| Library / Tipiṭaka / ತಿಪಿಟಕ • Tipiṭaka / ಮಿಲಿನ್ದಪಞ್ಹಪಾಳಿ • Milindapañhapāḷi |
೮. ನಿಯಾಮಕಙ್ಗಪಞ್ಹೋ
8. Niyāmakaṅgapañho
೮. ‘‘ಭನ್ತೇ ನಾಗಸೇನ, ‘ನಿಯಾಮಕಸ್ಸ ತೀಣಿ ಅಙ್ಗಾನಿ ಗಹೇತಬ್ಬಾನೀ’ತಿ ಯಂ ವದೇಸಿ, ಕತಮಾನಿ ತಾನಿ ತೀಣಿ ಅಙ್ಗಾನಿ ಗಹೇತಬ್ಬಾನೀ’’ತಿ? ‘‘ಯಥಾ, ಮಹಾರಾಜ, ನಿಯಾಮಕೋ ರತ್ತಿನ್ದಿವಂ ಸತತಂ ಸಮಿತಂ ಅಪ್ಪಮತ್ತೋ ಯತ್ತಪ್ಪಯತ್ತೋ ನಾವಂ ಸಾರೇತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಚಿತ್ತಂ ನಿಯಾಮಯಮಾನೇನ ರತ್ತಿನ್ದಿವಂ ಸತತಂ ಸಮಿತಂ ಅಪ್ಪಮತ್ತೇನ ಯತ್ತಪ್ಪಯತ್ತೇನ ಯೋನಿಸೋ ಮನಸಿಕಾರೇನ ಚಿತ್ತಂ ನಿಯಾಮೇತಬ್ಬಂ। ಇದಂ, ಮಹಾರಾಜ, ನಿಯಾಮಕಸ್ಸ ಪಠಮಂ ಅಙ್ಗಂ ಗಹೇತಬ್ಬಂ। ಭಾಸಿತಮ್ಪೇತಂ, ಮಹಾರಾಜ, ಭಗವತಾ ದೇವಾತಿದೇವೇನ ಧಮ್ಮಪದೇ –
8. ‘‘Bhante nāgasena, ‘niyāmakassa tīṇi aṅgāni gahetabbānī’ti yaṃ vadesi, katamāni tāni tīṇi aṅgāni gahetabbānī’’ti? ‘‘Yathā, mahārāja, niyāmako rattindivaṃ satataṃ samitaṃ appamatto yattappayatto nāvaṃ sāreti, evameva kho, mahārāja, yoginā yogāvacarena cittaṃ niyāmayamānena rattindivaṃ satataṃ samitaṃ appamattena yattappayattena yoniso manasikārena cittaṃ niyāmetabbaṃ. Idaṃ, mahārāja, niyāmakassa paṭhamaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena dhammapade –
‘‘‘ಅಪ್ಪಮಾದರತಾ ಹೋಥ, ಸಚಿತ್ತಮನುರಕ್ಖಥ।
‘‘‘Appamādaratā hotha, sacittamanurakkhatha;
‘‘ಪುನ ಚಪರಂ, ಮಹಾರಾಜ, ನಿಯಾಮಕಸ್ಸ ಯಂ ಕಿಞ್ಚಿ ಮಹಾಸಮುದ್ದೇ ಕಲ್ಯಾಣಂ ವಾ ಪಾಪಕಂ ವಾ, ಸಬ್ಬಂ ತಂ ವಿದಿತಂ ಹೋತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಕುಸಲಾಕುಸಲಂ ಸಾವಜ್ಜಾನವಜ್ಜಂ ಹೀನಪ್ಪಣೀತಂ ಕಣ್ಹಸುಕ್ಕಸಪ್ಪಟಿಭಾಗಂ ವಿಜಾನಿತಬ್ಬಂ। ಇದಂ, ಮಹಾರಾಜ, ನಿಯಾಮಕಸ್ಸ ದುತಿಯಂ ಅಙ್ಗಂ ಗಹೇತಬ್ಬಂ।
‘‘Puna caparaṃ, mahārāja, niyāmakassa yaṃ kiñci mahāsamudde kalyāṇaṃ vā pāpakaṃ vā, sabbaṃ taṃ viditaṃ hoti, evameva kho, mahārāja, yoginā yogāvacarena kusalākusalaṃ sāvajjānavajjaṃ hīnappaṇītaṃ kaṇhasukkasappaṭibhāgaṃ vijānitabbaṃ. Idaṃ, mahārāja, niyāmakassa dutiyaṃ aṅgaṃ gahetabbaṃ.
‘‘ಪುನ ಚಪರಂ, ಮಹಾರಾಜ, ನಿಯಾಮಕೋ ಯನ್ತೇ ಮುದ್ದಿಕಂ ದೇತಿ ‘ಮಾ ಕೋಚಿ ಯನ್ತಂ ಆಮಸಿತ್ಥಾ’ತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಚಿತ್ತೇ ಸಂವರಮುದ್ದಿಕಾ ದಾತಬ್ಬಾ ‘ಮಾ ಕಿಞ್ಚಿ ಪಾಪಕಂ ಅಕುಸಲವಿತಕ್ಕಂ ವಿತಕ್ಕೇಸೀ’ತಿ, ಇದಂ, ಮಹಾರಾಜ, ನಿಯಾಮಕಸ್ಸ ತತಿಯಂ ಅಙ್ಗಂ ಗಹೇತಬ್ಬಂ। ಭಾಸಿತಮ್ಪೇತಂ, ಮಹಾರಾಜ, ಭಗವತಾ ದೇವಾತಿದೇವೇನ ಸಂಯುತ್ತನಿಕಾಯವರೇ ‘ಮಾ, ಭಿಕ್ಖವೇ, ಪಾಪಕೇ ಅಕುಸಲೇ ವಿತಕ್ಕೇ ವಿತಕ್ಕೇಯ್ಯಾಥ, ಸೇಯ್ಯಥೀದಂ, ಕಾಮವಿತಕ್ಕಂ ಬ್ಯಾಪಾದವಿತಕ್ಕಂ ವಿಹಿಂಸಾವಿತಕ್ಕ’’’ನ್ತಿ।
‘‘Puna caparaṃ, mahārāja, niyāmako yante muddikaṃ deti ‘mā koci yantaṃ āmasitthā’ti, evameva kho, mahārāja, yoginā yogāvacarena citte saṃvaramuddikā dātabbā ‘mā kiñci pāpakaṃ akusalavitakkaṃ vitakkesī’ti, idaṃ, mahārāja, niyāmakassa tatiyaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena saṃyuttanikāyavare ‘mā, bhikkhave, pāpake akusale vitakke vitakkeyyātha, seyyathīdaṃ, kāmavitakkaṃ byāpādavitakkaṃ vihiṃsāvitakka’’’nti.
ನಿಯಾಮಕಙ್ಗಪಞ್ಹೋ ಅಟ್ಠಮೋ।
Niyāmakaṅgapañho aṭṭhamo.
Footnotes:
