| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
॥ নমো তস্স ভগৰতো অরহতো সম্মাসম্বুদ্ধস্স॥
Namo tassa bhagavato arahato sammāsambuddhassa
সংযুত্তনিকাযো
Saṃyuttanikāyo
সগাথাৰগ্গো
Sagāthāvaggo
১. দেৰতাসংযুত্তং
1. Devatāsaṃyuttaṃ
১. নল়ৰগ্গো
1. Naḷavaggo
১. ওঘতরণসুত্তং
1. Oghataraṇasuttaṃ
১. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। অথ খো অঞ্ঞতরা দেৰতা অভিক্কন্তায রত্তিযা অভিক্কন্তৰণ্ণা কেৰলকপ্পং জেতৰনং ওভাসেত্ৰা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং অট্ঠাসি। একমন্তং ঠিতা খো সা দেৰতা ভগৰন্তং এতদৰোচ – ‘‘‘কথং নু ত্ৰং, মারিস, ওঘমতরী’তি? ‘অপ্পতিট্ঠং খ্ৰাহং, আৰুসো, অনাযূহং ওঘমতরি’ন্তি। ‘যথা কথং পন ত্ৰং, মারিস, অপ্পতিট্ঠং অনাযূহং ওঘমতরী’তি? ‘যদাখ্ৰাহং, আৰুসো, সন্তিট্ঠামি তদাস্সু সংসীদামি ; যদাখ্ৰাহং, আৰুসো, আযূহামি তদাস্সু নিব্বুয্হামি 1। এৰং খ্ৰাহং, আৰুসো, অপ্পতিট্ঠং অনাযূহং ওঘমতরি’’’ন্তি।
1. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho aññatarā devatā abhikkantāya rattiyā abhikkantavaṇṇā kevalakappaṃ jetavanaṃ obhāsetvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitā kho sā devatā bhagavantaṃ etadavoca – ‘‘‘kathaṃ nu tvaṃ, mārisa, oghamatarī’ti? ‘Appatiṭṭhaṃ khvāhaṃ, āvuso, anāyūhaṃ oghamatari’nti. ‘Yathā kathaṃ pana tvaṃ, mārisa, appatiṭṭhaṃ anāyūhaṃ oghamatarī’ti? ‘Yadākhvāhaṃ, āvuso, santiṭṭhāmi tadāssu saṃsīdāmi ; yadākhvāhaṃ, āvuso, āyūhāmi tadāssu nibbuyhāmi 2. Evaṃ khvāhaṃ, āvuso, appatiṭṭhaṃ anāyūhaṃ oghamatari’’’nti.
‘‘চিরস্সং ৰত পস্সামি, ব্রাহ্মণং পরিনিব্বুতং।
‘‘Cirassaṃ vata passāmi, brāhmaṇaṃ parinibbutaṃ;
অপ্পতিট্ঠং অনাযূহং, তিণ্ণং লোকে ৰিসত্তিক’’ন্তি॥ –
Appatiṭṭhaṃ anāyūhaṃ, tiṇṇaṃ loke visattika’’nti. –
ইদমৰোচ সা দেৰতা। সমনুঞ্ঞো সত্থা অহোসি। অথ খো সা দেৰতা – ‘‘সমনুঞ্ঞো মে সত্থা’’তি ভগৰন্তং অভিৰাদেত্ৰা পদক্খিণং কত্ৰা তত্থেৰন্তরধাযীতি।
Idamavoca sā devatā. Samanuñño satthā ahosi. Atha kho sā devatā – ‘‘samanuñño me satthā’’ti bhagavantaṃ abhivādetvā padakkhiṇaṃ katvā tatthevantaradhāyīti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১. ওঘতরণসুত্তৰণ্ণনা • 1. Oghataraṇasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১. ওঘতরণসুত্তৰণ্ণনা • 1. Oghataraṇasuttavaṇṇanā
