| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
২৫১. পব্বাজনীযকম্মপটিপ্পস্সদ্ধিকথা
251. Pabbājanīyakammapaṭippassaddhikathā
৪২৪. ইধ পন, ভিক্খৰে, ভিক্খু সঙ্ঘেন পব্বাজনীযকম্মকতো সম্মা ৰত্ততি, লোমং পাতেতি , নেত্থারং ৰত্ততি, পব্বাজনীযস্স কম্মস্স পটিপ্পস্সদ্ধিং যাচতি। তত্র চে ভিক্খূনং এৰং হোতি – ‘‘অযং খো, আৰুসো, ভিক্খু সঙ্ঘেন পব্বাজনীযকম্মকতো সম্মা ৰত্ততি, লোমং পাতেতি, নেত্থারং ৰত্ততি, পব্বাজনীযস্স কম্মস্স পটিপ্পস্সদ্ধিং যাচতি। হন্দস্স মযং পব্বাজনীযকম্মং পটিপ্পস্সম্ভেমা’’তি। তে তস্স পব্বাজনীযকম্মং পটিপ্পস্সম্ভেন্তি – অধম্মেন ৰগ্গা। সো তম্হা আৰাসা অঞ্ঞং আৰাসং গচ্ছতি। তত্থপি ভিক্খূনং এৰং হোতি – ‘‘ইমস্স খো, আৰুসো, ভিক্খুনো সঙ্ঘেন পব্বাজনীযকম্মং পটিপ্পস্সদ্ধং অধম্মেন ৰগ্গেহি। হন্দস্স মযং পব্বাজনীযকম্মং পটিপ্পস্সম্ভেমা’’তি। তে তস্স পব্বাজনীযকম্মং পটিপ্পস্সম্ভেন্তি – অধম্মেন সমগ্গা…পে॰… ধম্মেন ৰগ্গা… ধম্মপতিরূপকেন ৰগ্গা… ধম্মপতিরূপকেন সমগ্গা…পে॰…।
424. Idha pana, bhikkhave, bhikkhu saṅghena pabbājanīyakammakato sammā vattati, lomaṃ pāteti , netthāraṃ vattati, pabbājanīyassa kammassa paṭippassaddhiṃ yācati. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu saṅghena pabbājanīyakammakato sammā vattati, lomaṃ pāteti, netthāraṃ vattati, pabbājanīyassa kammassa paṭippassaddhiṃ yācati. Handassa mayaṃ pabbājanīyakammaṃ paṭippassambhemā’’ti. Te tassa pabbājanīyakammaṃ paṭippassambhenti – adhammena vaggā. So tamhā āvāsā aññaṃ āvāsaṃ gacchati. Tatthapi bhikkhūnaṃ evaṃ hoti – ‘‘imassa kho, āvuso, bhikkhuno saṅghena pabbājanīyakammaṃ paṭippassaddhaṃ adhammena vaggehi. Handassa mayaṃ pabbājanīyakammaṃ paṭippassambhemā’’ti. Te tassa pabbājanīyakammaṃ paṭippassambhenti – adhammena samaggā…pe… dhammena vaggā… dhammapatirūpakena vaggā… dhammapatirūpakena samaggā…pe….
চক্কং কাতব্বং।
Cakkaṃ kātabbaṃ.
পব্বাজনীযকম্মপটিপ্পস্সদ্ধিকথা নিট্ঠিতা।
Pabbājanīyakammapaṭippassaddhikathā niṭṭhitā.
