| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၁၀. နိရုတ္တိပထသုတ္တဝဏ္ဏနာ
10. Niruttipathasuttavaṇṇanā
၆၂. ဒသမေ နိရုတ္တိယောဝ နိရုတ္တိပထာ, အထ ဝာ နိရုတ္တိယော စ တာ နိရုတ္တိဝသေန ဝိညာတဗ္ဗာနံ အတ္ထာနံ ပထတ္တာ ပထာ စာတိ နိရုတ္တိပထာ။ သေသပဒဒ္ဝယေပိ ဧသေဝ နယော။ တီဏိပိ စေတာနိ အညမညဝေဝစနာနေဝာတိ ဝေဒိတဗ္ဗာနိ။ အသံကိဏ္ဏာတိ အဝိဇဟိတာ, ‘‘ကော ဣမေဟိ အတ္ထော’’တိ ဝတ္ဝာ အဆဍ္ဍိတာ။ အသံကိဏ္ဏပုဗ္ဗာတိ အတီတေပိ န ဇဟိတပုဗ္ဗာ။ န သံကီယန္တီတိ ဧတရဟိပိ ‘‘ကိမေတေဟီ’’တိ န ဆဍ္ဍီယန္တိ။ န သံကီယိသ္သန္တီတိ အနာဂတေပိ န ဆဍ္ဍီယိသ္သန္တိ။ အပ္ပဋိကုဋ္ဌာတိ အပ္ပဋိဗာဟိတာ။ အတီတန္တိ အတ္တနော သဘာဝံ ဘင္ဂမေဝ ဝာ အတိက္ကန္တံ။ နိရုဒ္ဓန္တိ ဒေသန္တရံ အသင္ကမိတ္ဝာ တတ္ထေဝ နိရုဒ္ဓံ ဝူပသန္တံ။ ဝိပရိဏတန္တိ ဝိပရိဏာမံ ဂတံ နဋ္ဌံ။ အဇာတန္တိ အနုပ္ပန္နံ။ အပာတုဘူတန္တိ အပာကဋီဘူတံ။
62.Dasame niruttiyova niruttipathā, atha vā niruttiyo ca tā niruttivasena viññātabbānaṃ atthānaṃ pathattā pathā cāti niruttipathā. Sesapadadvayepi eseva nayo. Tīṇipi cetāni aññamaññavevacanānevāti veditabbāni. Asaṃkiṇṇāti avijahitā, ‘‘ko imehi attho’’ti vatvā achaḍḍitā. Asaṃkiṇṇapubbāti atītepi na jahitapubbā. Na saṃkīyantīti etarahipi ‘‘kimetehī’’ti na chaḍḍīyanti. Na saṃkīyissantīti anāgatepi na chaḍḍīyissanti. Appaṭikuṭṭhāti appaṭibāhitā. Atītanti attano sabhāvaṃ bhaṅgameva vā atikkantaṃ. Niruddhanti desantaraṃ asaṅkamitvā tattheva niruddhaṃ vūpasantaṃ. Vipariṇatanti vipariṇāmaṃ gataṃ naṭṭhaṃ. Ajātanti anuppannaṃ. Apātubhūtanti apākaṭībhūtaṃ.
ဥက္ကလာတိ ဥက္ကလဇနပဒဝာသိနော။ ဝသ္သဘညာတိ ဝသ္သော စ ဘညော စ။ ဒ္ဝေပိ ဟိ တေ မူလဒိဋ္ဌိဂတိကာ။ အဟေတုကဝာဒာတိအာဒီသု ‘‘နတ္ထိ ဟေတု နတ္ထိ ပစ္စယော’’တိ ဂဟိတတ္တာ အဟေတုကဝာဒာ။ ‘‘ကရောတော န ကရီယတိ ပာပ’’န္တိ ဂဟိတတ္တာ အကိရိယဝာဒာ။ ‘‘နတ္ထိ ဒိန္န’’န္တိအာဒိဂဟဏတော နတ္ထိကဝာဒာ။ တတ္ထ ဣမေ ဒ္ဝေ ဇနာ, တိသ္သော ဒိဋ္ဌိယော, ကိံ ဧကေကသ္သ ဒိယဍ္ဎာ ဟောတီတိ? န တထာ, ယထာ ပန ဧကော ဘိက္ခု ပဋိပာဋိယာ စတ္တာရိပိ ဈာနာနိ နိဗ္ဗတ္တေတိ , ဧဝမေတ္ထ ဧကေကော တိသ္သောပိ ဒိဋ္ဌိယော နိဗ္ဗတ္တေသီတိ ဝေဒိတဗ္ဗော။ ‘‘နတ္ထိ ဟေတု နတ္ထိ ပစ္စယော’’တိ ပုနပ္ပုနံ အာဝဇ္ဇေန္တသ္သ အာဟရန္တသ္သ အဘိနန္ဒန္တသ္သ အသ္သာဒေန္တသ္သ မဂ္ဂဒသ္သနံ ဝိယ ဟောတိ။ သော မိစ္ဆတ္တနိယာမံ ဩက္ကမတိ, သော ဧကန္တကာဠကောတိ ဝုစ္စတိ။ ယထာ ပန အဟေတုကဒိဋ္ဌိယံ, ဧဝံ ‘‘ကရောတော န ကရီယတိ ပာပံ, နတ္ထိ ဒိန္န’’န္တိ ဣမေသုပိ ဌာနေသု မိစ္ဆတ္တနိယာမံ ဩက္ကမတိ။
Ukkalāti ukkalajanapadavāsino. Vassabhaññāti vasso ca bhañño ca. Dvepi hi te mūladiṭṭhigatikā. Ahetukavādātiādīsu ‘‘natthi hetu natthi paccayo’’ti gahitattā ahetukavādā. ‘‘Karoto na karīyati pāpa’’nti gahitattā akiriyavādā. ‘‘Natthi dinna’’ntiādigahaṇato natthikavādā. Tattha ime dve janā, tisso diṭṭhiyo, kiṃ ekekassa diyaḍḍhā hotīti? Na tathā, yathā pana eko bhikkhu paṭipāṭiyā cattāripi jhānāni nibbatteti , evamettha ekeko tissopi diṭṭhiyo nibbattesīti veditabbo. ‘‘Natthi hetu natthi paccayo’’ti punappunaṃ āvajjentassa āharantassa abhinandantassa assādentassa maggadassanaṃ viya hoti. So micchattaniyāmaṃ okkamati, so ekantakāḷakoti vuccati. Yathā pana ahetukadiṭṭhiyaṃ, evaṃ ‘‘karoto na karīyati pāpaṃ, natthi dinna’’nti imesupi ṭhānesu micchattaniyāmaṃ okkamati.
န ဂရဟိတဗ္ဗံ နပ္ပဋိက္ကောသိတဗ္ဗံ အမညိံသူတိ ဧတ္ထ ‘‘ယဒေတံ အတီတံ နာမ, နယိဒံ အတီတံ, ဣဒမသ္သ အနာဂတံ ဝာ ပစ္စုပ္ပန္နံ ဝာ’’တိ ဝဒန္တော ဂရဟတိ နာမ။ တတ္ထ ဒောသံ ဒသ္သေတ္ဝာ ‘‘ကိံ ဣမိနာ ဂရဟိတေနာ’’တိ? ဝဒန္တော ပဋိက္ကောသတိ နာမ။ ဣမေ ပန နိရုတ္တိပထေ တေပိ အစ္စန္တကာဠကာ ဒိဋ္ဌိဂတိကာ န ဂရဟိတဗ္ဗေ န ပဋိက္ကောသိတဗ္ဗေ မညိံသု။ အတီတံ ပန အတီတမေဝ, အနာဂတံ အနာဂတမေဝ, ပစ္စုပ္ပန္နံ ပစ္စုပ္ပန္နမေဝ ကထယိံသု။ နိန္ဒာဃဋ္ဋနဗ္ယာရောသဥပာရမ္ဘဘယာတိ ဝိညူနံ သန္တိကာ နိန္ဒာဘယေန စ ဃဋ္ဋနဘယေန စ ဒောသာရောပနဘယေန စ ဥပာရမ္ဘဘယေန စ။ ဣတိ ဣမသ္မိံ သုတ္တေ စတုဘူမိကခန္ဓာနံ ပဏ္ဏတ္တိ ကထိတာတိ။ ဒသမံ။
Na garahitabbaṃ nappaṭikkositabbaṃ amaññiṃsūti ettha ‘‘yadetaṃ atītaṃ nāma, nayidaṃ atītaṃ, idamassa anāgataṃ vā paccuppannaṃ vā’’ti vadanto garahati nāma. Tattha dosaṃ dassetvā ‘‘kiṃ iminā garahitenā’’ti? Vadanto paṭikkosati nāma. Ime pana niruttipathe tepi accantakāḷakā diṭṭhigatikā na garahitabbe na paṭikkositabbe maññiṃsu. Atītaṃ pana atītameva, anāgataṃ anāgatameva, paccuppannaṃ paccuppannameva kathayiṃsu. Nindāghaṭṭanabyārosaupārambhabhayāti viññūnaṃ santikā nindābhayena ca ghaṭṭanabhayena ca dosāropanabhayena ca upārambhabhayena ca. Iti imasmiṃ sutte catubhūmikakhandhānaṃ paṇṇatti kathitāti. Dasamaṃ.
ဥပယဝဂ္ဂော ဆဋ္ဌော။
Upayavaggo chaṭṭho.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁၀. နိရုတ္တိပထသုတ္တံ • 10. Niruttipathasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁၀. နိရုတ္တိပထသုတ္တဝဏ္ဏနာ • 10. Niruttipathasuttavaṇṇanā
