| Library / Tipiṭaka / திபிடக • Tipiṭaka / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā |
நிரோத⁴ஸச்சனித்³தே³ஸவண்ணனா
Nirodhasaccaniddesavaṇṇanā
35.
35.
நிரோத⁴ஸச்சனித்³தே³ஸே யோ தஸ்ஸாயேவ தண்ஹாயாதி எத்த² ‘‘யோ தஸ்ஸேவ து³க்க²ஸ்ஸா’’தி வத்தப்³பே³ யஸ்மா ஸமுத³யனிரோதே⁴னேவ து³க்க²ங் நிருஜ்ஜ²தி, நோ அஞ்ஞதா². யதா²ஹ –
Nirodhasaccaniddese yo tassāyeva taṇhāyāti ettha ‘‘yo tasseva dukkhassā’’ti vattabbe yasmā samudayanirodheneva dukkhaṃ nirujjhati, no aññathā. Yathāha –
‘‘யதா²பி மூலே அனுபத்³த³வே த³ள்ஹே, சி²ன்னோபி ருக்கோ² புனரேவ ரூஹதி;
‘‘Yathāpi mūle anupaddave daḷhe, chinnopi rukkho punareva rūhati;
ஏவம்பி தண்ஹானுஸயே அனூஹதே, நிப்³ப³த்ததீ து³க்க²மித³ங் புனப்புன’’ந்தி. (த⁴॰ ப॰ 338);
Evampi taṇhānusaye anūhate, nibbattatī dukkhamidaṃ punappuna’’nti. (dha. pa. 338);
தஸ்மா தங் து³க்க²னிரோத⁴ங் த³ஸ்ஸெந்தோ ஸமுத³யனிரோதே⁴ன த³ஸ்ஸேதுங் ஏவமாஹ. ஸீஹஸமானவுத்தினோ ஹி ததா²க³தா, தே து³க்க²ங் நிரோதெ⁴ந்தா து³க்க²னிரோத⁴ஞ்ச த³ஸ்ஸெந்தா ஹேதும்ஹி படிபஜ்ஜந்தி, ந ப²லே. ஸுவானவுத்தினோ பன அஞ்ஞதித்தி²யா , தே து³க்க²ங் நிரோதெ⁴ந்தா து³க்க²னிரோத⁴ஞ்ச த³ஸ்ஸெந்தா அத்தகிலமதா²னுயோகே³ன சேவ தஸ்ஸேவ ச தே³ஸனாய ப²லே படிபஜ்ஜந்தி, ந ஹேதும்ஹீதி. ஸீஹஸமானவுத்திதாய ஸத்தா² ஹேதும்ஹி படிபஜ்ஜந்தோ ‘‘யோ தஸ்ஸாயேவா’’திஆதி³மாஹ. த⁴ம்மஸேனாபதிபி ஸத்தா²ரா வுத்தக்கமேனேவாஹ.
Tasmā taṃ dukkhanirodhaṃ dassento samudayanirodhena dassetuṃ evamāha. Sīhasamānavuttino hi tathāgatā, te dukkhaṃ nirodhentā dukkhanirodhañca dassentā hetumhi paṭipajjanti, na phale. Suvānavuttino pana aññatitthiyā , te dukkhaṃ nirodhentā dukkhanirodhañca dassentā attakilamathānuyogena ceva tasseva ca desanāya phale paṭipajjanti, na hetumhīti. Sīhasamānavuttitāya satthā hetumhi paṭipajjanto ‘‘yo tassāyevā’’tiādimāha. Dhammasenāpatipi satthārā vuttakkamenevāha.
தத்த² தஸ்ஸாயேவ தண்ஹாயாதி யா ஸா தண்ஹா ‘‘போனோப⁴விகா’’தி வத்வா காமதண்ஹாதி³வஸேன விப⁴த்தா உப்பத்தினிவேஸனவஸேன ச ஹெட்டா² பகாஸிதா, தஸ்ஸாயேவ தண்ஹாய. அஸேஸவிராக³னிரோதோ⁴தி விராகோ³ வுச்சதி மக்³கோ³, ‘‘விராகா³ விமுச்சதீ’’தி (ம॰ நி॰ 1.245; ஸங்॰ நி॰ 3.12; மஹாவ॰ 23) ஹி வுத்தங். விராகே³ன நிரோதோ⁴ விராக³னிரோதோ⁴, அனுஸயஸமுக்³கா⁴ததோ அஸேஸோ விராக³னிரோதோ⁴ அஸேஸவிராக³னிரோதோ⁴. அத² வா விராகோ³தி ஹி பஹானங் வுச்சதி, தஸ்மா அஸேஸோ விராகோ³ அஸேஸோ நிரோதோ⁴தி ஏவம்பெத்த² யோஜனா த³ட்ட²ப்³பா³. அத்த²தோ பன ஸப்³பா³னேவ பனேதானி அஸேஸவிராக³னிரோதோ⁴திஆதீ³னி நிப்³பா³னஸ்ஸேவ வேவசனானி. பரமத்த²தோ ஹி து³க்க²னிரோத⁴ங் அரியஸச்சந்தி நிப்³பா³னங் வுச்சதி. யஸ்மா பன தங் ஆக³ம்ம தண்ஹா அஸேஸா விரஜ்ஜதி நிருஜ்ஜ²தி, தஸ்மா தங் ‘‘தஸ்ஸாயேவ தண்ஹாய அஸேஸவிராக³னிரோதோ⁴’’தி வுச்சதி. நிப்³பா³னஞ்ச ஆக³ம்ம தண்ஹா சஜீயதி படினிஸ்ஸஜ்ஜீயதி முச்சதி ந அல்லீயதி, காமகு³ணாலயேஸு செத்த² ஏகோபி ஆலயோ நத்தி², தஸ்மா நிப்³பா³னங் சாகோ³ படினிஸ்ஸக்³கோ³ முத்தி அனாலயோதி வுச்சதி. ஏகமேவ ஹி நிப்³பா³னங், நாமானி பனஸ்ஸ ஸப்³ப³ஸங்க²தானங் நாமபடிபக்க²வஸேன அனேகானி ஹொந்தி. ஸெய்யதி²த³ங் – அஸேஸவிராகோ³ அஸேஸனிரோதோ⁴ சாகோ³ படினிஸ்ஸக்³கோ³ முத்தி அனாலயோ ராக³க்க²யோ தோ³ஸக்க²யோ மோஹக்க²யோ தண்ஹாக்க²யோ அனுப்பாதோ³ அப்பவத்தங் அனிமித்தங் அப்பணிஹிதங் அனாயூஹனங் அப்படிஸந்தி⁴ அனுபபத்தி அக³தி அஜாதங் அஜரங் அப்³யாதி⁴ அமதங் அஸோகங் அபரிதே³வங் அனுபாயாஸங் அஸங்கிலிட்ட²ந்திஆதீ³னி.
Tattha tassāyeva taṇhāyāti yā sā taṇhā ‘‘ponobhavikā’’ti vatvā kāmataṇhādivasena vibhattā uppattinivesanavasena ca heṭṭhā pakāsitā, tassāyeva taṇhāya. Asesavirāganirodhoti virāgo vuccati maggo, ‘‘virāgā vimuccatī’’ti (ma. ni. 1.245; saṃ. ni. 3.12; mahāva. 23) hi vuttaṃ. Virāgena nirodho virāganirodho, anusayasamugghātato aseso virāganirodho asesavirāganirodho. Atha vā virāgoti hi pahānaṃ vuccati, tasmā aseso virāgo aseso nirodhoti evampettha yojanā daṭṭhabbā. Atthato pana sabbāneva panetāni asesavirāganirodhotiādīni nibbānasseva vevacanāni. Paramatthato hi dukkhanirodhaṃ ariyasaccanti nibbānaṃ vuccati. Yasmā pana taṃ āgamma taṇhā asesā virajjati nirujjhati, tasmā taṃ ‘‘tassāyeva taṇhāya asesavirāganirodho’’ti vuccati. Nibbānañca āgamma taṇhā cajīyati paṭinissajjīyati muccati na allīyati, kāmaguṇālayesu cettha ekopi ālayo natthi, tasmā nibbānaṃ cāgo paṭinissaggo mutti anālayoti vuccati. Ekameva hi nibbānaṃ, nāmāni panassa sabbasaṅkhatānaṃ nāmapaṭipakkhavasena anekāni honti. Seyyathidaṃ – asesavirāgo asesanirodho cāgo paṭinissaggo mutti anālayo rāgakkhayo dosakkhayo mohakkhayo taṇhākkhayo anuppādo appavattaṃ animittaṃ appaṇihitaṃ anāyūhanaṃ appaṭisandhi anupapatti agati ajātaṃ ajaraṃ abyādhi amataṃ asokaṃ aparidevaṃ anupāyāsaṃ asaṃkiliṭṭhantiādīni.
இதா³னி மக்³கே³ன சி²ன்னாய நிப்³பா³னங் ஆக³ம்ம அப்பவத்திப்பத்தாயபி ச தண்ஹாய யேஸு வத்தூ²ஸு தஸ்ஸா உப்பத்தி த³ஸ்ஸிதா, தத்தே²வ அபா⁴வங் த³ஸ்ஸேதுங் ஸா கோ² பனேஸாதிஆதி³மாஹ. தத்த² யதா² புரிஸோ கெ²த்தே ஜாதங் தித்தகாலாபு³வல்லிங் தி³ஸ்வா அக்³க³தோ பட்டா²ய மூலங் பரியேஸித்வா சி²ந்தெ³ய்ய, ஸா அனுபுப்³பே³ன மிலாயித்வா அப்பஞ்ஞத்திங் க³ச்செ²ய்ய, ததோ தஸ்மிங் கெ²த்தே தித்தகாலாபு³ நிருத்³தா⁴ பஹீனாதி வுச்செய்ய, ஏவமேவ கெ²த்தே தித்தகாலாபு³ விய சக்கா²தீ³ஸு தண்ஹா. ஸா அரியமக்³கே³ன மூலச்சி²ன்னா நிப்³பா³னங் ஆக³ம்ம அப்பவத்திங் க³ச்ச²தி. ஏவங் க³தா பன தேஸு வத்தூ²ஸு கெ²த்தே தித்தகாலாபு³ விய ந பஞ்ஞாயதி. யதா² ச அடவிதோ சோரே ஆனெத்வா நக³ரஸ்ஸ த³க்கி²ணத்³வாரே கா⁴தெய்யுங், ததோ அடவியங் சோரா மதாதி வா மாரிதாதி வா வுச்செய்யுங், ஏவமேவ அடவியங் சோரா விய யா சக்கா²தீ³ஸு தண்ஹா, ஸா த³க்கி²ணத்³வாரே சோரா விய நிப்³பா³னங் ஆக³ம்ம நிருத்³த⁴த்தா நிப்³பா³னே நிருத்³தா⁴. ஏவங் நிருத்³தா⁴ பன தேஸு வத்தூ²ஸு அடவியங் சோரா விய ந பஞ்ஞாயதி. தேனஸ்ஸா தத்தே²வ நிரோத⁴ங் த³ஸ்ஸெந்தோ ‘‘சக்கு² லோகே பியரூபங் ஸாதரூபங், எத்தே²ஸா தண்ஹா பஹீயமானா பஹீயதீ’’திஆதி³மாஹ. அத² வா தண்ஹுப்பாத³வத்து²ஸ்ஸ பரிஞ்ஞாதத்தா பரிஞ்ஞாதவத்து²ஸ்மிங் புன ந உப்பஜ்ஜனதோ அனுப்பாத³னிரோத⁴வஸேன தண்ஹுப்பாத³வத்து²ஸ்மிங்யேவ நிருஜ்ஜ²தீதி வுச்சதி. எத்த² ச உப்பஜ்ஜனபடிபக்க²வஸேன பஹீயதீதி வுத்தங், நிவிஸனபடிபக்க²வஸேன நிருஜ்ஜ²தீதி.
Idāni maggena chinnāya nibbānaṃ āgamma appavattippattāyapi ca taṇhāya yesu vatthūsu tassā uppatti dassitā, tattheva abhāvaṃ dassetuṃ sā kho panesātiādimāha. Tattha yathā puriso khette jātaṃ tittakālābuvalliṃ disvā aggato paṭṭhāya mūlaṃ pariyesitvā chindeyya, sā anupubbena milāyitvā appaññattiṃ gaccheyya, tato tasmiṃ khette tittakālābu niruddhā pahīnāti vucceyya, evameva khette tittakālābu viya cakkhādīsu taṇhā. Sā ariyamaggena mūlacchinnā nibbānaṃ āgamma appavattiṃ gacchati. Evaṃ gatā pana tesu vatthūsu khette tittakālābu viya na paññāyati. Yathā ca aṭavito core ānetvā nagarassa dakkhiṇadvāre ghāteyyuṃ, tato aṭaviyaṃ corā matāti vā māritāti vā vucceyyuṃ, evameva aṭaviyaṃ corā viya yā cakkhādīsu taṇhā, sā dakkhiṇadvāre corā viya nibbānaṃ āgamma niruddhattā nibbāne niruddhā. Evaṃ niruddhā pana tesu vatthūsu aṭaviyaṃ corā viya na paññāyati. Tenassā tattheva nirodhaṃ dassento ‘‘cakkhu loke piyarūpaṃ sātarūpaṃ, etthesā taṇhā pahīyamānā pahīyatī’’tiādimāha. Atha vā taṇhuppādavatthussa pariññātattā pariññātavatthusmiṃ puna na uppajjanato anuppādanirodhavasena taṇhuppādavatthusmiṃyeva nirujjhatīti vuccati. Ettha ca uppajjanapaṭipakkhavasena pahīyatīti vuttaṃ, nivisanapaṭipakkhavasena nirujjhatīti.
நிரோத⁴ஸச்சனித்³தே³ஸவண்ணனா நிட்டி²தா.
Nirodhasaccaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / படிஸம்பி⁴தா³மக்³க³பாளி • Paṭisambhidāmaggapāḷi / 1. ஸுதமயஞாணனித்³தே³ஸோ • 1. Sutamayañāṇaniddeso
