| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
১৪. পচ্চৰেক্খণঞাণনিদ্দেসো
14. Paccavekkhaṇañāṇaniddeso
৬৫. কথং তদা সমুদাগতে ধম্মে পস্সনে পঞ্ঞা পচ্চৰেক্খণে ঞাণং? সোতাপত্তিমগ্গক্খণে দস্সনট্ঠেন সম্মাদিট্ঠি তদা সমুদাগতা। অভিনিরোপনট্ঠেন সম্মাসঙ্কপ্পো তদা সমুদাগতো। পরিগ্গহট্ঠেন সম্মাৰাচা তদা সমুদাগতা। সমুট্ঠানট্ঠেন সম্মাকম্মন্তো তদা সমুদাগতো। ৰোদানট্ঠেন সম্মাআজীৰো তদা সমুদাগতো। পগ্গহট্ঠেন সম্মাৰাযামো তদা সমুদাগতো। উপট্ঠানট্ঠেন সম্মাসতি তদা সমুদাগতা। অৰিক্খেপট্ঠেন সম্মাসমাধি তদা সমুদাগতো।
65. Kathaṃ tadā samudāgate dhamme passane paññā paccavekkhaṇe ñāṇaṃ? Sotāpattimaggakkhaṇe dassanaṭṭhena sammādiṭṭhi tadā samudāgatā. Abhiniropanaṭṭhena sammāsaṅkappo tadā samudāgato. Pariggahaṭṭhena sammāvācā tadā samudāgatā. Samuṭṭhānaṭṭhena sammākammanto tadā samudāgato. Vodānaṭṭhena sammāājīvo tadā samudāgato. Paggahaṭṭhena sammāvāyāmo tadā samudāgato. Upaṭṭhānaṭṭhena sammāsati tadā samudāgatā. Avikkhepaṭṭhena sammāsamādhi tadā samudāgato.
উপট্ঠানট্ঠেন সতিসম্বোজ্ঝঙ্গো তদা সমুদাগতো। পৰিচযট্ঠেন ধম্মৰিচযসম্বোজ্ঝঙ্গো তদা সমুদাগতো। পগ্গহট্ঠেন ৰীরিযসম্বোজ্ঝঙ্গো তদা সমুদাগতো। ফরণট্ঠেন পীতিসম্বোজ্ঝঙ্গো তদা সমুদাগতো। উপসমট্ঠেন পস্সদ্ধিসম্বোজ্ঝঙ্গো তদা সমুদাগতো। অৰিক্খেপট্ঠেন সমাধিসম্বোজ্ঝঙ্গো তদা সমুদাগতো। পটিসঙ্খানট্ঠেন উপেক্খাসম্বোজ্ঝঙ্গো তদা সমুদাগতো।
Upaṭṭhānaṭṭhena satisambojjhaṅgo tadā samudāgato. Pavicayaṭṭhena dhammavicayasambojjhaṅgo tadā samudāgato. Paggahaṭṭhena vīriyasambojjhaṅgo tadā samudāgato. Pharaṇaṭṭhena pītisambojjhaṅgo tadā samudāgato. Upasamaṭṭhena passaddhisambojjhaṅgo tadā samudāgato. Avikkhepaṭṭhena samādhisambojjhaṅgo tadā samudāgato. Paṭisaṅkhānaṭṭhena upekkhāsambojjhaṅgo tadā samudāgato.
অস্সদ্ধিযে অকম্পিযট্ঠেন সদ্ধাবলং তদা সমুদাগতং। কোসজ্জে অকম্পিযট্ঠেন ৰীরিযবলং তদা সমুদাগতং। পমাদে অকম্পিযট্ঠেন সতিবলং তদা সমুদাগতং। উদ্ধচ্চে অকম্পিযট্ঠেন সমাধিবলং তদা সমুদাগতং। অৰিজ্জায অকম্পিযট্ঠেন পঞ্ঞাবলং তদা সমুদাগতং।
Assaddhiye akampiyaṭṭhena saddhābalaṃ tadā samudāgataṃ. Kosajje akampiyaṭṭhena vīriyabalaṃ tadā samudāgataṃ. Pamāde akampiyaṭṭhena satibalaṃ tadā samudāgataṃ. Uddhacce akampiyaṭṭhena samādhibalaṃ tadā samudāgataṃ. Avijjāya akampiyaṭṭhena paññābalaṃ tadā samudāgataṃ.
অধিমোক্খট্ঠেন সদ্ধিন্দ্রিযং তদা সমুদাগতং। পগ্গহট্ঠেন ৰীরিযিন্দ্রিযং তদা সমুদাগতং। উপট্ঠানট্ঠেন সতিন্দ্রিযং তদা সমুদাগতং। অৰিক্খেপট্ঠেন সমাধিন্দ্রিযং তদা সমুদাগতং। দস্সনট্ঠেন পঞ্ঞিন্দ্রিযং তদা সমুদাগতং।
Adhimokkhaṭṭhena saddhindriyaṃ tadā samudāgataṃ. Paggahaṭṭhena vīriyindriyaṃ tadā samudāgataṃ. Upaṭṭhānaṭṭhena satindriyaṃ tadā samudāgataṃ. Avikkhepaṭṭhena samādhindriyaṃ tadā samudāgataṃ. Dassanaṭṭhena paññindriyaṃ tadā samudāgataṃ.
আধিপতেয্যট্ঠেন ইন্দ্রিযা তদা সমুদাগতা। অকম্পিযট্ঠেন বলা তদা সমুদাগতা। নিয্যানট্ঠেন সম্বোজ্ঝঙ্গা তদা সমুদাগতা। হেতুট্ঠেন মগ্গো তদা সমুদাগতো। উপট্ঠানট্ঠেন সতিপট্ঠানা তদা সমুদাগতা। পদহনট্ঠেন সম্মপ্পধানা তদা সমুদাগতা। ইজ্ঝনট্ঠেন ইদ্ধিপাদা তদা সমুদাগতা। তথট্ঠেন সচ্চা তদা সমুদাগতা। অৰিক্খেপট্ঠেন সমথো তদা সমুদাগতো। অনুপস্সনট্ঠেন ৰিপস্সনা তদা সমুদাগতা। একরসট্ঠেন সমথৰিপস্সনা তদা সমুদাগতা। অনতিৰত্তনট্ঠেন যুগনদ্ধং তদা সমুদাগতং। সংৰরট্ঠেন সীলৰিসুদ্ধি তদা সমুদাগতা। অৰিক্খেপট্ঠেন চিত্তৰিসুদ্ধি তদা সমুদাগতা। দস্সনট্ঠেন দিট্ঠিৰিসুদ্ধি তদা সমুদাগতা। ৰিমুত্তট্ঠেন ৰিমোক্খো তদা সমুদাগতো। পটিৰেধট্ঠেন ৰিজ্জা তদা সমুদাগতা। পরিচ্চাগট্ঠেন ৰিমুত্তি তদা সমুদাগতা। সমুচ্ছেদট্ঠেন খযে ঞাণং তদা সমুদাগতং।
Ādhipateyyaṭṭhena indriyā tadā samudāgatā. Akampiyaṭṭhena balā tadā samudāgatā. Niyyānaṭṭhena sambojjhaṅgā tadā samudāgatā. Hetuṭṭhena maggo tadā samudāgato. Upaṭṭhānaṭṭhena satipaṭṭhānā tadā samudāgatā. Padahanaṭṭhena sammappadhānā tadā samudāgatā. Ijjhanaṭṭhena iddhipādā tadā samudāgatā. Tathaṭṭhena saccā tadā samudāgatā. Avikkhepaṭṭhena samatho tadā samudāgato. Anupassanaṭṭhena vipassanā tadā samudāgatā. Ekarasaṭṭhena samathavipassanā tadā samudāgatā. Anativattanaṭṭhena yuganaddhaṃ tadā samudāgataṃ. Saṃvaraṭṭhena sīlavisuddhi tadā samudāgatā. Avikkhepaṭṭhena cittavisuddhi tadā samudāgatā. Dassanaṭṭhena diṭṭhivisuddhi tadā samudāgatā. Vimuttaṭṭhena vimokkho tadā samudāgato. Paṭivedhaṭṭhena vijjā tadā samudāgatā. Pariccāgaṭṭhena vimutti tadā samudāgatā. Samucchedaṭṭhena khaye ñāṇaṃ tadā samudāgataṃ.
ছন্দো মূলট্ঠেন তদা সমুদাগতো। মনসিকারো সমুট্ঠানট্ঠেন তদা সমুদাগতো। ফস্সো সমোধানট্ঠেন তদা সমুদাগতো। ৰেদনা সমোসরণট্ঠেন তদা সমুদাগতা। সমাধি পমুখট্ঠেন তদা সমুদাগতো। সতি আধিপতেয্যট্ঠেন তদা সমুদাগতা। পঞ্ঞা তদুত্তরট্ঠেন তদা সমুদাগতা । ৰিমুত্তি সারট্ঠেন তদা সমুদাগতা। অমতোগধং নিব্বানং পরিযোসানট্ঠেন তদা সমুদাগতং। ৰুট্ঠহিত্ৰা পচ্চৰেক্খতি, ইমে ধম্মা তদা সমুদাগতা।
Chando mūlaṭṭhena tadā samudāgato. Manasikāro samuṭṭhānaṭṭhena tadā samudāgato. Phasso samodhānaṭṭhena tadā samudāgato. Vedanā samosaraṇaṭṭhena tadā samudāgatā. Samādhi pamukhaṭṭhena tadā samudāgato. Sati ādhipateyyaṭṭhena tadā samudāgatā. Paññā taduttaraṭṭhena tadā samudāgatā . Vimutti sāraṭṭhena tadā samudāgatā. Amatogadhaṃ nibbānaṃ pariyosānaṭṭhena tadā samudāgataṃ. Vuṭṭhahitvā paccavekkhati, ime dhammā tadā samudāgatā.
সোতাপত্তিফলক্খণে দস্সনট্ঠেন সম্মাদিট্ঠি তদা সমুদাগতা। অভিনিরোপনট্ঠেন সম্মাসঙ্কপ্পো তদা সমুদাগতো…পে॰… পটিপ্পস্সদ্ধট্ঠেন অনুপ্পাদে ঞাণং তদা সমুদাগতং। ছন্দো মূলট্ঠেন তদা সমুদাগতো। মনসিকারো সমুট্ঠানট্ঠেন তদা সমুদাগতো। ফস্সো সমোধানট্ঠেন তদা সমুদাগতো। ৰেদনা সমোসরণট্ঠেন তদা সমুদাগতা। সমাধি পমুখট্ঠেন তদা সমুদাগতো। সতি আধিপতেয্যট্ঠেন তদা সমুদাগতা। পঞ্ঞা তদুত্তরট্ঠেন তদা সমুদাগতা। ৰিমুত্তি সারট্ঠেন তদা সমুদাগতা। অমতোগধং নিব্বানং পরিযোসানট্ঠেন তদা সমুদাগতং। ৰুট্ঠহিত্ৰা পচ্চৰেক্খতি, ইমে ধম্মা তদা সমুদাগতা।
Sotāpattiphalakkhaṇe dassanaṭṭhena sammādiṭṭhi tadā samudāgatā. Abhiniropanaṭṭhena sammāsaṅkappo tadā samudāgato…pe… paṭippassaddhaṭṭhena anuppāde ñāṇaṃ tadā samudāgataṃ. Chando mūlaṭṭhena tadā samudāgato. Manasikāro samuṭṭhānaṭṭhena tadā samudāgato. Phasso samodhānaṭṭhena tadā samudāgato. Vedanā samosaraṇaṭṭhena tadā samudāgatā. Samādhi pamukhaṭṭhena tadā samudāgato. Sati ādhipateyyaṭṭhena tadā samudāgatā. Paññā taduttaraṭṭhena tadā samudāgatā. Vimutti sāraṭṭhena tadā samudāgatā. Amatogadhaṃ nibbānaṃ pariyosānaṭṭhena tadā samudāgataṃ. Vuṭṭhahitvā paccavekkhati, ime dhammā tadā samudāgatā.
সকদাগামিমগ্গক্খণে…পে॰… সকদাগামিফলক্খণে…পে॰… অনাগামিমগ্গক্খণে…পে॰… অনাগামিফলক্খণে…পে॰… অরহত্তমগ্গক্খণে দস্সনট্ঠেন সম্মাদিট্ঠি তদা সমুদাগতা…পে॰… সমুচ্ছেদট্ঠেন খযে ঞাণং তদা সমুদাগতং। ছন্দো মূলট্ঠেন তদা সমুদাগতো…পে॰… অমতোগধং নিব্বানং পরিযোসানট্ঠেন তদা সমুদাগতং। ৰুট্ঠহিত্ৰা পচ্চৰেক্খতি, ইমে ধম্মা তদা সমুদাগতা।
Sakadāgāmimaggakkhaṇe…pe… sakadāgāmiphalakkhaṇe…pe… anāgāmimaggakkhaṇe…pe… anāgāmiphalakkhaṇe…pe… arahattamaggakkhaṇe dassanaṭṭhena sammādiṭṭhi tadā samudāgatā…pe… samucchedaṭṭhena khaye ñāṇaṃ tadā samudāgataṃ. Chando mūlaṭṭhena tadā samudāgato…pe… amatogadhaṃ nibbānaṃ pariyosānaṭṭhena tadā samudāgataṃ. Vuṭṭhahitvā paccavekkhati, ime dhammā tadā samudāgatā.
অরহত্তফলক্খণে দস্সনট্ঠেন সম্মাদিট্ঠি তদা সমুদাগতা …পে॰… পটিপ্পস্সদ্ধট্ঠেন অনুপ্পাদে ঞাণং তদা সমুদাগতং। ছন্দো মূলট্ঠেন তদা সমুদাগতো …পে॰… অমতোগধং নিব্বানং পরিযোসানট্ঠেন তদা সমুদাগতং। ৰুট্ঠহিত্ৰা পচ্চৰেক্খতি, ইমে ধম্মা তদা সমুদাগতা। তং ঞাতট্ঠেন ঞাণং, পজাননট্ঠেন পঞ্ঞা। তেন ৰুচ্চতি – ‘‘তদা সমুদাগতে ধম্মে পস্সনে পঞ্ঞা পচ্চৰেক্খণে ঞাণং’’।
Arahattaphalakkhaṇe dassanaṭṭhena sammādiṭṭhi tadā samudāgatā …pe… paṭippassaddhaṭṭhena anuppāde ñāṇaṃ tadā samudāgataṃ. Chando mūlaṭṭhena tadā samudāgato …pe… amatogadhaṃ nibbānaṃ pariyosānaṭṭhena tadā samudāgataṃ. Vuṭṭhahitvā paccavekkhati, ime dhammā tadā samudāgatā. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘tadā samudāgate dhamme passane paññā paccavekkhaṇe ñāṇaṃ’’.
পচ্চৰেক্খণঞাণনিদ্দেসো চুদ্দসমো।
Paccavekkhaṇañāṇaniddeso cuddasamo.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / ১৪. পচ্চৰেক্খণঞাণনিদ্দেসৰণ্ণনা • 14. Paccavekkhaṇañāṇaniddesavaṇṇanā
