| Library / Tipiṭaka / ತಿಪಿಟಕ • Tipiṭaka / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā |
ಪಚ್ಛಿಮವಿಕಪ್ಪನುಪಗಚೀವರಾದಿಕಥಾ
Pacchimavikappanupagacīvarādikathā
೩೫೯. ಪಂಸುಕೂಲಕತೋತಿ ಕತಪಂಸುಕೂಲೋ। ಗರುಕೋ ಹೋತೀತಿ ಜಿಣ್ಣಜಿಣ್ಣಟ್ಠಾನೇ ಅಗ್ಗಳಾರೋಪನೇನ ಗರುಕೋ ಹೋತಿ। ಸುತ್ತಲೂಖಂ ಕಾತುನ್ತಿ ಸುತ್ತೇನೇವ ಅಗ್ಗಳಂ ಕಾತುನ್ತಿ ಅತ್ಥೋ। ವಿಕಣ್ಣೋ ಹೋತೀತಿ ಸುತ್ತಂ ಅಚ್ಛೇತ್ವಾ ಅಚ್ಛೇತ್ವಾ ಸಿಬ್ಬನ್ತಾನಂ ಏಕೋ ಸಙ್ಘಾಟಿಕೋಣೋ ದೀಘೋ ಹೋತಿ। ವಿಕಣ್ಣಂ ಉದ್ಧರಿತುನ್ತಿ ದೀಘಕೋಣಂ ಛಿನ್ದಿತುಂ। ಓಕಿರಿಯನ್ತೀತಿ ಛಿನ್ನಕೋಣತೋ ಗಳನ್ತಿ। ಅನುವಾತಂ ಪರಿಭಣ್ಡನ್ತಿ ಅನುವಾತಞ್ಚೇವ ಪರಿಭಣ್ಡಞ್ಚ। ಪತ್ತಾ ಲುಜ್ಜನ್ತೀತಿ ಮಹನ್ತೇಸು ಪತ್ತಮುಖೇಸು ದಿನ್ನಾನಿ ಸುತ್ತಾನಿ ಗಳನ್ತಿ, ತತೋ ಪತ್ತಾ ಲುಜ್ಜನ್ತಿ। ಅಟ್ಠಪದಕಂ ಕಾತುನ್ತಿ ಅಟ್ಠಪದಕಚ್ಛನ್ನೇನ ಪತ್ತಮುಖಂ ಸಿಬ್ಬಿತುಂ।
359.Paṃsukūlakatoti katapaṃsukūlo. Garuko hotīti jiṇṇajiṇṇaṭṭhāne aggaḷāropanena garuko hoti. Suttalūkhaṃ kātunti sutteneva aggaḷaṃ kātunti attho. Vikaṇṇo hotīti suttaṃ acchetvā acchetvā sibbantānaṃ eko saṅghāṭikoṇo dīgho hoti. Vikaṇṇaṃ uddharitunti dīghakoṇaṃ chindituṃ. Okiriyantīti chinnakoṇato gaḷanti. Anuvātaṃ paribhaṇḍanti anuvātañceva paribhaṇḍañca. Pattā lujjantīti mahantesu pattamukhesu dinnāni suttāni gaḷanti, tato pattā lujjanti. Aṭṭhapadakaṃ kātunti aṭṭhapadakacchannena pattamukhaṃ sibbituṃ.
೩೬೦. ಅನ್ವಾಧಿಕಮ್ಪಿ ಆರೋಪೇತುನ್ತಿ ಆಗನ್ತುಕಪತ್ತಮ್ಪಿ ದಾತುಂ। ಇದಂ ಪನ ಅಪ್ಪಹೋನಕೇ ಆರೋಪೇತಬ್ಬಂ। ಸಚೇ ಪಹೋತಿ, ಆಗನ್ತುಕಪತ್ತಂ ನ ವಟ್ಟತಿ, ಛಿನ್ದಿತಬ್ಬಮೇವ।
360.Anvādhikampi āropetunti āgantukapattampi dātuṃ. Idaṃ pana appahonake āropetabbaṃ. Sace pahoti, āgantukapattaṃ na vaṭṭati, chinditabbameva.
೩೬೧. ನ ಚ ಭಿಕ್ಖವೇ ಸದ್ಧಾದೇಯ್ಯನ್ತಿ ಏತ್ಥ ಸೇಸಞಾತೀನಂ ದೇನ್ತೋ ವಿನಿಪಾತೇತಿಯೇವ। ಮಾತಾಪಿತರೋ ಪನ ಸಚೇ ರಜ್ಜೇ ಠಿತಾ ಪತ್ಥಯನ್ತಿ, ದಾತಬ್ಬಂ।
361.Na ca bhikkhave saddhādeyyanti ettha sesañātīnaṃ dento vinipātetiyeva. Mātāpitaro pana sace rajje ṭhitā patthayanti, dātabbaṃ.
೩೬೨. ಗಿಲಾನೋತಿ ಗಿಲಾನತಾಯ ಗಹೇತ್ವಾ ಗನ್ತುಂ ಅಸಮತ್ಥೋ। ವಸ್ಸಿಕಸಙ್ಕೇತನ್ತಿ ವಸ್ಸಿಕೇ ಚತ್ತಾರೋ ಮಾಸೇ। ನದೀಪಾರನ್ತಿ ನದಿಯಾ ಪಾರೇ ಭತ್ತಂ ಭುಞ್ಜಿತಬ್ಬಂ ಹೋತಿ। ಅಗ್ಗಳಗುತ್ತಿವಿಹಾರೋತಿ ಸಬ್ಬೇಸ್ವೇವ ಚೇತೇಸು ಗಿಲಾನವಸ್ಸಿಕಸಙ್ಕೇತನದೀಪಾರಗಮನಅತ್ಥತಕಥಿನಭಾವೇಸು ಅಗ್ಗಳಗುತ್ತಿಯೇವ ಪಮಾಣಂ। ಗುತ್ತೇ ಏವ ಹಿ ವಿಹಾರೇ ಏತೇಸು ಕಾರಣೇಸು ನಿಕ್ಖಿಪಿತ್ವಾ ಬಹಿ ಗನ್ತುಂ ವಟ್ಟತಿ, ನ ಅಗುತ್ತೇ। ಆರಞ್ಞಕಸ್ಸ ಪನ ವಿಹಾರೋ ನ ಸುಗುತ್ತೋ ಹೋತಿ, ತೇನ ಭಣ್ಡುಕ್ಖಲಿಕಾಯ ಪಕ್ಖಿಪಿತ್ವಾ ಪಾಸಾಣಸುಸಿರ ರುಕ್ಖಸುಸಿರಾದೀಸು ಸುಪ್ಪಟಿಚ್ಛನ್ನೇಸು ಠಪೇತ್ವಾ ಗನ್ತಬ್ಬಂ।
362.Gilānoti gilānatāya gahetvā gantuṃ asamattho. Vassikasaṅketanti vassike cattāro māse. Nadīpāranti nadiyā pāre bhattaṃ bhuñjitabbaṃ hoti. Aggaḷaguttivihāroti sabbesveva cetesu gilānavassikasaṅketanadīpāragamanaatthatakathinabhāvesu aggaḷaguttiyeva pamāṇaṃ. Gutte eva hi vihāre etesu kāraṇesu nikkhipitvā bahi gantuṃ vaṭṭati, na agutte. Āraññakassa pana vihāro na sugutto hoti, tena bhaṇḍukkhalikāya pakkhipitvā pāsāṇasusira rukkhasusirādīsu suppaṭicchannesu ṭhapetvā gantabbaṃ.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಗ್ಗಪಾಳಿ • Mahāvaggapāḷi / ೨೨೧. ಪಚ್ಛಿಮವಿಕಪ್ಪನುಪಗಚೀವರಾದಿಕಥಾ • 221. Pacchimavikappanupagacīvarādikathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಪಚ್ಛಿಮವಿಕಪ್ಪನುಪಗಚೀವರಾದಿಕಥಾವಣ್ಣನಾ • Pacchimavikappanupagacīvarādikathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ನಿಸೀದನಾದಿಅನುಜಾನನಕಥಾವಣ್ಣನಾ • Nisīdanādianujānanakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಚೀವರರಜನಕಥಾದಿವಣ್ಣನಾ • Cīvararajanakathādivaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೨೨೧. ಪಚ್ಛಿಮವಿಕಪ್ಪನುಪಗಚೀವರಾದಿಕಥಾ • 221. Pacchimavikappanupagacīvarādikathā
