| Library / Tipiṭaka / តិបិដក • Tipiṭaka / មហាវគ្គបាឡិ • Mahāvaggapāḷi |
២៥៨. បព្ពាជនីយកម្មវិវាទកថា
258. Pabbājanīyakammavivādakathā
៤៣៥. ឥធ បន, ភិក្ខវេ, ភិក្ខុ កុលទូសកោ ហោតិ បាបសមាចារោ។ តត្រ ចេ ភិក្ខូនំ ឯវំ ហោតិ – ‘‘អយំ ខោ, អាវុសោ, ភិក្ខុ កុលទូសកោ បាបសមាចារោ។ ហន្ទស្ស មយំ បព្ពាជនីយកម្មំ ករោមា’’តិ។ តេ តស្ស បព្ពាជនីយកម្មំ ករោន្តិ – អធម្មេន វគ្គា…បេ.… អធម្មេន សមគ្គា… ធម្មេន វគ្គា… ធម្មបតិរូបកេន វគ្គា… ធម្មបតិរូបកេន សមគ្គា។ តត្រដ្ឋោ សង្ឃោ វិវទតិ – ‘‘អធម្មេន វគ្គកម្មំ, អធម្មេន សមគ្គកម្មំ, ធម្មេន វគ្គកម្មំ, ធម្មបតិរូបកេន វគ្គកម្មំ, ធម្មបតិរូបកេន សមគ្គកម្មំ, អកតំ កម្មំ ទុក្កដំ កម្មំ បុន កាតព្ពំ កម្ម’’ន្តិ។ តត្រ, ភិក្ខវេ, យេ តេ ភិក្ខូ ឯវមាហំសុ – ‘‘ធម្មបតិរូបកេន សមគ្គកម្ម’’ន្តិ យេ ច តេ ភិក្ខូ ឯវមាហំសុ – ‘‘អកតំ កម្មំ ទុក្កដំ កម្មំ បុន កាតព្ពំ កម្ម’’ន្តិ, ឥមេ តត្ថ ភិក្ខូ ធម្មវាទិនោ។ ឥមេ បញ្ច វារា សំខិត្តា។
435. Idha pana, bhikkhave, bhikkhu kuladūsako hoti pāpasamācāro. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu kuladūsako pāpasamācāro. Handassa mayaṃ pabbājanīyakammaṃ karomā’’ti. Te tassa pabbājanīyakammaṃ karonti – adhammena vaggā…pe… adhammena samaggā… dhammena vaggā… dhammapatirūpakena vaggā… dhammapatirūpakena samaggā. Tatraṭṭho saṅgho vivadati – ‘‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamma’’nti. Tatra, bhikkhave, ye te bhikkhū evamāhaṃsu – ‘‘dhammapatirūpakena samaggakamma’’nti ye ca te bhikkhū evamāhaṃsu – ‘‘akataṃ kammaṃ dukkaṭaṃ kammaṃ puna kātabbaṃ kamma’’nti, ime tattha bhikkhū dhammavādino. Ime pañca vārā saṃkhittā.
បព្ពាជនីយកម្មវិវាទកថា និដ្ឋិតា។
Pabbājanīyakammavivādakathā niṭṭhitā.
