| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
২৫৮. পব্বাজনীযকম্মৰিৰাদকথা
258. Pabbājanīyakammavivādakathā
৪৩৫. ইধ পন, ভিক্খৰে, ভিক্খু কুলদূসকো হোতি পাপসমাচারো। তত্র চে ভিক্খূনং এৰং হোতি – ‘‘অযং খো, আৰুসো, ভিক্খু কুলদূসকো পাপসমাচারো। হন্দস্স মযং পব্বাজনীযকম্মং করোমা’’তি। তে তস্স পব্বাজনীযকম্মং করোন্তি – অধম্মেন ৰগ্গা…পে॰… অধম্মেন সমগ্গা… ধম্মেন ৰগ্গা… ধম্মপতিরূপকেন ৰগ্গা… ধম্মপতিরূপকেন সমগ্গা। তত্রট্ঠো সঙ্ঘো ৰিৰদতি – ‘‘অধম্মেন ৰগ্গকম্মং, অধম্মেন সমগ্গকম্মং, ধম্মেন ৰগ্গকম্মং, ধম্মপতিরূপকেন ৰগ্গকম্মং, ধম্মপতিরূপকেন সমগ্গকম্মং, অকতং কম্মং দুক্কটং কম্মং পুন কাতব্বং কম্ম’’ন্তি। তত্র, ভিক্খৰে, যে তে ভিক্খূ এৰমাহংসু – ‘‘ধম্মপতিরূপকেন সমগ্গকম্ম’’ন্তি যে চ তে ভিক্খূ এৰমাহংসু – ‘‘অকতং কম্মং দুক্কটং কম্মং পুন কাতব্বং কম্ম’’ন্তি, ইমে তত্থ ভিক্খূ ধম্মৰাদিনো। ইমে পঞ্চ ৰারা সংখিত্তা।
435. Idha pana, bhikkhave, bhikkhu kuladūsako hoti pāpasamācāro. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu kuladūsako pāpasamācāro. Handassa mayaṃ pabbājanīyakammaṃ karomā’’ti. Te tassa pabbājanīyakammaṃ karonti – adhammena vaggā…pe… adhammena samaggā… dhammena vaggā… dhammapatirūpakena vaggā… dhammapatirūpakena samaggā. Tatraṭṭho saṅgho vivadati – ‘‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamma’’nti. Tatra, bhikkhave, ye te bhikkhū evamāhaṃsu – ‘‘dhammapatirūpakena samaggakamma’’nti ye ca te bhikkhū evamāhaṃsu – ‘‘akataṃ kammaṃ dukkaṭaṃ kammaṃ puna kātabbaṃ kamma’’nti, ime tattha bhikkhū dhammavādino. Ime pañca vārā saṃkhittā.
পব্বাজনীযকম্মৰিৰাদকথা নিট্ঠিতা।
Pabbājanīyakammavivādakathā niṭṭhitā.
