| Library / Tipiṭaka / ཏིཔིཊཀ • Tipiṭaka / ནེཏྟིཔྤཀརཎཔཱལི༹ • Nettippakaraṇapāḷi |
༡༢. ཨོཏརཎཧཱརསམྤཱཏོ
12. Otaraṇahārasampāto
༧༤. ཏཏྠ ཀཏམོ ཨོཏརཎོ ཧཱརསམྤཱཏོ?
74. Tattha katamo otaraṇo hārasampāto?
‘‘ཏསྨཱ རཀྑིཏཙིཏྟསྶ, སམྨཱསངྐཔྤགོཙརོ’’ཏི གཱཐཱ། ‘‘ཏསྨཱ རཀྑིཏཙིཏྟསྶ, སམྨཱསངྐཔྤགོཙརོ’’ ། ‘‘སམྨཱདིཊྛིཔུརེཀྑཱརོ’’ཏི སམྨཱདིཊྛིཡཱ གཧིཏཱཡ གཧིཏཱནི བྷཝནྟི པཉྩིནྡྲིཡཱནི, ཨཡཾ ཨིནྡྲིཡེཧི ཨོཏརཎཱ།
‘‘Tasmā rakkhitacittassa, sammāsaṅkappagocaro’’ti gāthā. ‘‘Tasmā rakkhitacittassa, sammāsaṅkappagocaro’’ . ‘‘Sammādiṭṭhipurekkhāro’’ti sammādiṭṭhiyā gahitāya gahitāni bhavanti pañcindriyāni, ayaṃ indriyehi otaraṇā.
ཏཱནིཡེཝ ཨིནྡྲིཡཱནི ཝིཛྫཱ, ཝིཛྫུཔྤཱདཱ ཨཝིཛྫཱནིརོདྷོ, ཨཝིཛྫཱནིརོདྷཱ སངྑཱརནིརོདྷོ, སངྑཱརནིརོདྷཱ ཝིཉྙཱཎནིརོདྷོ, ཨེཝཾ སབྦཾ, ཨཡཾ པཊིཙྩསམུཔྤཱདེན ཨོཏརཎཱ།
Tāniyeva indriyāni vijjā, vijjuppādā avijjānirodho, avijjānirodhā saṅkhāranirodho, saṅkhāranirodhā viññāṇanirodho, evaṃ sabbaṃ, ayaṃ paṭiccasamuppādena otaraṇā.
ཏཱནིཡེཝ པཉྩིནྡྲིཡཱནི ཏཱིཧི ཁནྡྷེཧི སངྒཧིཏཱནི – སཱིལཀྑནྡྷེན སམཱདྷིཀྑནྡྷེན པཉྙཱཀྑནྡྷེན། ཨཡཾ ཁནྡྷེཧི ཨོཏརཎཱ།
Tāniyeva pañcindriyāni tīhi khandhehi saṅgahitāni – sīlakkhandhena samādhikkhandhena paññākkhandhena. Ayaṃ khandhehi otaraṇā.
ཏཱནི ཡེཝ པཉྩིནྡྲིཡཱནི སངྑཱརཔརིཡཱཔནྣཱནི། ཡེ སངྑཱརཱ ཨནཱསཝཱ ནོ ཙ བྷཝངྒཱ, ཏེ སངྑཱརཱ དྷམྨདྷཱཏུསངྒཧིཏཱ, ཨཡཾ དྷཱཏཱུཧི ཨོཏརཎཱ།
Tāni yeva pañcindriyāni saṅkhārapariyāpannāni. Ye saṅkhārā anāsavā no ca bhavaṅgā, te saṅkhārā dhammadhātusaṅgahitā, ayaṃ dhātūhi otaraṇā.
སཱ དྷམྨདྷཱཏུ དྷམྨཱཡཏནཔརིཡཱཔནྣཱ, ཡཾ ཨཱཡཏནཾ ཨནཱསཝཾ ནོ ཙ བྷཝངྒཾ, ཨཡཾ ཨཱཡཏནེཧི ཨོཏརཎཱ།
Sā dhammadhātu dhammāyatanapariyāpannā, yaṃ āyatanaṃ anāsavaṃ no ca bhavaṅgaṃ, ayaṃ āyatanehi otaraṇā.
ནིཡུཏྟོ ཨོཏརཎོ ཧཱརསམྤཱཏོ།
Niyutto otaraṇo hārasampāto.
Related texts:
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཁུདྡཀནིཀཱཡ (ཊཱིཀཱ) • Khuddakanikāya (ṭīkā) / ནེཏྟིཝིབྷཱཝིནཱི • Nettivibhāvinī / ༡༢. ཨོཏརཎཧཱརསམྤཱཏཝིབྷཱཝནཱ • 12. Otaraṇahārasampātavibhāvanā
