| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၂၄၄. ပဗ္ဗာဇနီယကမ္မကထာ
244. Pabbājanīyakammakathā
၄၁၃. ဣဓ ပန, ဘိက္ခဝေ, ဘိက္ခု ကုလဒူသကော ဟောတိ ပာပသမာစာရော။ တတ္ရ စေ ဘိက္ခူနံ ဧဝံ ဟောတိ – ‘‘အယံ ခော, အာဝုသော, ဘိက္ခု ကုလဒူသကော ပာပသမာစာရော။ ဟန္ဒသ္သ မယံ ပဗ္ဗာဇနီယကမ္မံ ကရောမာ’’တိ။ တေ တသ္သ ပဗ္ဗာဇနီယကမ္မံ ကရောန္တိ – အဓမ္မေန ဝဂ္ဂာ။ သော တမ္ဟာ အာဝာသာ အညံ အာဝာသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘အယံ ခော, အာဝုသော, ဘိက္ခု သင္ဃေန ပဗ္ဗာဇနီယကမ္မကတော အဓမ္မေန ဝဂ္ဂေဟိ။ ဟန္ဒသ္သ မယံ ပဗ္ဗာဇနီယကမ္မံ ကရောမာ’’တိ။ တေ တသ္သ ပဗ္ဗာဇနီယကမ္မံ ကရောန္တိ – အဓမ္မေန သမဂ္ဂာ။ပေ.။ ဓမ္မေန ဝဂ္ဂာ။ ဓမ္မပတိရူပကေန ဝဂ္ဂာ။ ဓမ္မပတိရူပကေန သမဂ္ဂာ။ပေ.။။
413. Idha pana, bhikkhave, bhikkhu kuladūsako hoti pāpasamācāro. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu kuladūsako pāpasamācāro. Handassa mayaṃ pabbājanīyakammaṃ karomā’’ti. Te tassa pabbājanīyakammaṃ karonti – adhammena vaggā. So tamhā āvāsā aññaṃ āvāsaṃ gacchati. Tatthapi bhikkhūnaṃ evaṃ hoti – ‘‘ayaṃ kho, āvuso, bhikkhu saṅghena pabbājanīyakammakato adhammena vaggehi. Handassa mayaṃ pabbājanīyakammaṃ karomā’’ti. Te tassa pabbājanīyakammaṃ karonti – adhammena samaggā…pe… dhammena vaggā… dhammapatirūpakena vaggā… dhammapatirūpakena samaggā…pe….
စက္ကံ ကာတဗ္ဗံ ။
Cakkaṃ kātabbaṃ .
ပဗ္ဗာဇနီယကမ္မကတာ နိဋ္ဌိတာ။
Pabbājanīyakammakatā niṭṭhitā.
