| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১৩. পাকতিন্দ্রিযসুত্তং
13. Pākatindriyasuttaṃ
২৩৩. একং সমযং সম্বহুলা ভিক্খূ কোসলেসু ৰিহরন্তি অঞ্ঞতরস্মিং ৰনসণ্ডে উদ্ধতা উন্নল়া চপলা মুখরা ৰিকিণ্ণৰাচা মুট্ঠস্সতিনো অসম্পজানা অসমাহিতা ৰিব্ভন্তচিত্তা পাকতিন্দ্রিযা। অথ খো যা তস্মিং ৰনসণ্ডে অধিৰত্থা দেৰতা তেসং ভিক্খূনং অনুকম্পিকা অত্থকামা তে ভিক্খূ সংৰেজেতুকামা যেন তে ভিক্খূ তেনুপসঙ্কমি; উপসঙ্কমিত্ৰা তে ভিক্খূ গাথাহি অজ্ঝভাসি –
233. Ekaṃ samayaṃ sambahulā bhikkhū kosalesu viharanti aññatarasmiṃ vanasaṇḍe uddhatā unnaḷā capalā mukharā vikiṇṇavācā muṭṭhassatino asampajānā asamāhitā vibbhantacittā pākatindriyā. Atha kho yā tasmiṃ vanasaṇḍe adhivatthā devatā tesaṃ bhikkhūnaṃ anukampikā atthakāmā te bhikkhū saṃvejetukāmā yena te bhikkhū tenupasaṅkami; upasaṅkamitvā te bhikkhū gāthāhi ajjhabhāsi –
‘‘সুখজীৰিনো পুরে আসুং, ভিক্খূ গোতমসাৰকা।
‘‘Sukhajīvino pure āsuṃ, bhikkhū gotamasāvakā;
অনিচ্ছা পিণ্ডমেসনা, অনিচ্ছা সযনাসনং।
Anicchā piṇḍamesanā, anicchā sayanāsanaṃ;
লোকে অনিচ্চতং ঞত্ৰা, দুক্খস্সন্তং অকংসু তে॥
Loke aniccataṃ ñatvā, dukkhassantaṃ akaṃsu te.
‘‘দুপ্পোসং কত্ৰা অত্তানং, গামে গামণিকা ৰিয।
‘‘Dupposaṃ katvā attānaṃ, gāme gāmaṇikā viya;
ভুত্ৰা ভুত্ৰা নিপজ্জন্তি, পরাগারেসু মুচ্ছিতা॥
Bhutvā bhutvā nipajjanti, parāgāresu mucchitā.
‘‘সঙ্ঘস্স অঞ্জলিং কত্ৰা, ইধেকচ্চে ৰদামহং।
‘‘Saṅghassa añjaliṃ katvā, idhekacce vadāmahaṃ;
‘‘যে খো পমত্তা ৰিহরন্তি, তে মে সন্ধায ভাসিতং।
‘‘Ye kho pamattā viharanti, te me sandhāya bhāsitaṃ;
যে অপ্পমত্তা ৰিহরন্তি, নমো তেসং করোমহ’’ন্তি॥
Ye appamattā viharanti, namo tesaṃ karomaha’’nti.
অথ খো তে ভিক্খূ তায দেৰতায সংৰেজিতা সংৰেগমাপাদুন্তি।
Atha kho te bhikkhū tāya devatāya saṃvejitā saṃvegamāpādunti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১৩. পাকতিন্দ্রিযসুত্তৰণ্ণনা • 13. Pākatindriyasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১৩. পাকতিন্দ্রিযসুত্তৰণ্ণনা • 13. Pākatindriyasuttavaṇṇanā
