| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৮. নিযামোক্কন্তিকথাৰণ্ণনা
8. Niyāmokkantikathāvaṇṇanā
৪০৩. ইদানি নিযামোক্কন্তিকথা নাম হোতি। তত্থ যেসং ঘটিকারসুত্তে জোতিপালস্স পব্বজ্জং সন্ধায ‘‘বোধিসত্তো কস্সপভগৰতো পাৰচনে ওক্কন্তনিযামো চরিতব্রহ্মচরিযো’’তি লদ্ধি, সেয্যথাপি এতরহি অন্ধকানং; তে সন্ধায বোধিসত্তোতি পুচ্ছা সকৰাদিস্স, লদ্ধিযং ঠত্ৰা পটিঞ্ঞা ইতরস্স। ততো যস্মা নিযামোতি ৰা ব্রহ্মচরিযন্তি ৰা অরিযমগ্গস্স নামং, বোধিসত্তানঞ্চ ঠপেত্ৰা পারমীপূরণং অঞ্ঞা নিযামোক্কন্তি নাম নত্থি। যদি ভৰেয্য, বোধিসত্তো সোতাপন্নো সাৰকো ভৰেয্য। ন চেতমেৰং। কেৰলঞ্হি নং বুদ্ধা অত্তনো ঞাণবলে ঠত্ৰা – ‘‘অযং বুদ্ধো ভৰিস্সতী’’তি ব্যাকরোন্তি, তস্মা পুন বোধিসত্তোতি অনুযোগো সকৰাদিস্স। পচ্ছিমভৰং সন্ধায পটিক্খেপো ইতরস্স। দুতিযপঞ্হে জোতিপালকালং সন্ধায পটিঞ্ঞা তস্সেৰ। সাৰকো হুত্ৰাতিআদীসুপি এসেৰ নযো। অনুস্সৰিযোতি অনুস্সৰেন পটিৰিদ্ধধম্মো। পচ্ছিমভৰং সন্ধায পটিক্খিপিত্ৰা জোতিপালকালে অনুস্সৰং সন্ধায পটিজানাতি।
403. Idāni niyāmokkantikathā nāma hoti. Tattha yesaṃ ghaṭikārasutte jotipālassa pabbajjaṃ sandhāya ‘‘bodhisatto kassapabhagavato pāvacane okkantaniyāmo caritabrahmacariyo’’ti laddhi, seyyathāpi etarahi andhakānaṃ; te sandhāya bodhisattoti pucchā sakavādissa, laddhiyaṃ ṭhatvā paṭiññā itarassa. Tato yasmā niyāmoti vā brahmacariyanti vā ariyamaggassa nāmaṃ, bodhisattānañca ṭhapetvā pāramīpūraṇaṃ aññā niyāmokkanti nāma natthi. Yadi bhaveyya, bodhisatto sotāpanno sāvako bhaveyya. Na cetamevaṃ. Kevalañhi naṃ buddhā attano ñāṇabale ṭhatvā – ‘‘ayaṃ buddho bhavissatī’’ti byākaronti, tasmā puna bodhisattoti anuyogo sakavādissa. Pacchimabhavaṃ sandhāya paṭikkhepo itarassa. Dutiyapañhe jotipālakālaṃ sandhāya paṭiññā tasseva. Sāvako hutvātiādīsupi eseva nayo. Anussaviyoti anussavena paṭividdhadhammo. Pacchimabhavaṃ sandhāya paṭikkhipitvā jotipālakāle anussavaṃ sandhāya paṭijānāti.
৪০৪. অঞ্ঞং সত্থারন্তিআল়ারঞ্চ রামপুত্তঞ্চ সন্ধায ৰুত্তং। আযস্মা আনন্দোতিআদি ‘‘ওক্কন্তনিযামাৰ সাৰকা হোন্তি, ন ইতরে ওক্কন্তনিযামা এৰরূপা হোন্তী’’তি দস্সেতুং ৰুত্তং।
404. Aññaṃ satthārantiāḷārañca rāmaputtañca sandhāya vuttaṃ. Āyasmā ānandotiādi ‘‘okkantaniyāmāva sāvakā honti, na itare okkantaniyāmā evarūpā hontī’’ti dassetuṃ vuttaṃ.
সাৰকো জাতিং ৰীতিৰত্তোতি যায জাতিযা সাৰকো, তং ৰীতিৰত্তো অঞ্ঞস্মিং ভৰে অসাৰকো হোতীতি পুচ্ছতি। ইতরো সোতাপন্নাদীনং সোতাপন্নাদিসাৰকভাৰতো পটিক্খিপতি। সেসমেত্থ উত্তানত্থমেৰাতি।
Sāvako jātiṃ vītivattoti yāya jātiyā sāvako, taṃ vītivatto aññasmiṃ bhave asāvako hotīti pucchati. Itaro sotāpannādīnaṃ sotāpannādisāvakabhāvato paṭikkhipati. Sesamettha uttānatthamevāti.
নিযামোক্কন্তিকথাৰণ্ণনা।
Niyāmokkantikathāvaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (৪০) ৮. নিযামোক্কন্তিকথা • (40) 8. Niyāmokkantikathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৮. নিযামোক্কন্তিকথাৰণ্ণনা • 8. Niyāmokkantikathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৮. নিযামোক্কন্তিকথাৰণ্ণনা • 8. Niyāmokkantikathāvaṇṇanā
