| Library / Tipiṭaka / ติปิฎก • Tipiṭaka / วินยวินิจฺฉย-อุตฺตรวินิจฺฉย • Vinayavinicchaya-uttaravinicchaya |
ปาจิตฺติยกถา
Pācittiyakathā
๒๑๒๙.
2129.
ลสุณํ ภณฺฑิกํ วุตฺตํ, น เอกทฺวิติมิญฺชกํ;
Lasuṇaṃ bhaṇḍikaṃ vuttaṃ, na ekadvitimiñjakaṃ;
อามกํ มาคธํเยว, ‘‘ขาทิสฺสามี’’ติ คณฺหติฯ
Āmakaṃ māgadhaṃyeva, ‘‘khādissāmī’’ti gaṇhati.
๒๑๓๐.
2130.
คหเณ ทุกฺกฎํ ตสฺสา, ปาจิตฺติ ยทิ ขาทติ;
Gahaṇe dukkaṭaṃ tassā, pācitti yadi khādati;
อโชฺฌหารวเสเนว, ปาจิตฺติํ ปริทีปเยฯ
Ajjhohāravaseneva, pācittiṃ paridīpaye.
๒๑๓๑.
2131.
เทฺว ตโย ภณฺฑิเก สทฺธิํ, สงฺขาทิตฺวา สเจ ปน;
Dve tayo bhaṇḍike saddhiṃ, saṅkhāditvā sace pana;
อโชฺฌหรติ ยา ตสฺสา, เอกํ ปาจิตฺติยํ สิยาฯ
Ajjhoharati yā tassā, ekaṃ pācittiyaṃ siyā.
๒๑๓๒.
2132.
ภินฺทิตฺวา ตตฺถ เอเกกํ, มิญฺชํ ขาทนฺติยา ปน;
Bhinditvā tattha ekekaṃ, miñjaṃ khādantiyā pana;
มิญฺชานํ คณนายสฺสา, ปาจิตฺติคณนา สิยาฯ
Miñjānaṃ gaṇanāyassā, pācittigaṇanā siyā.
๒๑๓๓.
2133.
ปลณฺฑุโก ภญฺชนโก, หริโต จาปโลปิ จ;
Palaṇḍuko bhañjanako, harito cāpalopi ca;
ลสุณา ปน จตฺตาโร, วฎฺฎเนฺตว สภาวโตฯ
Lasuṇā pana cattāro, vaṭṭanteva sabhāvato.
๒๑๓๔.
2134.
ปลณฺฑุโก ปณฺฑุวโณฺณ, ภญฺชโน โลหิโตปิ จ;
Palaṇḍuko paṇḍuvaṇṇo, bhañjano lohitopi ca;
หริโต หริตวโณฺณ, จาปโล เสตโกปิ จฯ
Harito haritavaṇṇo, cāpalo setakopi ca.
๒๑๓๕.
2135.
เอกา มิญฺชา ปลณฺฑุสฺส, ภญฺชนสฺส ทุเว สิยุํ;
Ekā miñjā palaṇḍussa, bhañjanassa duve siyuṃ;
ติโสฺส หริตกสฺสาปิ, จาปโล โหตฺยมิญฺชโกฯ
Tisso haritakassāpi, cāpalo hotyamiñjako.
๒๑๓๖.
2136.
สูปมํสาทิสํปาเก , สาฬวุตฺตริภงฺคเก;
Sūpamaṃsādisaṃpāke , sāḷavuttaribhaṅgake;
น โทสุมฺมตฺติกาทีนํ, สมุฎฺฐาเนฬกูปมํฯ
Na dosummattikādīnaṃ, samuṭṭhāneḷakūpamaṃ.
ปฐมํฯ
Paṭhamaṃ.
๒๑๓๗.
2137.
สมฺพาเธ อุปกเจฺฉสุ, มุตฺตสฺส กรเณปิ วา;
Sambādhe upakacchesu, muttassa karaṇepi vā;
เอกโลมมฺปิ ปาจิตฺติ, สํหราเปนฺติยา สิยาฯ
Ekalomampi pācitti, saṃharāpentiyā siyā.
๒๑๓๘.
2138.
พหุเกปิ ตถา โลเม, สํหราเปนฺติยา ปน;
Bahukepi tathā lome, saṃharāpentiyā pana;
ปโยคคณนายสฺสา, น โลมคณนาย หิฯ
Payogagaṇanāyassā, na lomagaṇanāya hi.
๒๑๓๙.
2139.
น โทโส สติ อาพาเธ, โลมเก สํหรนฺติยา;
Na doso sati ābādhe, lomake saṃharantiyā;
สมุฎฺฐานาทโย มคฺค- สํวิธานสมา มตาฯ
Samuṭṭhānādayo magga- saṃvidhānasamā matā.
ทุติยํฯ
Dutiyaṃ.
๒๑๔๐.
2140.
โหติ อนฺตมโส มุตฺต-กรณสฺส ตลฆาตเน;
Hoti antamaso mutta-karaṇassa talaghātane;
เกสเรนาปิ ราเคน, ปาจิตฺติ ปทุมสฺส วาฯ
Kesarenāpi rāgena, pācitti padumassa vā.
๒๑๔๑.
2141.
คณฺฑํ ตตฺถ วณํ วาปิ, น โทโส ปหรนฺติยา;
Gaṇḍaṃ tattha vaṇaṃ vāpi, na doso paharantiyā;
สมุฎฺฐานาทโย ตุลฺยา, ปฐมนฺติมวตฺถุนาฯ
Samuṭṭhānādayo tulyā, paṭhamantimavatthunā.
ตติยํฯ
Tatiyaṃ.
๒๑๔๒.
2142.
ยา ปนุปฺปลปตฺตมฺปิ, พฺยญฺชเน ภิกฺขุนตฺตโน;
Yā panuppalapattampi, byañjane bhikkhunattano;
กามราคปเรตา ตุ, ปเวเสติ น วฎฺฎติฯ
Kāmarāgaparetā tu, paveseti na vaṭṭati.
๒๑๔๓.
2143.
อิทํ วตฺถุวเสเนว, วุตฺตํ ตุ ชตุมฎฺฐกํ;
Idaṃ vatthuvaseneva, vuttaṃ tu jatumaṭṭhakaṃ;
ทณฺฑเมลาฬุกํ วาปิ, มุตฺตสฺส กรเณ ปนฯ
Daṇḍamelāḷukaṃ vāpi, muttassa karaṇe pana.
๒๑๔๔.
2144.
สมฺผสฺสํ สาทิยนฺติยา, ปเวเสติ สเจ ปน;
Samphassaṃ sādiyantiyā, paveseti sace pana;
ปเวสาเปติ วา ตสฺมิํ, ตสฺสา ปาจิตฺติยํ สิยาฯ
Pavesāpeti vā tasmiṃ, tassā pācittiyaṃ siyā.
๒๑๔๕.
2145.
อาพาธปจฺจยา โทโส, นตฺถิ อุมฺมตฺติกาย วา;
Ābādhapaccayā doso, natthi ummattikāya vā;
ตลฆาตกตุลฺยาว, สมุฎฺฐานาทโย มตาฯ
Talaghātakatulyāva, samuṭṭhānādayo matā.
จตุตฺถํฯ
Catutthaṃ.
๒๑๔๖.
2146.
องฺคุลีนํ ปน ทฺวินฺนํ, อคฺคปพฺพทฺวยาธิกํ;
Aṅgulīnaṃ pana dvinnaṃ, aggapabbadvayādhikaṃ;
ปาจิตฺติยํ ปเวเสตฺวา, ทกสุทฺธิํ กโรนฺติยาฯ
Pācittiyaṃ pavesetvā, dakasuddhiṃ karontiyā.
๒๑๔๗.
2147.
เอกิสฺสางฺคุลิยา ตีณิ, ปพฺพานิ ปน ทีฆโต;
Ekissāṅguliyā tīṇi, pabbāni pana dīghato;
ปาจิตฺติยํ ภเว สุทฺธิํ, ปเวเสตฺวาทิยนฺติยาฯ
Pācittiyaṃ bhave suddhiṃ, pavesetvādiyantiyā.
๒๑๔๘.
2148.
จตุนฺนํ วาปิ ติสฺสนฺนํ, เอกปพฺพมฺปิ ยา ปน;
Catunnaṃ vāpi tissannaṃ, ekapabbampi yā pana;
วิตฺถารโต ปเวเสติ, ตสฺสา ปาจิตฺติยํ สิยาฯ
Vitthārato paveseti, tassā pācittiyaṃ siyā.
๒๑๔๙.
2149.
อิติ สพฺพปฺปกาเรน, มหาปจฺจริยา ปน;
Iti sabbappakārena, mahāpaccariyā pana;
อภิพฺยตฺตตรํ กตฺวา, อยมโตฺถ วิภาวิโตฯ
Abhibyattataraṃ katvā, ayamattho vibhāvito.
๒๑๕๐.
2150.
โทโส ทฺวงฺคุลปเพฺพ วา, นตฺถิ อาพาธการณา;
Doso dvaṅgulapabbe vā, natthi ābādhakāraṇā;
อธิกมฺปิ ปเวเสตฺวา, ทกสุทฺธิํ กโรนฺติยาฯ
Adhikampi pavesetvā, dakasuddhiṃ karontiyā.
๒๑๕๑.
2151.
ตถา อุมฺมตฺติกาทีน-มนาปตฺติ ปกาสิตา;
Tathā ummattikādīna-manāpatti pakāsitā;
สมุฎฺฐานาทโย สเพฺพ, ตลฆาตสมา มตาฯ
Samuṭṭhānādayo sabbe, talaghātasamā matā.
ปญฺจมํฯ
Pañcamaṃ.
๒๑๕๒.
2152.
ภุญฺชโต ปน ภิกฺขุสฺส, ปานียํ วา วิธูปนํ;
Bhuñjato pana bhikkhussa, pānīyaṃ vā vidhūpanaṃ;
คเหตฺวา อุปติเฎฺฐยฺย, ตสฺสา ปาจิตฺติยํ สิยาฯ
Gahetvā upatiṭṭheyya, tassā pācittiyaṃ siyā.
๒๑๕๓.
2153.
คหิตา อุทเกเนว, ขีรตกฺกาทโย รสา;
Gahitā udakeneva, khīratakkādayo rasā;
‘‘พีชนี’’ติ จ ยา กาจิ, วตฺถโกณาทิ วุจฺจติฯ
‘‘Bījanī’’ti ca yā kāci, vatthakoṇādi vuccati.
๒๑๕๔.
2154.
หตฺถปาเส อิธฎฺฐาน-ปจฺจยาปตฺติ ทีปิตา;
Hatthapāse idhaṭṭhāna-paccayāpatti dīpitā;
ปหารปจฺจยา วุตฺตํ, ขนฺธเก ทุกฺกฎํ วิสุํฯ
Pahārapaccayā vuttaṃ, khandhake dukkaṭaṃ visuṃ.
๒๑๕๕.
2155.
หตฺถปาสํ ชหิตฺวา วา, อุปติฎฺฐนฺติยา ปน;
Hatthapāsaṃ jahitvā vā, upatiṭṭhantiyā pana;
ขาทโต ขาทนํ วาปิ, โหติ อาปตฺติ ทุกฺกฎํฯ
Khādato khādanaṃ vāpi, hoti āpatti dukkaṭaṃ.
๒๑๕๖.
2156.
น โทโส เทติ ทาเปติ, ตถา อุมฺมตฺติกาย วา;
Na doso deti dāpeti, tathā ummattikāya vā;
อิทํ เอฬกโลเมน, สมุฎฺฐานํ สมํ มตํฯ
Idaṃ eḷakalomena, samuṭṭhānaṃ samaṃ mataṃ.
ฉฎฺฐํฯ
Chaṭṭhaṃ.
๒๑๕๗.
2157.
วิญฺญตฺวา อามกํ ธญฺญํ, ภชฺชิตฺวา ยทิ ภิกฺขุนี;
Viññatvā āmakaṃ dhaññaṃ, bhajjitvā yadi bhikkhunī;
โกเฎฺฎตฺวา จ ปจิตฺวา จ, ปาจิตฺติ ปริภุญฺชติฯ
Koṭṭetvā ca pacitvā ca, pācitti paribhuñjati.
๒๑๕๘.
2158.
น เกวลํ ตุ ธญฺญานํ, คหเณเยว ทุกฺกฎํ;
Na kevalaṃ tu dhaññānaṃ, gahaṇeyeva dukkaṭaṃ;
หรเณปิ จ ธญฺญานํ, ตถา สุกฺขาปเน ปนฯ
Haraṇepi ca dhaññānaṃ, tathā sukkhāpane pana.
๒๑๕๙.
2159.
ภชฺชนตฺถาย ธญฺญานํ, กปลฺลุทฺธนสชฺชเน;
Bhajjanatthāya dhaññānaṃ, kapalluddhanasajjane;
อคฺคิสฺส กรเณ ทพฺพิ-สชฺชเน จ, กปลฺลเกฯ
Aggissa karaṇe dabbi-sajjane ca, kapallake.
๒๑๖๐.
2160.
ธญฺญปกฺขิปเน ตตฺถ, ทพฺพิยา ฆฎฺฎโกฎฺฎเน;
Dhaññapakkhipane tattha, dabbiyā ghaṭṭakoṭṭane;
ปโปฺผฎนาทิเก สพฺพ-ปโยเค ทุกฺกฎํ ภเวฯ
Papphoṭanādike sabba-payoge dukkaṭaṃ bhave.
๒๑๖๑.
2161.
โภชนเญฺจว วิญฺญตฺติ, ปมาณํ อิทเมตฺถ หิ;
Bhojanañceva viññatti, pamāṇaṃ idamettha hi;
วิญฺญตฺวา วา สยํ ตสฺมา, ภชฺชนาทีนิ อญฺญโตฯ
Viññatvā vā sayaṃ tasmā, bhajjanādīni aññato.
๒๑๖๒.
2162.
วิญฺญาเปตฺวา ปนญฺญาย, ภชฺชนาทีนิ วา สยํ;
Viññāpetvā panaññāya, bhajjanādīni vā sayaṃ;
การาเปตฺวาปิ กตฺวา วา, อโชฺฌหรติ ยา ปนฯ
Kārāpetvāpi katvā vā, ajjhoharati yā pana.
๒๑๖๓.
2163.
อโชฺฌหารปโยเคสุ, ตสฺสา ปาจิตฺติโย สิยุํ;
Ajjhohārapayogesu, tassā pācittiyo siyuṃ;
มาตรํ วาปิ ยาจิตฺวา, ปาจิตฺติ ปริภุญฺชติฯ
Mātaraṃ vāpi yācitvā, pācitti paribhuñjati.
๒๑๖๔.
2164.
ภชฺชนาทีนิ กตฺวา วา, การาเปตฺวาปิ วา ปน;
Bhajjanādīni katvā vā, kārāpetvāpi vā pana;
อวิญฺญตฺติ สยํ ลทฺธํ, ทุกฺกฎํ ปริภุญฺชติฯ
Aviññatti sayaṃ laddhaṃ, dukkaṭaṃ paribhuñjati.
๒๑๖๕.
2165.
วิญฺญตฺติยา ปนญฺญาย, ลทฺธํ ตาย สยมฺปิ วา;
Viññattiyā panaññāya, laddhaṃ tāya sayampi vā;
การาเปตฺวาปิ กตฺวา วา, ตถา อโชฺฌหรนฺติยาฯ
Kārāpetvāpi katvā vā, tathā ajjhoharantiyā.
๒๑๖๖.
2166.
เสทกมฺมาทิอตฺถาย, ธญฺญวิญฺญตฺติยา ปน;
Sedakammādiatthāya, dhaññaviññattiyā pana;
ฐเปตฺวา สตฺต ธญฺญานิ, เสสวิญฺญตฺติยาปิ จฯ
Ṭhapetvā satta dhaññāni, sesaviññattiyāpi ca.
๒๑๖๗.
2167.
อนาปตฺตีติ ญาตพฺพํ, ตถา อุมฺมตฺติกาย จ;
Anāpattīti ñātabbaṃ, tathā ummattikāya ca;
ญาตกานมฺปิ ธญฺญํ ตุ, อามกํ น จ วฎฺฎติฯ
Ñātakānampi dhaññaṃ tu, āmakaṃ na ca vaṭṭati.
๒๑๖๘.
2168.
วินา วิญฺญตฺติยา ลทฺธํ, นวกเมฺมสุ วฎฺฎติ;
Vinā viññattiyā laddhaṃ, navakammesu vaṭṭati;
สมุฎฺฐานาทโย สเพฺพ, อทฺธานสทิสา มตาฯ
Samuṭṭhānādayo sabbe, addhānasadisā matā.
สตฺตมํฯ
Sattamaṃ.
๒๑๖๙.
2169.
อุจฺจารํ วาปิ ปสฺสาวํ, สงฺการํ วา วิฆาสกํ;
Uccāraṃ vāpi passāvaṃ, saṅkāraṃ vā vighāsakaṃ;
ฉเฑฺฑยฺย วา ติโรกุเฎฺฎ, ฉฑฺฑาเปยฺย ปเรหิ วาฯ
Chaḍḍeyya vā tirokuṭṭe, chaḍḍāpeyya parehi vā.
๒๑๗๐.
2170.
โหติ ปาจิตฺติยํ ตสฺสา, ปากาเรปิ อยํ นโย;
Hoti pācittiyaṃ tassā, pākārepi ayaṃ nayo;
ฉเฑฺฑนฺติยา ปเนเกก-มเนกาปตฺติ ทีปิตาฯ
Chaḍḍentiyā panekeka-manekāpatti dīpitā.
๒๑๗๑.
2171.
เอตานิ ปน วตฺถูนิ, จตฺตาริ สกลานิปิ;
Etāni pana vatthūni, cattāri sakalānipi;
เอเกเนว ปโยเคน, เอกา ฉเฑฺฑนฺติยา สิยาฯ
Ekeneva payogena, ekā chaḍḍentiyā siyā.
๒๑๗๒.
2172.
อาณตฺติยมฺปิ เอเสว, นโย เญโยฺย วิภาวินา;
Āṇattiyampi eseva, nayo ñeyyo vibhāvinā;
ฉฑฺฑเน ทนฺตกฎฺฐสฺส, ปาจิตฺติ ปริทีปิตาฯ
Chaḍḍane dantakaṭṭhassa, pācitti paridīpitā.
๒๑๗๓.
2173.
สพฺพตฺถ ปน ภิกฺขุสฺส, โหติ อาปตฺติ ทุกฺกฎํ;
Sabbattha pana bhikkhussa, hoti āpatti dukkaṭaṃ;
อวลเญฺชปิ วา ฐาเน, โอโลเกตฺวาปิ วา ปนฯ
Avalañjepi vā ṭhāne, oloketvāpi vā pana.
๒๑๗๔.
2174.
ฉเฑฺฑนฺติยา อนาปตฺติ, ตถา อุมฺมตฺติกาย วา;
Chaḍḍentiyā anāpatti, tathā ummattikāya vā;
สญฺจริตฺตสมุฎฺฐานํ, กฺริยากฺริยมิทํ สิยาฯ
Sañcarittasamuṭṭhānaṃ, kriyākriyamidaṃ siyā.
อฎฺฐมํฯ
Aṭṭhamaṃ.
๒๑๗๕.
2175.
เขเตฺต วา นาฬิเกราทิ-อาราเม วาปิ ยา ปน;
Khette vā nāḷikerādi-ārāme vāpi yā pana;
โรปิเม หริตฎฺฐาเน, ยตฺถ กตฺถจิ ภิกฺขุนีฯ
Ropime haritaṭṭhāne, yattha katthaci bhikkhunī.
๒๑๗๖.
2176.
ตานิ จตฺตาริ วตฺถูนิ, สเจ ฉเฑฺฑติ วา สยํ;
Tāni cattāri vatthūni, sace chaḍḍeti vā sayaṃ;
ฉฑฺฑาเปติ ตถา วุตฺต-นโย อาปตฺตินิจฺฉโยฯ
Chaḍḍāpeti tathā vutta-nayo āpattinicchayo.
๒๑๗๗.
2177.
ภุญฺชมานา นิสีทิตฺวา, เขเตฺต ตุ หริเต ตถา;
Bhuñjamānā nisīditvā, khette tu harite tathā;
อุจฺฉุอาทีนิ ขาทนฺตี, คจฺฉนฺตี ปน ตตฺถ ยาฯ
Ucchuādīni khādantī, gacchantī pana tattha yā.
๒๑๗๘.
2178.
ฉเฑฺฑติ ยทิ อุจฺฉิฎฺฐํ, อุทกํ จลกานิ วา;
Chaḍḍeti yadi ucchiṭṭhaṃ, udakaṃ calakāni vā;
โหติ ปาจิตฺติยํ ตสฺสา, ภิกฺขุโน โหติ ทุกฺกฎํฯ
Hoti pācittiyaṃ tassā, bhikkhuno hoti dukkaṭaṃ.
๒๑๗๙.
2179.
ฉเฑฺฑนฺติยา สิยาปตฺติ, ฐาเน อนฺตมโส ชลํ;
Chaḍḍentiyā siyāpatti, ṭhāne antamaso jalaṃ;
ปิวิตฺวา มตฺถกจฺฉินฺนํ, นาฬิเกรมฺปิ ตาทิเสฯ
Pivitvā matthakacchinnaṃ, nāḷikerampi tādise.
๒๑๘๐.
2180.
กสิเต ตุ ปนฎฺฐาเน, พีชนิเกฺขปเน กเต;
Kasite tu panaṭṭhāne, bījanikkhepane kate;
น อุเฎฺฐตงฺกุรํ ยาว, สเพฺพสํ ตาว ทุกฺกฎํฯ
Na uṭṭhetaṅkuraṃ yāva, sabbesaṃ tāva dukkaṭaṃ.
๒๑๘๑.
2181.
ลายิตมฺปิ มนุสฺสานํ, เขตฺตํ รกฺขติ เจ ปุน;
Lāyitampi manussānaṃ, khettaṃ rakkhati ce puna;
โรหนตฺถาย ตตฺถสฺสา, ยถาวตฺถุกเมว หิฯ
Rohanatthāya tatthassā, yathāvatthukameva hi.
๒๑๘๒.
2182.
น โทโส ฉฑฺฑิเต เขเตฺต, สพฺพํ ฉเฑฺฑนฺติยา ปน;
Na doso chaḍḍite khette, sabbaṃ chaḍḍentiyā pana;
สมุฎฺฐานาทโย สเพฺพ, อฎฺฐเมน สมา มตาฯ
Samuṭṭhānādayo sabbe, aṭṭhamena samā matā.
นวมํฯ
Navamaṃ.
๒๑๘๓.
2183.
นจฺจํ วา ปน คีตํ วา, วาทิตํ วาปิ ภิกฺขุนี;
Naccaṃ vā pana gītaṃ vā, vāditaṃ vāpi bhikkhunī;
ทสฺสนตฺถาย คเจฺฉยฺย, ตสฺสา ปาจิตฺติยํ สิยาฯ
Dassanatthāya gaccheyya, tassā pācittiyaṃ siyā.
๒๑๘๔.
2184.
ทสฺสนตฺถาย นจฺจสฺส, คีตสฺส สวนาย จ;
Dassanatthāya naccassa, gītassa savanāya ca;
คจฺฉนฺติยา สิยา ตสฺสา, ปทวาเรน ทุกฺกฎํฯ
Gacchantiyā siyā tassā, padavārena dukkaṭaṃ.
๒๑๘๕.
2185.
สเจ เอกปโยเคน, โอโลเกนฺตี จ ปสฺสติ;
Sace ekapayogena, olokentī ca passati;
สุณาติ เตสํ คีตมฺปิ, เอกา ปาจิตฺติ ทีปิตาฯ
Suṇāti tesaṃ gītampi, ekā pācitti dīpitā.
๒๑๘๖.
2186.
อญฺญสฺมิมฺปิ ทิสาภาเค, นจฺจํ ปสฺสติ เจ ปน;
Aññasmimpi disābhāge, naccaṃ passati ce pana;
สุณาติ อญฺญโต คีตํ, วิสุํ ปาจิตฺติโย สิยุํฯ
Suṇāti aññato gītaṃ, visuṃ pācittiyo siyuṃ.
๒๑๘๗.
2187.
ปโยคคณนาเยตฺถ, อาปตฺติคณนา สิยา;
Payogagaṇanāyettha, āpattigaṇanā siyā;
นจฺจิตุํ คายิตุํ เนว, สยํ ลภติ ภิกฺขุนีฯ
Naccituṃ gāyituṃ neva, sayaṃ labhati bhikkhunī.
๒๑๘๘.
2188.
‘‘อญฺญํ นจฺจาติ วาเทหิ’’, อิติ วตฺตุํ น วฎฺฎติ;
‘‘Aññaṃ naccāti vādehi’’, iti vattuṃ na vaṭṭati;
‘‘อุปฎฺฐานํ กโรมา’’ติ, วุเตฺต วา สมฺปฎิจฺฉิตุํฯ
‘‘Upaṭṭhānaṃ karomā’’ti, vutte vā sampaṭicchituṃ.
๒๑๘๙.
2189.
ตสฺสา ปาจิตฺติ สพฺพตฺถ, ภิกฺขุโน โหติ ทุกฺกฎํ;
Tassā pācitti sabbattha, bhikkhuno hoti dukkaṭaṃ;
‘‘อุปฎฺฐานํ กโรมา’’ติ, วุเตฺต ภิกฺขุนิยา ปนฯ
‘‘Upaṭṭhānaṃ karomā’’ti, vutte bhikkhuniyā pana.
๒๑๙๐.
2190.
‘‘อุปฎฺฐานํ ปสตฺถ’’นฺติ, วตฺตุเมวํ ตุ วฎฺฎติ;
‘‘Upaṭṭhānaṃ pasattha’’nti, vattumevaṃ tu vaṭṭati;
อาราเมเยว ฐตฺวา วา, ยา ปสฺสติ สุณาติ วาฯ
Ārāmeyeva ṭhatvā vā, yā passati suṇāti vā.
๒๑๙๑.
2191.
อตฺตโน จ ฐิโตกาสํ, อาคนฺตฺวา จ ปโยชิตํ;
Attano ca ṭhitokāsaṃ, āgantvā ca payojitaṃ;
คนฺตฺวา ปสฺสนฺติยา วาปิ, ตถารูปา หิ การณาฯ
Gantvā passantiyā vāpi, tathārūpā hi kāraṇā.
๒๑๙๒.
2192.
ปสฺสนฺติยา ตถา มคฺคํ, นจฺจํ ปฎิปเถปิ จ;
Passantiyā tathā maggaṃ, naccaṃ paṭipathepi ca;
ตถา อุมฺมตฺติกาทีน-มนาปตฺตาปทาสุปิฯ
Tathā ummattikādīna-manāpattāpadāsupi.
๒๑๙๓.
2193.
อิทเมฬกโลเมน, สมุฎฺฐานํ สมํ มตํ;
Idameḷakalomena, samuṭṭhānaṃ samaṃ mataṃ;
โลกวชฺชมิทํ ปาป-จิตฺตเญฺจว ติเวทนํฯ
Lokavajjamidaṃ pāpa-cittañceva tivedanaṃ.
ทสมํฯ
Dasamaṃ.
ลสุณวโคฺค ปฐโมฯ
Lasuṇavaggo paṭhamo.
๒๑๙๔.
2194.
ยาธ รตฺตนฺธการสฺมิํ, อปฺปทีเป ปเนกิกา;
Yādha rattandhakārasmiṃ, appadīpe panekikā;
สนฺติฎฺฐติ สเจ สทฺธิํ, ปุริเสน จ ภิกฺขุนีฯ
Santiṭṭhati sace saddhiṃ, purisena ca bhikkhunī.
๒๑๙๕.
2195.
ตสฺสา ปาจิตฺติยํ วุตฺตํ, สทฺธิํ วา สลฺลปนฺติยา;
Tassā pācittiyaṃ vuttaṃ, saddhiṃ vā sallapantiyā;
หตฺถปาสํ สมาคนฺตฺวา, รหสฺสาทวเสน ตุฯ
Hatthapāsaṃ samāgantvā, rahassādavasena tu.
๒๑๙๖.
2196.
หตฺถปาสํ ชหิตฺวา วา, ปุริสสฺส สเจ ปน;
Hatthapāsaṃ jahitvā vā, purisassa sace pana;
อชหิตฺวาปิ วา ยกฺข-เปตาทีนมฺปิ ภิกฺขุนีฯ
Ajahitvāpi vā yakkha-petādīnampi bhikkhunī.
๒๑๙๗.
2197.
สนฺติฎฺฐติ จ ยา ตสฺสา, ทุกฺกฎํ ปริทีปิตํ;
Santiṭṭhati ca yā tassā, dukkaṭaṃ paridīpitaṃ;
อนาปตฺติ สเจ โกจิ, ทุติยา วิญฺญุ วิชฺชติฯ
Anāpatti sace koci, dutiyā viññu vijjati.
๒๑๙๘.
2198.
ตถา อุมฺมตฺติกาทีน-มถญฺญวิหิตาย วา;
Tathā ummattikādīna-mathaññavihitāya vā;
เถยฺยสตฺถสมุฎฺฐานํ, กฺริยํ สญฺญาวิโมกฺขกํฯ
Theyyasatthasamuṭṭhānaṃ, kriyaṃ saññāvimokkhakaṃ.
ปฐมํฯ
Paṭhamaṃ.
๒๑๙๙.
2199.
ทุติเย ตุ ‘‘ปฎิจฺฉเนฺน, โอกาเส’’ติ อิทํ ปน;
Dutiye tu ‘‘paṭicchanne, okāse’’ti idaṃ pana;
อธิกํ อิตรํ สพฺพํ, ปฐเมน สมํ มตํฯ
Adhikaṃ itaraṃ sabbaṃ, paṭhamena samaṃ mataṃ.
ทุติยํฯ
Dutiyaṃ.
๒๒๐๐.
2200.
ตติเยปิ จตุเตฺถปิ, อปุพฺพํ นตฺถิ กิญฺจิปิ;
Tatiyepi catutthepi, apubbaṃ natthi kiñcipi;
สมานํ ปฐเมเนว, สมุฎฺฐานาทินา สหฯ
Samānaṃ paṭhameneva, samuṭṭhānādinā saha.
ตติยจตุตฺถานิฯ
Tatiyacatutthāni.
๒๒๐๑.
2201.
ฉทนโนฺต นิสีทิตฺวา, อโนวสฺสปฺปเทสกํ;
Chadananto nisīditvā, anovassappadesakaṃ;
อโชฺฌกาเส นิสีทิตฺวา, อุปจารมฺปิ วา สเจฯ
Ajjhokāse nisīditvā, upacārampi vā sace.
๒๒๐๒.
2202.
อติกฺกเมติ ยา, โหติ, ทุกฺกฎํ ปฐเม ปเท;
Atikkameti yā, hoti, dukkaṭaṃ paṭhame pade;
ทุติเย จ ปเท ตสฺสา, ปาจิตฺติ ปริยาปุตาฯ
Dutiye ca pade tassā, pācitti pariyāputā.
๒๒๐๓.
2203.
ปลฺลงฺกสฺส อโนกาเส, ทุกฺกฎํ สมุทีริตํ;
Pallaṅkassa anokāse, dukkaṭaṃ samudīritaṃ;
ตถาปุเฎฺฐ อนาปุฎฺฐ-สญฺญาย วิจิกิจฺฉโตฯ
Tathāpuṭṭhe anāpuṭṭha-saññāya vicikicchato.
๒๒๐๔.
2204.
อสํหาริเมนาปตฺติ, คิลานายาปทาสุ วา;
Asaṃhārimenāpatti, gilānāyāpadāsu vā;
สมุฎฺฐานาทโย สเพฺพ, กถิเนน สมา มตาฯ
Samuṭṭhānādayo sabbe, kathinena samā matā.
ปญฺจมํฯ
Pañcamaṃ.
๒๒๐๕.
2205.
เอกาปตฺติ นิสีทิตฺวา, โหติ คจฺฉนฺติยา ปน;
Ekāpatti nisīditvā, hoti gacchantiyā pana;
เอกาว อนิสีทิตฺวา, นิปชฺชิตฺวา วชนฺติยาฯ
Ekāva anisīditvā, nipajjitvā vajantiyā.
๒๒๐๖.
2206.
นิสีทิตฺวา นิปชฺชิตฺวา, โหนฺติ คจฺฉนฺติยา ทุเว;
Nisīditvā nipajjitvā, honti gacchantiyā duve;
เสสํ อนนฺตเรเนว, สมุฎฺฐานาทินา สมํฯ
Sesaṃ anantareneva, samuṭṭhānādinā samaṃ.
ฉฎฺฐํฯ
Chaṭṭhaṃ.
๒๒๐๗.
2207.
ฉเฎฺฐน สตฺตมํ ตุลฺยํ, อฎฺฐเม นตฺถิ กิญฺจิปิ;
Chaṭṭhena sattamaṃ tulyaṃ, aṭṭhame natthi kiñcipi;
วตฺตพฺพํ ติสมุฎฺฐานํ, สจิตฺตํ ทุกฺขเวทนํฯ
Vattabbaṃ tisamuṭṭhānaṃ, sacittaṃ dukkhavedanaṃ.
สตฺตมฎฺฐมานิฯ
Sattamaṭṭhamāni.
๒๒๐๘.
2208.
นิรยพฺรหฺมจริเยหิ, อตฺตานํ วา ปรมฺปิ วา;
Nirayabrahmacariyehi, attānaṃ vā parampi vā;
อภิสเปยฺย ปาจิตฺติ, วาจโต วาจโต สิยาฯ
Abhisapeyya pācitti, vācato vācato siyā
๒๒๐๙.
2209.
ฐเปตฺวา นิรยเญฺจว, พฺรหฺมจริยญฺจ ยา ปน;
Ṭhapetvā nirayañceva, brahmacariyañca yā pana;
‘‘สุนขี สูกรี กากี, กาณา กุณี’’ติอาทินาฯ
‘‘Sunakhī sūkarī kākī, kāṇā kuṇī’’tiādinā.
๒๒๑๐.
2210.
อโกฺกสติ จ วาจาย, วาจายาปตฺติ ทุกฺกฎํ;
Akkosati ca vācāya, vācāyāpatti dukkaṭaṃ;
ติกปาจิตฺติยํ วุตฺตํ, เสสาย ติกทุกฺกฎํฯ
Tikapācittiyaṃ vuttaṃ, sesāya tikadukkaṭaṃ.
๒๒๑๑.
2211.
ปุรกฺขตฺวา วทนฺตีน-มตฺถธมฺมานุสาสนิํ;
Purakkhatvā vadantīna-matthadhammānusāsaniṃ;
อนาปตฺตฎฺฐเมเนว, สมุฎฺฐานาทโย สมาฯ
Anāpattaṭṭhameneva, samuṭṭhānādayo samā.
นวมํฯ
Navamaṃ.
๒๒๑๒.
2212.
โรทนฺติยา วธิตฺวา วา, ปาจิตฺติ ปริทีปิตา;
Rodantiyā vadhitvā vā, pācitti paridīpitā;
ทฺวีสุ เตสุ ปเนเกกํ, ทุกฺกฎํ ตุ กโรนฺติยาฯ
Dvīsu tesu panekekaṃ, dukkaṭaṃ tu karontiyā.
๒๒๑๓.
2213.
เสสมุตฺตานเมเวตฺถ, สมุฎฺฐานาทโย ปน;
Sesamuttānamevettha, samuṭṭhānādayo pana;
ธุรนิเกฺขปตุลฺยาว, กฺริยามตฺตํ วิเสสกํฯ
Dhuranikkhepatulyāva, kriyāmattaṃ visesakaṃ.
ทสมํฯ
Dasamaṃ.
อนฺธการวโคฺค ทุติโยฯ
Andhakāravaggo dutiyo.
๒๒๑๔.
2214.
นฺหายติ นคฺคา ยา ปน หุตฺวา;
Nhāyati naggā yā pana hutvā;
สพฺพปโยเค ทุกฺกฎมสฺสา;
Sabbapayoge dukkaṭamassā;
ตสฺส จ โวสาเน ชินวุตฺตํ;
Tassa ca vosāne jinavuttaṃ;
ภิกฺขุนิ โทสํ สา สมุเปติฯ
Bhikkhuni dosaṃ sā samupeti.
๒๒๑๕.
2215.
อจฺฉินฺนจีวรา นฎฺฐ-จีวรา อาปทาสุ วา;
Acchinnacīvarā naṭṭha-cīvarā āpadāsu vā;
น โทเสฬกโลเมน, สมุฎฺฐานาทโย สมาฯ
Na doseḷakalomena, samuṭṭhānādayo samā.
ปฐมํฯ
Paṭhamaṃ.
๒๒๑๖.
2216.
ทุติเย ปน วตฺตพฺพํ, อปุพฺพํ นตฺถิ กิญฺจิปิ;
Dutiye pana vattabbaṃ, apubbaṃ natthi kiñcipi;
สมุฎฺฐานาทโย สเพฺพ, สญฺจริตฺตสมา มตาฯ
Samuṭṭhānādayo sabbe, sañcarittasamā matā.
ทุติยํฯ
Dutiyaṃ.
๒๒๑๗.
2217.
ทุสฺสิพฺพิตํ วิสิเพฺพตฺวา, สิพฺพนตฺถาย จีวรํ;
Dussibbitaṃ visibbetvā, sibbanatthāya cīvaraṃ;
อนนฺตราย ตํ ปจฺฉา, ยา น สิเพฺพยฺย ภิกฺขุนีฯ
Anantarāya taṃ pacchā, yā na sibbeyya bhikkhunī.
๒๒๑๘.
2218.
ฐเปตฺวา จตุปญฺจาหํ, ‘‘น สิพฺพิสฺสามฺยห’’นฺติ หิ;
Ṭhapetvā catupañcāhaṃ, ‘‘na sibbissāmyaha’’nti hi;
ธุเร นิกฺขิตฺตมเตฺตว, ตสฺสา ปาจิตฺติยํ สิยาฯ
Dhure nikkhittamatteva, tassā pācittiyaṃ siyā.
๒๒๑๙.
2219.
ปจฺฉา สิพฺพติ ปาจิตฺติ, นิกฺขิปิตฺวา ธุรํ สเจ;
Pacchā sibbati pācitti, nikkhipitvā dhuraṃ sace;
ติกปาจิตฺติยํ วุตฺตํ, เสสาย ติกทุกฺกฎํฯ
Tikapācittiyaṃ vuttaṃ, sesāya tikadukkaṭaṃ.
๒๒๒๐.
2220.
วุตฺตํ อุภินฺนมญฺญสฺมิํ, ปริกฺขาเร ตุ ทุกฺกฎํ;
Vuttaṃ ubhinnamaññasmiṃ, parikkhāre tu dukkaṭaṃ;
อนาปตฺติ คิลานาย, อนฺตราเยปิ วา สติฯ
Anāpatti gilānāya, antarāyepi vā sati.
๒๒๒๑.
2221.
อติกฺกเมติ ปญฺจาหํ, กโรนฺตี วาปิ จีวรํ;
Atikkameti pañcāhaṃ, karontī vāpi cīvaraṃ;
ธุรนิเกฺขปนํ นาม, สมุฎฺฐานมิทํ มตํฯ
Dhuranikkhepanaṃ nāma, samuṭṭhānamidaṃ mataṃ.
ตติยํฯ
Tatiyaṃ.
๒๒๒๒.
2222.
ปญฺจาหิกํ ตุ สงฺฆาฎิ-จารํ ยาติกฺกเมยฺย หิ;
Pañcāhikaṃ tu saṅghāṭi-cāraṃ yātikkameyya hi;
โหติ ปาจิตฺติยาปตฺติ, ฉเฎฺฐ ตสฺสารุณุคฺคเมฯ
Hoti pācittiyāpatti, chaṭṭhe tassāruṇuggame.
๒๒๒๓.
2223.
เอกสฺมิํ จีวเร เอกา, ปญฺจ ปญฺจสุ ทีปิตา;
Ekasmiṃ cīvare ekā, pañca pañcasu dīpitā;
ติจีวรญฺจ สํกจฺจิ, ทกสาฎีติ ปญฺจ ตุฯ
Ticīvarañca saṃkacci, dakasāṭīti pañca tu.
๒๒๒๔.
2224.
ติกปาจิตฺติ ปญฺจาหา-นติกฺกเนฺต ทฺวิทุกฺกฎํ;
Tikapācitti pañcāhā-natikkante dvidukkaṭaṃ;
ปญฺจเม ทิวเส ปญฺจ, จีวรานิ นิเสวติฯ
Pañcame divase pañca, cīvarāni nisevati.
๒๒๒๕.
2225.
โอตาเปติ คิลานาย, อนาปตฺติปทาสุปิ;
Otāpeti gilānāya, anāpattipadāsupi;
สมุฎฺฐานาทโย สเพฺพ, กถิเนน สมา มตาฯ
Samuṭṭhānādayo sabbe, kathinena samā matā.
จตุตฺถํฯ
Catutthaṃ.
๒๒๒๖.
2226.
คเหตฺวา ยา อนาปุจฺฉา, สงฺกเมตพฺพจีวรํ;
Gahetvā yā anāpucchā, saṅkametabbacīvaraṃ;
ปริภุญฺชติ อญฺญิสฺสา, ตสฺสา ปาจิตฺติยํ สิยาฯ
Paribhuñjati aññissā, tassā pācittiyaṃ siyā.
๒๒๒๗.
2227.
ติกปาจิตฺติยํ วุตฺตํ, เสสาย ติกทุกฺกฎํ;
Tikapācittiyaṃ vuttaṃ, sesāya tikadukkaṭaṃ;
อจฺฉินฺนจีวรา นฎฺฐ-จีวรา อาปทาสุ วาฯ
Acchinnacīvarā naṭṭha-cīvarā āpadāsu vā.
๒๒๒๘.
2228.
ตถา อุมฺมตฺติกาทีน-มนาปตฺติ ปกาสิตา;
Tathā ummattikādīna-manāpatti pakāsitā;
กถิเนน สมุฎฺฐานํ, ตุลฺยเมตํ กฺริยากฺริยํฯ
Kathinena samuṭṭhānaṃ, tulyametaṃ kriyākriyaṃ.
ปญฺจมํฯ
Pañcamaṃ.
๒๒๒๙.
2229.
ยา หิ ภิกฺขุนิ สงฺฆสฺส, ลภิตพฺพํ ตุ จีวรํ;
Yā hi bhikkhuni saṅghassa, labhitabbaṃ tu cīvaraṃ;
นิวาเรติ สเจ ตสฺสา, ปาจิตฺติ ปริทีปเยฯ
Nivāreti sace tassā, pācitti paridīpaye.
๒๒๓๐.
2230.
คณสฺสาปิ จ เอกิสฺสา, ลาเภ อาปตฺติ ทุกฺกฎํ;
Gaṇassāpi ca ekissā, lābhe āpatti dukkaṭaṃ;
ตเถวญฺญํ ปริกฺขารํ, นิวาเรติ สเจ ปนฯ
Tathevaññaṃ parikkhāraṃ, nivāreti sace pana.
๒๒๓๑.
2231.
อานิสํสํ นิทเสฺสตฺวา, นิวาเรติ น โทสตา;
Ānisaṃsaṃ nidassetvā, nivāreti na dosatā;
อทินฺนาทานตุลฺยาว, สมุฎฺฐานาทโย มตาฯ
Adinnādānatulyāva, samuṭṭhānādayo matā.
ฉฎฺฐํฯ
Chaṭṭhaṃ.
๒๒๓๒.
2232.
จีวรานํ วิภงฺคํ ยา, ปฎิเสเธยฺย ธมฺมิกํ;
Cīvarānaṃ vibhaṅgaṃ yā, paṭisedheyya dhammikaṃ;
โหติ ปาจิตฺติยํ ตสฺสา, ทุกฺกฎํ ปริทีปิตํฯ
Hoti pācittiyaṃ tassā, dukkaṭaṃ paridīpitaṃ.
๒๒๓๓.
2233.
อธเมฺม ธมฺมสญฺญาย, อุโภ เวมติกาย วา;
Adhamme dhammasaññāya, ubho vematikāya vā;
อานิสํสํ นิทเสฺสตฺวา, ปฎิเสเธนฺติยา ปนฯ
Ānisaṃsaṃ nidassetvā, paṭisedhentiyā pana.
๒๒๓๔.
2234.
ตถา อุมฺมตฺติกาทีน-มนาปตฺติ ปกาสิตา;
Tathā ummattikādīna-manāpatti pakāsitā;
สมุฎฺฐานาทโย สเพฺพ, อนนฺตรสมา มตาฯ
Samuṭṭhānādayo sabbe, anantarasamā matā.
สตฺตมํฯ
Sattamaṃ.
๒๒๓๕.
2235.
นิวาสนูปคํ วาปิ, ตถา ปารุปนูปคํ;
Nivāsanūpagaṃ vāpi, tathā pārupanūpagaṃ;
กปฺปพินฺทุกตํ กิญฺจิ, มุญฺจิตฺวา สหธมฺมิเกฯ
Kappabindukataṃ kiñci, muñcitvā sahadhammike.
๒๒๓๖.
2236.
ปิตโรปิ ปนญฺญสฺส, ทเทยฺย ยทิ จีวรํ;
Pitaropi panaññassa, dadeyya yadi cīvaraṃ;
ยสฺส กสฺสจิ ตสฺสาปิ, ปาจิตฺติ ปริยาปุตาฯ
Yassa kassaci tassāpi, pācitti pariyāputā.
๒๒๓๗.
2237.
คณนาย วเสเนตฺถ, จีวรานํ ตุ ตา ปน;
Gaṇanāya vasenettha, cīvarānaṃ tu tā pana;
ปาจิตฺติโย คเณตพฺพา, ภิกฺขุโน ทุกฺกฎํ สิยาฯ
Pācittiyo gaṇetabbā, bhikkhuno dukkaṭaṃ siyā.
๒๒๓๘.
2238.
ตาวกาลิกมเญฺญส-มนาปตฺติ ททาติ เจ;
Tāvakālikamaññesa-manāpatti dadāti ce;
สญฺจริตฺตสมา วุตฺตา, สมุฎฺฐานาทโย นยาฯ
Sañcarittasamā vuttā, samuṭṭhānādayo nayā.
อฎฺฐมํฯ
Aṭṭhamaṃ.
๒๒๓๙.
2239.
จีวรสฺส วิภงฺคํ ยา, นิเสเธตฺวาน จีวเร;
Cīvarassa vibhaṅgaṃ yā, nisedhetvāna cīvare;
กาลํ อติกฺกเมยฺยสฺสา, ทุพฺพลาสาย โทสตาฯ
Kālaṃ atikkameyyassā, dubbalāsāya dosatā.
๒๒๔๐.
2240.
อทุพฺพเล ตุ จีวเร, สุทุพฺพลนฺติ เจตสา;
Adubbale tu cīvare, sudubbalanti cetasā;
อุโภสุ กงฺขิตาย วา, อโวจ ทุกฺกฎํ ชิโนฯ
Ubhosu kaṅkhitāya vā, avoca dukkaṭaṃ jino.
๒๒๔๑.
2241.
อานิสํสํ นิทเสฺสตฺวา, นิวาเรติ น โทสตา;
Ānisaṃsaṃ nidassetvā, nivāreti na dosatā;
อทินฺนาทานตุลฺยาว, สมุฎฺฐานาทโย มตาฯ
Adinnādānatulyāva, samuṭṭhānādayo matā.
นวมํฯ
Navamaṃ.
๒๒๔๒.
2242.
ธมฺมิกํ กถินุทฺธารํ, ยา นิวาเรยฺย ภิกฺขุนี;
Dhammikaṃ kathinuddhāraṃ, yā nivāreyya bhikkhunī;
ตสฺสา ปาจิตฺติยาปตฺติ, มุนิเนฺทน ปกาสิตาฯ
Tassā pācittiyāpatti, munindena pakāsitā.
๒๒๔๓.
2243.
อานิสํโส มหา โหติ, ยสฺส อตฺถารมูลโก;
Ānisaṃso mahā hoti, yassa atthāramūlako;
อุทฺธารมูลโก อโปฺป, น ทาตโพฺพ ปนีทิโสฯ
Uddhāramūlako appo, na dātabbo panīdiso.
๒๒๔๔.
2244.
อานิสํโส มหา โหติ, ยสฺส อุพฺภารมูลโก;
Ānisaṃso mahā hoti, yassa ubbhāramūlako;
อตฺถารมูลโก อโปฺป, ทาตโพฺพ เอวรูปโกฯ
Atthāramūlako appo, dātabbo evarūpako.
๒๒๔๕.
2245.
ตถา สมานิสํโสปิ, สทฺธาปาลนการณา;
Tathā samānisaṃsopi, saddhāpālanakāraṇā;
อานิสํสํ นิทเสฺสตฺวา, ปฎิเสเธติ วฎฺฎติฯ
Ānisaṃsaṃ nidassetvā, paṭisedheti vaṭṭati.
๒๒๔๖.
2246.
เสสํ ปน อเสเสน, สตฺตเมน สมํ มตํ;
Sesaṃ pana asesena, sattamena samaṃ mataṃ;
สมุฎฺฐานาทินา สทฺธิํ, อปุพฺพํ นตฺถิ กิญฺจิปิฯ
Samuṭṭhānādinā saddhiṃ, apubbaṃ natthi kiñcipi.
ทสมํฯ
Dasamaṃ.
นคฺควโคฺค ตติโยฯ
Naggavaggo tatiyo.
๒๒๔๗.
2247.
เอกาย ตุ นิปนฺนาย, อปรา วา นิปชฺชตุ;
Ekāya tu nipannāya, aparā vā nipajjatu;
นิปเชฺชยฺยุํ สเหว เทฺว, ทฺวินฺนํ ปาจิตฺติยํ สิยาฯ
Nipajjeyyuṃ saheva dve, dvinnaṃ pācittiyaṃ siyā.
๒๒๔๘.
2248.
อาปตฺติพหุกา เญยฺยา, ปุนปฺปุนํ นิปชฺชเน;
Āpattibahukā ñeyyā, punappunaṃ nipajjane;
เอกาย จ นิปนฺนาย, สเจ เอกา นิสีทติฯ
Ekāya ca nipannāya, sace ekā nisīdati.
๒๒๔๙.
2249.
อุโภ วาปิ นิสีทนฺติ, สมํ, อุมฺมตฺติกาย วา;
Ubho vāpi nisīdanti, samaṃ, ummattikāya vā;
อนาปตฺติ สมุฎฺฐานํ, เอฬเกน สมํ มตํฯ
Anāpatti samuṭṭhānaṃ, eḷakena samaṃ mataṃ.
ปฐมํฯ
Paṭhamaṃ.
๒๒๕๐.
2250.
ปาวารกฎสาราทิํ, สนฺถริตฺวา ปเนกกํ;
Pāvārakaṭasārādiṃ, santharitvā panekakaṃ;
สํหาริเมสุ เตเนว, ปารุปิตฺวา สเจ ปนฯ
Saṃhārimesu teneva, pārupitvā sace pana.
๒๒๕๑.
2251.
นิปชฺชนฺติ สเหว เทฺว, ตาสํ ปาจิตฺติยํ สิยา;
Nipajjanti saheva dve, tāsaṃ pācittiyaṃ siyā;
เอกสฺมิํ ทุกฺกฎํ ทฺวินฺนํ, วุตฺตํ ตุ ทฺวิกทุกฺกฎํฯ
Ekasmiṃ dukkaṭaṃ dvinnaṃ, vuttaṃ tu dvikadukkaṭaṃ.
๒๒๕๒.
2252.
ววตฺถานํ นิทเสฺสตฺวา, นิปชฺชนฺติ สเจ ปน;
Vavatthānaṃ nidassetvā, nipajjanti sace pana;
น โทสุมฺมตฺติกาทีนํ, เสสํ ตุลฺยํ ปนาทินาฯ
Na dosummattikādīnaṃ, sesaṃ tulyaṃ panādinā.
ทุติยํฯ
Dutiyaṃ.
๒๒๕๓.
2253.
ปุรโต จ อนาปุจฺฉา, ยทิ จงฺกมนาทโย;
Purato ca anāpucchā, yadi caṅkamanādayo;
กเรยฺย ปน ปาจิตฺติ, อญฺญิสฺสาผาสุการณาฯ
Kareyya pana pācitti, aññissāphāsukāraṇā.
๒๒๕๔.
2254.
นิวตฺตนานํ คณนาย ตสฺสา;
Nivattanānaṃ gaṇanāya tassā;
ปาจิตฺติยานํ คณนา จ เญยฺยา;
Pācittiyānaṃ gaṇanā ca ñeyyā;
ปโยคโตเยว ภวนฺติ โทสา;
Payogatoyeva bhavanti dosā;
นิปชฺชนฎฺฐานนิสีทนานํฯ
Nipajjanaṭṭhānanisīdanānaṃ.
๒๒๕๕.
2255.
อุเทฺทสาทีสุ ปาจิตฺติ, ปทานํ คณนาวสา;
Uddesādīsu pācitti, padānaṃ gaṇanāvasā;
ติกปาจิตฺติยํ วุตฺตํ, เสสาย ติกทุกฺกฎํฯ
Tikapācittiyaṃ vuttaṃ, sesāya tikadukkaṭaṃ.
๒๒๕๖.
2256.
น จ อผาสุกามาย, อาปุจฺฉา ปุรโต ปน;
Na ca aphāsukāmāya, āpucchā purato pana;
ตสฺสา จงฺกมนาทีนิ, อนาปตฺติ กโรนฺติยาฯ
Tassā caṅkamanādīni, anāpatti karontiyā.
๒๒๕๗.
2257.
อทินฺนาทานตุลฺยาว , สมุฎฺฐานาทโย นยา;
Adinnādānatulyāva , samuṭṭhānādayo nayā;
กฺริยากฺริยมิทํ ปาป- มานสํ ทุกฺขเวทนํฯ
Kriyākriyamidaṃ pāpa- mānasaṃ dukkhavedanaṃ.
ตติยํฯ
Tatiyaṃ.
๒๒๕๘.
2258.
สยํ อนนฺตรายา ยา, ทุกฺขิตํ สหชีวินิํ;
Sayaṃ anantarāyā yā, dukkhitaṃ sahajīviniṃ;
นุปฎฺฐาเปยฺย จญฺญาย, นุปเฎฺฐยฺย สยมฺปิ วาฯ
Nupaṭṭhāpeyya caññāya, nupaṭṭheyya sayampi vā.
๒๒๕๙.
2259.
ธุเร นิกฺขิตฺตมเตฺตว, ตสฺสา ปาจิตฺติยํ สิยา;
Dhure nikkhittamatteva, tassā pācittiyaṃ siyā;
อเนฺตวาสินิยา วาปิ, ทุกฺกฎํ อิตราย วาฯ
Antevāsiniyā vāpi, dukkaṭaṃ itarāya vā.
๒๒๖๐.
2260.
อนาปตฺติ คิลานาย, คเวสิตฺวาลภนฺติยา;
Anāpatti gilānāya, gavesitvālabhantiyā;
อาปทุมฺมตฺติกาทีนํ, ธุรนิเกฺขปโนทยํฯ
Āpadummattikādīnaṃ, dhuranikkhepanodayaṃ.
จตุตฺถํฯ
Catutthaṃ.
๒๒๖๑.
2261.
สกํ ปุคฺคลิกํ ทตฺวา, สกวาฎํ อุปสฺสยํ;
Sakaṃ puggalikaṃ datvā, sakavāṭaṃ upassayaṃ;
สยํ อุปสฺสยา ตมฺหา, นิกฺกฑฺฒติ สเจ ปนฯ
Sayaṃ upassayā tamhā, nikkaḍḍhati sace pana.
๒๒๖๒.
2262.
เอเกเนว ปโยเคน, ทฺวาราทีสุ พหูนิปิ;
Ekeneva payogena, dvārādīsu bahūnipi;
ตํ นิกฺกฑฺฒนฺติยา ตสฺสา, เอกํ ปาจิตฺติยํ สิยาฯ
Taṃ nikkaḍḍhantiyā tassā, ekaṃ pācittiyaṃ siyā.
๒๒๖๓.
2263.
ปโยคคณนาเยตฺถ, ปาจิตฺติคณนา มตา;
Payogagaṇanāyettha, pācittigaṇanā matā;
อาณตฺติยมฺปิ เอเสว, นโย วุโตฺต มเหสินาฯ
Āṇattiyampi eseva, nayo vutto mahesinā.
๒๒๖๔.
2264.
‘‘เอตฺตกาว อิมํ ทฺวารา, นิกฺกฑฺฒาหี’’ติ ภาสติ;
‘‘Ettakāva imaṃ dvārā, nikkaḍḍhāhī’’ti bhāsati;
เอกายาณตฺติยา ทฺวาร-คณนาปตฺติโย สิยุํฯ
Ekāyāṇattiyā dvāra-gaṇanāpattiyo siyuṃ.
๒๒๖๕.
2265.
ทุกฺกฎํ อกวาฎมฺหา, เสสาย ติกทุกฺกฎํ;
Dukkaṭaṃ akavāṭamhā, sesāya tikadukkaṭaṃ;
อุภินฺนํ ปน สพฺพตฺถ, ปริกฺขาเรสุ ทุกฺกฎํฯ
Ubhinnaṃ pana sabbattha, parikkhāresu dukkaṭaṃ.
๒๒๖๖.
2266.
เสสเมตฺถ อเสเสน, สมุฎฺฐานาทินา สห;
Sesamettha asesena, samuṭṭhānādinā saha;
สงฺฆิกา หิ วิหารสฺมา, นิกฺกฑฺฒนสมํ มตํฯ
Saṅghikā hi vihārasmā, nikkaḍḍhanasamaṃ mataṃ.
ปญฺจมํฯ
Pañcamaṃ.
๒๒๖๗.
2267.
ฉเฎฺฐ ปนิธ วตฺตพฺพํ, อปุพฺพํ นตฺถิ กิญฺจิปิ;
Chaṭṭhe panidha vattabbaṃ, apubbaṃ natthi kiñcipi;
สิกฺขาปเทนริฎฺฐสฺส, สทิโสว วินิจฺฉโยฯ
Sikkhāpadenariṭṭhassa, sadisova vinicchayo.
ฉฎฺฐํฯ
Chaṭṭhaṃ.
๒๒๖๘.
2268.
สาสงฺกสมฺมเต อโนฺต-รเฎฺฐ ภิกฺขุนิยา ปน;
Sāsaṅkasammate anto-raṭṭhe bhikkhuniyā pana;
จรนฺติยา สิยาปตฺติ, วินา สเตฺถน จาริกํฯ
Carantiyā siyāpatti, vinā satthena cārikaṃ.
๒๒๖๙.
2269.
คามนฺตรปเวเส จ, อรเญฺญ อทฺธโยชเน;
Gāmantarapavese ca, araññe addhayojane;
ปาจิตฺติยนโย เญโยฺย, ภิกฺขุนา วินยญฺญุนาฯ
Pācittiyanayo ñeyyo, bhikkhunā vinayaññunā.
๒๒๗๐.
2270.
น โทโส สห สเตฺถน, เขมฎฺฐานาปทาสุ วา;
Na doso saha satthena, khemaṭṭhānāpadāsu vā;
อิทํ เอฬกโลเมน, สมุฎฺฐานาทินา สมํฯ
Idaṃ eḷakalomena, samuṭṭhānādinā samaṃ.
สตฺตมํฯ
Sattamaṃ.
๒๒๗๑.
2271.
อฎฺฐเม นวเม วาปิ, อนุตฺตานํ น วิชฺชติ;
Aṭṭhame navame vāpi, anuttānaṃ na vijjati;
สตฺตเมน สมานานิ, สมุฎฺฐานาทินา สหฯ
Sattamena samānāni, samuṭṭhānādinā saha.
อฎฺฐมนวมานิฯ
Aṭṭhamanavamāni.
๒๒๗๒.
2272.
ปาจิตฺติ ธุรนิเกฺขเป, ‘‘น คมิสฺสามฺยห’’นฺติ จ;
Pācitti dhuranikkhepe, ‘‘na gamissāmyaha’’nti ca;
กตฺวา จ ธุรนิเกฺขปํ, ปจฺฉา คจฺฉนฺติยา ตถาฯ
Katvā ca dhuranikkhepaṃ, pacchā gacchantiyā tathā.
๒๒๗๓.
2273.
โยชนานิ ปวาเรตฺวา, ปญฺจ คนฺตุมฺปิ วฎฺฎติ;
Yojanāni pavāretvā, pañca gantumpi vaṭṭati;
ฉสุ วตฺตพฺพเมวตฺถิ, กินฺนุ นามิธ ตํ สิยาฯ
Chasu vattabbamevatthi, kinnu nāmidha taṃ siyā.
๒๒๗๔.
2274.
ตีณิ คนฺตฺวา จ เตเนว, ปจฺจาคนฺตุํ น วฎฺฎติ;
Tīṇi gantvā ca teneva, paccāgantuṃ na vaṭṭati;
อเญฺญน ปน มเคฺคน, ปจฺฉาคจฺฉติ วฎฺฎติฯ
Aññena pana maggena, pacchāgacchati vaṭṭati.
๒๒๗๕.
2275.
อนาปตฺตนฺตรายสฺมิํ, ตสฺสา ทสวิเธ สติ;
Anāpattantarāyasmiṃ, tassā dasavidhe sati;
อาปทาสุ คิลานาย, อลาเภ ทุติยาย วาฯ
Āpadāsu gilānāya, alābhe dutiyāya vā.
๒๒๗๖.
2276.
ราชโจรมนุสฺสคฺคิ-โตยวาฬสรีสปา;
Rājacoramanussaggi-toyavāḷasarīsapā;
มนุสฺสชีวิตพฺรหฺม-จริยสฺสนฺตรายิกาฯ
Manussajīvitabrahma-cariyassantarāyikā.
๒๒๗๗.
2277.
สมุฎฺฐานาทินา ตุลฺยํ, ปฐมนฺติมวตฺถุนา;
Samuṭṭhānādinā tulyaṃ, paṭhamantimavatthunā;
อยเมว วิเสโส หิ, อกฺริยํ ทุกฺขเวทนํฯ
Ayameva viseso hi, akriyaṃ dukkhavedanaṃ.
ทสมํฯ
Dasamaṃ.
ตุวฎฺฎวโคฺค จตุโตฺถฯ
Tuvaṭṭavaggo catuttho.
๒๒๗๘.
2278.
ราชาคารํ จิตฺตาคารํ, อารามํ กีฬุยฺยานํ วา;
Rājāgāraṃ cittāgāraṃ, ārāmaṃ kīḷuyyānaṃ vā;
กีฬาวาปิํ นานาการํ, ทฎฺฐุํ คจฺฉนฺตินํ ตานิฯ
Kīḷāvāpiṃ nānākāraṃ, daṭṭhuṃ gacchantinaṃ tāni.
๒๒๗๙.
2279.
นิทฺทิฎฺฐํ มุนินา ตาสํ, ทุกฺกฎํ ตุ ปเท ปเท;
Niddiṭṭhaṃ muninā tāsaṃ, dukkaṭaṃ tu pade pade;
ปทํ อนุทฺธริตฺวาว, สเจ ปสฺสนฺติ ปญฺจปิฯ
Padaṃ anuddharitvāva, sace passanti pañcapi.
๒๒๘๐.
2280.
เอกาเยว ปนาปตฺติ, ปาจิตฺติ ปริทีปิตา;
Ekāyeva panāpatti, pācitti paridīpitā;
คนฺตฺวา ปสฺสนฺติ เจ ตํ ตํ, ปาเฎกฺกาปตฺติโย สิยุํฯ
Gantvā passanti ce taṃ taṃ, pāṭekkāpattiyo siyuṃ.
๒๒๘๑.
2281.
ปโยคพหุตายาปิ, ปาจิตฺติพหุตา สิยา;
Payogabahutāyāpi, pācittibahutā siyā;
ภิกฺขุสฺส ปน สพฺพตฺถ, โหติ อาปตฺติ ทุกฺกฎํฯ
Bhikkhussa pana sabbattha, hoti āpatti dukkaṭaṃ.
๒๒๘๒.
2282.
อวเสโส อนาปตฺติ-กถามคฺควินิจฺฉโย;
Avaseso anāpatti-kathāmaggavinicchayo;
นจฺจทสฺสนตุโลฺยว, สมุฎฺฐานาทินา สหฯ
Naccadassanatulyova, samuṭṭhānādinā saha.
ปฐมํฯ
Paṭhamaṃ.
๒๒๘๓.
2283.
อาสนฺทิํ วา ปลฺลงฺกํ วา, มาณนาตีตํ วาฬูเปตํ;
Āsandiṃ vā pallaṅkaṃ vā, māṇanātītaṃ vāḷūpetaṃ;
เสวนฺตีนํ ยาสํ ตาสํ, ปาจิตฺตาปตฺติํ สตฺถาหฯ
Sevantīnaṃ yāsaṃ tāsaṃ, pācittāpattiṃ satthāha.
๒๒๘๔.
2284.
นิสีทนสฺสาปิ นิปชฺชนสฺส;
Nisīdanassāpi nipajjanassa;
ปโยคพาหุลฺลวเสน โหติ;
Payogabāhullavasena hoti;
อิเจฺจวมจฺจนฺตยเสน วุตฺตา;
Iccevamaccantayasena vuttā;
ปาจิตฺติยานํ คณนา ปเนวํฯ
Pācittiyānaṃ gaṇanā panevaṃ.
๒๒๘๕.
2285.
ปาเท อาสนฺทิยา เฉตฺวา, ภิตฺวา ปลฺลงฺกวาฬเก;
Pāde āsandiyā chetvā, bhitvā pallaṅkavāḷake;
อนาปตฺติ สมุฎฺฐาน-มนนฺตรสมํ มตํฯ
Anāpatti samuṭṭhāna-manantarasamaṃ mataṃ.
ทุติยํฯ
Dutiyaṃ.
๒๒๘๖.
2286.
ฉนฺนํ อญฺญตรํ สุตฺตํ, ยทิ กนฺตติ ภิกฺขุนี;
Channaṃ aññataraṃ suttaṃ, yadi kantati bhikkhunī;
ยตฺตกํ อญฺฉิตํ หตฺถา, ตสฺมิํ ตกฺกมฺหิ เวฐิเตฯ
Yattakaṃ añchitaṃ hatthā, tasmiṃ takkamhi veṭhite.
๒๒๘๗.
2287.
เอกา ปาจิตฺติ นิทฺทิฎฺฐา, สุตฺตกนฺตนโต ปน;
Ekā pācitti niddiṭṭhā, suttakantanato pana;
สพฺพปุพฺพปโยเคสุ, ทุกฺกฎํ หตฺถวารโตฯ
Sabbapubbapayogesu, dukkaṭaṃ hatthavārato.
๒๒๘๘.
2288.
น โทโส กนฺติตํ สุตฺตํ, ปุน กนฺตนฺติยา ปน;
Na doso kantitaṃ suttaṃ, puna kantantiyā pana;
อิทํ เอฬกโลเมน, สมุฎฺฐานาทินา สมํฯ
Idaṃ eḷakalomena, samuṭṭhānādinā samaṃ.
ตติยํฯ
Tatiyaṃ.
๒๒๘๙.
2289.
โกฎฺฎนํ ตณฺฑุลานํ ตุ, อาทิํ กตฺวาน ทุกฺกฎํ;
Koṭṭanaṃ taṇḍulānaṃ tu, ādiṃ katvāna dukkaṭaṃ;
สพฺพปุพฺพปโยเคสุ, เวยฺยาวจฺจํ กโรนฺติยาฯ
Sabbapubbapayogesu, veyyāvaccaṃ karontiyā.
๒๒๙๐.
2290.
ภาชนานิ คเณตฺวาว, ปาจิตฺติ ยาคุอาทิสุ;
Bhājanāni gaṇetvāva, pācitti yāguādisu;
ขชฺชกาทีสุ รูปานํ, คณนาย หิ ทีปเยฯ
Khajjakādīsu rūpānaṃ, gaṇanāya hi dīpaye.
๒๒๙๑.
2291.
สเจ มาตาปิตูนมฺปิ, อาคตานํ ปนตฺตโน;
Sace mātāpitūnampi, āgatānaṃ panattano;
กิญฺจิ กมฺมํ อกาเรตฺวา, กิญฺจิ กาตุํ น วฎฺฎติฯ
Kiñci kammaṃ akāretvā, kiñci kātuṃ na vaṭṭati.
๒๒๙๒.
2292.
สงฺฆสฺส ยาคุปาเน วา, สงฺฆภเตฺตปิ วา ตถา;
Saṅghassa yāgupāne vā, saṅghabhattepi vā tathā;
เจติยสฺส จ ปูชาย, เวยฺยาวจฺจกรสฺส วาฯ
Cetiyassa ca pūjāya, veyyāvaccakarassa vā.
๒๒๙๓.
2293.
อตฺตโน จ อนาปตฺติ, ตถา อุมฺมตฺติกาย วา;
Attano ca anāpatti, tathā ummattikāya vā;
สมุฎฺฐานาทโย สเพฺพ, ตติเยน สมา มตาฯ
Samuṭṭhānādayo sabbe, tatiyena samā matā.
จตุตฺถํฯ
Catutthaṃ.
๒๒๙๔.
2294.
ปาจิตฺติ ธุรนิเกฺขเป, ยถา จีวรสิพฺพเน;
Pācitti dhuranikkhepe, yathā cīvarasibbane;
ตถา อิธ ปเนกาหํ, ปริหาโร น ลพฺภติฯ
Tathā idha panekāhaṃ, parihāro na labbhati.
๒๒๙๕.
2295.
เสสํ วุตฺตนเยเนว, ตตฺถ จีวรสิพฺพเน;
Sesaṃ vuttanayeneva, tattha cīvarasibbane;
สมุฎฺฐานาทินา สทฺธิํ, เวทิตพฺพํ วิภาวินา;
Samuṭṭhānādinā saddhiṃ, veditabbaṃ vibhāvinā;
ปญฺจมํฯ
Pañcamaṃ.
๒๒๙๖.
2296.
กาเยน กายพเทฺธน, ตถา นิสฺสคฺคิเยน วา;
Kāyena kāyabaddhena, tathā nissaggiyena vā;
คิหีนํ ปน ยํ กิญฺจิ, ทนฺตโปโนทกํ วินาฯ
Gihīnaṃ pana yaṃ kiñci, dantaponodakaṃ vinā.
๒๒๙๗.
2297.
อโชฺฌหรณิยํ อญฺญํ, อเญฺญสํ ตุ ททาติ ยา;
Ajjhoharaṇiyaṃ aññaṃ, aññesaṃ tu dadāti yā;
โหติ ปาจิตฺติยํ ตสฺสา, ฐเปตฺวา สหธมฺมิเกฯ
Hoti pācittiyaṃ tassā, ṭhapetvā sahadhammike.
๒๒๙๘.
2298.
ทนฺตกโฎฺฐทเก วุตฺตํ, ทุกฺกฎํ มุนินา อิธ;
Dantakaṭṭhodake vuttaṃ, dukkaṭaṃ muninā idha;
ยา น เทติ จ ทาเปติ, นิกฺขมิตฺวาปิ เทนฺติยาฯ
Yā na deti ca dāpeti, nikkhamitvāpi dentiyā.
๒๒๙๙.
2299.
เทติ พาหิรเลปํ วา, น โทสุมฺมตฺติกาย วา;
Deti bāhiralepaṃ vā, na dosummattikāya vā;
สมุฎฺฐานาทโย สเพฺพ, ตติเยน สมา มตาฯ
Samuṭṭhānādayo sabbe, tatiyena samā matā.
ฉฎฺฐํฯ
Chaṭṭhaṃ.
๒๓๐๐.
2300.
อทตฺวา ปริภุเญฺชยฺย, ยา จาวสถจีวรํ;
Adatvā paribhuñjeyya, yā cāvasathacīvaraṃ;
ทิวเส ตุ จตุเตฺถ ตํ, โธวิตฺวา ปุน จีวรํฯ
Divase tu catutthe taṃ, dhovitvā puna cīvaraṃ.
๒๓๐๑.
2301.
สามเณราย วา อนฺต-มโส อุตุนิยา สเจ;
Sāmaṇerāya vā anta-maso utuniyā sace;
ตสฺสา ปาจิตฺติยํ วุตฺตํ, ติกปาจิตฺติยํ สิยาฯ
Tassā pācittiyaṃ vuttaṃ, tikapācittiyaṃ siyā.
๒๓๐๒.
2302.
ตสฺสา นิสฺสชฺชิเต ตสฺมิํ, วุตฺตํ ตุ ทฺวิกทุกฺกฎํ;
Tassā nissajjite tasmiṃ, vuttaṃ tu dvikadukkaṭaṃ;
อุตุนีนํ อภาเว ตุ, อญฺญาสํ ปุน ปริยเยฯ
Utunīnaṃ abhāve tu, aññāsaṃ puna pariyaye.
๒๓๐๓.
2303.
อจฺฉินฺนจีวราทีน-มนาปตฺตาปทาสุปิ;
Acchinnacīvarādīna-manāpattāpadāsupi;
สมุฎฺฐานาทโย สเพฺพ, กถิเนน สมา มตาฯ
Samuṭṭhānādayo sabbe, kathinena samā matā.
สตฺตมํฯ
Sattamaṃ.
๒๓๐๔.
2304.
อทตฺวา รกฺขณตฺถาย, วิหารํ สกวาฎกํ;
Adatvā rakkhaṇatthāya, vihāraṃ sakavāṭakaṃ;
โหติ ปาจิตฺติยํ ตสฺสา, จาริกํ ปกฺกมนฺติยาฯ
Hoti pācittiyaṃ tassā, cārikaṃ pakkamantiyā.
๒๓๐๕.
2305.
อตฺตโน คามโต อญฺญํ, คามํ คจฺฉนฺติยา ปน;
Attano gāmato aññaṃ, gāmaṃ gacchantiyā pana;
ปริกฺขิตฺตวิหารสฺส, ปริเกฺขปมฺปิ วา ตถาฯ
Parikkhittavihārassa, parikkhepampi vā tathā.
๒๓๐๖.
2306.
อิตรสฺสุปจารํ วา, ปฐเมน ปเทน ตํ;
Itarassupacāraṃ vā, paṭhamena padena taṃ;
ทุกฺกฎํ สมติกฺกเนฺต, ปาจิตฺติ ทุติเยน ตุฯ
Dukkaṭaṃ samatikkante, pācitti dutiyena tu.
๒๓๐๗.
2307.
อกวาฎพนฺธนสฺมิํ, ทุกฺกฎํ ปริทีปิตํ;
Akavāṭabandhanasmiṃ, dukkaṭaṃ paridīpitaṃ;
อนฺตราเย อนาปตฺติ, ชคฺคิกํ อลภนฺติยาฯ
Antarāye anāpatti, jaggikaṃ alabhantiyā.
๒๓๐๘.
2308.
อาปทาสุ คิลานาย, ตถา อุมฺมตฺติกาย วา;
Āpadāsu gilānāya, tathā ummattikāya vā;
สมุฎฺฐานาทโย สเพฺพ, กถิเนน สมา มตาฯ
Samuṭṭhānādayo sabbe, kathinena samā matā.
อฎฺฐมํฯ
Aṭṭhamaṃ.
๒๓๐๙.
2309.
หตฺถิอสฺสรถาทีหิ, สํยุตฺตํ สิปฺปเมว วา;
Hatthiassarathādīhi, saṃyuttaṃ sippameva vā;
ปรูปฆาตกํ มนฺตา-คทโยคปฺปเภทกํฯ
Parūpaghātakaṃ mantā-gadayogappabhedakaṃ.
๒๓๑๐.
2310.
ปริยาปุเณยฺย เจ กิญฺจิ, ยสฺส กสฺสจิ สนฺติเก;
Pariyāpuṇeyya ce kiñci, yassa kassaci santike;
โหติ ปาจิตฺติยํ ตสฺสา, ปทาทีนํ วเสนิธฯ
Hoti pācittiyaṃ tassā, padādīnaṃ vasenidha.
๒๓๑๑.
2311.
เลเข ปน อนาปตฺติ, ธารณาย จ คุตฺติยา;
Lekhe pana anāpatti, dhāraṇāya ca guttiyā;
ปริเตฺตสุ จ สเพฺพสุ, ตถา อุมฺมตฺติกาย วาฯ
Parittesu ca sabbesu, tathā ummattikāya vā.
นวมํฯ
Navamaṃ.
๒๓๑๒.
2312.
ทสเม นตฺถิ วตฺตพฺพํ, นวเมน สมํ อิทํ;
Dasame natthi vattabbaṃ, navamena samaṃ idaṃ;
สมุฎฺฐานาทโย ทฺวินฺนํ, ปทโสธมฺมสาทิสาฯ
Samuṭṭhānādayo dvinnaṃ, padasodhammasādisā.
ทสมํฯ
Dasamaṃ.
จิตฺตาคารวโคฺค ปญฺจโมฯ
Cittāgāravaggo pañcamo.
๒๓๑๓.
2313.
สภิกฺขุกํ ปนารามํ, ชานิตฺวา ปวิสนฺติยา;
Sabhikkhukaṃ panārāmaṃ, jānitvā pavisantiyā;
อนาปุจฺฉาว ยํ กิญฺจิ, ปาจิตฺติ ปริยาปุตาฯ
Anāpucchāva yaṃ kiñci, pācitti pariyāputā.
๒๓๑๔.
2314.
สเจ อนฺตมโส รุกฺข-มูลสฺสปิ จ ภิกฺขุนี;
Sace antamaso rukkha-mūlassapi ca bhikkhunī;
อนาปุจฺฉา ปริเกฺขปํ, อติกฺกาเมติ ยา ปนฯ
Anāpucchā parikkhepaṃ, atikkāmeti yā pana.
๒๓๑๕.
2315.
อุปจาโรกฺกเม วาปิ, อปริกฺขิตฺตกสฺส ตุ;
Upacārokkame vāpi, aparikkhittakassa tu;
ทุกฺกฎํ ปฐเม ปาเท, ปาจิตฺติ ทุติเย สิยาฯ
Dukkaṭaṃ paṭhame pāde, pācitti dutiye siyā.
๒๓๑๖.
2316.
อภิกฺขุเก สภิกฺขูติ, สญฺญาย ปนุโภสุปิ;
Abhikkhuke sabhikkhūti, saññāya panubhosupi;
ชาตกงฺขาย วา ตสฺสา, โหติ อาปตฺติ ทุกฺกฎํฯ
Jātakaṅkhāya vā tassā, hoti āpatti dukkaṭaṃ.
๒๓๑๗.
2317.
ปฐมํ ปวิสนฺตีนํ, ตาสํ สีสานุโลกิกา;
Paṭhamaṃ pavisantīnaṃ, tāsaṃ sīsānulokikā;
ตา สนฺนิปติตา ยตฺถ, ตาสํ คจฺฉติ สนฺติกํฯ
Tā sannipatitā yattha, tāsaṃ gacchati santikaṃ.
๒๓๑๘.
2318.
สนฺตํ ภิกฺขุํ ปนาปุจฺฉา, มโคฺค วารามมชฺฌโต;
Santaṃ bhikkhuṃ panāpucchā, maggo vārāmamajjhato;
เตน คจฺฉนฺติยา วาปิ, อาปทาสุ วิสนฺติยาฯ
Tena gacchantiyā vāpi, āpadāsu visantiyā.
๒๓๑๙.
2319.
ตถา อุมฺมตฺติกาทีน-มนาปตฺติ ปกาสิตา;
Tathā ummattikādīna-manāpatti pakāsitā;
ธุรนิเกฺขปตุลฺยาว, สมุฎฺฐานาทโย นยาฯ
Dhuranikkhepatulyāva, samuṭṭhānādayo nayā.
ปฐมํฯ
Paṭhamaṃ.
๒๓๒๐.
2320.
อโกฺกเสยฺย จ ยา ภิกฺขุํ, ปริภาเสยฺย วา ปน;
Akkoseyya ca yā bhikkhuṃ, paribhāseyya vā pana;
ติกปาจิตฺติยํ ตสฺสา, เสเส จ ติกทุกฺกฎํฯ
Tikapācittiyaṃ tassā, sese ca tikadukkaṭaṃ.
๒๓๒๑.
2321.
ปุรกฺขตฺวา วทนฺตีน-;
Purakkhatvā vadantīna-;
มตฺถธมฺมานุสาสนิํ;
Matthadhammānusāsaniṃ;
น โทโสมสวาเทน;
Na dosomasavādena;
ตุโลฺย เสสนโย มโตฯ
Tulyo sesanayo mato.
ทุติยํฯ
Dutiyaṃ.
๒๓๒๒.
2322.
ยา สงฺฆํ ปริภาเสยฺย, ตสฺสา ปาจิตฺติยํ สิยา;
Yā saṅghaṃ paribhāseyya, tassā pācittiyaṃ siyā;
เอกํ สมฺพหุลา วาปิ, ตเถว อิตราย วาฯ
Ekaṃ sambahulā vāpi, tatheva itarāya vā.
๒๓๒๓.
2323.
ปริภาสนฺติยา ตสฺสา, ทุกฺกฎํ ปริทีปิตํ;
Paribhāsantiyā tassā, dukkaṭaṃ paridīpitaṃ;
เสสํ อนนฺตเรเนว, สมุฎฺฐานาทินา สมํฯ
Sesaṃ anantareneva, samuṭṭhānādinā samaṃ.
ตติยํฯ
Tatiyaṃ.
๒๓๒๔.
2324.
นิมนฺติตาปิ วา สเจ, ปวาริตาปิ วา ปน;
Nimantitāpi vā sace, pavāritāpi vā pana;
นิมนฺตนปวารณา, อุโภปิ วุตฺตลกฺขณาฯ
Nimantanapavāraṇā, ubhopi vuttalakkhaṇā.
๒๓๒๕.
2325.
ปุเรภตฺตํ ตุ ยาคุญฺจ, ฐเปตฺวา กาลิกตฺตยํ;
Purebhattaṃ tu yāguñca, ṭhapetvā kālikattayaṃ;
ยา จโชฺฌหรณตฺถาย, ยํ กิญฺจิ ปน อามิสํฯ
Yā cajjhoharaṇatthāya, yaṃ kiñci pana āmisaṃ.
๒๓๒๖.
2326.
ปฎิคฺคณฺหาติ เจ ตสฺสา, คหเณ ทุกฺกฎํ สิยา;
Paṭiggaṇhāti ce tassā, gahaṇe dukkaṭaṃ siyā;
อโชฺฌหารวเสเนตฺถ, ปาจิตฺติ ปริทีปิตาฯ
Ajjhohāravasenettha, pācitti paridīpitā.
๒๓๒๗.
2327.
กาลิกานิ จ ตีเณว, อาหารตฺถาย คณฺหติ;
Kālikāni ca tīṇeva, āhāratthāya gaṇhati;
คหเณ ทุกฺกฎํ วุตฺตํ, ตถา อโชฺฌหรนฺติยาฯ
Gahaṇe dukkaṭaṃ vuttaṃ, tathā ajjhoharantiyā.
๒๓๒๘.
2328.
นิมนฺติตา ยา ปน อปฺปวาริตา;
Nimantitā yā pana appavāritā;
สเจปิ ยาคุํ ปิวตีธ วฎฺฎติ;
Sacepi yāguṃ pivatīdha vaṭṭati;
ตถา กเถตฺวา ปุน สามิกสฺส วา;
Tathā kathetvā puna sāmikassa vā;
สเจปิ สา ภุญฺชติ อญฺญโภชนํฯ
Sacepi sā bhuñjati aññabhojanaṃ.
๒๓๒๙.
2329.
กาลิกานิ จ ตีเณว, ปจฺจเย สติ ภุญฺชติ;
Kālikāni ca tīṇeva, paccaye sati bhuñjati;
ตถา อุมฺมตฺติกาทีนํ, อนาปตฺติ ปกาสิตาฯ
Tathā ummattikādīnaṃ, anāpatti pakāsitā.
๒๓๓๐.
2330.
สมุฎฺฐานมิทํ ตุลฺยํ, อทฺธาเนน กฺริยากฺริยํ;
Samuṭṭhānamidaṃ tulyaṃ, addhānena kriyākriyaṃ;
นิมนฺติตา อนาปุจฺฉา, สามิํ ภุญฺชติ เจ ปนฯ
Nimantitā anāpucchā, sāmiṃ bhuñjati ce pana.
๒๓๓๑.
2331.
กปฺปิยํ ปน กาเรตฺวา, อกาเรตฺวาปิ วา ยทิ;
Kappiyaṃ pana kāretvā, akāretvāpi vā yadi;
ปริภุญฺชติ ยา ตสฺสา, ปาจิตฺติ กฺริยโต สิยาฯ
Paribhuñjati yā tassā, pācitti kriyato siyā.
จตุตฺถํฯ
Catutthaṃ.
๒๓๓๒.
2332.
ภิกฺขุนีนํ อวณฺณํ วา, ปาจิตฺติ กุลสนฺติเก;
Bhikkhunīnaṃ avaṇṇaṃ vā, pācitti kulasantike;
กุลสฺสาวณฺณนํ วาปิ, ภิกฺขุนีนํ วทนฺติยาฯ
Kulassāvaṇṇanaṃ vāpi, bhikkhunīnaṃ vadantiyā.
๒๓๓๓.
2333.
สนฺตํ ภาสนฺติยา โทสํ, น โทสุมฺมตฺติกาย วา;
Santaṃ bhāsantiyā dosaṃ, na dosummattikāya vā;
โอมสวาทตุลฺยาว, สมุฎฺฐานาทโย นยาฯ
Omasavādatulyāva, samuṭṭhānādayo nayā.
ปญฺจมํฯ
Pañcamaṃ.
๒๓๓๔.
2334.
อทฺธโยชนโต โอเร, ภิกฺขุ โอวาททายโก;
Addhayojanato ore, bhikkhu ovādadāyako;
น วสติ สเจ มโคฺค, อเขโม วา สเจ สิยาฯ
Na vasati sace maggo, akhemo vā sace siyā.
๒๓๓๕.
2335.
อยํ อภิกฺขุโก นาม, อาวาโส ปน ตตฺถ หิ;
Ayaṃ abhikkhuko nāma, āvāso pana tattha hi;
อุปคจฺฉนฺติยา วสฺสํ, อาปตฺติ อรุณุคฺคเมฯ
Upagacchantiyā vassaṃ, āpatti aruṇuggame.
๒๓๓๖.
2336.
ปกฺกนฺตา ปกฺขสงฺกนฺตา, วิพฺภนฺตา วา มตาปิ วา;
Pakkantā pakkhasaṅkantā, vibbhantā vā matāpi vā;
วสฺสํ อุปคตา ภิกฺขู, อนาปตฺตาปทาสุปิฯ
Vassaṃ upagatā bhikkhū, anāpattāpadāsupi.
๒๓๓๗.
2337.
เสโส เญโยฺย กถามโคฺค;
Seso ñeyyo kathāmaggo;
ภิกฺขุโนวาทโก ปน;
Bhikkhunovādako pana;
อิทํ เอฬกโลเมน;
Idaṃ eḷakalomena;
สมุฎฺฐานาทินา สมํฯ
Samuṭṭhānādinā samaṃ.
ฉฎฺฐํฯ
Chaṭṭhaṃ.
๒๓๓๘.
2338.
ยา ภิกฺขุนุภโตสเงฺฆ, วสฺสํวุฎฺฐา ตโต ปุน;
Yā bhikkhunubhatosaṅghe, vassaṃvuṭṭhā tato puna;
‘‘นาหํ ปวาเรสฺสามี’’ติ, สา นิกฺขิปติ เจ ธุรํฯ
‘‘Nāhaṃ pavāressāmī’’ti, sā nikkhipati ce dhuraṃ.
๒๓๓๙.
2339.
ธุเร นิกฺขิตฺตมตฺตสฺมิํ, ตสฺสา ปาจิตฺติยํ สิยา;
Dhure nikkhittamattasmiṃ, tassā pācittiyaṃ siyā;
สติ วา อนฺตรายสฺมิํ, คิลานายาปทาสุปิฯ
Sati vā antarāyasmiṃ, gilānāyāpadāsupi.
๒๓๔๐.
2340.
ปริเยสิตฺวาปิ วา ภิกฺขุํ, น โทโส อลภนฺติยา;
Pariyesitvāpi vā bhikkhuṃ, na doso alabhantiyā;
อิทํ ตุ ธุรนิเกฺขป-สมุฎฺฐานมุทีริตํฯ
Idaṃ tu dhuranikkhepa-samuṭṭhānamudīritaṃ.
สตฺตมํฯ
Sattamaṃ.
๒๓๔๑.
2341.
‘‘โอวาทาทีนมตฺถาย, น คจฺฉิสฺสามฺยห’’นฺติ หิ;
‘‘Ovādādīnamatthāya, na gacchissāmyaha’’nti hi;
ธุเร นิกฺขิตฺตมตฺตสฺมิํ, ปาจิตฺติ ปริทีปเยฯ
Dhure nikkhittamattasmiṃ, pācitti paridīpaye.
๒๓๔๒.
2342.
สทิสํ ตุ สมุฎฺฐานํ, ปฐมนฺติมวตฺถุนา;
Sadisaṃ tu samuṭṭhānaṃ, paṭhamantimavatthunā;
อกฺริยํ โลกวชฺชญฺจ, กายิกํ ทุกฺขเวทนํฯ
Akriyaṃ lokavajjañca, kāyikaṃ dukkhavedanaṃ.
อฎฺฐมํฯ
Aṭṭhamaṃ.
๒๓๔๓.
2343.
‘‘น ยาจิสฺสามิ โอวาทํ, น ปุจฺฉิสฺสามุโปสถํ’’;
‘‘Na yācissāmi ovādaṃ, na pucchissāmuposathaṃ’’;
อิเจฺจวํ ปน นิกฺขิเตฺต, ธุเร ปาจิตฺติยํ สิยาฯ
Iccevaṃ pana nikkhitte, dhure pācittiyaṃ siyā.
๒๓๔๔.
2344.
สติ วา อนฺตรายสฺมิํ, คิลานายาปทาสุ วา;
Sati vā antarāyasmiṃ, gilānāyāpadāsu vā;
น โทโส ปริเยสิตฺวา, ทุติยํ อลภนฺติยาฯ
Na doso pariyesitvā, dutiyaṃ alabhantiyā.
๒๓๔๕.
2345.
อฎฺฐเมปิ อนาปตฺติ, เอวเมว ปกาสิตา;
Aṭṭhamepi anāpatti, evameva pakāsitā;
อิทํ ตุ ธุรนิเกฺขป-สมุฎฺฐานมุทีริตํฯ
Idaṃ tu dhuranikkhepa-samuṭṭhānamudīritaṃ.
นวมํฯ
Navamaṃ.
๒๓๔๖.
2346.
ปสาเข ปน สญฺชาตํ, คณฺฑํ รุจิตเมว วา;
Pasākhe pana sañjātaṃ, gaṇḍaṃ rucitameva vā;
อนาปุจฺฉาว สงฺฆํ วา, คณํ เอเกน เอกิกาฯ
Anāpucchāva saṅghaṃ vā, gaṇaṃ ekena ekikā.
๒๓๔๗.
2347.
‘‘ภินฺท ผาเลหิ โธวา’’ติ, สพฺพาเนวาณาเปนฺติยา;
‘‘Bhinda phālehi dhovā’’ti, sabbānevāṇāpentiyā;
กเตสุ ทุกฺกฎานิจฺฉ, ตสฺสา ปาจิตฺติโย ฉ จฯ
Katesu dukkaṭāniccha, tassā pācittiyo cha ca.
๒๓๔๘.
2348.
‘‘ยเมตฺถ อตฺถิ กาตพฺพํ, ตํ สพฺพํ ตฺวํ กโรหิ’’ติ;
‘‘Yamettha atthi kātabbaṃ, taṃ sabbaṃ tvaṃ karohi’’ti;
อาณาเปติ สเจ เอวํ, โส จ สพฺพํ กโรติ เจฯ
Āṇāpeti sace evaṃ, so ca sabbaṃ karoti ce.
๒๓๔๙.
2349.
เอกาย ปน วาจาย, ทุกฺกฎานิ ปนจฺฉ จ;
Ekāya pana vācāya, dukkaṭāni panaccha ca;
ตสฺสา ปาจิตฺติยจฺฉกฺกํ, ทฺวาทสาปตฺติโย สิยุํฯ
Tassā pācittiyacchakkaṃ, dvādasāpattiyo siyuṃ.
๒๓๕๐.
2350.
เภทนาทีสุ เอกํ สา, อาณาเปติ สเจ ปน;
Bhedanādīsu ekaṃ sā, āṇāpeti sace pana;
โส กโรติ จ สพฺพานิ, เอกํ ปาจิตฺติยํ สิยาฯ
So karoti ca sabbāni, ekaṃ pācittiyaṃ siyā.
๒๓๕๑.
2351.
อาปุจฺฉิตฺวาปิ วา วิญฺญุํ, คเหตฺวา ทุติยมฺปิ วา;
Āpucchitvāpi vā viññuṃ, gahetvā dutiyampi vā;
เภทนาทีนิ สพฺพานิ, การาเปติ สเจ ปนฯ
Bhedanādīni sabbāni, kārāpeti sace pana.
๒๓๕๒.
2352.
ตสฺสา อุมฺมตฺติกาทีน-มนาปตฺติ ปกาสิตา;
Tassā ummattikādīna-manāpatti pakāsitā;
สมุฎฺฐานาทโย สเพฺพ, กถิเนน สมา มตาฯ
Samuṭṭhānādayo sabbe, kathinena samā matā.
ทสมํฯ
Dasamaṃ.
อารามวโคฺค ฉโฎฺฐฯ
Ārāmavaggo chaṭṭho.
๒๓๕๓.
2353.
คณํปริเยสนาทิสฺมิํ, คพฺภินิํ วุฎฺฐเปนฺติยา;
Gaṇaṃpariyesanādismiṃ, gabbhiniṃ vuṭṭhapentiyā;
ญตฺติยา กมฺมวาจาหิ, อุปชฺฌายาย ทุกฺกฎํฯ
Ñattiyā kammavācāhi, upajjhāyāya dukkaṭaṃ.
๒๓๕๔.
2354.
กมฺมวาจาย โอสาเน, ปาจิตฺติ ปริยาปุตา;
Kammavācāya osāne, pācitti pariyāputā;
ตถา คพฺภินิสญฺญาย, น จ คพฺภินิยา ปนฯ
Tathā gabbhinisaññāya, na ca gabbhiniyā pana.
๒๓๕๕.
2355.
อุโภ สญฺชาตกงฺขาย, โหติ อาปตฺติ ทุกฺกฎํ;
Ubho sañjātakaṅkhāya, hoti āpatti dukkaṭaṃ;
ตถาจรินิยา ตสฺสา, คณสฺสาปิ จ ทีปิตํฯ
Tathācariniyā tassā, gaṇassāpi ca dīpitaṃ.
๒๓๕๖.
2356.
ทฺวีสฺวคพฺภินิสญฺญาย, น โทสุมฺมตฺติกาย วา;
Dvīsvagabbhinisaññāya, na dosummattikāya vā;
อทินฺนาทานตุลฺยาว, สมุฎฺฐานาทโย นยาฯ
Adinnādānatulyāva, samuṭṭhānādayo nayā.
ปฐมํฯ
Paṭhamaṃ.
๒๓๕๗.
2357.
ทุติเย นตฺถิ วตฺตพฺพํ, ปฐเมน สมํ มตํ;
Dutiye natthi vattabbaṃ, paṭhamena samaṃ mataṃ;
สมุฎฺฐานาทินา สทฺธิํ, นตฺถิ กาจิ วิเสสตาฯ
Samuṭṭhānādinā saddhiṃ, natthi kāci visesatā.
ทุติยํฯ
Dutiyaṃ.
๒๓๕๘.
2358.
ฉสฺวสิกฺขิตสิกฺขํ ตุ, สิกฺขมานญฺหิ ภิกฺขุนี;
Chasvasikkhitasikkhaṃ tu, sikkhamānañhi bhikkhunī;
เทฺว วสฺสานิ สิยาปตฺติ, วุฎฺฐาเปยฺย สเจ ปนฯ
Dve vassāni siyāpatti, vuṭṭhāpeyya sace pana.
๒๓๕๙.
2359.
ติกปาจิตฺติยํ วุตฺตํ, ธมฺมกเมฺม ตุ สตฺถุนา;
Tikapācittiyaṃ vuttaṃ, dhammakamme tu satthunā;
อธเมฺม ปน กมฺมสฺมิํ, ทีปิตํ ติกทุกฺกฎํฯ
Adhamme pana kammasmiṃ, dīpitaṃ tikadukkaṭaṃ.
๒๓๖๐.
2360.
ฉสุ สิกฺขิตสิกฺขํ ยา, เทฺว วสฺสานิ อขณฺฑโต;
Chasu sikkhitasikkhaṃ yā, dve vassāni akhaṇḍato;
วุฎฺฐาเปติ อนาปตฺติ, ตถา อุมฺมตฺติกาย วาฯ
Vuṭṭhāpeti anāpatti, tathā ummattikāya vā.
๒๓๖๑.
2361.
อิมา หิ ฉ จ สิกฺขาโย, สฎฺฐิวสฺสาปิ เจ ปน;
Imā hi cha ca sikkhāyo, saṭṭhivassāpi ce pana;
ปพฺพชฺชาย ปทาตพฺพา, อทตฺวา น จ การเยฯ
Pabbajjāya padātabbā, adatvā na ca kāraye.
ตติยํฯ
Tatiyaṃ.
๒๓๖๒.
2362.
จตุเตฺถ นตฺถิ วตฺตพฺพํ, อิธ สเงฺฆน สมฺมตํ;
Catutthe natthi vattabbaṃ, idha saṅghena sammataṃ;
สิกฺขมานมนาปตฺติ, โหติ ตํ วุฎฺฐเปนฺติยาฯ
Sikkhamānamanāpatti, hoti taṃ vuṭṭhapentiyā.
๒๓๖๓.
2363.
อทินฺนา ปฐมํ โหติ, สเจ วุฎฺฐานสมฺมุติ;
Adinnā paṭhamaṃ hoti, sace vuṭṭhānasammuti;
ตตฺถาปิ จ ปทาตพฺพา, อุปสมฺปทมาฬเกฯ
Tatthāpi ca padātabbā, upasampadamāḷake.
๒๓๖๔.
2364.
ตติยญฺจ จตุตฺถญฺจ, สมุฎฺฐานาทินา ปน;
Tatiyañca catutthañca, samuṭṭhānādinā pana;
ปฐเมน สมํ เญยฺยํ, จตุตฺถํ ตุ กฺริยากฺริยํฯ
Paṭhamena samaṃ ñeyyaṃ, catutthaṃ tu kriyākriyaṃ.
จตุตฺถํฯ
Catutthaṃ.
๒๓๖๕.
2365.
อูนทฺวาทสวสฺสํ ตุ, กญฺจิ คิหิคตํ ปน;
Ūnadvādasavassaṃ tu, kañci gihigataṃ pana;
ปริปุณฺณาติ สญฺญาย, น โทโส วุฎฺฐเปนฺติยาฯ
Paripuṇṇāti saññāya, na doso vuṭṭhapentiyā.
๒๓๖๖.
2366.
โหติ วานุปสมฺปนฺนา, อุปสมฺปาทิตาปิ สา;
Hoti vānupasampannā, upasampāditāpi sā;
อเสเสน จ เสสํ ตุ, ปฐเมน สมํ มตํฯ
Asesena ca sesaṃ tu, paṭhamena samaṃ mataṃ.
ปญฺจมํฯ
Pañcamaṃ.
๒๓๖๗.
2367.
ฉฎฺฐํ ตุ ตติเย วุตฺต-นเยเนว วิภาวเย;
Chaṭṭhaṃ tu tatiye vutta-nayeneva vibhāvaye;
สตฺตมมฺปิ ตถา สพฺพํ, จตุเตฺถน สมํ มตํฯ
Sattamampi tathā sabbaṃ, catutthena samaṃ mataṃ.
ฉฎฺฐสตฺตมานิฯ
Chaṭṭhasattamāni.
๒๓๖๘.
2368.
ยํ ตุวฎฺฎกวคฺคสฺมิํ, ทุกฺขิตํ สหชีวินิํ;
Yaṃ tuvaṭṭakavaggasmiṃ, dukkhitaṃ sahajīviniṃ;
วุตฺตํ เตน สมํ เญยฺยํ, อฎฺฐมํ น วิเสสตาฯ
Vuttaṃ tena samaṃ ñeyyaṃ, aṭṭhamaṃ na visesatā.
อฎฺฐมํฯ
Aṭṭhamaṃ.
๒๓๖๙.
2369.
เทฺว วสฺสานิ จ ยา กาจิ, วุฎฺฐาปิตปวตฺตินิํ;
Dve vassāni ca yā kāci, vuṭṭhāpitapavattiniṃ;
นานุพเนฺธยฺย เจ ตสฺสา, ปาจิตฺติ ปริยาปุตาฯ
Nānubandheyya ce tassā, pācitti pariyāputā.
๒๓๗๐.
2370.
‘‘เทฺว วสฺสานิ อหํ นานุ-พนฺธิสฺสามี’’ติ เจ ปน;
‘‘Dve vassāni ahaṃ nānu-bandhissāmī’’ti ce pana;
ธุเร นิกฺขิตฺตมตฺตสฺมิํ, ตสฺสา ปาจิตฺติยํ สิยาฯ
Dhure nikkhittamattasmiṃ, tassā pācittiyaṃ siyā.
๒๓๗๑.
2371.
ตญฺจ พาลมลชฺชิํ วา, คิลานายาปทาสุ วา;
Tañca bālamalajjiṃ vā, gilānāyāpadāsu vā;
นานุพนฺธนฺติยา ตสฺสา, น โทสุมฺมตฺติกาย วาฯ
Nānubandhantiyā tassā, na dosummattikāya vā.
๒๓๗๒.
2372.
สมุฎฺฐานาทโย ตุลฺยา, ปฐมนฺติมวตฺถุนา;
Samuṭṭhānādayo tulyā, paṭhamantimavatthunā;
อิทํ ปนากฺริยํ วุตฺตํ, เวทนา ทุกฺขเวทนาฯ
Idaṃ panākriyaṃ vuttaṃ, vedanā dukkhavedanā.
นวมํฯ
Navamaṃ.
๒๓๗๓.
2373.
วุฎฺฐาเปตฺวา ตุ ยา กาจิ, ภิกฺขุนี สหชีวินิํ;
Vuṭṭhāpetvā tu yā kāci, bhikkhunī sahajīviniṃ;
ตํ คเหตฺวา น คเจฺฉยฺย, น จญฺญํ อาณาเปยฺย เจฯ
Taṃ gahetvā na gaccheyya, na caññaṃ āṇāpeyya ce.
๒๓๗๔.
2374.
ธุเร นิกฺขิตฺตมตฺตสฺมิํ, ตสฺสา ปาจิตฺติยํ สิยา;
Dhure nikkhittamattasmiṃ, tassā pācittiyaṃ siyā;
สติ วา อนฺตรายสฺมิํ, ทุติยํ อลภนฺติยาฯ
Sati vā antarāyasmiṃ, dutiyaṃ alabhantiyā.
๒๓๗๕.
2375.
อาปทาสุ คิลานาย, ตถา อุมฺมตฺติกาย วา;
Āpadāsu gilānāya, tathā ummattikāya vā;
น โทโส ธุรนิเกฺขป-สมุฎฺฐานมิทํ ปนฯ
Na doso dhuranikkhepa-samuṭṭhānamidaṃ pana.
ทสมํฯ
Dasamaṃ.
คพฺภินิวโคฺค สตฺตโมฯ
Gabbhinivaggo sattamo.
๒๓๗๖.
2376.
กุมาริภูตวคฺคสฺส, ปฐมาทีนิ ตีณิปิ;
Kumāribhūtavaggassa, paṭhamādīni tīṇipi;
คิหิคเตหิ ตีเหว, สทิสานีติ นิทฺทิเสฯ
Gihigatehi tīheva, sadisānīti niddise.
๒๓๗๗.
2377.
ยา มหูปปทา เทฺว ตุ, สิกฺขมานา ปนาทิโต;
Yā mahūpapadā dve tu, sikkhamānā panādito;
‘‘คตา วีสติวสฺสา’’ติ, วิญฺญาตพฺพา วิภาวินาฯ
‘‘Gatā vīsativassā’’ti, viññātabbā vibhāvinā.
๒๓๗๘.
2378.
สเจ คิหิคตา โหนฺติ, น จ วา ปุริสํ คตา;
Sace gihigatā honti, na ca vā purisaṃ gatā;
‘‘สิกฺขมานา’’ติ วตฺตพฺพา, ตา หิ สมฺมุติอาทิสุฯ
‘‘Sikkhamānā’’ti vattabbā, tā hi sammutiādisu.
๒๓๗๙.
2379.
น ตา ‘‘กุมาริภูตา’’ติ, ตถา ‘‘คิหิคตา’’ติ วา;
Na tā ‘‘kumāribhūtā’’ti, tathā ‘‘gihigatā’’ti vā;
วตฺตพฺพา ปนุโภเปตา, เอวํ วตฺตุํ น วฎฺฎติฯ
Vattabbā panubhopetā, evaṃ vattuṃ na vaṭṭati.
๒๓๘๐.
2380.
สมฺมุติํ ทสวสฺสาย, ทตฺวา ทฺวาทสวสฺสิกา;
Sammutiṃ dasavassāya, datvā dvādasavassikā;
กตฺตพฺพา อุปสมฺปนฺนา, เสสาสุปิ อยํ นโยฯ
Kattabbā upasampannā, sesāsupi ayaṃ nayo.
๒๓๘๑.
2381.
ยา อฎฺฐารสวสฺสา ตุ, ตโต ปฎฺฐาย สา ปน;
Yā aṭṭhārasavassā tu, tato paṭṭhāya sā pana;
วุตฺตา ‘‘กุมาริภูตา’’ติ, ตถา ‘‘คิหิคตา’’ติปิฯ
Vuttā ‘‘kumāribhūtā’’ti, tathā ‘‘gihigatā’’tipi.
๒๓๘๒.
2382.
วุตฺตา ‘‘กุมาริภูตา’’ติ, สามเณรี หิ ยา ปน;
Vuttā ‘‘kumāribhūtā’’ti, sāmaṇerī hi yā pana;
‘‘กุมาริภูตา’’ อิเจฺจว, วตฺตพฺพา น ปนญฺญถาฯ
‘‘Kumāribhūtā’’ icceva, vattabbā na panaññathā.
๒๓๘๓.
2383.
เอตา ตุ ปน ติโสฺสปิ, สิกฺขาสมฺมุติทานโต;
Etā tu pana tissopi, sikkhāsammutidānato;
‘‘สิกฺขมานา’’ติ วตฺตุมฺปิ, วฎฺฎเตว น สํสโยฯ
‘‘Sikkhamānā’’ti vattumpi, vaṭṭateva na saṃsayo.
ตติยํฯ
Tatiyaṃ.
๒๓๘๔.
2384.
อูนทฺวาทสวสฺสาว, วุฎฺฐาเปติ สเจ ปรํ;
Ūnadvādasavassāva, vuṭṭhāpeti sace paraṃ;
หุตฺวา สยมุปชฺฌายา, สิกฺขมานํ ตุ ภิกฺขุนีฯ
Hutvā sayamupajjhāyā, sikkhamānaṃ tu bhikkhunī.
๒๓๘๕.
2385.
ปุเพฺพ วุตฺตนเยเนว, ทุกฺกฎานมนนฺตรํ;
Pubbe vuttanayeneva, dukkaṭānamanantaraṃ;
กมฺมวาจานโมสาเน, ตสฺสา ปาจิตฺติ ทีปิตาฯ
Kammavācānamosāne, tassā pācitti dīpitā.
จตุตฺถํฯ
Catutthaṃ.
๒๓๘๖.
2386.
ปญฺจเม นตฺถิ วตฺตพฺพํ, จตุตฺถํ ปญฺจมมฺปิ จ;
Pañcame natthi vattabbaṃ, catutthaṃ pañcamampi ca;
อุภยํ ติสมุฎฺฐานํ, ปญฺจมํ ตุ กฺริยากฺริยํฯ
Ubhayaṃ tisamuṭṭhānaṃ, pañcamaṃ tu kriyākriyaṃ.
ปญฺจมํฯ
Pañcamaṃ.
๒๓๘๗.
2387.
สเงฺฆนุปปริกฺขิตฺวา, ‘‘อลํ ตาวา’’ติ วาริตา;
Saṅghenupaparikkhitvā, ‘‘alaṃ tāvā’’ti vāritā;
อุปสมฺปาทิเตเนตฺถ, ปจฺฉา ขียติ โทสตาฯ
Upasampāditenettha, pacchā khīyati dosatā.
๒๓๘๘.
2388.
อุชฺฌายติ สเจ ฉนฺท-โทสาทีหิ กโรนฺติยา;
Ujjhāyati sace chanda-dosādīhi karontiyā;
น โทโส ติสมุฎฺฐานํ, สจิตฺตํ ทุกฺขเวทนํฯ
Na doso tisamuṭṭhānaṃ, sacittaṃ dukkhavedanaṃ.
ฉฎฺฐํฯ
Chaṭṭhaṃ.
๒๓๘๙.
2389.
ลเทฺธ จ จีวเร ปจฺฉา, อสเนฺต อนฺตรายิเก;
Laddhe ca cīvare pacchā, asante antarāyike;
‘‘วุฎฺฐาเปสฺสามิ นาห’’นฺติ, ธุรนิเกฺขปเน ปนฯ
‘‘Vuṭṭhāpessāmi nāha’’nti, dhuranikkhepane pana.
๒๓๙๐.
2390.
โหติ ปาจิตฺติยํ ตสฺสา, คิลานายาปทาสุปิ;
Hoti pācittiyaṃ tassā, gilānāyāpadāsupi;
น โทโส ปริเยสิตฺวา, ปริสํ อลภนฺติยาฯ
Na doso pariyesitvā, parisaṃ alabhantiyā.
๒๓๙๑.
2391.
อิทญฺหิ ธุรนิเกฺขป-สมุฎฺฐานํ สจิตฺตกํ;
Idañhi dhuranikkhepa-samuṭṭhānaṃ sacittakaṃ;
อกฺริยํ โลกวชฺชญฺจ, โหติทํ ทุกฺขเวทนํฯ
Akriyaṃ lokavajjañca, hotidaṃ dukkhavedanaṃ.
สตฺตมํฯ
Sattamaṃ.
๒๓๙๒.
2392.
อฎฺฐมํ สตฺตเมเนว, สทิสํ ปน สพฺพถา;
Aṭṭhamaṃ sattameneva, sadisaṃ pana sabbathā;
นวเมปิ จ วตฺตพฺพํ, นตฺถิ อุตฺตานเมวิทํฯ
Navamepi ca vattabbaṃ, natthi uttānamevidaṃ.
๒๓๙๓.
2393.
นตฺถาชานนฺติยา โทโส, ตถา อุมฺมตฺติกาย วา;
Natthājānantiyā doso, tathā ummattikāya vā;
อทินฺนาทานตุลฺยาว, สมุฎฺฐานาทโย นยาฯ
Adinnādānatulyāva, samuṭṭhānādayo nayā.
อฎฺฐมนวมานิฯ
Aṭṭhamanavamāni.
๒๓๙๔.
2394.
มาตรา ปิตรา วาถ, นานุญฺญาตํ ตุ สามินา;
Mātarā pitarā vātha, nānuññātaṃ tu sāminā;
ตสฺสา ปาจิตฺติยาปตฺติ, ตํ วุฎฺฐาเปนฺติยา สิยาฯ
Tassā pācittiyāpatti, taṃ vuṭṭhāpentiyā siyā.
๒๓๙๕.
2395.
อุปสมฺปทกาลสฺมิํ, ตถา ปพฺพาชนกฺขเณ;
Upasampadakālasmiṃ, tathā pabbājanakkhaṇe;
ทฺวิกฺขตฺตุํ ปุจฺฉิตพฺพํ ตุ, ภิกฺขุนีหิ, น ภิกฺขุนาฯ
Dvikkhattuṃ pucchitabbaṃ tu, bhikkhunīhi, na bhikkhunā.
๒๓๙๖.
2396.
อนาปตฺติ น ชานาติ, มาตุอาทีนมตฺถิตํ;
Anāpatti na jānāti, mātuādīnamatthitaṃ;
อิทํ จตุสมุฎฺฐานํ, วาจโต กายวาจโตฯ
Idaṃ catusamuṭṭhānaṃ, vācato kāyavācato.
๒๓๙๗.
2397.
วาจามานสโต เจว, กายวาจาทิโตปิ จ;
Vācāmānasato ceva, kāyavācāditopi ca;
กฺริยากฺริยมจิตฺตญฺจ, ติจิตฺตญฺจ ติเวทนํฯ
Kriyākriyamacittañca, ticittañca tivedanaṃ.
ทสมํฯ
Dasamaṃ.
๒๓๙๘.
2398.
ยา ปาริวาสิเกเนตฺถ, ฉนฺททาเนน ภิกฺขุนี;
Yā pārivāsikenettha, chandadānena bhikkhunī;
วุฎฺฐาเปติ สเจ สิกฺข-มานํ ปาจิตฺติยํ สิยาฯ
Vuṭṭhāpeti sace sikkha-mānaṃ pācittiyaṃ siyā.
๒๓๙๙.
2399.
อวุฎฺฐิตายนาปตฺติ, ปริสายาวิหาย วา;
Avuṭṭhitāyanāpatti, parisāyāvihāya vā;
ฉนฺทํ ตุ ติสมุฎฺฐานํ, ติจิตฺตญฺจ ติเวทนํฯ
Chandaṃ tu tisamuṭṭhānaṃ, ticittañca tivedanaṃ.
เอกาทสมํฯ
Ekādasamaṃ.
๒๔๐๐.
2400.
ทฺวาทเส เตรเส วาปิ, วตฺตพฺพํ นตฺถิ กิญฺจิปิ;
Dvādase terase vāpi, vattabbaṃ natthi kiñcipi;
สมุฎฺฐานาทโย สเพฺพ, อนนฺตรสมา มตาฯ
Samuṭṭhānādayo sabbe, anantarasamā matā.
ทฺวาทสมเตรสมานิฯ
Dvādasamaterasamāni.
กุมารีภูตวโคฺค อฎฺฐโมฯ
Kumārībhūtavaggo aṭṭhamo.
๒๔๐๑.
2401.
สมณี อคิลานา ยา, ธาเรยฺย ฉตฺตุปาหนํ;
Samaṇī agilānā yā, dhāreyya chattupāhanaṃ;
ตสฺสา ปาจิตฺติยาปตฺติ, โหตีติ ปริยาปุตาฯ
Tassā pācittiyāpatti, hotīti pariyāputā.
๒๔๐๒.
2402.
สเจ เอกปโยเคน, มคฺคสฺส คมเน ปน;
Sace ekapayogena, maggassa gamane pana;
ทิวสมฺปิ จ ธาเรติ, เอกํ ปาจิตฺติยํ สิยาฯ
Divasampi ca dhāreti, ekaṃ pācittiyaṃ siyā.
๒๔๐๓.
2403.
กทฺทมาทีนิ ปสฺสิตฺวา, โอมุญฺจิตฺวา อุปาหนา;
Kaddamādīni passitvā, omuñcitvā upāhanā;
ฉตฺตเมว จ ธาเรนฺตี, ยทิ คจฺฉติ ทุกฺกฎํฯ
Chattameva ca dhārentī, yadi gacchati dukkaṭaṃ.
๒๔๐๔.
2404.
สเจ อุปาหนารุฬฺหา, ทิสฺวา คจฺฉาทิกํ ปน;
Sace upāhanāruḷhā, disvā gacchādikaṃ pana;
ตํ ฉตฺตมปนาเมตฺวา, ทุกฺกฎํ โหติ คจฺฉติฯ
Taṃ chattamapanāmetvā, dukkaṭaṃ hoti gacchati.
๒๔๐๕.
2405.
ฉตฺตมฺปิ อปนาเมตฺวา, โอมุญฺจิตฺวา อุปาหนา;
Chattampi apanāmetvā, omuñcitvā upāhanā;
ปุน ธาเรนฺติยา ตสฺสา, โหติ ปาจิตฺติยํ ปนฯ
Puna dhārentiyā tassā, hoti pācittiyaṃ pana.
๒๔๐๖.
2406.
ปโยคคณนาเยว , ปาจิตฺติคณนา สิยา;
Payogagaṇanāyeva , pācittigaṇanā siyā;
ติกปาจิตฺติยํ วุตฺตํ, ตเถว ทฺวิกทุกฺกฎํฯ
Tikapācittiyaṃ vuttaṃ, tatheva dvikadukkaṭaṃ.
๒๔๐๗.
2407.
อาราเม อุปจาเร วา, โทโส นตฺถาปทาสุปิ;
Ārāme upacāre vā, doso natthāpadāsupi;
อิทํ เอฬกโลเมน, สมุฎฺฐานาทินา สมํฯ
Idaṃ eḷakalomena, samuṭṭhānādinā samaṃ.
ปฐมํฯ
Paṭhamaṃ.
๒๔๐๘.
2408.
โหติ ภิกฺขุนิยา ยานา, โอโรหิตฺวา ปุนปฺปุนํ;
Hoti bhikkhuniyā yānā, orohitvā punappunaṃ;
อภิรูหนฺติยาปตฺติ, ปโยคคณนาวสาฯ
Abhirūhantiyāpatti, payogagaṇanāvasā.
๒๔๐๙.
2409.
อาปทาสุ อนาปตฺติ, ตถา อุมฺมตฺติกาย วา;
Āpadāsu anāpatti, tathā ummattikāya vā;
เสสํ อนนฺตเรเนว, สมุฎฺฐานาทินา สมํฯ
Sesaṃ anantareneva, samuṭṭhānādinā samaṃ.
ทุติยํฯ
Dutiyaṃ.
๒๔๑๐.
2410.
ยา จ ธาเรยฺย สงฺฆาณิํ, ยํ กิญฺจิปิ กฎูปิยํ;
Yā ca dhāreyya saṅghāṇiṃ, yaṃ kiñcipi kaṭūpiyaṃ;
ตสฺสา ปาจิตฺติยาปตฺติ, โหตีติ ปริยาปุตาฯ
Tassā pācittiyāpatti, hotīti pariyāputā.
๒๔๑๑.
2411.
ธาเรนฺติยา ปเนตฺถาปิ, โอมุญฺจิตฺวา ปุนปฺปุนํ;
Dhārentiyā panetthāpi, omuñcitvā punappunaṃ;
ปโยคคณนาเยว, ตสฺสา ปาจิตฺติโย สิยุํฯ
Payogagaṇanāyeva, tassā pācittiyo siyuṃ.
๒๔๑๒.
2412.
อาพาธปจฺจยา ยา ตุ, ธาเรติ กฎิสุตฺตกํ;
Ābādhapaccayā yā tu, dhāreti kaṭisuttakaṃ;
ตถา อุมฺมตฺติกาทีน-มนาปตฺติ ปกาสิตาฯ
Tathā ummattikādīna-manāpatti pakāsitā.
๒๔๑๓.
2413.
เสสํ ตุ ปฐเมเนว, สทิสนฺติ ปกาสิตํ;
Sesaṃ tu paṭhameneva, sadisanti pakāsitaṃ;
อิธ จากุสลํ จิตฺตํ, โลกวชฺชํ วิเสสตาฯ
Idha cākusalaṃ cittaṃ, lokavajjaṃ visesatā.
ตติยํฯ
Tatiyaṃ.
๒๔๑๔.
2414.
ธาเรติ ปน ยํ กิญฺจิ, สเจ สีสูปคาทิสุ;
Dhāreti pana yaṃ kiñci, sace sīsūpagādisu;
ตสฺสา ตสฺส จ วตฺถุสฺส, คณนาปตฺติโย สิยุํฯ
Tassā tassa ca vatthussa, gaṇanāpattiyo siyuṃ.
๒๔๑๕.
2415.
อาพาธปจฺจยา โทโส, กิญฺจิ ธาเรนฺติยา น จ;
Ābādhapaccayā doso, kiñci dhārentiyā na ca;
เสสํ อนนฺตเรเนว, สทิสํ ปริทีปิตํฯ
Sesaṃ anantareneva, sadisaṃ paridīpitaṃ.
จตุตฺถํฯ
Catutthaṃ.
๒๔๑๖.
2416.
เยน เกนจิ คเนฺธน, สวณฺณาวณฺณเกน จ;
Yena kenaci gandhena, savaṇṇāvaṇṇakena ca;
นฺหาสนฺติยา ปนาปตฺติ, นฺหาโนสาเน ปกาสิตาฯ
Nhāsantiyā panāpatti, nhānosāne pakāsitā.
๒๔๑๗.
2417.
คนฺธโยชนโต สพฺพ-ปโยเค ทุกฺกฎํ สิยา;
Gandhayojanato sabba-payoge dukkaṭaṃ siyā;
อาพาธปจฺจยา โทโส, นตฺถิ อุมฺมตฺติกาย วาฯ
Ābādhapaccayā doso, natthi ummattikāya vā.
๒๔๑๘.
2418.
เสสํ ตุ ตติเยเนว, สทิสํ สพฺพถา มตํ;
Sesaṃ tu tatiyeneva, sadisaṃ sabbathā mataṃ;
ฉฎฺฐมฺปิ ตติเยเนว, สทิสนฺติ ปกาสิตํฯ
Chaṭṭhampi tatiyeneva, sadisanti pakāsitaṃ.
ปญฺจมฉฎฺฐานิฯ
Pañcamachaṭṭhāni.
๒๔๑๙.
2419.
อุพฺพฎฺฎาเปยฺย จญฺญาย, สมฺพาหาเปยฺย วา ตถา;
Ubbaṭṭāpeyya caññāya, sambāhāpeyya vā tathā;
โหติ ภิกฺขุนิยาปตฺติ, สเจ ภิกฺขุนิยา ปนฯ
Hoti bhikkhuniyāpatti, sace bhikkhuniyā pana.
๒๔๒๐.
2420.
เอตฺถ หตฺถมโมเจตฺวา, เอกา อุพฺพฎฺฎเน สิยา;
Ettha hatthamamocetvā, ekā ubbaṭṭane siyā;
โมเจตฺวา ปน โมเจตฺวา, ปโยคคณนา สิยาฯ
Mocetvā pana mocetvā, payogagaṇanā siyā.
๒๔๒๑.
2421.
สมฺพาหเนปิ เอเสว, นโย เญโยฺย วิภาวินา;
Sambāhanepi eseva, nayo ñeyyo vibhāvinā;
อาปทาสุ คิลานาย, อนาปตฺติ ปกาสิตาฯ
Āpadāsu gilānāya, anāpatti pakāsitā.
๒๔๒๒.
2422.
เสสํ ตุ ตติเยเนว, สมุฎฺฐานาทินา สมํ;
Sesaṃ tu tatiyeneva, samuṭṭhānādinā samaṃ;
สตฺตเมน สมานาว, อฎฺฐมาทีนิ ตีณิปิฯ
Sattamena samānāva, aṭṭhamādīni tīṇipi.
สตฺตมฎฺฐมนวมทสมานิฯ
Sattamaṭṭhamanavamadasamāni.
๒๔๒๓.
2423.
ยา อโนฺตอุปจารสฺมิํ, ภิกฺขุสฺส ปุรโต ปน;
Yā antoupacārasmiṃ, bhikkhussa purato pana;
อนาปุจฺฉา นิสีเทยฺย, ฉมายปิ น วฎฺฎติฯ
Anāpucchā nisīdeyya, chamāyapi na vaṭṭati.
๒๔๒๔.
2424.
ติกปาจิตฺติยํ วุตฺตํ, ปุจฺฉิเต ทุกฺกฎทฺวยํ;
Tikapācittiyaṃ vuttaṃ, pucchite dukkaṭadvayaṃ;
อาปทาสุ คิลานาย, น โทสุมฺมตฺติกาย วาฯ
Āpadāsu gilānāya, na dosummattikāya vā.
๒๔๒๕.
2425.
อิทํ ปน สมุฎฺฐานํ, กถิเนน สมํ มตํ;
Idaṃ pana samuṭṭhānaṃ, kathinena samaṃ mataṃ;
กฺริยากฺริยมจิตฺตญฺจ, ติจิตฺตญฺจ ติเวทนํฯ
Kriyākriyamacittañca, ticittañca tivedanaṃ.
เอกาทสมํฯ
Ekādasamaṃ.
๒๔๒๖.
2426.
อโนกาสกตํ ภิกฺขุํ, ปญฺหํ ปุเจฺฉยฺย โทสตา;
Anokāsakataṃ bhikkhuṃ, pañhaṃ puccheyya dosatā;
วินเย จ กโตกาสํ, สุตฺตํ ปุจฺฉนฺติยาปิ จฯ
Vinaye ca katokāsaṃ, suttaṃ pucchantiyāpi ca.
๒๔๒๗.
2427.
กาเรตฺวา ปน โอกาสํ, อโนทิสฺสาปิ ปุจฺฉติ;
Kāretvā pana okāsaṃ, anodissāpi pucchati;
น โทโส ปทโสธมฺม-สมุฎฺฐานมิทํ ปนฯ
Na doso padasodhamma-samuṭṭhānamidaṃ pana.
ทฺวาทสมํฯ
Dvādasamaṃ.
๒๔๒๘.
2428.
สํกจฺจิกํ วินา คามํ, ปทสา ปวิสนฺติยา;
Saṃkaccikaṃ vinā gāmaṃ, padasā pavisantiyā;
ปริกฺขิตฺตสฺส คามสฺส, ปริเกฺขโปกฺกเม ปนฯ
Parikkhittassa gāmassa, parikkhepokkame pana.
๒๔๒๙.
2429.
ทุกฺกฎํ ปฐเม ปาเท, ปาจิตฺติ ทุติเย สิยา;
Dukkaṭaṃ paṭhame pāde, pācitti dutiye siyā;
อุปจาโรกฺกเมเปตฺถ, เอเสว จ นโย มโตฯ
Upacārokkamepettha, eseva ca nayo mato.
๒๔๓๐.
2430.
ยสฺสา สํกจฺจิกํ นฎฺฐํ, อจฺฉินฺนํ วาปิ เกนจิ;
Yassā saṃkaccikaṃ naṭṭhaṃ, acchinnaṃ vāpi kenaci;
อนาปตฺติ สิยา ตสฺสา, คิลานายาปทาสุปิฯ
Anāpatti siyā tassā, gilānāyāpadāsupi.
๒๔๓๑.
2431.
อิทเมฬกโลเมน, สมุฎฺฐานาทินา สมํ;
Idameḷakalomena, samuṭṭhānādinā samaṃ;
เสสํ วุตฺตนเยเนว, วิญฺญาตพฺพํ วิภาวินาฯ
Sesaṃ vuttanayeneva, viññātabbaṃ vibhāvinā.
เตรสมํฯ
Terasamaṃ.
ฉตฺตุปาหนวโคฺค นวโมฯ
Chattupāhanavaggo navamo.
อิติ วินยวินิจฺฉเย ปาจิตฺติยกถา นิฎฺฐิตาฯ
Iti vinayavinicchaye pācittiyakathā niṭṭhitā.
