| Library / Tipiṭaka / ติปิฎก • Tipiṭaka / ขุทฺทสิกฺขา-มูลสิกฺขา • Khuddasikkhā-mūlasikkhā |
๔. ปาจิตฺติยนิเทฺทโส
4. Pācittiyaniddeso
๓๐.
30.
สมฺปชานมุสาวาเท, ปาจิตฺติยมุทีริตํ;
Sampajānamusāvāde, pācittiyamudīritaṃ;
ภิกฺขุญฺจ โอมสนฺตสฺส, เปสุญฺญหรเณปิ จฯ
Bhikkhuñca omasantassa, pesuññaharaṇepi ca.
๓๑.
31.
ฐเปตฺวา ภิกฺขุนิํ ภิกฺขุํ, อเญฺญน ปิฎกตฺตยํ;
Ṭhapetvā bhikkhuniṃ bhikkhuṃ, aññena piṭakattayaṃ;
ปทโสธมฺมํ ภณนฺตสฺส, ปาจิตฺติยมุทีริตํฯ
Padasodhammaṃ bhaṇantassa, pācittiyamudīritaṃ.
๓๒.
32.
อนุปสมฺปเนฺนเนว, สยิตฺวาน ติรตฺติยํ;
Anupasampanneneva, sayitvāna tirattiyaṃ;
ปาจิตฺติ สหเสยฺยาย, จตุตฺถตฺถงฺคเต ปุนฯ
Pācitti sahaseyyāya, catutthatthaṅgate puna.
๓๓.
33.
อิตฺถิยา เอกรตฺตมฺปิ, เสยฺยํ กปฺปยโตปิ วา;
Itthiyā ekarattampi, seyyaṃ kappayatopi vā;
เทเสนฺตสฺส วินา วิญฺญุํ, ธมฺมญฺจ ฉปฺปทุตฺตริํฯ
Desentassa vinā viññuṃ, dhammañca chappaduttariṃ.
๓๔.
34.
ทุฎฺฐุลฺลํ ภิกฺขุโน วชฺชํ, ภิกฺขุสมฺมุติยา วินา;
Duṭṭhullaṃ bhikkhuno vajjaṃ, bhikkhusammutiyā vinā;
อภิกฺขุโน วทนฺตสฺส, ปาจิตฺติยมุทีริตํฯ
Abhikkhuno vadantassa, pācittiyamudīritaṃ.
๓๕.
35.
ขเณยฺย วา ขณาเปยฺย, ปถวิญฺจ อกปฺปิยํ;
Khaṇeyya vā khaṇāpeyya, pathaviñca akappiyaṃ;
ภูตคามํ วิโกเปยฺย, ตสฺส ปาจิตฺติยํ สิยาฯ
Bhūtagāmaṃ vikopeyya, tassa pācittiyaṃ siyā.
๓๖.
36.
อโชฺฌกาเส ตุ มญฺจาทิํ, กตฺวา สนฺถรณาทิกํ;
Ajjhokāse tu mañcādiṃ, katvā santharaṇādikaṃ;
สงฺฆิกํ ยาติ ปาจิตฺติ, อกตฺวาปุจฺฉนาทิกํฯ
Saṅghikaṃ yāti pācitti, akatvāpucchanādikaṃ.
๓๗.
37.
สงฺฆิกาวสเถ เสยฺยํ, กตฺวา สนฺถรณาทิกํ;
Saṅghikāvasathe seyyaṃ, katvā santharaṇādikaṃ;
อกตฺวาปุจฺฉนาทิํ โย, ยาติ ปาจิตฺติ ตสฺสปิฯ
Akatvāpucchanādiṃ yo, yāti pācitti tassapi.
๓๘.
38.
ชานํ สปฺปาณกํ โตยํ, ปาจิตฺติ ปริภุญฺชโต;
Jānaṃ sappāṇakaṃ toyaṃ, pācitti paribhuñjato;
อญฺญาติกา ภิกฺขุนิยา, ฐเปตฺวา ปาริวตฺตกํฯ
Aññātikā bhikkhuniyā, ṭhapetvā pārivattakaṃ.
๓๙.
39.
จีวรํ เทติ ปาจิตฺติ, จีวรํ สิพฺพโตปิ จ;
Cīvaraṃ deti pācitti, cīvaraṃ sibbatopi ca;
อติริตฺตํ อกาเรตฺวา, ปวาเรตฺวาน ภุญฺชโตฯ
Atirittaṃ akāretvā, pavāretvāna bhuñjato.
๔๐.
40.
ภิกฺขุํ อาสาทนาเปโกฺข, ปวาเรติ ปวาริตํ;
Bhikkhuṃ āsādanāpekkho, pavāreti pavāritaṃ;
อนติริเตฺตน ภุเตฺต ตุ, ปาจิตฺติยมุทีริตํฯ
Anatirittena bhutte tu, pācittiyamudīritaṃ.
๔๑.
41.
สนฺนิธิโภชนํ ภุเญฺช, วิกาเล ยาวกาลิกํ;
Sannidhibhojanaṃ bhuñje, vikāle yāvakālikaṃ;
ภุญฺชโต วาปิ ปาจิตฺติ, อคิลาโน ปณีตกํฯ
Bhuñjato vāpi pācitti, agilāno paṇītakaṃ.
๔๒.
42.
วิญฺญาเปตฺวาน ภุเญฺชยฺย, สปฺปิภตฺตาทิกมฺปิ จ;
Viññāpetvāna bhuñjeyya, sappibhattādikampi ca;
อปฺปฎิคฺคหิตํ ภุเญฺช, ทนฺตกโฎฺฐทกํ วินาฯ
Appaṭiggahitaṃ bhuñje, dantakaṭṭhodakaṃ vinā.
๔๓.
43.
ติตฺถิยสฺส ทเท กิญฺจิ, ภุญฺชิตพฺพํ สหตฺถโต;
Titthiyassa dade kiñci, bhuñjitabbaṃ sahatthato;
นิสชฺชํ วารโห กเปฺป, มาตุคาเมน เจกโตฯ
Nisajjaṃ vāraho kappe, mātugāmena cekato.
๔๔.
44.
สุราเมรยปาเนปิ, ปาจิตฺติยมุทีริตํ;
Surāmerayapānepi, pācittiyamudīritaṃ;
องฺคุลิปโตทเก จาปิ, หสธเมฺมปิ โจทเกฯ
Aṅgulipatodake cāpi, hasadhammepi codake.
๔๕.
45.
อนาทเรปิ ปาจิตฺติ, ภิกฺขุํ ภีสยโตปิ วา;
Anādarepi pācitti, bhikkhuṃ bhīsayatopi vā;
ภยานกํ กถํ กตฺวา, ทเสฺสตฺวา วา ภยานกํฯ
Bhayānakaṃ kathaṃ katvā, dassetvā vā bhayānakaṃ.
๔๖.
46.
ฐเปตฺวา ปจฺจยํ กิญฺจิ, อคิลาโน ชเลยฺย วา;
Ṭhapetvā paccayaṃ kiñci, agilāno jaleyya vā;
โชติํ ชลาปเยยฺยาปิ, ตสฺส ปาจิตฺติยํ สิยาฯ
Jotiṃ jalāpayeyyāpi, tassa pācittiyaṃ siyā.
๔๗.
47.
กปฺปพินฺทุมนาทาย, นวจีวรโภคิโน;
Kappabindumanādāya, navacīvarabhogino;
หสาเปกฺขสฺส ปาจิตฺติ, ภิกฺขุโน จีวราทิกํฯ
Hasāpekkhassa pācitti, bhikkhuno cīvarādikaṃ.
๔๘.
48.
อปเนตฺวา นิเธนฺตสฺส, นิธาเปนฺตสฺส วา ปน;
Apanetvā nidhentassa, nidhāpentassa vā pana;
ชานํ ปาณํ มาเรนฺตสฺส, ติรจฺฉานคตมฺปิ จฯ
Jānaṃ pāṇaṃ mārentassa, tiracchānagatampi ca.
๔๙.
49.
ฉาเทตุกาโม ฉาเทติ, ทุฎฺฐุลฺลํ ภิกฺขุโนปิ จ;
Chādetukāmo chādeti, duṭṭhullaṃ bhikkhunopi ca;
คามนฺตรคตสฺสาปิ, สํวิธายิตฺถิยา สหฯ
Gāmantaragatassāpi, saṃvidhāyitthiyā saha.
๕๐.
50.
ภิกฺขุํ ปหรโต วาปิ, ตลสตฺติกมุคฺคิเร;
Bhikkhuṃ paharato vāpi, talasattikamuggire;
โจเทติ วา โจทาเปติ, ครุกามูลเกนปิฯ
Codeti vā codāpeti, garukāmūlakenapi.
๕๑.
51.
กุกฺกุจฺจุปฺปาทเน จาปิ, ภณฺฑนตฺถายุปสฺสุติํ;
Kukkuccuppādane cāpi, bhaṇḍanatthāyupassutiṃ;
โสตุํ ภณฺฑนชาตานํ, ยาติ ปาจิตฺติยํ สิยาฯ
Sotuṃ bhaṇḍanajātānaṃ, yāti pācittiyaṃ siyā.
๕๒.
52.
สงฺฆสฺส ลาภํ ปริณามิตํ ตุ,
Saṅghassa lābhaṃ pariṇāmitaṃ tu,
นาเมติ โย ตํ ปรปุคฺคลสฺส;
Nāmeti yo taṃ parapuggalassa;
ปุจฺฉํ อกตฺวาปิ จ สนฺตภิกฺขุํ,
Pucchaṃ akatvāpi ca santabhikkhuṃ,
ปาจิตฺติ คามสฺส คเต วิกาเลติฯ
Pācitti gāmassa gate vikāleti.
