| Library / Tipiṭaka / तिपिटक • Tipiṭaka / महाविभङ्ग-अट्ठकथा • Mahāvibhaṅga-aṭṭhakathā |
४. पहारसिक्खापदवण्णना
4. Pahārasikkhāpadavaṇṇanā
४४९. चतुत्थे – पहारं देन्तीति ‘‘आवुसो पीठकं पञ्ञपेथ, पादधोवनं आहरथा’’तिआदीनि वत्वा तथा अकरोन्तानं पहारं देन्ति।
449. Catutthe – pahāraṃ dentīti ‘‘āvuso pīṭhakaṃ paññapetha, pādadhovanaṃ āharathā’’tiādīni vatvā tathā akarontānaṃ pahāraṃ denti.
४५१. पहारं देति आपत्ति पाचित्तियस्साति एत्थ पहरितुकामताय पहारे दिन्ने सचेपि मरति पाचित्तियमेव। पहारेन हत्थो वा पादो वा भिज्जति, सीसं वा भिन्नं होति, पाचित्तियमेव। ‘‘यथायं सङ्घमज्झे न विरोचति, तथा नं करोमी’’ति एवं विरूपकरणाधिप्पायेन कण्णं वा नासं वा छिन्दति, दुक्कटं।
451.Pahāraṃ deti āpatti pācittiyassāti ettha paharitukāmatāya pahāre dinne sacepi marati pācittiyameva. Pahārena hattho vā pādo vā bhijjati, sīsaṃ vā bhinnaṃ hoti, pācittiyameva. ‘‘Yathāyaṃ saṅghamajjhe na virocati, tathā naṃ karomī’’ti evaṃ virūpakaraṇādhippāyena kaṇṇaṃ vā nāsaṃ vā chindati, dukkaṭaṃ.
४५२. अनुपसम्पन्नस्साति गहट्ठस्स वा पब्बजितस्स वा इत्थिया वा पुरिसस्स वा अन्तमसो तिरच्छानगतस्सापि पहारं देति, दुक्कटं। सचे पन रत्तचित्तो इत्थिं पहरति, सङ्घादिसेसो।
452.Anupasampannassāti gahaṭṭhassa vā pabbajitassa vā itthiyā vā purisassa vā antamaso tiracchānagatassāpi pahāraṃ deti, dukkaṭaṃ. Sace pana rattacitto itthiṃ paharati, saṅghādiseso.
४५३. केनचि विहेठियमानोति मनुस्सेन वा तिरच्छानगतेन वा विहेठियमानो। मोक्खाधिप्पायोति ततो अत्तनो मोक्खं पत्थयमानो। पहारं देतीति कायकायपटिबद्धनिस्सग्गियानं अञ्ञतरेन पहारं देति, अनापत्ति। सचेपि अन्तरामग्गे चोरं वा पच्चत्थिकं वा विहेठेतुकामं दिस्वा ‘‘उपासक, एत्थेव तिट्ठ, मा आगमी’’ति वत्वा वचनं अनादियित्वा आगच्छन्तं ‘‘गच्छ रे’’ति मुग्गरेन वा सत्थकेन वा पहरित्वा याति, सो चे तेन पहारेन मरति, अनापत्तियेव। वाळमिगेसुपि एसेव नयो। सेसमेत्थ उत्तानमेव। समुट्ठानादीनि पनस्स पठमपाराजिकसदिसानि, इदं पन दुक्खवेदनन्ति।
453.Kenaciviheṭhiyamānoti manussena vā tiracchānagatena vā viheṭhiyamāno. Mokkhādhippāyoti tato attano mokkhaṃ patthayamāno. Pahāraṃ detīti kāyakāyapaṭibaddhanissaggiyānaṃ aññatarena pahāraṃ deti, anāpatti. Sacepi antarāmagge coraṃ vā paccatthikaṃ vā viheṭhetukāmaṃ disvā ‘‘upāsaka, ettheva tiṭṭha, mā āgamī’’ti vatvā vacanaṃ anādiyitvā āgacchantaṃ ‘‘gaccha re’’ti muggarena vā satthakena vā paharitvā yāti, so ce tena pahārena marati, anāpattiyeva. Vāḷamigesupi eseva nayo. Sesamettha uttānameva. Samuṭṭhānādīni panassa paṭhamapārājikasadisāni, idaṃ pana dukkhavedananti.
पहारसिक्खापदं चतुत्थं।
Pahārasikkhāpadaṃ catutthaṃ.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / महाविभङ्ग • Mahāvibhaṅga / ८. सहधम्मिकवग्गो • 8. Sahadhammikavaggo
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / ४. पहारसिक्खापदवण्णना • 4. Pahārasikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / ४. पहारसिक्खापदवण्णना • 4. Pahārasikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / ४. पहारसिक्खापदवण्णना • 4. Pahārasikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / ४. पहारसिक्खापदं • 4. Pahārasikkhāpadaṃ
