| Library / Tipiṭaka / तिपिटक • Tipiṭaka / कङ्खावितरणी-अभिनव-टीका • Kaṅkhāvitaraṇī-abhinava-ṭīkā |
४. पहारसिक्खापदवण्णना
4. Pahārasikkhāpadavaṇṇanā
पहारं ददेय्याति अन्तमसो उप्पलपत्तं उपादाय कायकायप्पटिबद्धनिस्सग्गियानं अञ्ञतरेन पहारं ददेय्य। एवं पन पहारे दिन्ने हत्थो वा भिज्जतु, पादो वा सीसं वा, मरतु वा, पाचित्तियमेव। तेनाह ‘‘पहरितुकामताया’’तिआदि।
Pahāraṃ dadeyyāti antamaso uppalapattaṃ upādāya kāyakāyappaṭibaddhanissaggiyānaṃ aññatarena pahāraṃ dadeyya. Evaṃ pana pahāre dinne hattho vā bhijjatu, pādo vā sīsaṃ vā, maratu vā, pācittiyameva. Tenāha ‘‘paharitukāmatāyā’’tiādi.
अनुपसम्पन्नेति गहट्ठे वा पब्बजिते वा इत्थिया वा पुरिसे वा अन्तमसो तिरच्छानगतेपि। सचे पन रत्तचित्तो इत्थिं पहरति, सङ्घादिसेसो। केनचि विहेठियमानस्साति मनुस्सेन वा तिरच्छानगतेन वा विहेठियमानस्स। मोक्खाधिप्पायस्साति ततो अत्तनो मोक्खं पत्थयमानस्स। सचेपि अन्तरामग्गे (पाचि॰ अट्ठ॰ ४५३) चोरं वा पच्चत्थिकं वा विहेठेतुकामं दिस्वा ‘‘उपासक, एत्थेव तिट्ठ, मा आगमित्था’’ति वत्वा वचनं अनादियित्वा आगच्छन्तं ‘‘गच्छ रे’’ति मुग्गरेन वा सत्थकेन वा पहरित्वा याति, सो चे तेन पहारेन मरति, अनापत्तियेव। वाळमिगेसुपि एसेव नयो।
Anupasampanneti gahaṭṭhe vā pabbajite vā itthiyā vā purise vā antamaso tiracchānagatepi. Sace pana rattacitto itthiṃ paharati, saṅghādiseso. Kenaci viheṭhiyamānassāti manussena vā tiracchānagatena vā viheṭhiyamānassa. Mokkhādhippāyassāti tato attano mokkhaṃ patthayamānassa. Sacepi antarāmagge (pāci. aṭṭha. 453) coraṃ vā paccatthikaṃ vā viheṭhetukāmaṃ disvā ‘‘upāsaka, ettheva tiṭṭha, mā āgamitthā’’ti vatvā vacanaṃ anādiyitvā āgacchantaṃ ‘‘gaccha re’’ti muggarena vā satthakena vā paharitvā yāti, so ce tena pahārena marati, anāpattiyeva. Vāḷamigesupi eseva nayo.
पहारसिक्खापदवण्णना निट्ठिता।
Pahārasikkhāpadavaṇṇanā niṭṭhitā.
