| Library / Tipiṭaka / तिपिटक • Tipiṭaka / अपदानपाळि • Apadānapāḷi |
३१. पदुमकेसरवग्गो
31. Padumakesaravaggo
१. पदुमकेसरियत्थेरअपदानं
1. Padumakesariyattheraapadānaṃ
१.
1.
‘‘इसिसङ्घे अहं पुब्बे, आसिं मातङ्गवारणो।
‘‘Isisaṅghe ahaṃ pubbe, āsiṃ mātaṅgavāraṇo;
महेसीनं पसादेन, पद्मकेसरमोकिरिं॥
Mahesīnaṃ pasādena, padmakesaramokiriṃ.
२.
2.
‘‘पच्चेकजिनसेट्ठेसु, धुतरागेसु तादिसु।
‘‘Paccekajinaseṭṭhesu, dhutarāgesu tādisu;
तेसु चित्तं पसादेत्वा, कप्पं सग्गम्हि मोदहं॥
Tesu cittaṃ pasādetvā, kappaṃ saggamhi modahaṃ.
३.
3.
‘‘एकनवुतितो कप्पे, केसरं ओकिरिं तदा।
‘‘Ekanavutito kappe, kesaraṃ okiriṃ tadā;
दुग्गतिं नाभिजानामि, बुद्धपूजायिदं फलं॥
Duggatiṃ nābhijānāmi, buddhapūjāyidaṃ phalaṃ.
४.
4.
‘‘पटिसम्भिदा चतस्सो, विमोक्खापि च अट्ठिमे।
‘‘Paṭisambhidā catasso, vimokkhāpi ca aṭṭhime;
छळभिञ्ञा सच्छिकता, कतं बुद्धस्स सासनं’’॥
Chaḷabhiññā sacchikatā, kataṃ buddhassa sāsanaṃ’’.
इत्थं सुदं आयस्मा पदुमकेसरियो थेरो इमा गाथायो अभासित्थाति।
Itthaṃ sudaṃ āyasmā padumakesariyo thero imā gāthāyo abhāsitthāti.
पदुमकेसरियत्थेरस्सापदानं पठमं।
Padumakesariyattherassāpadānaṃ paṭhamaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / १-१०. पदुमकेसरियत्थेरअपदानादिवण्णना • 1-10. Padumakesariyattheraapadānādivaṇṇanā
