| Library / Tipiṭaka / តិបិដក • Tipiṭaka / បដិសម្ភិទាមគ្គបាឡិ • Paṭisambhidāmaggapāḷi |
៤៣. បទេសវិហារញាណនិទ្ទេសោ
43. Padesavihārañāṇaniddeso
៩៤. កថំ សមោទហនេ បញ្ញា បទេសវិហារេ ញាណំ? មិច្ឆាទិដ្ឋិបច្ចយាបិ វេទយិតំ, មិច្ឆាទិដ្ឋិវូបសមបច្ចយាបិ វេទយិតំ។ សម្មាទិដ្ឋិបច្ចយាបិ វេទយិតំ, សម្មាទិដ្ឋិវូបសមបច្ចយាបិ វេទយិតំ។ មិច្ឆាសង្កប្បបច្ចយាបិ វេទយិតំ, មិច្ឆាសង្កប្បវូបសមបច្ចយាបិ វេទយិតំ។ សម្មាសង្កប្បបច្ចយាបិ វេទយិតំ, សម្មាសង្កប្បវូបសមបច្ចយាបិ វេទយិតំ…បេ.… មិច្ឆាវិមុត្តិបច្ចយាបិ វេទយិតំ, មិច្ឆាវិមុត្តិវូបសមបច្ចយាបិ វេទយិតំ។ សម្មាវិមុត្តិបច្ចយាបិ វេទយិតំ, សម្មាវិមុត្តិវូបសមបច្ចយាបិ វេទយិតំ។ ឆន្ទបច្ចយាបិ វេទយិតំ, ឆន្ទវូបសមបច្ចយាបិ វេទយិតំ។ វិតក្កបច្ចយាបិ វេទយិតំ, វិតក្កវូបសមបច្ចយាបិ វេទយិតំ។ សញ្ញាបច្ចយាបិ វេទយិតំ, សញ្ញាវូបសមបច្ចយាបិ វេទយិតំ។
94. Kathaṃ samodahane paññā padesavihāre ñāṇaṃ? Micchādiṭṭhipaccayāpi vedayitaṃ, micchādiṭṭhivūpasamapaccayāpi vedayitaṃ. Sammādiṭṭhipaccayāpi vedayitaṃ, sammādiṭṭhivūpasamapaccayāpi vedayitaṃ. Micchāsaṅkappapaccayāpi vedayitaṃ, micchāsaṅkappavūpasamapaccayāpi vedayitaṃ. Sammāsaṅkappapaccayāpi vedayitaṃ, sammāsaṅkappavūpasamapaccayāpi vedayitaṃ…pe… micchāvimuttipaccayāpi vedayitaṃ, micchāvimuttivūpasamapaccayāpi vedayitaṃ. Sammāvimuttipaccayāpi vedayitaṃ, sammāvimuttivūpasamapaccayāpi vedayitaṃ. Chandapaccayāpi vedayitaṃ, chandavūpasamapaccayāpi vedayitaṃ. Vitakkapaccayāpi vedayitaṃ, vitakkavūpasamapaccayāpi vedayitaṃ. Saññāpaccayāpi vedayitaṃ, saññāvūpasamapaccayāpi vedayitaṃ.
ឆន្ទោ ច អវូបសន្តោ ហោតិ, វិតក្កោ ច អវូបសន្តោ ហោតិ, សញ្ញា ច អវូបសន្តា ហោតិ, តប្បច្ចយាបិ វេទយិតំ។ ឆន្ទោ ច វូបសន្តោ ហោតិ, វិតក្កោ ច អវូបសន្តោ ហោតិ, សញ្ញា ច អវូបសន្តា ហោតិ, តប្បច្ចយាបិ វេទយិតំ។ ឆន្ទោ ច វូបសន្តោ ហោតិ, វិតក្កោ ច វូបសន្តោ ហោតិ, សញ្ញា ច អវូបសន្តា ហោតិ, តប្បច្ចយាបិ វេទយិតំ។ ឆន្ទោ ច វូបសន្តោ ហោតិ, វិតក្កោ ច វូបសន្តោ ហោតិ, សញ្ញា ច វូបសន្តា ហោតិ, តប្បច្ចយាបិ វេទយិតំ។ អប្បត្តស្ស បត្តិយា អត្ថិ អាសវំ, តស្មិម្បិ ឋានេ អនុប្បត្តេ តប្បច្ចយាបិ វេទយិតំ។ តំ ញាតដ្ឋេន ញាណំ, បជាននដ្ឋេន បញ្ញា។ តេន វុច្ចតិ – ‘‘សមោទហនេ បញ្ញា បទេសវិហារេ ញាណំ’’។
Chando ca avūpasanto hoti, vitakko ca avūpasanto hoti, saññā ca avūpasantā hoti, tappaccayāpi vedayitaṃ. Chando ca vūpasanto hoti, vitakko ca avūpasanto hoti, saññā ca avūpasantā hoti, tappaccayāpi vedayitaṃ. Chando ca vūpasanto hoti, vitakko ca vūpasanto hoti, saññā ca avūpasantā hoti, tappaccayāpi vedayitaṃ. Chando ca vūpasanto hoti, vitakko ca vūpasanto hoti, saññā ca vūpasantā hoti, tappaccayāpi vedayitaṃ. Appattassa pattiyā atthi āsavaṃ, tasmimpi ṭhāne anuppatte tappaccayāpi vedayitaṃ. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘samodahane paññā padesavihāre ñāṇaṃ’’.
បទេសវិហារញាណនិទ្ទេសោ តេចត្តាលីសមោ។
Padesavihārañāṇaniddeso tecattālīsamo.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / បដិសម្ភិទាមគ្គ-អដ្ឋកថា • Paṭisambhidāmagga-aṭṭhakathā / ៤៣. បទេសវិហារញាណនិទ្ទេសវណ្ណនា • 43. Padesavihārañāṇaniddesavaṇṇanā
