| Library / Tipiṭaka / តិបិដក • Tipiṭaka / បដិសម្ភិទាមគ្គបាឡិ • Paṭisambhidāmaggapāḷi |
១៤. បច្ចវេក្ខណញាណនិទ្ទេសោ
14. Paccavekkhaṇañāṇaniddeso
៦៥. កថំ តទា សមុទាគតេ ធម្មេ បស្សនេ បញ្ញា បច្ចវេក្ខណេ ញាណំ? សោតាបត្តិមគ្គក្ខណេ ទស្សនដ្ឋេន សម្មាទិដ្ឋិ តទា សមុទាគតា។ អភិនិរោបនដ្ឋេន សម្មាសង្កប្បោ តទា សមុទាគតោ។ បរិគ្គហដ្ឋេន សម្មាវាចា តទា សមុទាគតា។ សមុដ្ឋានដ្ឋេន សម្មាកម្មន្តោ តទា សមុទាគតោ។ វោទានដ្ឋេន សម្មាអាជីវោ តទា សមុទាគតោ។ បគ្គហដ្ឋេន សម្មាវាយាមោ តទា សមុទាគតោ។ ឧបដ្ឋានដ្ឋេន សម្មាសតិ តទា សមុទាគតា។ អវិក្ខេបដ្ឋេន សម្មាសមាធិ តទា សមុទាគតោ។
65. Kathaṃ tadā samudāgate dhamme passane paññā paccavekkhaṇe ñāṇaṃ? Sotāpattimaggakkhaṇe dassanaṭṭhena sammādiṭṭhi tadā samudāgatā. Abhiniropanaṭṭhena sammāsaṅkappo tadā samudāgato. Pariggahaṭṭhena sammāvācā tadā samudāgatā. Samuṭṭhānaṭṭhena sammākammanto tadā samudāgato. Vodānaṭṭhena sammāājīvo tadā samudāgato. Paggahaṭṭhena sammāvāyāmo tadā samudāgato. Upaṭṭhānaṭṭhena sammāsati tadā samudāgatā. Avikkhepaṭṭhena sammāsamādhi tadā samudāgato.
ឧបដ្ឋានដ្ឋេន សតិសម្ពោជ្ឈង្គោ តទា សមុទាគតោ។ បវិចយដ្ឋេន ធម្មវិចយសម្ពោជ្ឈង្គោ តទា សមុទាគតោ។ បគ្គហដ្ឋេន វីរិយសម្ពោជ្ឈង្គោ តទា សមុទាគតោ។ ផរណដ្ឋេន បីតិសម្ពោជ្ឈង្គោ តទា សមុទាគតោ។ ឧបសមដ្ឋេន បស្សទ្ធិសម្ពោជ្ឈង្គោ តទា សមុទាគតោ។ អវិក្ខេបដ្ឋេន សមាធិសម្ពោជ្ឈង្គោ តទា សមុទាគតោ។ បដិសង្ខានដ្ឋេន ឧបេក្ខាសម្ពោជ្ឈង្គោ តទា សមុទាគតោ។
Upaṭṭhānaṭṭhena satisambojjhaṅgo tadā samudāgato. Pavicayaṭṭhena dhammavicayasambojjhaṅgo tadā samudāgato. Paggahaṭṭhena vīriyasambojjhaṅgo tadā samudāgato. Pharaṇaṭṭhena pītisambojjhaṅgo tadā samudāgato. Upasamaṭṭhena passaddhisambojjhaṅgo tadā samudāgato. Avikkhepaṭṭhena samādhisambojjhaṅgo tadā samudāgato. Paṭisaṅkhānaṭṭhena upekkhāsambojjhaṅgo tadā samudāgato.
អស្សទ្ធិយេ អកម្បិយដ្ឋេន សទ្ធាពលំ តទា សមុទាគតំ។ កោសជ្ជេ អកម្បិយដ្ឋេន វីរិយពលំ តទា សមុទាគតំ។ បមាទេ អកម្បិយដ្ឋេន សតិពលំ តទា សមុទាគតំ។ ឧទ្ធច្ចេ អកម្បិយដ្ឋេន សមាធិពលំ តទា សមុទាគតំ។ អវិជ្ជាយ អកម្បិយដ្ឋេន បញ្ញាពលំ តទា សមុទាគតំ។
Assaddhiye akampiyaṭṭhena saddhābalaṃ tadā samudāgataṃ. Kosajje akampiyaṭṭhena vīriyabalaṃ tadā samudāgataṃ. Pamāde akampiyaṭṭhena satibalaṃ tadā samudāgataṃ. Uddhacce akampiyaṭṭhena samādhibalaṃ tadā samudāgataṃ. Avijjāya akampiyaṭṭhena paññābalaṃ tadā samudāgataṃ.
អធិមោក្ខដ្ឋេន សទ្ធិន្ទ្រិយំ តទា សមុទាគតំ។ បគ្គហដ្ឋេន វីរិយិន្ទ្រិយំ តទា សមុទាគតំ។ ឧបដ្ឋានដ្ឋេន សតិន្ទ្រិយំ តទា សមុទាគតំ។ អវិក្ខេបដ្ឋេន សមាធិន្ទ្រិយំ តទា សមុទាគតំ។ ទស្សនដ្ឋេន បញ្ញិន្ទ្រិយំ តទា សមុទាគតំ។
Adhimokkhaṭṭhena saddhindriyaṃ tadā samudāgataṃ. Paggahaṭṭhena vīriyindriyaṃ tadā samudāgataṃ. Upaṭṭhānaṭṭhena satindriyaṃ tadā samudāgataṃ. Avikkhepaṭṭhena samādhindriyaṃ tadā samudāgataṃ. Dassanaṭṭhena paññindriyaṃ tadā samudāgataṃ.
អាធិបតេយ្យដ្ឋេន ឥន្ទ្រិយា តទា សមុទាគតា។ អកម្បិយដ្ឋេន ពលា តទា សមុទាគតា។ និយ្យានដ្ឋេន សម្ពោជ្ឈង្គា តទា សមុទាគតា។ ហេតុដ្ឋេន មគ្គោ តទា សមុទាគតោ។ ឧបដ្ឋានដ្ឋេន សតិបដ្ឋានា តទា សមុទាគតា។ បទហនដ្ឋេន សម្មប្បធានា តទា សមុទាគតា។ ឥជ្ឈនដ្ឋេន ឥទ្ធិបាទា តទា សមុទាគតា។ តថដ្ឋេន សច្ចា តទា សមុទាគតា។ អវិក្ខេបដ្ឋេន សមថោ តទា សមុទាគតោ។ អនុបស្សនដ្ឋេន វិបស្សនា តទា សមុទាគតា។ ឯករសដ្ឋេន សមថវិបស្សនា តទា សមុទាគតា។ អនតិវត្តនដ្ឋេន យុគនទ្ធំ តទា សមុទាគតំ។ សំវរដ្ឋេន សីលវិសុទ្ធិ តទា សមុទាគតា។ អវិក្ខេបដ្ឋេន ចិត្តវិសុទ្ធិ តទា សមុទាគតា។ ទស្សនដ្ឋេន ទិដ្ឋិវិសុទ្ធិ តទា សមុទាគតា។ វិមុត្តដ្ឋេន វិមោក្ខោ តទា សមុទាគតោ។ បដិវេធដ្ឋេន វិជ្ជា តទា សមុទាគតា។ បរិច្ចាគដ្ឋេន វិមុត្តិ តទា សមុទាគតា។ សមុច្ឆេទដ្ឋេន ខយេ ញាណំ តទា សមុទាគតំ។
Ādhipateyyaṭṭhena indriyā tadā samudāgatā. Akampiyaṭṭhena balā tadā samudāgatā. Niyyānaṭṭhena sambojjhaṅgā tadā samudāgatā. Hetuṭṭhena maggo tadā samudāgato. Upaṭṭhānaṭṭhena satipaṭṭhānā tadā samudāgatā. Padahanaṭṭhena sammappadhānā tadā samudāgatā. Ijjhanaṭṭhena iddhipādā tadā samudāgatā. Tathaṭṭhena saccā tadā samudāgatā. Avikkhepaṭṭhena samatho tadā samudāgato. Anupassanaṭṭhena vipassanā tadā samudāgatā. Ekarasaṭṭhena samathavipassanā tadā samudāgatā. Anativattanaṭṭhena yuganaddhaṃ tadā samudāgataṃ. Saṃvaraṭṭhena sīlavisuddhi tadā samudāgatā. Avikkhepaṭṭhena cittavisuddhi tadā samudāgatā. Dassanaṭṭhena diṭṭhivisuddhi tadā samudāgatā. Vimuttaṭṭhena vimokkho tadā samudāgato. Paṭivedhaṭṭhena vijjā tadā samudāgatā. Pariccāgaṭṭhena vimutti tadā samudāgatā. Samucchedaṭṭhena khaye ñāṇaṃ tadā samudāgataṃ.
ឆន្ទោ មូលដ្ឋេន តទា សមុទាគតោ។ មនសិការោ សមុដ្ឋានដ្ឋេន តទា សមុទាគតោ។ ផស្សោ សមោធានដ្ឋេន តទា សមុទាគតោ។ វេទនា សមោសរណដ្ឋេន តទា សមុទាគតា។ សមាធិ បមុខដ្ឋេន តទា សមុទាគតោ។ សតិ អាធិបតេយ្យដ្ឋេន តទា សមុទាគតា។ បញ្ញា តទុត្តរដ្ឋេន តទា សមុទាគតា ។ វិមុត្តិ សារដ្ឋេន តទា សមុទាគតា។ អមតោគធំ និព្ពានំ បរិយោសានដ្ឋេន តទា សមុទាគតំ។ វុដ្ឋហិត្វា បច្ចវេក្ខតិ, ឥមេ ធម្មា តទា សមុទាគតា។
Chando mūlaṭṭhena tadā samudāgato. Manasikāro samuṭṭhānaṭṭhena tadā samudāgato. Phasso samodhānaṭṭhena tadā samudāgato. Vedanā samosaraṇaṭṭhena tadā samudāgatā. Samādhi pamukhaṭṭhena tadā samudāgato. Sati ādhipateyyaṭṭhena tadā samudāgatā. Paññā taduttaraṭṭhena tadā samudāgatā . Vimutti sāraṭṭhena tadā samudāgatā. Amatogadhaṃ nibbānaṃ pariyosānaṭṭhena tadā samudāgataṃ. Vuṭṭhahitvā paccavekkhati, ime dhammā tadā samudāgatā.
សោតាបត្តិផលក្ខណេ ទស្សនដ្ឋេន សម្មាទិដ្ឋិ តទា សមុទាគតា។ អភិនិរោបនដ្ឋេន សម្មាសង្កប្បោ តទា សមុទាគតោ…បេ.… បដិប្បស្សទ្ធដ្ឋេន អនុប្បាទេ ញាណំ តទា សមុទាគតំ។ ឆន្ទោ មូលដ្ឋេន តទា សមុទាគតោ។ មនសិការោ សមុដ្ឋានដ្ឋេន តទា សមុទាគតោ។ ផស្សោ សមោធានដ្ឋេន តទា សមុទាគតោ។ វេទនា សមោសរណដ្ឋេន តទា សមុទាគតា។ សមាធិ បមុខដ្ឋេន តទា សមុទាគតោ។ សតិ អាធិបតេយ្យដ្ឋេន តទា សមុទាគតា។ បញ្ញា តទុត្តរដ្ឋេន តទា សមុទាគតា។ វិមុត្តិ សារដ្ឋេន តទា សមុទាគតា។ អមតោគធំ និព្ពានំ បរិយោសានដ្ឋេន តទា សមុទាគតំ។ វុដ្ឋហិត្វា បច្ចវេក្ខតិ, ឥមេ ធម្មា តទា សមុទាគតា។
Sotāpattiphalakkhaṇe dassanaṭṭhena sammādiṭṭhi tadā samudāgatā. Abhiniropanaṭṭhena sammāsaṅkappo tadā samudāgato…pe… paṭippassaddhaṭṭhena anuppāde ñāṇaṃ tadā samudāgataṃ. Chando mūlaṭṭhena tadā samudāgato. Manasikāro samuṭṭhānaṭṭhena tadā samudāgato. Phasso samodhānaṭṭhena tadā samudāgato. Vedanā samosaraṇaṭṭhena tadā samudāgatā. Samādhi pamukhaṭṭhena tadā samudāgato. Sati ādhipateyyaṭṭhena tadā samudāgatā. Paññā taduttaraṭṭhena tadā samudāgatā. Vimutti sāraṭṭhena tadā samudāgatā. Amatogadhaṃ nibbānaṃ pariyosānaṭṭhena tadā samudāgataṃ. Vuṭṭhahitvā paccavekkhati, ime dhammā tadā samudāgatā.
សកទាគាមិមគ្គក្ខណេ…បេ.… សកទាគាមិផលក្ខណេ…បេ.… អនាគាមិមគ្គក្ខណេ…បេ.… អនាគាមិផលក្ខណេ…បេ.… អរហត្តមគ្គក្ខណេ ទស្សនដ្ឋេន សម្មាទិដ្ឋិ តទា សមុទាគតា…បេ.… សមុច្ឆេទដ្ឋេន ខយេ ញាណំ តទា សមុទាគតំ។ ឆន្ទោ មូលដ្ឋេន តទា សមុទាគតោ…បេ.… អមតោគធំ និព្ពានំ បរិយោសានដ្ឋេន តទា សមុទាគតំ។ វុដ្ឋហិត្វា បច្ចវេក្ខតិ, ឥមេ ធម្មា តទា សមុទាគតា។
Sakadāgāmimaggakkhaṇe…pe… sakadāgāmiphalakkhaṇe…pe… anāgāmimaggakkhaṇe…pe… anāgāmiphalakkhaṇe…pe… arahattamaggakkhaṇe dassanaṭṭhena sammādiṭṭhi tadā samudāgatā…pe… samucchedaṭṭhena khaye ñāṇaṃ tadā samudāgataṃ. Chando mūlaṭṭhena tadā samudāgato…pe… amatogadhaṃ nibbānaṃ pariyosānaṭṭhena tadā samudāgataṃ. Vuṭṭhahitvā paccavekkhati, ime dhammā tadā samudāgatā.
អរហត្តផលក្ខណេ ទស្សនដ្ឋេន សម្មាទិដ្ឋិ តទា សមុទាគតា …បេ.… បដិប្បស្សទ្ធដ្ឋេន អនុប្បាទេ ញាណំ តទា សមុទាគតំ។ ឆន្ទោ មូលដ្ឋេន តទា សមុទាគតោ …បេ.… អមតោគធំ និព្ពានំ បរិយោសានដ្ឋេន តទា សមុទាគតំ។ វុដ្ឋហិត្វា បច្ចវេក្ខតិ, ឥមេ ធម្មា តទា សមុទាគតា។ តំ ញាតដ្ឋេន ញាណំ, បជាននដ្ឋេន បញ្ញា។ តេន វុច្ចតិ – ‘‘តទា សមុទាគតេ ធម្មេ បស្សនេ បញ្ញា បច្ចវេក្ខណេ ញាណំ’’។
Arahattaphalakkhaṇe dassanaṭṭhena sammādiṭṭhi tadā samudāgatā …pe… paṭippassaddhaṭṭhena anuppāde ñāṇaṃ tadā samudāgataṃ. Chando mūlaṭṭhena tadā samudāgato …pe… amatogadhaṃ nibbānaṃ pariyosānaṭṭhena tadā samudāgataṃ. Vuṭṭhahitvā paccavekkhati, ime dhammā tadā samudāgatā. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘tadā samudāgate dhamme passane paññā paccavekkhaṇe ñāṇaṃ’’.
បច្ចវេក្ខណញាណនិទ្ទេសោ ចុទ្ទសមោ។
Paccavekkhaṇañāṇaniddeso cuddasamo.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / បដិសម្ភិទាមគ្គ-អដ្ឋកថា • Paṭisambhidāmagga-aṭṭhakathā / ១៤. បច្ចវេក្ខណញាណនិទ្ទេសវណ្ណនា • 14. Paccavekkhaṇañāṇaniddesavaṇṇanā
