| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၇-၈. ဩက္ခိတ္တစက္ခုသိက္ခာပဒဝဏ္ဏနာ
7-8. Okkhittacakkhusikkhāpadavaṇṇanā
ကိတ္တကေန ပန ဩက္ခိတ္တစက္ခု ဟောတီတိ အာဟ ‘‘ယုဂမတ္တံ ဘူမိဘာဂံ ပေက္ခမာနော’’တိ။ ယုဂယုတ္တကော ဟိ ဒန္တော အာဇာနေယ္ယော ယုဂမတ္တံ ပေက္ခတိ, ပုရတော စတုဟတ္ထပ္ပမာဏံ ဘူမိဘာဂံ, ဣမိနာပိ ဧတ္တကံ ပေက္ခန္တေန ဂန္တဗ္ဗံ။ ယော အနာဒရိယံ ပဋိစ္စ တံ တံ ဒိသာဘာဂံ ပာသာဒံ ကူဋာဂာရံ ဝီထိံ ဩလောကေန္တော ဂစ္ဆတိ, အာပတ္တိ ဒုက္ကဋသ္သ။ ဟတ္ထိအသ္သာဒိပရိသ္သယာဘာဝန္တိ ပရိသ္သယနဋ္ဌေန, အဘိဘဝနဋ္ဌေန, ဝိဟေဌနဋ္ဌေန ဝာ ပရိသ္သယော, ဟတ္ထိအသ္သာဒိယေဝ ပရိသ္သယော ဟတ္ထိအသ္သာဒိပရိသ္သယော, တသ္သာဘာဝံ, ဟတ္ထိအသ္သာဒိ ဥပဒ္ဒဝာဘာဝန္တိ အတ္ထော။ ‘‘ယထာ စ ဧကသ္မိံ ဌာနေ ဌတ္ဝာ, ဧဝံ ဂစ္ဆန္တောပိ ပရိသ္သယာဘာဝံ ဩလောကေတုံ လဘတိယေဝ, တထာ ဂာမေ ပူဇ’’န္တိ (သာရတ္ထ. ဋီ. ပာစိတ္တိယ ၃.၅၈၂) ဝဒန္တိ။
Kittakena pana okkhittacakkhu hotīti āha ‘‘yugamattaṃ bhūmibhāgaṃ pekkhamāno’’ti. Yugayuttako hi danto ājāneyyo yugamattaṃ pekkhati, purato catuhatthappamāṇaṃ bhūmibhāgaṃ, imināpi ettakaṃ pekkhantena gantabbaṃ. Yo anādariyaṃ paṭicca taṃ taṃ disābhāgaṃ pāsādaṃ kūṭāgāraṃ vīthiṃ olokento gacchati, āpatti dukkaṭassa. Hatthiassādiparissayābhāvanti parissayanaṭṭhena, abhibhavanaṭṭhena, viheṭhanaṭṭhena vā parissayo, hatthiassādiyeva parissayo hatthiassādiparissayo, tassābhāvaṃ, hatthiassādi upaddavābhāvanti attho. ‘‘Yathā ca ekasmiṃ ṭhāne ṭhatvā, evaṃ gacchantopi parissayābhāvaṃ oloketuṃ labhatiyeva, tathā gāme pūja’’nti (sārattha. ṭī. pācittiya 3.582) vadanti.
ဩက္ခိတ္တစက္ခုသိက္ခာပဒဝဏ္ဏနာ နိဋ္ဌိတာ။
Okkhittacakkhusikkhāpadavaṇṇanā niṭṭhitā.
