| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
६. पच्चनीकसुत्तं
6. Paccanīkasuttaṃ
२०२. सावत्थिनिदानं । तेन खो पन समयेन पच्चनीकसातो नाम ब्राह्मणो सावत्थियं पटिवसति। अथ खो पच्चनीकसातस्स ब्राह्मणस्स एतदहोसि – ‘‘यंनूनाहं येन समणो गोतमो तेनुपसङ्कमेय्यं। यं यदेव समणो गोतमो भासिस्सति तं तदेवस्साहं 1 पच्चनीकास्स’’न्ति 2। तेन खो पन समयेन भगवा अब्भोकासे चङ्कमति। अथ खो पच्चनीकसातो ब्राह्मणो येन भगवा तेनुपसङ्कमि; उपसङ्कमित्वा भगवन्तं चङ्कमन्तं एतदवोच – ‘भण समणधम्म’न्ति।
202. Sāvatthinidānaṃ . Tena kho pana samayena paccanīkasāto nāma brāhmaṇo sāvatthiyaṃ paṭivasati. Atha kho paccanīkasātassa brāhmaṇassa etadahosi – ‘‘yaṃnūnāhaṃ yena samaṇo gotamo tenupasaṅkameyyaṃ. Yaṃ yadeva samaṇo gotamo bhāsissati taṃ tadevassāhaṃ 3 paccanīkāssa’’nti 4. Tena kho pana samayena bhagavā abbhokāse caṅkamati. Atha kho paccanīkasāto brāhmaṇo yena bhagavā tenupasaṅkami; upasaṅkamitvā bhagavantaṃ caṅkamantaṃ etadavoca – ‘bhaṇa samaṇadhamma’nti.
‘‘न पच्चनीकसातेन, सुविजानं सुभासितं।
‘‘Na paccanīkasātena, suvijānaṃ subhāsitaṃ;
उपक्किलिट्ठचित्तेन, सारम्भबहुलेन च॥
Upakkiliṭṭhacittena, sārambhabahulena ca.
‘‘यो च विनेय्य सारम्भं, अप्पसादञ्च चेतसो।
‘‘Yo ca vineyya sārambhaṃ, appasādañca cetaso;
आघातं पटिनिस्सज्ज, स वे 5 जञ्ञा सुभासित’’न्ति॥
Āghātaṃ paṭinissajja, sa ve 6 jaññā subhāsita’’nti.
एवं वुत्ते, पच्चनीकसातो ब्राह्मणो भगवन्तं एतदवोच – ‘‘अभिक्कन्तं, भो गोतम, अभिक्कन्तं, भो गोतम…पे॰… उपासकं मं भवं गोतमो धारेतु अज्जतग्गे पाणुपेतं सरणं गत’’न्ति।
Evaṃ vutte, paccanīkasāto brāhmaṇo bhagavantaṃ etadavoca – ‘‘abhikkantaṃ, bho gotama, abhikkantaṃ, bho gotama…pe… upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / ६. पच्चनीकसुत्तवण्णना • 6. Paccanīkasuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / ६. पच्चनीकसुत्तवण्णना • 6. Paccanīkasuttavaṇṇanā
