| Library / Tipiṭaka / திபிடக • Tipiṭaka / பு³த்³த⁴வங்ஸபாளி • Buddhavaṃsapāḷi |
12. பது³முத்தரபு³த்³த⁴வங்ஸோ
12. Padumuttarabuddhavaṃso
1.
1.
நாரத³ஸ்ஸ அபரேன, ஸம்பு³த்³தோ⁴ த்³விபது³த்தமோ;
Nāradassa aparena, sambuddho dvipaduttamo;
பது³முத்தரோ நாம ஜினோ, அக்கோ²போ⁴ ஸாக³ரூபமோ.
Padumuttaro nāma jino, akkhobho sāgarūpamo.
2.
2.
மண்ட³கப்போவ ஸோ ஆஸி, யம்ஹி பு³த்³தோ⁴ அஜாயத²;
Maṇḍakappova so āsi, yamhi buddho ajāyatha;
உஸ்ஸன்னகுஸலா ஜனதா, தம்ஹி கப்பே அஜாயத².
Ussannakusalā janatā, tamhi kappe ajāyatha.
3.
3.
பது³முத்தரஸ்ஸ ப⁴க³வதோ, பட²மே த⁴ம்மதே³ஸனே;
Padumuttarassa bhagavato, paṭhame dhammadesane;
கோடிஸதஸஹஸ்ஸானங், த⁴ம்மாபி⁴ஸமயோ அஹு.
Koṭisatasahassānaṃ, dhammābhisamayo ahu.
4.
4.
ததோ பரம்பி வஸ்ஸந்தே, தப்பயந்தே ச பாணினே;
Tato parampi vassante, tappayante ca pāṇine;
ஸத்ததிங்ஸஸதஸஹஸ்ஸானங், து³தியாபி⁴ஸமயோ அஹு.
Sattatiṃsasatasahassānaṃ, dutiyābhisamayo ahu.
5.
5.
யம்ஹி காலே மஹாவீரோ, ஆனந்த³ங் உபஸங்கமி;
Yamhi kāle mahāvīro, ānandaṃ upasaṅkami;
பிதுஸந்திகங் உபக³ந்த்வா, ஆஹனீ அமதது³ந்து³பி⁴ங்.
Pitusantikaṃ upagantvā, āhanī amatadundubhiṃ.
6.
6.
ஆஹதே அமதபே⁴ரிம்ஹி, வஸ்ஸந்தே த⁴ம்மவுட்டி²யா;
Āhate amatabherimhi, vassante dhammavuṭṭhiyā;
பஞ்ஞாஸஸதஸஹஸ்ஸானங், ததியாபி⁴ஸமயோ அஹு.
Paññāsasatasahassānaṃ, tatiyābhisamayo ahu.
7.
7.
ஓவாத³கோ விஞ்ஞாபகோ, தாரகோ ஸப்³ப³பாணினங்;
Ovādako viññāpako, tārako sabbapāṇinaṃ;
தே³ஸனாகுஸலோ பு³த்³தோ⁴, தாரேஸி ஜனதங் ப³ஹுங்.
Desanākusalo buddho, tāresi janataṃ bahuṃ.
8.
8.
ஸன்னிபாதா தயோ ஆஸுங், பது³முத்தரஸ்ஸ ஸத்து²னோ;
Sannipātā tayo āsuṃ, padumuttarassa satthuno;
கோடிஸதஸஹஸ்ஸானங், பட²மோ ஆஸி ஸமாக³மோ.
Koṭisatasahassānaṃ, paṭhamo āsi samāgamo.
9.
9.
யதா³ பு³த்³தோ⁴ அஸமஸமோ, வஸி வேபா⁴ரபப்³ப³தே;
Yadā buddho asamasamo, vasi vebhārapabbate;
நவுதிகோடிஸஹஸ்ஸானங், து³தியோ ஆஸி ஸமாக³மோ.
Navutikoṭisahassānaṃ, dutiyo āsi samāgamo.
10.
10.
புன சாரிகங் பக்கந்தே, கா³மனிக³மரட்ட²தோ;
Puna cārikaṃ pakkante, gāmanigamaraṭṭhato;
அஸீதிகோடிஸஹஸ்ஸானங், ததியோ ஆஸி ஸமாக³மோ.
Asītikoṭisahassānaṃ, tatiyo āsi samāgamo.
11.
11.
அஹங் தேன ஸமயேன, ஜடிலோ நாம ரட்டி²கோ;
Ahaṃ tena samayena, jaṭilo nāma raṭṭhiko;
ஸம்பு³த்³த⁴ப்பமுக²ங் ஸங்க⁴ங், ஸப⁴த்தங் து³ஸ்ஸமதா³ஸஹங்.
Sambuddhappamukhaṃ saṅghaṃ, sabhattaṃ dussamadāsahaṃ.
12.
12.
ஸோபி மங் பு³த்³தோ⁴ ப்³யாகாஸி, ஸங்க⁴மஜ்ஜே² நிஸீதி³ய;
Sopi maṃ buddho byākāsi, saṅghamajjhe nisīdiya;
‘‘ஸதஸஹஸ்ஸிதோ கப்பே, அயங் பு³த்³தோ⁴ ப⁴விஸ்ஸதி.
‘‘Satasahassito kappe, ayaṃ buddho bhavissati.
13.
13.
‘‘பதா⁴னங் பத³ஹித்வான…பே॰… ஹெஸ்ஸாம ஸம்முகா² இமங்’’.
‘‘Padhānaṃ padahitvāna…pe… hessāma sammukhā imaṃ’’.
14.
14.
தஸ்ஸாபி வசனங் ஸுத்வா, உத்தரிங் வதமதி⁴ட்ட²ஹிங்;
Tassāpi vacanaṃ sutvā, uttariṃ vatamadhiṭṭhahiṃ;
அகாஸிங் உக்³க³த³ள்ஹங் தி⁴திங், த³ஸபாரமிபூரியா.
Akāsiṃ uggadaḷhaṃ dhitiṃ, dasapāramipūriyā.
15.
15.
ப்³யாஹதா தித்தி²யா ஸப்³பே³, விமனா து³ம்மனா ததா³;
Byāhatā titthiyā sabbe, vimanā dummanā tadā;
ந தேஸங் கேசி பரிசரந்தி, ரட்ட²தோ நிச்சு²ப⁴ந்தி தே.
Na tesaṃ keci paricaranti, raṭṭhato nicchubhanti te.
16.
16.
ஸப்³பே³ தத்த² ஸமாக³ந்த்வா, உபக³ச்சு²ங் பு³த்³த⁴ஸந்திகே;
Sabbe tattha samāgantvā, upagacchuṃ buddhasantike;
துவங் நாதோ² மஹாவீர, ஸரணங் ஹோஹி சக்கு²ம.
Tuvaṃ nātho mahāvīra, saraṇaṃ hohi cakkhuma.
17.
17.
அனுகம்பகோ காருணிகோ, ஹிதேஸீ ஸப்³ப³பாணினங்;
Anukampako kāruṇiko, hitesī sabbapāṇinaṃ;
ஸம்பத்தே தித்தி²யே ஸப்³பே³, பஞ்சஸீலே பதிட்ட²பி.
Sampatte titthiye sabbe, pañcasīle patiṭṭhapi.
18.
18.
ஏவங் நிராகுலங் ஆஸி, ஸுஞ்ஞதங் தித்தி²யேஹி தங்;
Evaṃ nirākulaṃ āsi, suññataṃ titthiyehi taṃ;
விசித்தங் அரஹந்தேஹி, வஸீபூ⁴தேஹி தாதி³ஹி.
Vicittaṃ arahantehi, vasībhūtehi tādihi.
19.
19.
நக³ரங் ஹங்ஸவதீ நாம, ஆனந்தோ³ நாம க²த்தியோ;
Nagaraṃ haṃsavatī nāma, ānando nāma khattiyo;
ஸுஜாதா நாம ஜனிகா, பது³முத்தரஸ்ஸ ஸத்து²னோ.
Sujātā nāma janikā, padumuttarassa satthuno.
20.
20.
த³ஸவஸ்ஸஸஹஸ்ஸானி, அகா³ரங் அஜ்ஜ² ஸோ வஸி;
Dasavassasahassāni, agāraṃ ajjha so vasi;
21.
21.
திசத்தாரீஸஸஹஸ்ஸானி, நாரியோ ஸமலங்கதா;
Ticattārīsasahassāni, nāriyo samalaṅkatā;
வஸுத³த்தா நாம நாரீ, உத்தமோ நாம அத்ரஜோ.
Vasudattā nāma nārī, uttamo nāma atrajo.
22.
22.
நிமித்தே சதுரோ தி³ஸ்வா, பாஸாதே³னாபி⁴னிக்க²மி;
Nimitte caturo disvā, pāsādenābhinikkhami;
ஸத்தாஹங் பதா⁴னசாரங், அசரீ புரிஸுத்தமோ.
Sattāhaṃ padhānacāraṃ, acarī purisuttamo.
23.
23.
ப்³ரஹ்முனா யாசிதோ ஸந்தோ, பது³முத்தரோ வினாயகோ;
Brahmunā yācito santo, padumuttaro vināyako;
வத்தி சக்கங் மஹாவீரோ, மிதி²லுய்யானமுத்தமே.
Vatti cakkaṃ mahāvīro, mithiluyyānamuttame.
24.
24.
தே³வலோ ச ஸுஜாதோ ச, அஹேஸுங் அக்³க³ஸாவகா;
Devalo ca sujāto ca, ahesuṃ aggasāvakā;
ஸுமனோ நாமுபட்டா²கோ, பது³முத்தரஸ்ஸ மஹேஸினோ.
Sumano nāmupaṭṭhāko, padumuttarassa mahesino.
25.
25.
அமிதா ச அஸமா ச, அஹேஸுங் அக்³க³ஸாவிகா;
Amitā ca asamā ca, ahesuṃ aggasāvikā;
போ³தி⁴ தஸ்ஸ ப⁴க³வதோ, ஸலலோதி பவுச்சதி.
Bodhi tassa bhagavato, salaloti pavuccati.
26.
26.
ஹட்டா² சேவ விசித்தா ச, அஹேஸுங் அக்³கு³பட்டி²கா.
Haṭṭhā ceva vicittā ca, ahesuṃ aggupaṭṭhikā.
27.
27.
அட்ட²பண்ணாஸரதனங், அச்சுக்³க³தோ மஹாமுனி;
Aṭṭhapaṇṇāsaratanaṃ, accuggato mahāmuni;
கஞ்சனக்³கி⁴யஸங்காஸோ, த்³வத்திங்ஸவரலக்க²ணோ.
Kañcanagghiyasaṅkāso, dvattiṃsavaralakkhaṇo.
28.
28.
குட்டா கவாடா பி⁴த்தீ ச, ருக்கா² நக³ஸிலுச்சயா;
Kuṭṭā kavāṭā bhittī ca, rukkhā nagasiluccayā;
ந தஸ்ஸாவரணங் அத்தி², ஸமந்தா த்³வாத³ஸயோஜனே.
Na tassāvaraṇaṃ atthi, samantā dvādasayojane.
29.
29.
வஸ்ஸஸதஸஹஸ்ஸானி, ஆயு விஜ்ஜதி தாவதே³;
Vassasatasahassāni, āyu vijjati tāvade;
தாவதா திட்ட²மானோ ஸோ, தாரேஸி ஜனதங் ப³ஹுங்.
Tāvatā tiṭṭhamāno so, tāresi janataṃ bahuṃ.
30.
30.
ஸந்தாரெத்வா ப³ஹுஜனங், சி²ந்தி³த்வா ஸப்³ப³ஸங்ஸயங்;
Santāretvā bahujanaṃ, chinditvā sabbasaṃsayaṃ;
ஜலித்வா அக்³கி³க்க²ந்தோ⁴வ நிப்³பு³தோ ஸோ ஸஸாவகோ.
Jalitvā aggikkhandhova nibbuto so sasāvako.
31.
31.
பது³முத்தரோ ஜினோ பு³த்³தோ⁴, நந்தா³ராமம்ஹி நிப்³பு³தோ;
Padumuttaro jino buddho, nandārāmamhi nibbuto;
தத்தே²வஸ்ஸ தூ²பவரோ, த்³வாத³ஸுப்³பே³த⁴யோஜனோதி.
Tatthevassa thūpavaro, dvādasubbedhayojanoti.
பது³முத்தரஸ்ஸ ப⁴க³வதோ வங்ஸோ த³ஸமோ.
Padumuttarassa bhagavato vaṃso dasamo.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / பு³த்³த⁴வங்ஸ-அட்ட²கதா² • Buddhavaṃsa-aṭṭhakathā / 12. பது³முத்தரபு³த்³த⁴வங்ஸவண்ணனா • 12. Padumuttarabuddhavaṃsavaṇṇanā
