| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၄. ပဟာရသိက္ခာပဒဝဏ္ဏနာ
4. Pahārasikkhāpadavaṇṇanā
ပဟာရံ ဒဒေယ္ယာတိ အန္တမသော ဥပ္ပလပတ္တံ ဥပာဒာယ ကာယကာယပ္ပဋိဗဒ္ဓနိသ္သဂ္ဂိယာနံ အညတရေန ပဟာရံ ဒဒေယ္ယ။ ဧဝံ ပန ပဟာရေ ဒိန္နေ ဟတ္ထော ဝာ ဘိဇ္ဇတု, ပာဒော ဝာ သီသံ ဝာ, မရတု ဝာ, ပာစိတ္တိယမေဝ။ တေနာဟ ‘‘ပဟရိတုကာမတာယာ’’တိအာဒိ။
Pahāraṃ dadeyyāti antamaso uppalapattaṃ upādāya kāyakāyappaṭibaddhanissaggiyānaṃ aññatarena pahāraṃ dadeyya. Evaṃ pana pahāre dinne hattho vā bhijjatu, pādo vā sīsaṃ vā, maratu vā, pācittiyameva. Tenāha ‘‘paharitukāmatāyā’’tiādi.
အနုပသမ္ပန္နေတိ ဂဟဋ္ဌေ ဝာ ပဗ္ဗဇိတေ ဝာ ဣတ္ထိယာ ဝာ ပုရိသေ ဝာ အန္တမသော တိရစ္ဆာနဂတေပိ။ သစေ ပန ရတ္တစိတ္တော ဣတ္ထိံ ပဟရတိ, သင္ဃာဒိသေသော။ ကေနစိ ဝိဟေဌိယမာနသ္သာတိ မနုသ္သေန ဝာ တိရစ္ဆာနဂတေန ဝာ ဝိဟေဌိယမာနသ္သ။ မောက္ခာဓိပ္ပာယသ္သာတိ တတော အတ္တနော မောက္ခံ ပတ္ထယမာနသ္သ။ သစေပိ အန္တရာမဂ္ဂေ (ပာစိ. အဋ္ဌ. ၄၅၃) စောရံ ဝာ ပစ္စတ္ထိကံ ဝာ ဝိဟေဌေတုကာမံ ဒိသ္ဝာ ‘‘ဥပာသက, ဧတ္ထေဝ တိဋ္ဌ, မာ အာဂမိတ္ထာ’’တိ ဝတ္ဝာ ဝစနံ အနာဒိယိတ္ဝာ အာဂစ္ဆန္တံ ‘‘ဂစ္ဆ ရေ’’တိ မုဂ္ဂရေန ဝာ သတ္ထကေန ဝာ ပဟရိတ္ဝာ ယာတိ, သော စေ တေန ပဟာရေန မရတိ, အနာပတ္တိယေဝ။ ဝာဠမိဂေသုပိ ဧသေဝ နယော။
Anupasampanneti gahaṭṭhe vā pabbajite vā itthiyā vā purise vā antamaso tiracchānagatepi. Sace pana rattacitto itthiṃ paharati, saṅghādiseso. Kenaci viheṭhiyamānassāti manussena vā tiracchānagatena vā viheṭhiyamānassa. Mokkhādhippāyassāti tato attano mokkhaṃ patthayamānassa. Sacepi antarāmagge (pāci. aṭṭha. 453) coraṃ vā paccatthikaṃ vā viheṭhetukāmaṃ disvā ‘‘upāsaka, ettheva tiṭṭha, mā āgamitthā’’ti vatvā vacanaṃ anādiyitvā āgacchantaṃ ‘‘gaccha re’’ti muggarena vā satthakena vā paharitvā yāti, so ce tena pahārena marati, anāpattiyeva. Vāḷamigesupi eseva nayo.
ပဟာရသိက္ခာပဒဝဏ္ဏနာ နိဋ္ဌိတာ။
Pahārasikkhāpadavaṇṇanā niṭṭhitā.
