| Library / Tipiṭaka / ཏིཔིཊཀ • Tipiṭaka / ཙཱུལ༹ཝགྒཔཱལི༹ • Cūḷavaggapāḷi |
པཀྑཔྤཊིཙྪནྣཔརིཝཱསོ
Pakkhappaṭicchannaparivāso
༡༢༡. ཏེན ཁོ པན སམཡེན ཨཱཡསྨཱ ཨུདཱཡཱི ཨེཀཾ ཨཱཔཏྟིཾ ཨཱཔནྣོ ཧོཏི སཉྩེཏནིཀཾ སུཀྐཝིསྶཊྛིཾ པཀྑཔྤཊིཙྪནྣཾ། སོ བྷིཀྑཱུནཾ ཨཱརོཙེསི – ‘‘ཨཧཾ, ཨཱཝུསོ, ཨེཀཾ ཨཱཔཏྟིཾ ཨཱཔཛྫིཾ སཉྩེཏནིཀཾ སུཀྐཝིསྶཊྛིཾ པཀྑཔྤཊིཙྪནྣཾ། ཀཐཾ ནུ ཁོ མཡཱ པཊིཔཛྫིཏབྦ’’ནྟི? བྷགཝཏོ ཨེཏམཏྠཾ ཨཱརོཙེསུཾ། ‘‘ཏེན ཧི, བྷིཀྑཝེ, སངྒྷོ ཨུདཱཡིསྶ བྷིཀྑུནོ ཨེཀིསྶཱ ཨཱཔཏྟིཡཱ སཉྩེཏནིཀཱཡ སུཀྐཝིསྶཊྛིཡཱ པཀྑཔྤཊིཙྪནྣཱཡ པཀྑཔརིཝཱསཾ དེཏུ། ཨེཝཉྩ པན, བྷིཀྑཝེ, དཱཏབྦོ –
121. Tena kho pana samayena āyasmā udāyī ekaṃ āpattiṃ āpanno hoti sañcetanikaṃ sukkavissaṭṭhiṃ pakkhappaṭicchannaṃ. So bhikkhūnaṃ ārocesi – ‘‘ahaṃ, āvuso, ekaṃ āpattiṃ āpajjiṃ sañcetanikaṃ sukkavissaṭṭhiṃ pakkhappaṭicchannaṃ. Kathaṃ nu kho mayā paṭipajjitabba’’nti? Bhagavato etamatthaṃ ārocesuṃ. ‘‘Tena hi, bhikkhave, saṅgho udāyissa bhikkhuno ekissā āpattiyā sañcetanikāya sukkavissaṭṭhiyā pakkhappaṭicchannāya pakkhaparivāsaṃ detu. Evañca pana, bhikkhave, dātabbo –
‘‘ཏེན, བྷིཀྑཝེ, ཨུདཱཡིནཱ བྷིཀྑུནཱ སངྒྷཾ ཨུཔསངྐམིཏྭཱ…པེ॰… ཨེཝམསྶ ཝཙནཱིཡོ – ‘ཨཧཾ, བྷནྟེ, ཨེཀཾ ཨཱཔཏྟིཾ ཨཱཔཛྫིཾ སཉྩེཏནིཀཾ སུཀྐཝིསྶཊྛིཾ པཀྑཔྤཊིཙྪནྣཾ། སོཧཾ, བྷནྟེ, སངྒྷཾ ཨེཀིསྶཱ ཨཱཔཏྟིཡཱ སཉྩེཏནིཀཱཡ སུཀྐཝིསྶཊྛིཡཱ པཀྑཔྤཊིཙྪནྣཱཡ པཀྑཔརིཝཱསཾ ཡཱཙཱམཱི’ཏི། དུཏིཡམྤི ཡཱཙིཏབྦོ། ཏཏིཡམྤི ཡཱཙིཏབྦོ། བྱཏྟེན བྷིཀྑུནོ པཊིབལེན སངྒྷོ ཉཱཔེཏབྦོ –
‘‘Tena, bhikkhave, udāyinā bhikkhunā saṅghaṃ upasaṅkamitvā…pe… evamassa vacanīyo – ‘ahaṃ, bhante, ekaṃ āpattiṃ āpajjiṃ sañcetanikaṃ sukkavissaṭṭhiṃ pakkhappaṭicchannaṃ. Sohaṃ, bhante, saṅghaṃ ekissā āpattiyā sañcetanikāya sukkavissaṭṭhiyā pakkhappaṭicchannāya pakkhaparivāsaṃ yācāmī’ti. Dutiyampi yācitabbo. Tatiyampi yācitabbo. Byattena bhikkhuno paṭibalena saṅgho ñāpetabbo –
༡༢༢. ‘‘སུཎཱཏུ མེ, བྷནྟེ, སངྒྷོ། ཨཡཾ ཨུདཱཡཱི བྷིཀྑུ ཨེཀཾ ཨཱཔཏྟིཾ ཨཱཔཛྫི སཉྩེཏནིཀཾ སུཀྐཝིསྶཊྛིཾ པཀྑཔྤཊིཙྪནྣཾ། སོ སངྒྷཾ ཨེཀིསྶཱ ཨཱཔཏྟིཡཱ སཉྩེཏནིཀཱཡ སུཀྐཝིསྶཊྛིཡཱ པཀྑཔྤཊིཙྪནྣཱཡ པཀྑཔརིཝཱསཾ ཡཱཙཏི། ཡདི སངྒྷསྶ པཏྟཀལླཾ, སངྒྷོ ཨུདཱཡིསྶ བྷིཀྑུནོ ཨེཀིསྶཱ ཨཱཔཏྟིཡཱ སཉྩེཏནིཀཱཡ སུཀྐཝིསྶཊྛིཡཱ པཀྑཔྤཊིཙྪནྣཱཡ པཀྑཔརིཝཱསཾ དདེཡྻ། ཨེསཱ ཉཏྟི།
122. ‘‘Suṇātu me, bhante, saṅgho. Ayaṃ udāyī bhikkhu ekaṃ āpattiṃ āpajji sañcetanikaṃ sukkavissaṭṭhiṃ pakkhappaṭicchannaṃ. So saṅghaṃ ekissā āpattiyā sañcetanikāya sukkavissaṭṭhiyā pakkhappaṭicchannāya pakkhaparivāsaṃ yācati. Yadi saṅghassa pattakallaṃ, saṅgho udāyissa bhikkhuno ekissā āpattiyā sañcetanikāya sukkavissaṭṭhiyā pakkhappaṭicchannāya pakkhaparivāsaṃ dadeyya. Esā ñatti.
‘‘སུཎཱཏུ མེ, བྷནྟེ, སངྒྷོ། ཨཡཾ ཨུདཱཡཱི བྷིཀྑུ ཨེཀཾ ཨཱཔཏྟིཾ ཨཱཔཛྫི སཉྩེཏནིཀཾ སུཀྐཝིསྶཊྛིཾ པཀྑཔྤཊིཙྪནྣཾ། སོ སངྒྷཾ ཨེཀིསྶཱ ཨཱཔཏྟིཡཱ སཉྩེཏནིཀཱཡ སུཀྐཝིསྶཊྛིཡཱ པཀྑཔྤཊིཙྪནྣཱཡ པཀྑཔརིཝཱསཾ ཡཱཙཏི། སངྒྷོ ཨུདཱཡིསྶ བྷིཀྑུནོ ཨེཀིསྶཱ ཨཱཔཏྟིཡཱ སཉྩེཏནིཀཱཡ སུཀྐཝིསྶཊྛིཡཱ པཀྑཔྤཊིཙྪནྣཱཡ པཀྑཔརིཝཱསཾ དེཏི། ཡསྶཱཡསྨཏོ ཁམཏི ཨུདཱཡིསྶ བྷིཀྑུནོ ཨེཀིསྶཱ ཨཱཔཏྟིཡཱ སཉྩེཏནིཀཱཡ སུཀྐཝིསྶཊྛིཡཱ པཀྑཔྤཊིཙྪནྣཱཡ པཀྑཔརིཝཱསསྶ དཱནཾ, སོ ཏུཎྷསྶ; ཡསྶ ནཀྑམཏི, སོ བྷཱསེཡྻ།
‘‘Suṇātu me, bhante, saṅgho. Ayaṃ udāyī bhikkhu ekaṃ āpattiṃ āpajji sañcetanikaṃ sukkavissaṭṭhiṃ pakkhappaṭicchannaṃ. So saṅghaṃ ekissā āpattiyā sañcetanikāya sukkavissaṭṭhiyā pakkhappaṭicchannāya pakkhaparivāsaṃ yācati. Saṅgho udāyissa bhikkhuno ekissā āpattiyā sañcetanikāya sukkavissaṭṭhiyā pakkhappaṭicchannāya pakkhaparivāsaṃ deti. Yassāyasmato khamati udāyissa bhikkhuno ekissā āpattiyā sañcetanikāya sukkavissaṭṭhiyā pakkhappaṭicchannāya pakkhaparivāsassa dānaṃ, so tuṇhassa; yassa nakkhamati, so bhāseyya.
‘‘དུཏིཡམྤི ཨེཏམཏྠཾ ཝདཱམི…པེ॰… ཏཏིཡམྤི ཨེཏམཏྠཾ ཝདཱམི…པེ॰…།
‘‘Dutiyampi etamatthaṃ vadāmi…pe… tatiyampi etamatthaṃ vadāmi…pe….
‘‘དིནྣོ སངྒྷེན ཨུདཱཡིསྶ བྷིཀྑུནོ ཨེཀིསྶཱ ཨཱཔཏྟིཡཱ སཉྩེཏནིཀཱཡ སུཀྐཝིསྶཊྛིཡཱ པཀྑཔྤཊིཙྪནྣཱཡ པཀྑཔརིཝཱསོ། ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱི’’ཏི།
‘‘Dinno saṅghena udāyissa bhikkhuno ekissā āpattiyā sañcetanikāya sukkavissaṭṭhiyā pakkhappaṭicchannāya pakkhaparivāso. Khamati saṅghassa, tasmā tuṇhī, evametaṃ dhārayāmī’’ti.
