| Library / Tipiṭaka / തിപിടക • Tipiṭaka / അങ്ഗുത്തരനികായ • Aṅguttaranikāya |
൨. പച്ഛാസമണസുത്തം
2. Pacchāsamaṇasuttaṃ
൧൧൨. ‘‘പഞ്ചഹി, ഭിക്ഖവേ, ധമ്മേഹി സമന്നാഗതോ പച്ഛാസമണോ ന ആദാതബ്ബോ. കതമേഹി പഞ്ചഹി? അതിദൂരേ വാ ഗച്ഛതി അച്ചാസന്നേ വാ , ന പത്തപരിയാപന്നം ഗണ്ഹതി, ആപത്തിസാമന്താ ഭണമാനം ന നിവാരേതി, ഭണമാനസ്സ അന്തരന്തരാ കഥം ഓപാതേതി, ദുപ്പഞ്ഞോ ഹോതി ജളോ ഏളമൂഗോ. ഇമേഹി ഖോ, ഭിക്ഖവേ, പഞ്ചഹി ധമ്മേഹി സമന്നാഗതോ പച്ഛാസമണോ ന ആദാതബ്ബോ.
112. ‘‘Pañcahi, bhikkhave, dhammehi samannāgato pacchāsamaṇo na ādātabbo. Katamehi pañcahi? Atidūre vā gacchati accāsanne vā , na pattapariyāpannaṃ gaṇhati, āpattisāmantā bhaṇamānaṃ na nivāreti, bhaṇamānassa antarantarā kathaṃ opāteti, duppañño hoti jaḷo eḷamūgo. Imehi kho, bhikkhave, pañcahi dhammehi samannāgato pacchāsamaṇo na ādātabbo.
‘‘പഞ്ചഹി, ഭിക്ഖവേ, ധമ്മേഹി സമന്നാഗതോ പച്ഛാസമണോ ആദാതബ്ബോ. കതമേഹി പഞ്ചഹി? നാതിദൂരേ ഗച്ഛതി ന അച്ചാസന്നേ, പത്തപരിയാപന്നം ഗണ്ഹതി, ആപത്തിസാമന്താ ഭണമാനം നിവാരേതി , ഭണമാനസ്സ ന അന്തരന്തരാ കഥം ഓപാതേതി, പഞ്ഞവാ ഹോതി അജളോ അനേളമൂഗോ. ഇമേഹി ഖോ, ഭിക്ഖവേ, പഞ്ചഹി ധമ്മേഹി സമന്നാഗതോ പച്ഛാസമണോ ആദാതബ്ബോ’’തി. ദുതിയം.
‘‘Pañcahi, bhikkhave, dhammehi samannāgato pacchāsamaṇo ādātabbo. Katamehi pañcahi? Nātidūre gacchati na accāsanne, pattapariyāpannaṃ gaṇhati, āpattisāmantā bhaṇamānaṃ nivāreti , bhaṇamānassa na antarantarā kathaṃ opāteti, paññavā hoti ajaḷo aneḷamūgo. Imehi kho, bhikkhave, pañcahi dhammehi samannāgato pacchāsamaṇo ādātabbo’’ti. Dutiyaṃ.
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / അങ്ഗുത്തരനികായ (അട്ഠകഥാ) • Aṅguttaranikāya (aṭṭhakathā) / ൨. പച്ഛാസമണസുത്തവണ്ണനാ • 2. Pacchāsamaṇasuttavaṇṇanā
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / അങ്ഗുത്തരനികായ (ടീകാ) • Aṅguttaranikāya (ṭīkā) / ൧-൪. കുലൂപകസുത്താദിവണ്ണനാ • 1-4. Kulūpakasuttādivaṇṇanā
