| Library / Tipiṭaka / д̇ибидага • Tipiṭaka / винаяавинижчаяа-уд̇д̇аравинижчаяа • Vinayavinicchaya-uttaravinicchaya |
багин̣н̣агавинижчаяагат̇аа
Pakiṇṇakavinicchayakathā
3029.
3029.
чад̇д̇ам̣ бан̣н̣амаяам̣ гин̃жи, б̣ахи анд̇о жа саб̣б̣асо;
Chattaṃ paṇṇamayaṃ kiñci, bahi anto ca sabbaso;
бан̃жаван̣н̣зна суд̇д̇зна, сиб̣б̣ид̇ум̣ на жа ваддад̇и.
Pañcavaṇṇena suttena, sibbituṃ na ca vaṭṭati.
3030.
3030.
чинд̣̇ид̇ум̣ ад̣дхажанд̣̇ам̣ ваа, бан̣н̣з магарад̣̇анд̇агам̣;
Chindituṃ aḍḍhacandaṃ vā, paṇṇe makaradantakaṃ;
гхадагам̣ ваал̣аруубам̣ ваа, лзкаа д̣̇ан̣д̣з на ваддад̇и.
Ghaṭakaṃ vāḷarūpaṃ vā, lekhā daṇḍe na vaṭṭati.
3031.
3031.
сиб̣б̣ид̇ум̣ згаван̣н̣зна, чад̇д̇ам̣ суд̇д̇зна ваддад̇и;
Sibbituṃ ekavaṇṇena, chattaṃ suttena vaṭṭati;
т̇ирад̇т̇ам̣, бан̃жаван̣н̣аанам̣, бан̃ж̇арам̣ ваа винанд̇хид̇ум̣.
Thiratthaṃ, pañcavaṇṇānaṃ, pañjaraṃ vā vinandhituṃ.
3032.
3032.
гхадагам̣ ваал̣аруубам̣ ваа, лзкаа ваа бана гзвалаа;
Ghaṭakaṃ vāḷarūpaṃ vā, lekhā vā pana kevalā;
бхинд̣̇ид̇ваа вааби гхам̣сид̇ваа, д̇хаарзд̇ум̣ бана ваддад̇и.
Bhinditvā vāpi ghaṃsitvā, dhāretuṃ pana vaṭṭati.
3033.
3033.
ахичад̇д̇агасан̣таанам̣, д̣̇ан̣д̣аб̣унд̣̇амхи ваддад̇и;
Ahichattakasaṇṭhānaṃ, daṇḍabundamhi vaṭṭati;
уггирид̇ваа гад̇аа лзкаа, б̣анд̇ханад̇т̇ааяа ваддад̇и.
Ukkiritvā katā lekhā, bandhanatthāya vaṭṭati.
3034.
3034.
наанааван̣н̣зхи суд̇д̇зхи, ман̣д̣анад̇т̇ааяа жийварам̣;
Nānāvaṇṇehi suttehi, maṇḍanatthāya cīvaraṃ;
самам̣ сад̇абад̣̇аад̣̇ийнам̣, сиб̣б̣ид̇ум̣ на жа ваддад̇и.
Samaṃ satapadādīnaṃ, sibbituṃ na ca vaṭṭati.
3035.
3035.
бад̇д̇асса барияанд̇з ваа, д̇ат̇аа бад̇д̇амукзби ваа;
Pattassa pariyante vā, tathā pattamukhepi vā;
взн̣им̣ сан̇калигам̣ вааби, гарод̇о ход̇и д̣̇уггадам̣.
Veṇiṃ saṅkhalikaṃ vāpi, karoto hoti dukkaṭaṃ.
3036.
3036.
баддамби г̇ан̣тибаасаанам̣, адтагон̣аад̣̇игам̣вид̇хим̣;
Paṭṭampi gaṇṭhipāsānaṃ, aṭṭhakoṇādikaṃvidhiṃ;
д̇ад̇т̇аг̇гхияаг̇ад̣̇ааруубам̣, муг̇г̇араад̣̇им̣ гаронд̇и жа.
Tatthagghiyagadārūpaṃ, muggarādiṃ karonti ca.
3037.
3037.
д̇ад̇т̇а гаггадагагкийни, удтаабзнд̇и на ваддад̇и;
Tattha kakkaṭakakkhīni, uṭṭhāpenti na vaṭṭati;
суд̇д̇аа жа бил̣агаа д̇ад̇т̇а, д̣̇увин̃н̃зяяаава д̣̇ийбид̇аа.
Suttā ca piḷakā tattha, duviññeyyāva dīpitā.
3038.
3038.
жад̇угон̣аава вадданд̇и, г̇ан̣тибаасагабаддагаа;
Catukoṇāva vaṭṭanti, gaṇṭhipāsakapaṭṭakā;
ган̣н̣агон̣зсу суд̇д̇аани, рад̇д̇з чинд̣̇зяяа жийварз.
Kaṇṇakoṇesu suttāni, ratte chindeyya cīvare.
3039.
3039.
суужигаммавигаарам̣ ваа, ан̃н̃ам̣ ваа бана гин̃жиби;
Sūcikammavikāraṃ vā, aññaṃ vā pana kiñcipi;
жийварз бхигкунаа гаад̇ум̣, гаараабзд̇ум̣ на ваддад̇и.
Cīvare bhikkhunā kātuṃ, kārāpetuṃ na vaṭṭati.
3040.
3040.
яо жа багкибад̇и бхигку жийварам̣;
Yo ca pakkhipati bhikkhu cīvaraṃ;
ган̃ж̇ибидтакалиаллигаад̣̇ису;
Kañjipiṭṭhakhaliallikādisu;
ван̣н̣амадтамабхибад̇т̇аяам̣ барам̣;
Vaṇṇamaṭṭhamabhipatthayaṃ paraṃ;
д̇асса над̇т̇и бана муд̇д̇и д̣̇уггадаа.
Tassa natthi pana mutti dukkaṭā.
3041.
3041.
суужихад̇т̇амалаад̣̇ийнам̣ , гаран̣з жийварасса жа;
Sūcihatthamalādīnaṃ , karaṇe cīvarassa ca;
д̇ат̇аа гилидтагаалз жа, д̇хованад̇т̇ам̣ д̇у ваддад̇и.
Tathā kiliṭṭhakāle ca, dhovanatthaṃ tu vaṭṭati.
3042.
3042.
раж̇анз бана г̇анд̇хам̣ ваа, д̇злам̣ ваа лаакамзва ваа;
Rajane pana gandhaṃ vā, telaṃ vā lākhameva vā;
гин̃жи багкибид̇ум̣ д̇ад̇т̇а, бхигкуно на жа ваддад̇и.
Kiñci pakkhipituṃ tattha, bhikkhuno na ca vaṭṭati.
3043.
3043.
сан̇кзна ман̣инаа вааби, ан̃н̃знаби жа гзнажи;
Saṅkhena maṇinā vāpi, aññenapi ca kenaci;
жийварам̣ на жа гхаддзяяа, гхам̣сид̇аб̣б̣ам̣ на д̣̇он̣ияаа.
Cīvaraṃ na ca ghaṭṭeyya, ghaṃsitabbaṃ na doṇiyā.
3044.
3044.
жийварам̣ д̣̇он̣ияам̣ гад̇ваа, нааби гхаддзяяа мудтинаа;
Cīvaraṃ doṇiyaṃ katvā, nāpi ghaṭṭeyya muṭṭhinā;
рад̇д̇ам̣ бахарид̇ум̣ гин̃жи, хад̇т̇зхзва жа ваддад̇и.
Rattaṃ paharituṃ kiñci, hattheheva ca vaṭṭati.
3045.
3045.
г̇ан̣тигз бана лзкаа ваа, бил̣агаа ваа на ваддад̇и;
Gaṇṭhike pana lekhā vā, piḷakā vā na vaṭṭati;
габбаб̣инд̣̇увигааро ваа, баал̣иган̣н̣игабхзд̣̇ад̇о.
Kappabinduvikāro vā, pāḷikaṇṇikabhedato.
3046.
3046.
т̇аалагасса жа бад̇д̇асса, б̣ахи анд̇оби ваа бана;
Thālakassa ca pattassa, bahi antopi vā pana;
аараг̇г̇зна гад̇аа лзкаа, на жа ваддад̇и гаажиби.
Āraggena katā lekhā, na ca vaṭṭati kācipi.
3047.
3047.
ааробзд̇ваа бхамам̣ бад̇д̇ам̣, маж̇ж̇ид̇ваа жз бажанд̇и жа;
Āropetvā bhamaṃ pattaṃ, majjitvā ce pacanti ca;
‘‘ман̣иван̣н̣ам̣ гариссаама’’, ид̇и гаад̇ум̣ на ваддад̇и.
‘‘Maṇivaṇṇaṃ karissāma’’, iti kātuṃ na vaṭṭati.
3048.
3048.
бад̇д̇аман̣д̣алагз гин̃жи, бхид̇д̇игаммам̣ на ваддад̇и;
Pattamaṇḍalake kiñci, bhittikammaṃ na vaṭṭati;
на д̣̇осо гожи д̇ад̇т̇асса, гаад̇ум̣ магарад̣̇анд̇агам̣.
Na doso koci tatthassa, kātuṃ makaradantakaṃ.
3049.
3049.
на д̇хаммагаран̣ажчад̇д̇з, лзкаа гаажиби ваддад̇и;
Na dhammakaraṇacchatte, lekhā kācipi vaṭṭati;
гужчияам̣ ваа табзд̇ваа д̇ам̣, лзкам̣ д̇у мукаваддияам̣.
Kucchiyaṃ vā ṭhapetvā taṃ, lekhaṃ tu mukhavaṭṭiyaṃ.
3050.
3050.
суд̇д̇ам̣ ваа д̣̇иг̇ун̣ам̣ гад̇ваа, годдзнд̇и жа д̇ахим̣ д̇ахим̣;
Suttaṃ vā diguṇaṃ katvā, koṭṭenti ca tahiṃ tahiṃ;
гааяаб̣анд̇ханасобхад̇т̇ам̣, д̇ам̣ на ваддад̇и бхигкуно.
Kāyabandhanasobhatthaṃ, taṃ na vaṭṭati bhikkhuno.
3051.
3051.
д̣̇асаамукз д̣̇ал̣хад̇т̇ааяа, д̣̇вийсу анд̇зсу ваддад̇и;
Dasāmukhe daḷhatthāya, dvīsu antesu vaṭṭati;
маалаагаммалад̇аагамма-жид̇д̇игамби на ваддад̇и.
Mālākammalatākamma-cittikampi na vaṭṭati.
3052.
3052.
агкийни д̇ад̇т̇а д̣̇ассзд̇ваа, годдид̇з бана гаа гат̇аа;
Akkhīni tattha dassetvā, koṭṭite pana kā kathā;
гаггадагкийни ваа д̇ад̇т̇а, удтаабзд̇ум̣ на ваддад̇и.
Kakkaṭakkhīni vā tattha, uṭṭhāpetuṃ na vaṭṭati.
3053.
3053.
гхадам̣ д̣̇зд̣д̣убхасийсам̣ ваа, магарасса мукамби ваа;
Ghaṭaṃ deḍḍubhasīsaṃ vā, makarassa mukhampi vā;
вигаараруубам̣ яам̣ гин̃жи, на ваддад̇и д̣̇асаамукз.
Vikārarūpaṃ yaṃ kiñci, na vaṭṭati dasāmukhe.
3054.
3054.
уж̇угам̣ мажчаган̣дам̣ ваа, мадтам̣ ваа бана баддигам̣;
Ujukaṃ macchakaṇṭaṃ vā, maṭṭhaṃ vā pana paṭṭikaṃ;
каж̇ж̇уурибад̇д̇агаагаарам̣, гад̇ваа ваддад̇и годдид̇ам̣.
Khajjūripattakākāraṃ, katvā vaṭṭati koṭṭitaṃ.
3055.
3055.
баддигаа суугаранд̇анд̇и, д̣̇увид̇хам̣ гааяаб̣анд̇ханам̣;
Paṭṭikā sūkarantanti, duvidhaṃ kāyabandhanaṃ;
раж̇ж̇угаа д̣̇уссабаддаад̣̇и, саб̣б̣ам̣ д̇ассаануломигам̣.
Rajjukā dussapaṭṭādi, sabbaṃ tassānulomikaṃ.
3056.
3056.
мураж̇ам̣ мад̣̇д̣̇авийн̣ан̃жа, д̣̇зд̣д̣убхан̃жа галааб̣угам̣;
Murajaṃ maddavīṇañca, deḍḍubhañca kalābukaṃ;
раж̇ж̇уяо на жа вадданд̇и, буримаа д̣̇взд̣̇асаа сияум̣.
Rajjuyo na ca vaṭṭanti, purimā dvedasā siyuṃ.
3057.
3057.
д̣̇асаа бааман̇г̇асан̣таанаа, нид̣̇д̣̇идтаа гааяаб̣анд̇ханз;
Dasā pāmaṅgasaṇṭhānā, niddiṭṭhā kāyabandhane;
згаа д̣̇вид̇ижад̇ассо ваа, вадданд̇и на д̇ад̇о барам̣.
Ekā dviticatasso vā, vaṭṭanti na tato paraṃ.
3058.
3058.
згараж̇ж̇умаяам̣ вуд̇д̇ам̣, мунинаа гааяаб̣анд̇ханам̣;
Ekarajjumayaṃ vuttaṃ, muninā kāyabandhanaṃ;
д̇ан̃жа бааман̇г̇асан̣таанам̣, згамби жа на ваддад̇и.
Tañca pāmaṅgasaṇṭhānaṃ, ekampi ca na vaṭṭati.
3059.
3059.
раж̇ж̇угз згад̇о гад̇ваа, б̣ахуу згааяа раж̇ж̇уяаа;
Rajjuke ekato katvā, bahū ekāya rajjuyā;
ниранд̇аран̃хи взтзд̇ваа, гад̇ам̣ ваддад̇и б̣анд̇хид̇ум̣.
Nirantarañhi veṭhetvā, kataṃ vaṭṭati bandhituṃ.
3060.
3060.
д̣̇анд̇агадтависаан̣адти-лохавзл̣унал̣аб̣бхаваа;
Dantakaṭṭhavisāṇaṭṭhi-lohaveḷunaḷabbhavā;
ж̇ад̇усан̇камаяаасуд̇д̇а-палаж̇аа вид̇хагаа мад̇аа.
Jatusaṅkhamayāsutta-phalajā vidhakā matā.
3061.
3061.
гааяаб̣анд̇ханавид̇хзби, вигааро на жа ваддад̇и;
Kāyabandhanavidhepi, vikāro na ca vaṭṭati;
д̇ад̇т̇а д̇ад̇т̇а барижчзд̣̇а-лзкаамад̇д̇ам̣ д̇у ваддад̇и.
Tattha tattha pariccheda-lekhāmattaṃ tu vaṭṭati.
3062.
3062.
маалаагаммалад̇аагамма-наанааруубавижид̇д̇ид̇аа ;
Mālākammalatākamma-nānārūpavicittitā ;
на жа ваддад̇и бхигкуунам̣, ан̃ж̇аний ж̇анаран̃ж̇аний.
Na ca vaṭṭati bhikkhūnaṃ, añjanī janarañjanī.
3063.
3063.
д̇аад̣̇исам̣ бана гхам̣сид̇ваа, взтзд̇ваа суд̇д̇агзна ваа;
Tādisaṃ pana ghaṃsitvā, veṭhetvā suttakena vā;
вал̣ан̃ж̇анд̇асса бхигкусса, на д̣̇осо гожи виж̇ж̇ад̇и.
Vaḷañjantassa bhikkhussa, na doso koci vijjati.
3064.
3064.
ваддаа ваа жад̇урассаа ваа, адтам̣саа вааби ан̃ж̇аний;
Vaṭṭā vā caturassā vā, aṭṭhaṃsā vāpi añjanī;
ваддад̇зваад̇и нид̣̇д̣̇идтаа, ван̣н̣амадтаа на ваддад̇и.
Vaṭṭatevāti niddiṭṭhā, vaṇṇamaṭṭhā na vaṭṭati.
3065.
3065.
д̇ат̇аан̃ж̇анисалаагааби , ан̃ж̇анит̇авигааяа жа;
Tathāñjanisalākāpi , añjanithavikāya ca;
наанааван̣н̣зхи суд̇д̇зхи, жид̇д̇агаммам̣ на ваддад̇и.
Nānāvaṇṇehi suttehi, cittakammaṃ na vaṭṭati.
3066.
3066.
згаван̣н̣зна суд̇д̇зна, сибаадим̣ язна гзнажи;
Ekavaṇṇena suttena, sipāṭiṃ yena kenaci;
яам̣ гин̃жи бана сиб̣б̣зд̇ваа, вал̣ан̃ж̇анд̇асса ваддад̇и.
Yaṃ kiñci pana sibbetvā, vaḷañjantassa vaṭṭati.
3067.
3067.
ман̣игам̣ бил̣агам̣ вааби, бибпалз аараган̣дагз;
Maṇikaṃ piḷakaṃ vāpi, pipphale ārakaṇṭake;
табзд̇ум̣ бана яам̣ гин̃жи, на жа ваддад̇и бхигкуно.
Ṭhapetuṃ pana yaṃ kiñci, na ca vaṭṭati bhikkhuno.
3068.
3068.
д̣̇ан̣д̣агзби барижчзд̣̇а-лзкаамад̇д̇ам̣ д̇у ваддад̇и;
Daṇḍakepi pariccheda-lekhāmattaṃ tu vaṭṭati;
валид̇ваа жа накажчзд̣̇ам̣, гаронд̇ийд̇и хи ваддад̇и.
Valitvā ca nakhacchedaṃ, karontīti hi vaṭṭati.
3069.
3069.
уд̇д̇арааран̣ияам̣ вааби, д̇ханугз бзллад̣̇ан̣д̣агз;
Uttarāraṇiyaṃ vāpi, dhanuke pelladaṇḍake;
маалаагаммаад̣̇и яам̣ гин̃жи, ван̣н̣амадтам̣ на ваддад̇и.
Mālākammādi yaṃ kiñci, vaṇṇamaṭṭhaṃ na vaṭṭati.
3070.
3070.
сан̣д̣аасз д̣̇анд̇агадтаанам̣, д̇ат̇аа чзд̣̇анаваасияаа;
Saṇḍāse dantakaṭṭhānaṃ, tathā chedanavāsiyā;
д̣̇вийсу бассзсу лохзна, б̣анд̇хид̇ум̣ бана ваддад̇и.
Dvīsu passesu lohena, bandhituṃ pana vaṭṭati.
3071.
3071.
д̇ат̇аа гад̇д̇арад̣̇ан̣д̣зби, жид̇д̇агаммам̣ на ваддад̇и;
Tathā kattaradaṇḍepi, cittakammaṃ na vaṭṭati;
ваддалзкаава вадданд̇и, згаа ваа д̣̇взби хздтад̇о.
Vaṭṭalekhāva vaṭṭanti, ekā vā dvepi heṭṭhato.
3072.
3072.
висаан̣з наал̣ияам̣ вааби, д̇ат̇звааман̣д̣асаарагз;
Visāṇe nāḷiyaṃ vāpi, tathevāmaṇḍasārake;
д̇злабхааж̇анагз саб̣б̣ам̣, ван̣н̣амадтам̣ д̇у ваддад̇и.
Telabhājanake sabbaṃ, vaṇṇamaṭṭhaṃ tu vaṭṭati.
3073.
3073.
баанийяасса ул̣ун̇гзби, д̣̇он̣ияам̣ раж̇анассаби;
Pānīyassa uḷuṅkepi, doṇiyaṃ rajanassapi;
гхадз палагабийтзби, валаяаад̇хаарагаад̣̇игз.
Ghaṭe phalakapīṭhepi, valayādhārakādike.
3074.
3074.
д̇ат̇аа бад̇д̇абид̇хаанз жа, д̇аалаван̣дз жа б̣ийж̇анз;
Tathā pattapidhāne ca, tālavaṇṭe ca bījane;
баад̣̇абун̃чанияам̣ вааби, саммун̃ж̇анияамзва жа.
Pādapuñchaniyaṃ vāpi, sammuñjaniyameva ca.
3075.
3075.
ман̃жз бхуумад̇т̇арз бийтз, бхисиб̣имб̣оханзсу жа;
Mañce bhūmatthare pīṭhe, bhisibimbohanesu ca;
маалаагаммаад̣̇игам̣ жид̇д̇ам̣, саб̣б̣амзва жа ваддад̇и.
Mālākammādikaṃ cittaṃ, sabbameva ca vaṭṭati.
3076.
3076.
наанааман̣имаяад̇т̇амбха-гаваадад̣̇ваарабхид̇д̇игам̣ ;
Nānāmaṇimayatthambha-kavāṭadvārabhittikaṃ ;
сзнаасанаманун̃н̃аад̇ам̣, гаа гат̇аа ван̣н̣амадтагз.
Senāsanamanuññātaṃ, kā kathā vaṇṇamaṭṭhake.
3077.
3077.
сован̣н̣ияам̣ д̣̇ваарагаваадаб̣ад̣̇д̇хам̣;
Sovaṇṇiyaṃ dvārakavāṭabaddhaṃ;
суван̣н̣анаанааман̣ибхид̇д̇ибхуумим̣;
Suvaṇṇanānāmaṇibhittibhūmiṃ;
на гин̃жи згамби нисзд̇ханийяам̣;
Na kiñci ekampi nisedhanīyaṃ;
сзнаасанам̣ ваддад̇и саб̣б̣амзва.
Senāsanaṃ vaṭṭati sabbameva.
3078.
3078.
б̣уд̣̇д̇хам̣ д̇хамман̃жа сан̇гхан̃жа, на уд̣̇д̣̇исса д̣̇авам̣ гарз;
Buddhaṃ dhammañca saṅghañca, na uddissa davaṃ kare;
мууг̇аб̣б̣ад̇аад̣̇игам̣ нзва, г̇ан̣хзяяа д̇ид̇т̇ияаб̣б̣ад̇ам̣.
Mūgabbatādikaṃ neva, gaṇheyya titthiyabbataṃ.
3079.
3079.
гааяам̣ ваа ан̇г̇аж̇аад̇ам̣ ваа, уурум̣ ваа на д̇у д̣̇ассаяз;
Kāyaṃ vā aṅgajātaṃ vā, ūruṃ vā na tu dassaye;
бхигкунийнам̣ д̇у д̇аа вааби, на син̃жз уд̣̇агаад̣̇инаа.
Bhikkhunīnaṃ tu tā vāpi, na siñce udakādinā.
3080.
3080.
вассаман̃н̃ад̇т̇а вудто жз, бхааг̇аман̃н̃ад̇т̇а г̇ан̣хад̇и;
Vassamaññattha vuṭṭho ce, bhāgamaññattha gaṇhati;
д̣̇уггадам̣ буна д̣̇аад̇аб̣б̣ам̣, г̇ийваа надтзби ж̇аж̇ж̇арз.
Dukkaṭaṃ puna dātabbaṃ, gīvā naṭṭhepi jajjare.
3081.
3081.
жод̣̇ид̇о со сажз д̇зхи, бхигкуухи на д̣̇ад̣̇зяяад̇ам̣;
Codito so sace tehi, bhikkhūhi na dadeyyataṃ;
д̇хуранигкзбанз д̇зсам̣, бхан̣д̣аг̇гхзнзва гаараяз.
Dhuranikkhepane tesaṃ, bhaṇḍaggheneva kāraye.
3082.
3082.
агаббияасамаад̣̇аанам̣, гарод̇о ход̇и д̣̇уггадам̣;
Akappiyasamādānaṃ, karoto hoti dukkaṭaṃ;
д̣̇аваа силам̣ бавиж̇жханд̇о, д̣̇уггадаа на жа мужжад̇и.
Davā silaṃ pavijjhanto, dukkaṭā na ca muccati.
3083.
3083.
г̇ихийг̇обагад̣̇аанасмим̣, на д̣̇осо гожи г̇ан̣хад̇о;
Gihīgopakadānasmiṃ, na doso koci gaṇhato;
барижчзд̣̇анаяо вуд̇д̇о, сан̇гхажзд̇ияасанд̇агз.
Paricchedanayo vutto, saṅghacetiyasantake.
3084.
3084.
яаанам̣ бурисасам̣яуд̇д̇ам̣, хад̇т̇аваддагамзва ваа;
Yānaṃ purisasaṃyuttaṃ, hatthavaṭṭakameva vā;
баадан̇гин̃жа г̇илаанасса, ваддад̇зваабхируухид̇ум̣.
Pāṭaṅkiñca gilānassa, vaṭṭatevābhirūhituṃ.
3085.
3085.
на жа бхигкунияаа сад̣̇д̇хим̣, самбаяож̇зяяа гин̃жиби;
Na ca bhikkhuniyā saddhiṃ, sampayojeyya kiñcipi;
д̣̇уггадам̣ бхигкуним̣ рааг̇аа, обхаасзнд̇асса бхигкуно.
Dukkaṭaṃ bhikkhuniṃ rāgā, obhāsentassa bhikkhuno.
3086.
3086.
бхигкунийнам̣ хавз бхигку, баад̇имогкам̣ на уд̣̇д̣̇исз;
Bhikkhunīnaṃ have bhikkhu, pātimokkhaṃ na uddise;
аабад̇д̇им̣ ваа сажз д̇аасам̣, бадиг̇г̇ан̣хзяяа д̣̇уггадам̣.
Āpattiṃ vā sace tāsaṃ, paṭiggaṇheyya dukkaṭaṃ.
3087.
3087.
ад̇д̇ано барибхог̇ад̇т̇ам̣, д̣̇иннаман̃н̃асса гассажи;
Attano paribhogatthaṃ, dinnamaññassa kassaci;
барибхог̇амагад̇ваава, д̣̇ад̣̇ад̇о бана д̣̇уггадам̣.
Paribhogamakatvāva, dadato pana dukkaṭaṃ.
3088.
3088.
асаббааяам̣ сажз саб̣б̣ам̣, абанзд̇умби ваддад̇и;
Asappāyaṃ sace sabbaṃ, apanetumpi vaṭṭati;
аг̇г̇ам̣ г̇ахзд̇ваа д̣̇аад̇ум̣ ваа, бад̇д̇аад̣̇ийсубяаяам̣ наяо.
Aggaṃ gahetvā dātuṃ vā, pattādīsupyayaṃ nayo.
3089.
3089.
бан̃жаваг̇г̇уубасамбад̣̇аа , г̇ун̣ан̇г̇ун̣аубааханаа;
Pañcavaggūpasampadā , guṇaṅguṇaupāhanā;
жаммад̇т̇ааро д̇хуванхаанам̣, маж̇жхад̣̇зсз на ваддад̇и.
Cammatthāro dhuvanhānaṃ, majjhadese na vaṭṭati.
3090.
3090.
самб̣аад̇хасса жа сааманд̇аа, сад̇т̇агаммам̣ д̣̇уван̇г̇улаа;
Sambādhassa ca sāmantā, satthakammaṃ duvaṅgulā;
ваарид̇ам̣, вад̇т̇игаммамби, самб̣аад̇хзязва сад̇т̇унаа.
Vāritaṃ, vatthikammampi, sambādheyeva satthunā.
3091.
3091.
бан̣н̣аани аж̇ж̇угаад̣̇ийнам̣, лон̣ам̣ ваа ун̣хаяааг̇уяаа;
Paṇṇāni ajjukādīnaṃ, loṇaṃ vā uṇhayāguyā;
багкибид̇ваана баагад̇т̇ам̣, жаалзд̇ум̣ на жа ваддад̇и.
Pakkhipitvāna pākatthaṃ, cāletuṃ na ca vaṭṭati.
3092.
3092.
сажз барисаман̃н̃асса, убал̣аалзд̇и д̣̇уггадам̣;
Sace parisamaññassa, upaḷāleti dukkaṭaṃ;
д̇ад̇т̇а жаад̣̇ийнавам̣ д̇асса, вад̇д̇ум̣ бана жа ваддад̇и.
Tattha cādīnavaṃ tassa, vattuṃ pana ca vaṭṭati.
3093.
3093.
‘‘магканам̣ г̇уут̇амуд̇д̇зхи, г̇ад̇зна нхааяид̇ум̣ вияа;
‘‘Makkhanaṃ gūthamuttehi, gatena nhāyituṃ viya;
гад̇ам̣ ниссааяа д̣̇уссийлам̣, д̇аяаа вихарад̇аа’’д̇и жа.
Kataṃ nissāya dussīlaṃ, tayā viharatā’’ti ca.
3094.
3094.
бхад̇д̇аг̇г̇з яааг̇убаанз жа, анд̇ог̇аамз жа вийт̇ияам̣;
Bhattagge yāgupāne ca, antogāme ca vīthiyaṃ;
анд̇хагаарз анааваж̇ж̇о, згаавад̇д̇о жа б̣яаавадо.
Andhakāre anāvajjo, ekāvatto ca byāvaṭo.
3095.
3095.
суд̇д̇о каад̣̇ан̃жа бхун̃ж̇анд̇о, важжам̣ муд̇д̇амби ваа гарам̣;
Sutto khādañca bhuñjanto, vaccaṃ muttampi vā karaṃ;
ванд̣̇анаа д̇зрасаннам̣ д̇у, аяуд̇д̇ад̇т̇зна ваарид̇аа.
Vandanā terasannaṃ tu, ayuttatthena vāritā.
3096.
3096.
наг̇г̇о анубасамбанно, наанаасам̣ваасагоби жа;
Naggo anupasampanno, nānāsaṃvāsakopi ca;
яо бажчаа убасамбанно, угкид̇д̇о маад̇уг̇аамаго.
Yo pacchā upasampanno, ukkhitto mātugāmako.
3097.
3097.
згаад̣̇аса абхаб̣б̣аа жа, г̇аругадтаа жа бан̃жимз;
Ekādasa abhabbā ca, garukaṭṭhā ca pañcime;
ванд̣̇ад̇о д̣̇уггадам̣ вуд̇д̇ам̣, б̣аавийсад̇и жа буг̇г̇алз.
Vandato dukkaṭaṃ vuttaṃ, bāvīsati ca puggale.
3098.
3098.
яо бурз убасамбанно, наанаасам̣ваасавуд̣дхаго;
Yo pure upasampanno, nānāsaṃvāsavuḍḍhako;
д̇хаммаваад̣̇ий жа самб̣уд̣̇д̇хо, ванд̣̇анийяаа д̇аяо имз.
Dhammavādī ca sambuddho, vandanīyā tayo ime.
3099.
3099.
д̇аж̇ж̇анаад̣̇игад̇з зд̇т̇а, жад̇уро бана буг̇г̇алз;
Tajjanādikate ettha, caturo pana puggale;
ванд̣̇ад̇оби анаабад̇д̇и, д̇зхи гамман̃жа губ̣б̣ад̇о.
Vandatopi anāpatti, tehi kammañca kubbato.
3100.
3100.
ад̇хидтаанам̣ банзгасса, д̣̇виннам̣ ваа д̇ин̣н̣амзва ваа;
Adhiṭṭhānaṃ panekassa, dvinnaṃ vā tiṇṇameva vā;
д̣̇идтаавигаммамуд̣̇д̣̇идтам̣, д̇ад̇о уд̣̇д̇хам̣ нивааран̣ам̣.
Diṭṭhāvikammamuddiṭṭhaṃ, tato uddhaṃ nivāraṇaṃ.
3101.
3101.
санд̣̇идто ход̇и самбхад̇д̇о, ж̇ийвад̇аалабид̇оби жа;
Sandiṭṭho hoti sambhatto, jīvatālapitopi ca;
г̇ахид̇ад̇д̇амано ход̇и, виссаасо бан̃жад̇хаа сияаа.
Gahitattamano hoti, vissāso pañcadhā siyā.
3102.
3102.
сийлад̣̇идтивибад̇д̇и жа, аажаарааж̇ийвасамбхаваа;
Sīladiṭṭhivipatti ca, ācārājīvasambhavā;
вибад̇д̇ияо жад̇ассова, вуд̇д̇аа аад̣̇ижжаб̣анд̇хунаа.
Vipattiyo catassova, vuttā ādiccabandhunā.
3103.
3103.
д̇ад̇т̇а аббадигаммаа жа, яаа жа вудтаанаг̇ааминий;
Tattha appaṭikammā ca, yā ca vuṭṭhānagāminī;
аабад̇д̇ияо д̣̇увз сийла-вибад̇д̇ийд̇и багаасид̇аа.
Āpattiyo duve sīla-vipattīti pakāsitā.
3104.
3104.
анд̇аг̇г̇аахигад̣̇идти жа, яаа д̣̇идти д̣̇асавад̇т̇угаа;
Antaggāhikadiṭṭhi ca, yā diṭṭhi dasavatthukā;
аяам̣ д̣̇идтивибад̇д̇ийд̇и, д̣̇увид̇хаа д̣̇идти д̣̇ийбид̇аа.
Ayaṃ diṭṭhivipattīti, duvidhā diṭṭhi dīpitā.
3105.
3105.
д̣̇зсанааг̇ааминигаа яаа жа, бан̃жа т̇уллажжаяаад̣̇игаа;
Desanāgāminikā yā ca, pañca thullaccayādikā;
вуд̇д̇аажааравибад̇д̇ийд̇и, аажаарагусалзна саа.
Vuttācāravipattīti, ācārakusalena sā.
3106.
3106.
гуханаад̣̇иббавад̇д̇о хи, мижчааж̇ийвод̇и д̣̇ийбид̇о;
Kuhanādippavatto hi, micchājīvoti dīpito;
ааж̇ийвабажжаяаабад̇д̇и, чаб̣б̣ид̇хаад̇и багаасид̇аа.
Ājīvapaccayāpatti, chabbidhāti pakāsitā.
3107.
3107.
гаммунаа лад̣̇д̇хисиймаахи, наанаасам̣ваасагаа д̇аяо;
Kammunā laddhisīmāhi, nānāsaṃvāsakā tayo;
угкид̇д̇о д̇ивид̇хо гамма-наанаасам̣ваасаго мад̇о.
Ukkhitto tividho kamma-nānāsaṃvāsako mato.
3108.
3108.
ад̇хаммаваад̣̇ибагкасмим̣, нисиннова вижинд̇ияам̣;
Adhammavādipakkhasmiṃ, nisinnova vicintiyaṃ;
‘‘д̇хаммаваад̣̇ий банзд̇з’’д̇и, уббаннз бана маанасз.
‘‘Dhammavādī panete’’ti, uppanne pana mānase.
3109.
3109.
наанаасам̣ваасаго наама, лад̣̇д̇хияааяам̣ багаасид̇о;
Nānāsaṃvāsako nāma, laddhiyāyaṃ pakāsito;
д̇ад̇радто бана со д̣̇виннам̣, гаммам̣ гобзд̇и сан̇гхигам̣.
Tatraṭṭho pana so dvinnaṃ, kammaṃ kopeti saṅghikaṃ.
3110.
3110.
б̣ахисиймааг̇ад̇о сиймаа-наанаасам̣ваасаго мад̇о;
Bahisīmāgato sīmā-nānāsaṃvāsako mato;
наанаасам̣ваасагаа звам̣, д̇аяо вуд̇д̇аа махзсинаа.
Nānāsaṃvāsakā evaṃ, tayo vuttā mahesinā.
3111.
3111.
жуд̇о анубасамбанно, наанаасам̣ваасагаа д̇аяо;
Cuto anupasampanno, nānāsaṃvāsakā tayo;
бхигкуунзгаад̣̇асаабхаб̣б̣аа, асам̣ваасаа имз сияум̣.
Bhikkhūnekādasābhabbā, asaṃvāsā ime siyuṃ.
3112.
3112.
асам̣ваасасса саб̣б̣асса, д̇ат̇аа гаммаарахасса жа;
Asaṃvāsassa sabbassa, tathā kammārahassa ca;
сан̇гхз уммад̇д̇агаад̣̇ийнам̣, бадигкзбо на руухад̇и.
Saṅghe ummattakādīnaṃ, paṭikkhepo na rūhati.
3113.
3113.
сасам̣ваасзгасиймадта-багад̇ад̇д̇асса бхигкуно;
Sasaṃvāsekasīmaṭṭha-pakatattassa bhikkhuno;
важанзна бадигкзбо, руухад̇аананд̇арассаби.
Vacanena paṭikkhepo, rūhatānantarassapi.
3114.
3114.
бхигку аабаж̇ж̇ад̇аабад̇д̇им̣, аагаарзхи банажчахи;
Bhikkhu āpajjatāpattiṃ, ākārehi panacchahi;
вуд̇д̇аа саман̣агаббаа жа, бан̃жа, бан̃жа висуд̣̇д̇хияо.
Vuttā samaṇakappā ca, pañca, pañca visuddhiyo.
3115.
3115.
нид̣̇аанам̣ буг̇г̇алам̣ вад̇т̇ум̣, вид̇хим̣ бан̃н̃ад̇д̇ияаа бана;
Nidānaṃ puggalaṃ vatthuṃ, vidhiṃ paññattiyā pana;
вибад̇д̇аабад̇д̇анаабад̇д̇и, самудтаананаяамби жа.
Vipattāpattanāpatti, samuṭṭhānanayampi ca.
3116.
3116.
важ̇ж̇агаммагрияаасан̃н̃аа, жид̇д̇аан̣ад̇д̇ивид̇хим̣ бана;
Vajjakammakriyāsaññā, cittāṇattividhiṃ pana;
д̇ат̇зван̇г̇авид̇хаанан̃жа, взд̣̇анаа гусалад̇д̇игам̣.
Tathevaṅgavidhānañca, vedanā kusalattikaṃ.
3117.
3117.
сад̇д̇арасавид̇хам̣ зд̇ам̣, д̣̇ассзд̇ваа лагкан̣ам̣ б̣уд̇хо;
Sattarasavidhaṃ etaṃ, dassetvā lakkhaṇaṃ budho;
сигкаабад̣̇зсу яож̇зяяа, д̇ад̇т̇а д̇ад̇т̇а яат̇аарахам̣.
Sikkhāpadesu yojeyya, tattha tattha yathārahaṃ.
3118.
3118.
нид̣̇аанам̣ д̇ад̇т̇а взсаалий, д̇ат̇аа рааж̇аг̇ахам̣ бурам̣;
Nidānaṃ tattha vesālī, tathā rājagahaṃ puraṃ;
саавад̇т̇аал̣ави госамб̣ий, саггабхаг̇г̇аа багаасид̇аа.
Sāvatthāḷavi kosambī, sakkabhaggā pakāsitā.
3119.
3119.
д̣̇аса взсаалияаа вуд̇д̇аа, згавийсам̣ г̇ириб̣б̣аж̇з;
Dasa vesāliyā vuttā, ekavīsaṃ giribbaje;
сад̇аани хи ча уунаани, д̇ийн̣и саавад̇т̇ияаа сияум̣.
Satāni hi cha ūnāni, tīṇi sāvatthiyā siyuṃ.
3120.
3120.
ча банаал̣авияам̣ вуд̇д̇аа, адта госамб̣ияам̣ гад̇аа;
Cha panāḷaviyaṃ vuttā, aṭṭha kosambiyaṃ katā;
адта саггзсу бан̃н̃ад̇д̇аа, д̇аяо бхаг̇г̇з багаасид̇аа.
Aṭṭha sakkesu paññattā, tayo bhagge pakāsitā.
3121.
3121.
д̇звийсад̇ивид̇хаа вуд̇д̇аа, суд̣̇иннад̇ханияаад̣̇аяо;
Tevīsatividhā vuttā, sudinnadhaniyādayo;
бхигкуунам̣ баад̇имогкасмим̣, аад̣̇игаммигабуг̇г̇алаа.
Bhikkhūnaṃ pātimokkhasmiṃ, ādikammikapuggalā.
3122.
3122.
бхигкунийнам̣ д̇ат̇аа баад̇и-могкасмим̣ аад̣̇игаммигаа;
Bhikkhunīnaṃ tathā pāti-mokkhasmiṃ ādikammikā;
т̇уллананд̣̇аад̣̇аяо сад̇д̇а, саб̣б̣з д̇им̣са бхаванд̇и д̇з.
Thullanandādayo satta, sabbe tiṃsa bhavanti te.
3123.
3123.
д̇арум̣ д̇имуулам̣ навабад̇д̇амзнам̣;
Taruṃ timūlaṃ navapattamenaṃ;
д̣̇ваяан̇гурам̣ сад̇д̇апалам̣ чабубпам̣;
Dvayaṅkuraṃ sattaphalaṃ chapupphaṃ;
ж̇аанаад̇и яо д̣̇виббабхавам̣ д̣̇висаакам̣;
Jānāti yo dvippabhavaṃ dvisākhaṃ;
ж̇аанаад̇и бан̃н̃ад̇д̇имасзсад̇о со.
Jānāti paññattimasesato so.
3124.
3124.
ид̇и барамамимам̣ винижчаяам̣;
Iti paramamimaṃ vinicchayaṃ;
мад̇хурабад̣̇ад̇т̇аманаагулам̣ д̇у яо;
Madhurapadatthamanākulaṃ tu yo;
батад̇и сун̣ад̇и бужчад̇з жа со;
Paṭhati suṇati pucchate ca so;
бхавад̇убаалисамо винижчаяз.
Bhavatupālisamo vinicchaye.
ид̇и винаяавинижчаяз багин̣н̣агавинижчаяагат̇аа самад̇д̇аа.
Iti vinayavinicchaye pakiṇṇakavinicchayakathā samattā.
