| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
5. நிஸீத³னஸிக்கா²பத³வண்ணனா
5. Nisīdanasikkhāpadavaṇṇanā
நிஸீத³னஸந்த²தந்தி ‘‘நிஸீத³னங் நாம ஸத³ஸங் வுச்சதீ’’தி எத்த² பத³பா⁴ஜனியங் (பாரா॰ 568) வுத்தத்தா ஸத³ஸங் ஸந்த²தங், எத்த² ச நிஸீத³னக்³க³ஹணங் ஸந்த²தே சீவரஸஞ்ஞானிவாரணத்த²ங், யதோ தே பி⁴க்கூ² கம்ப³லசீவரஸஞ்ஞாய ஸந்த²தங் ச²ட்³டெ³த்வா து⁴தங்கா³னி ஸமாதி³யிங்ஸு. ஸயனாஸனப்பயோஜனத்தா ஸந்த²தஸ்ஸ ‘‘புராணஸந்த²தங் நாமா’’திஆதி³ வுத்தங். யத்தா²தி யஸ்மிங் ஸந்த²தே. வித³த்தி²மத்தந்தி ஸுக³தவித³த்தி²மத்தங். உக்கட்ட²பரிச்சே²தோ³ சாயங் ‘‘அனாபத்தி அலப⁴ந்தோ தோ²கதரங் ஆதி³யித்வா கரோதீ’’தி (பாரா॰ 570) பத³பா⁴ஜனே வுத்தத்தா. ஏகதே³ஸேதி இதா³னி கத்தப்³ப³னவஸந்த²தஸ்ஸ ஏகப்பதே³ஸே. விஜடெத்வாதி வித்³த⁴ங்ஸெத்வா. அனாதா³தி ய-காரலோபேனாயங் நித்³தே³ஸோதி ஆஹ ‘‘ஸதி புராணஸந்த²தே அக்³க³ஹெத்வா’’தி.
Nisīdanasanthatanti ‘‘nisīdanaṃ nāma sadasaṃ vuccatī’’ti ettha padabhājaniyaṃ (pārā. 568) vuttattā sadasaṃ santhataṃ, ettha ca nisīdanaggahaṇaṃ santhate cīvarasaññānivāraṇatthaṃ, yato te bhikkhū kambalacīvarasaññāya santhataṃ chaḍḍetvā dhutaṅgāni samādiyiṃsu. Sayanāsanappayojanattā santhatassa ‘‘purāṇasanthataṃ nāmā’’tiādi vuttaṃ. Yatthāti yasmiṃ santhate. Vidatthimattanti sugatavidatthimattaṃ. Ukkaṭṭhaparicchedo cāyaṃ ‘‘anāpatti alabhanto thokataraṃ ādiyitvā karotī’’ti (pārā. 570) padabhājane vuttattā. Ekadeseti idāni kattabbanavasanthatassa ekappadese. Vijaṭetvāti viddhaṃsetvā. Anādāti ya-kāralopenāyaṃ niddesoti āha ‘‘sati purāṇasanthate aggahetvā’’ti.
எத்த² ச ‘‘இத³ங் மே, ப⁴ந்தே, நிஸீத³னஸந்த²தங் அனாதி³யித்வா புராணஸந்த²தஸ்ஸ ஸாமந்தா ஸுக³தவித³த்தி²ங் காராபிதங் நிஸ்ஸக்³கி³ய’’ந்தி (பாரா॰ 568) இமினா நயேன நிஸ்ஸஜ்ஜனவிதா⁴னங் வேதி³தப்³ப³ங். ஸந்த²தவிஸ்ஸஜ்ஜனவத்து²ஸ்மிங் பஞ்ஞத்தந்தி ப⁴க³வதா ஸந்த²தானி விப்பகிண்ணானி தி³ஸ்வா ‘‘ஸத்³தா⁴தெ³ய்யவினிபாதனே காரணங் நத்தி², பரிபோ⁴கு³பாயங் நேஸங் த³ஸ்ஸெஸ்ஸாமீ’’தி (பாரா॰ அட்ட²॰ 2.566) ஸந்த²தவிஸ்ஸஜ்ஜனவத்து²ஸ்மிங் பஞ்ஞத்தங். கிரியாகிரியத்தா இமஸ்ஸ ஸிக்கா²பத³ஸ்ஸ ‘‘ஸேஸங் ததியஸதி³ஸமேவா’’தி வுத்தங், த்³வேபா⁴க³ஸிக்கா²பத³ஸதி³ஸமேவாதி அத்தோ². அயங் பன விஸேஸோ – புராணஸந்த²தஸ்ஸ ஸாமந்தா ஸுக³தவித³த்தி²யா ஆதா³ய கரணே, அலப⁴ந்தஸ்ஸ தோ²கதரங் ஆதா³ய கரணே, ஸப்³ப³தா² அலப⁴ந்தஸ்ஸ அனாதா³ய கரணே ச அனாபத்தீதி. அங்கே³ஸு பனெத்த² பட²மங்க³புராணஸந்த²தஸ்ஸ ஸாமந்தா ஸுக³தவித³த்தி²அனாதி³யனாதி த³ட்ட²ப்³ப³ங்.
Ettha ca ‘‘idaṃ me, bhante, nisīdanasanthataṃ anādiyitvā purāṇasanthatassa sāmantā sugatavidatthiṃ kārāpitaṃ nissaggiya’’nti (pārā. 568) iminā nayena nissajjanavidhānaṃ veditabbaṃ. Santhatavissajjanavatthusmiṃ paññattanti bhagavatā santhatāni vippakiṇṇāni disvā ‘‘saddhādeyyavinipātane kāraṇaṃ natthi, paribhogupāyaṃ nesaṃ dassessāmī’’ti (pārā. aṭṭha. 2.566) santhatavissajjanavatthusmiṃ paññattaṃ. Kiriyākiriyattā imassa sikkhāpadassa ‘‘sesaṃ tatiyasadisamevā’’ti vuttaṃ, dvebhāgasikkhāpadasadisamevāti attho. Ayaṃ pana viseso – purāṇasanthatassa sāmantā sugatavidatthiyā ādāya karaṇe, alabhantassa thokataraṃ ādāya karaṇe, sabbathā alabhantassa anādāya karaṇe ca anāpattīti. Aṅgesu panettha paṭhamaṅgapurāṇasanthatassa sāmantā sugatavidatthianādiyanāti daṭṭhabbaṃ.
நிஸீத³னஸிக்கா²பத³வண்ணனா நிட்டி²தா.
Nisīdanasikkhāpadavaṇṇanā niṭṭhitā.
