| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
9. பது³மத்தே²ரஅபதா³னவண்ணனா
9. Padumattheraapadānavaṇṇanā
சதுஸச்சங் பகாஸெந்தோதிஆதி³கங் ஆயஸ்மதோ பது³மத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதகுஸலஸம்பா⁴ரோ பது³முத்தரமுனினா த⁴ம்மபஜ்ஜோதே ஜோதமானே ஏகஸ்மிங் குலகே³ஹே நிப்³ப³த்தோ க⁴ராவாஸங் ஸண்ட²பெத்வா போ⁴க³ஸம்பன்னோதி பாகடோ. ஸோ ஸத்த²ரி பஸீதி³த்வா மஹாஜனேன ஸத்³தி⁴ங் த⁴ம்மங் ஸுணந்தோ த⁴ஜேன ஸஹ பது³மகலாபங் க³ஹெத்வா அட்டா²ஸி, ஸத⁴ஜங் தங் பது³மகலாபங் ஆகாஸமுக்கி²பிங், தங் அச்ச²ரியங் தி³ஸ்வா அதிவிய ஸோமனஸ்ஸஜாதோ அஹோஸி. ஸோ யாவஜீவங் குஸலங் கத்வா ஜீவிதபரியோஸானே ஸக்³கே³ நிப்³ப³த்தோ த⁴ஜமிவ ச²காமாவசரே பாகடோ பூஜிதோ ச தி³ப்³ப³ஸம்பத்திமனுப⁴வித்வா மனுஸ்ஸேஸு ச சக்கவத்திஸம்பத்திமனுப⁴வித்வா இமஸ்மிங் பு³த்³து⁴ப்பாதே³ விப⁴வஸம்பன்னே ஸத்³தா⁴ஸம்பன்னே ஏகஸ்மிங் குலகே³ஹே நிப்³ப³த்தோ வுத்³தி⁴மன்வாய ஸத்³தா⁴ஜாதோ பஞ்சவஸ்ஸிகோவ பப்³ப³ஜித்வா நசிரஸ்ஸேவ அரஹா ஹுத்வா கதபுஞ்ஞனாமேன பது³மத்தே²ரோதி பாகடோ.
Catusaccaṃ pakāsentotiādikaṃ āyasmato padumattherassa apadānaṃ. Ayampi purimabuddhesu katakusalasambhāro padumuttaramuninā dhammapajjote jotamāne ekasmiṃ kulagehe nibbatto gharāvāsaṃ saṇṭhapetvā bhogasampannoti pākaṭo. So satthari pasīditvā mahājanena saddhiṃ dhammaṃ suṇanto dhajena saha padumakalāpaṃ gahetvā aṭṭhāsi, sadhajaṃ taṃ padumakalāpaṃ ākāsamukkhipiṃ, taṃ acchariyaṃ disvā ativiya somanassajāto ahosi. So yāvajīvaṃ kusalaṃ katvā jīvitapariyosāne sagge nibbatto dhajamiva chakāmāvacare pākaṭo pūjito ca dibbasampattimanubhavitvā manussesu ca cakkavattisampattimanubhavitvā imasmiṃ buddhuppāde vibhavasampanne saddhāsampanne ekasmiṃ kulagehe nibbatto vuddhimanvāya saddhājāto pañcavassikova pabbajitvā nacirasseva arahā hutvā katapuññanāmena padumattheroti pākaṭo.
67. அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ சதுஸச்சங் பகாஸெந்தோதிஆதி³மாஹ. தத்த² ஸச்சந்தி தத²ங் அவிதத²ங் அவிபரீதங் ஸச்சங், து³க்க²ஸமுத³யனிரோத⁴மக்³க³வஸேன சத்தாரி ஸச்சானி ஸமாஹடானீதி சதுஸச்சங், தங் சதுஸச்சங் பகாஸெந்தோ லோகே பாகடங் கரொந்தோதி அத்தோ². வரத⁴ம்மப்பவத்தகோதி உத்தமத⁴ம்மப்பவத்தகோ பகாஸகோதி அத்தோ². அமதங் வுட்டி²ந்தி அமதமஹானிப்³பா³னவுட்டி²தா⁴ரங் பவஸ்ஸந்தோ பக்³க⁴ரந்தோ ஸதே³வகங் லோகங் தேமெந்தோ ஸப்³ப³கிலேஸபரிளாஹங் நிப்³பா³பெந்தோ த⁴ம்மவஸ்ஸங் வஸ்ஸதீதி அத்தோ².
67. Attano pubbakammaṃ saritvā somanassajāto pubbacaritāpadānaṃ pakāsento catusaccaṃ pakāsentotiādimāha. Tattha saccanti tathaṃ avitathaṃ aviparītaṃ saccaṃ, dukkhasamudayanirodhamaggavasena cattāri saccāni samāhaṭānīti catusaccaṃ, taṃ catusaccaṃ pakāsento loke pākaṭaṃ karontoti attho. Varadhammappavattakoti uttamadhammappavattako pakāsakoti attho. Amataṃ vuṭṭhinti amatamahānibbānavuṭṭhidhāraṃ pavassanto paggharanto sadevakaṃ lokaṃ temento sabbakilesapariḷāhaṃ nibbāpento dhammavassaṃ vassatīti attho.
68. ஸத⁴ஜங் பது³மங் க³ய்ஹாதி த⁴ஜேன ஸஹ ஏகதோ கத்வா பது³மங் பது³மகலாபங் க³ஹெத்வாதி அத்தோ². அட்³ட⁴கோஸே டி²தோ அஹந்தி உபோ⁴ உக்கி²பித்வா டி²தோ அஹந்தி அத்தோ². ஸேஸங் ஸப்³ப³த்த² உத்தானத்த²மேவாதி.
68.Sadhajaṃ padumaṃ gayhāti dhajena saha ekato katvā padumaṃ padumakalāpaṃ gahetvāti attho. Aḍḍhakose ṭhito ahanti ubho ukkhipitvā ṭhito ahanti attho. Sesaṃ sabbattha uttānatthamevāti.
பது³மத்தே²ரஅபதா³னவண்ணனா ஸமத்தா.
Padumattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 9. பது³மத்தே²ரஅபதா³னங் • 9. Padumattheraapadānaṃ
