| Library / Tipiṭaka / तिपिटक • Tipiṭaka / खुद्दसिक्खा-मूलसिक्खा • Khuddasikkhā-mūlasikkhā |
४. पाचित्तियनिद्देसो
4. Pācittiyaniddeso
३०.
30.
सम्पजानमुसावादे, पाचित्तियमुदीरितं।
Sampajānamusāvāde, pācittiyamudīritaṃ;
भिक्खुञ्च ओमसन्तस्स, पेसुञ्ञहरणेपि च॥
Bhikkhuñca omasantassa, pesuññaharaṇepi ca.
३१.
31.
ठपेत्वा भिक्खुनिं भिक्खुं, अञ्ञेन पिटकत्तयं।
Ṭhapetvā bhikkhuniṃ bhikkhuṃ, aññena piṭakattayaṃ;
पदसोधम्मं भणन्तस्स, पाचित्तियमुदीरितं॥
Padasodhammaṃ bhaṇantassa, pācittiyamudīritaṃ.
३२.
32.
अनुपसम्पन्नेनेव, सयित्वान तिरत्तियं।
Anupasampanneneva, sayitvāna tirattiyaṃ;
पाचित्ति सहसेय्याय, चतुत्थत्थङ्गते पुन॥
Pācitti sahaseyyāya, catutthatthaṅgate puna.
३३.
33.
इत्थिया एकरत्तम्पि, सेय्यं कप्पयतोपि वा।
Itthiyā ekarattampi, seyyaṃ kappayatopi vā;
देसेन्तस्स विना विञ्ञुं, धम्मञ्च छप्पदुत्तरिं॥
Desentassa vinā viññuṃ, dhammañca chappaduttariṃ.
३४.
34.
दुट्ठुल्लं भिक्खुनो वज्जं, भिक्खुसम्मुतिया विना।
Duṭṭhullaṃ bhikkhuno vajjaṃ, bhikkhusammutiyā vinā;
अभिक्खुनो वदन्तस्स, पाचित्तियमुदीरितं॥
Abhikkhuno vadantassa, pācittiyamudīritaṃ.
३५.
35.
खणेय्य वा खणापेय्य, पथविञ्च अकप्पियं।
Khaṇeyya vā khaṇāpeyya, pathaviñca akappiyaṃ;
भूतगामं विकोपेय्य, तस्स पाचित्तियं सिया॥
Bhūtagāmaṃ vikopeyya, tassa pācittiyaṃ siyā.
३६.
36.
अज्झोकासे तु मञ्चादिं, कत्वा सन्थरणादिकं।
Ajjhokāse tu mañcādiṃ, katvā santharaṇādikaṃ;
सङ्घिकं याति पाचित्ति, अकत्वापुच्छनादिकं॥
Saṅghikaṃ yāti pācitti, akatvāpucchanādikaṃ.
३७.
37.
सङ्घिकावसथे सेय्यं, कत्वा सन्थरणादिकं।
Saṅghikāvasathe seyyaṃ, katvā santharaṇādikaṃ;
अकत्वापुच्छनादिं यो, याति पाचित्ति तस्सपि॥
Akatvāpucchanādiṃ yo, yāti pācitti tassapi.
३८.
38.
जानं सप्पाणकं तोयं, पाचित्ति परिभुञ्जतो।
Jānaṃ sappāṇakaṃ toyaṃ, pācitti paribhuñjato;
अञ्ञातिका भिक्खुनिया, ठपेत्वा पारिवत्तकं॥
Aññātikā bhikkhuniyā, ṭhapetvā pārivattakaṃ.
३९.
39.
चीवरं देति पाचित्ति, चीवरं सिब्बतोपि च।
Cīvaraṃ deti pācitti, cīvaraṃ sibbatopi ca;
अतिरित्तं अकारेत्वा, पवारेत्वान भुञ्जतो॥
Atirittaṃ akāretvā, pavāretvāna bhuñjato.
४०.
40.
भिक्खुं आसादनापेक्खो, पवारेति पवारितं।
Bhikkhuṃ āsādanāpekkho, pavāreti pavāritaṃ;
अनतिरित्तेन भुत्ते तु, पाचित्तियमुदीरितं॥
Anatirittena bhutte tu, pācittiyamudīritaṃ.
४१.
41.
सन्निधिभोजनं भुञ्जे, विकाले यावकालिकं।
Sannidhibhojanaṃ bhuñje, vikāle yāvakālikaṃ;
भुञ्जतो वापि पाचित्ति, अगिलानो पणीतकं॥
Bhuñjato vāpi pācitti, agilāno paṇītakaṃ.
४२.
42.
विञ्ञापेत्वान भुञ्जेय्य, सप्पिभत्तादिकम्पि च।
Viññāpetvāna bhuñjeyya, sappibhattādikampi ca;
अप्पटिग्गहितं भुञ्जे, दन्तकट्ठोदकं विना॥
Appaṭiggahitaṃ bhuñje, dantakaṭṭhodakaṃ vinā.
४३.
43.
तित्थियस्स ददे किञ्चि, भुञ्जितब्बं सहत्थतो।
Titthiyassa dade kiñci, bhuñjitabbaṃ sahatthato;
निसज्जं वारहो कप्पे, मातुगामेन चेकतो॥
Nisajjaṃ vāraho kappe, mātugāmena cekato.
४४.
44.
सुरामेरयपानेपि, पाचित्तियमुदीरितं।
Surāmerayapānepi, pācittiyamudīritaṃ;
अङ्गुलिपतोदके चापि, हसधम्मेपि चोदके॥
Aṅgulipatodake cāpi, hasadhammepi codake.
४५.
45.
अनादरेपि पाचित्ति, भिक्खुं भीसयतोपि वा।
Anādarepi pācitti, bhikkhuṃ bhīsayatopi vā;
भयानकं कथं कत्वा, दस्सेत्वा वा भयानकं॥
Bhayānakaṃ kathaṃ katvā, dassetvā vā bhayānakaṃ.
४६.
46.
ठपेत्वा पच्चयं किञ्चि, अगिलानो जलेय्य वा।
Ṭhapetvā paccayaṃ kiñci, agilāno jaleyya vā;
जोतिं जलापयेय्यापि, तस्स पाचित्तियं सिया॥
Jotiṃ jalāpayeyyāpi, tassa pācittiyaṃ siyā.
४७.
47.
कप्पबिन्दुमनादाय, नवचीवरभोगिनो।
Kappabindumanādāya, navacīvarabhogino;
हसापेक्खस्स पाचित्ति, भिक्खुनो चीवरादिकं॥
Hasāpekkhassa pācitti, bhikkhuno cīvarādikaṃ.
४८.
48.
अपनेत्वा निधेन्तस्स, निधापेन्तस्स वा पन।
Apanetvā nidhentassa, nidhāpentassa vā pana;
जानं पाणं मारेन्तस्स, तिरच्छानगतम्पि च॥
Jānaṃ pāṇaṃ mārentassa, tiracchānagatampi ca.
४९.
49.
छादेतुकामो छादेति, दुट्ठुल्लं भिक्खुनोपि च।
Chādetukāmo chādeti, duṭṭhullaṃ bhikkhunopi ca;
गामन्तरगतस्सापि, संविधायित्थिया सह॥
Gāmantaragatassāpi, saṃvidhāyitthiyā saha.
५०.
50.
भिक्खुं पहरतो वापि, तलसत्तिकमुग्गिरे।
Bhikkhuṃ paharato vāpi, talasattikamuggire;
चोदेति वा चोदापेति, गरुकामूलकेनपि॥
Codeti vā codāpeti, garukāmūlakenapi.
५१.
51.
कुक्कुच्चुप्पादने चापि, भण्डनत्थायुपस्सुतिं।
Kukkuccuppādane cāpi, bhaṇḍanatthāyupassutiṃ;
सोतुं भण्डनजातानं, याति पाचित्तियं सिया॥
Sotuṃ bhaṇḍanajātānaṃ, yāti pācittiyaṃ siyā.
५२.
52.
सङ्घस्स लाभं परिणामितं तु,
Saṅghassa lābhaṃ pariṇāmitaṃ tu,
नामेति यो तं परपुग्गलस्स।
Nāmeti yo taṃ parapuggalassa;
पुच्छं अकत्वापि च सन्तभिक्खुं,
Pucchaṃ akatvāpi ca santabhikkhuṃ,
पाचित्ति गामस्स गते विकालेति॥
Pācitti gāmassa gate vikāleti.
