| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৫. পব্বজ্জপঞ্হো
5. Pabbajjapañho
৫. অথ খো আযস্মা নাগসেনো যেন মিলিন্দস্স রঞ্ঞো নিৰেসনং তেনুপসঙ্কমি, উপসঙ্কমিত্ৰা পঞ্ঞত্তে আসনে নিসীদি। অথ খো মিলিন্দো রাজা আযস্মন্তং নাগসেনং সপরিসং পণীতেন খাদনীযেন ভোজনীযেন সহত্থা সন্তপ্পেত্ৰা সম্পৰারেত্ৰা একমেকং ভিক্খুং একমেকেন দুস্সযুগেন অচ্ছাদেত্ৰা আযস্মন্তং নাগসেনং তিচীৰরেন অচ্ছাদেত্ৰা আযস্মন্তং নাগসেনং এতদৰোচ ‘‘ভন্তে নাগসেন দসহি, ভিক্খূহি সদ্ধিং ইধ নিসীদথ, অৰসেসা গচ্ছন্তূ’’তি।
5. Atha kho āyasmā nāgaseno yena milindassa rañño nivesanaṃ tenupasaṅkami, upasaṅkamitvā paññatte āsane nisīdi. Atha kho milindo rājā āyasmantaṃ nāgasenaṃ saparisaṃ paṇītena khādanīyena bhojanīyena sahatthā santappetvā sampavāretvā ekamekaṃ bhikkhuṃ ekamekena dussayugena acchādetvā āyasmantaṃ nāgasenaṃ ticīvarena acchādetvā āyasmantaṃ nāgasenaṃ etadavoca ‘‘bhante nāgasena dasahi, bhikkhūhi saddhiṃ idha nisīdatha, avasesā gacchantū’’ti.
অথ খো মিলিন্দো রাজা আযস্মন্তং নাগসেনং ভুত্তাৰিং ওনীতপত্তপাণিং ৰিদিত্ৰা অঞ্ঞতরং নীচং আসনং গহেত্ৰা একমন্তং নিসীদি, একমন্তং নিসিন্নো খো মিলিন্দো রাজা আযস্মন্তং নাগসেনং এতদৰোচ ‘‘ভন্তে নাগসেন, কিম্হি হোতি কথাসল্লাপো’’তি? ‘‘অত্থেন মযং, মহারাজ, অত্থিকা, অত্থে হোতু কথাসল্লাপো’’তি।
Atha kho milindo rājā āyasmantaṃ nāgasenaṃ bhuttāviṃ onītapattapāṇiṃ viditvā aññataraṃ nīcaṃ āsanaṃ gahetvā ekamantaṃ nisīdi, ekamantaṃ nisinno kho milindo rājā āyasmantaṃ nāgasenaṃ etadavoca ‘‘bhante nāgasena, kimhi hoti kathāsallāpo’’ti? ‘‘Atthena mayaṃ, mahārāja, atthikā, atthe hotu kathāsallāpo’’ti.
রাজা আহ ‘‘কিমত্থিযা, ভন্তে নাগসেন, তুম্হাকং পব্বজ্জা, কো চ তুম্হাকং পরমত্থো’’তি। থেরো আহ ‘‘কিন্তি, মহারাজ, ইদং দুক্খং নিরুজ্ঝেয্য, অঞ্ঞঞ্চ দুক্খং ন উপ্পজ্জেয্যাতি। এতদত্থা, মহারাজ, অম্হাকং পব্বজ্জা, অনুপাদা পরিনিব্বানং খো পন অম্হাকং পরমত্থো’’তি।
Rājā āha ‘‘kimatthiyā, bhante nāgasena, tumhākaṃ pabbajjā, ko ca tumhākaṃ paramattho’’ti. Thero āha ‘‘kinti, mahārāja, idaṃ dukkhaṃ nirujjheyya, aññañca dukkhaṃ na uppajjeyyāti. Etadatthā, mahārāja, amhākaṃ pabbajjā, anupādā parinibbānaṃ kho pana amhākaṃ paramattho’’ti.
‘‘ত্ৰং পন, ভন্তে, এতদত্থায পব্বজিতোসী’’তি? ‘‘অহং খো, মহারাজ, দহরকো সন্তো পব্বজিতো, ন জানামি ইমস্স নামত্থায পব্বজামীতি, অপি চ খো মে এৰং অহোসি ‘পণ্ডিতা ইমে সমণা সক্যপুত্তিযা, তে মং সিক্খাপেস্সন্তী’তি, স্ৰাহং তেহি সিক্খাপিতো জানামি চ পস্সামি চ ‘ইমস্স নামত্থায পব্বজ্জা’’’তি।
‘‘Tvaṃ pana, bhante, etadatthāya pabbajitosī’’ti? ‘‘Ahaṃ kho, mahārāja, daharako santo pabbajito, na jānāmi imassa nāmatthāya pabbajāmīti, api ca kho me evaṃ ahosi ‘paṇḍitā ime samaṇā sakyaputtiyā, te maṃ sikkhāpessantī’ti, svāhaṃ tehi sikkhāpito jānāmi ca passāmi ca ‘imassa nāmatthāya pabbajjā’’’ti.
‘‘কল্লোসি , ভন্তে নাগসেনা’’তি।
‘‘Kallosi , bhante nāgasenā’’ti.
পব্বজ্জপঞ্হো পঞ্চমো।
Pabbajjapañho pañcamo.
Footnotes:
