| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၁၁. နိရောဓကထာဝဏ္ဏနာ
11. Nirodhakathāvaṇṇanā
၃၅၃. ဣဒာနိ နိရောဓကထာ နာမ ဟောတိ။ တတ္ထ ယေသံ အပ္ပဋိသင္ခာနိရောဓဉ္စ ပဋိသင္ခာနိရောဓဉ္စ ဒ္ဝေပိ ဧကတော ကတ္ဝာ နိရောဓသစ္စန္တိ လဒ္ဓိ, သေယ္ယထာပိ ဧတရဟိ မဟိသာသကာနဉ္စေဝ အန္ဓကာနဉ္စ; တေ သန္ဓာယ ဒ္ဝေ နိရောဓာတိ ပုစ္ဆာ သကဝာဒိသ္သ, ပဋိညာ ပရဝာဒိသ္သ ။ ဒ္ဝေ ဒုက္ခနိရောဓာတိ ပဉ္ဟေသု ယသ္မာ ဒ္ဝေ ဒုက္ခသစ္စာနိ န ဣစ္ဆတိ, တသ္မာ ပဋိက္ခိပတိ။ ယသ္မာ ဒ္ဝီဟာကာရေဟိ ဒုက္ခံ နိရုဇ္ဈတီတိ ဣစ္ဆတိ, တသ္မာ ပဋိဇာနာတိ။ ဒ္ဝေ နိရောဓသစ္စာနီတိပဉ္ဟေသု ဒ္ဝိန္နံ ဒုက္ခသစ္စာနံ နိရောဓဝသေနအနိစ္ဆန္တော ပဋိက္ခိပတိ။ ဒ္ဝီဟာကာရေဟိ ဒုက္ခသ္သ နိရုဇ္ဈနတော ပဋိဇာနာတိ။ ဒ္ဝေ တာဏာနီတိအာဒီသုပိ ဧသေဝ နယော။
353. Idāni nirodhakathā nāma hoti. Tattha yesaṃ appaṭisaṅkhānirodhañca paṭisaṅkhānirodhañca dvepi ekato katvā nirodhasaccanti laddhi, seyyathāpi etarahi mahisāsakānañceva andhakānañca; te sandhāya dve nirodhāti pucchā sakavādissa, paṭiññā paravādissa . Dve dukkhanirodhāti pañhesu yasmā dve dukkhasaccāni na icchati, tasmā paṭikkhipati. Yasmā dvīhākārehi dukkhaṃ nirujjhatīti icchati, tasmā paṭijānāti. Dve nirodhasaccānītipañhesu dvinnaṃ dukkhasaccānaṃ nirodhavasenaanicchanto paṭikkhipati. Dvīhākārehi dukkhassa nirujjhanato paṭijānāti. Dve tāṇānītiādīsupi eseva nayo.
အတ္ထိ ဒ္ဝိန္နံ နိဗ္ဗာနာနန္တိအာဒီသု ပုစ္ဆာသု ဥစ္စနီစတာဒီနိ အပသ္သန္တော ပဋိက္ခိပတိ။
Atthi dvinnaṃ nibbānānantiādīsu pucchāsu uccanīcatādīni apassanto paṭikkhipati.
အပ္ပဋိသင္ခာနိရုဒ္ဓေတိ ယေ ပဋိသင္ခာယ လောကုတ္တရေန ဉာဏေန အနိရုဒ္ဓာ သုဒ္ဓပကတိကတ္တာ ဝာ ဥဒ္ဒေသပရိပုစ္ဆာဒီနံ ဝာ ဝသေန န သမုဒာစရဏတော နိရုဒ္ဓာတိ ဝုစ္စန္တိ, တေ သင္ခာရေ။ ပဋိသင္ခာ နိရောဓေန္တီတိ။ လောကုတ္တရဉာဏေန နိရောဓေန္တိ အနုပ္ပတ္တိဘာဝံ ဂမေန္တိ။ နနု အပ္ပဋိသင္ခာနိရုဒ္ဓာ သင္ခာရာတိ ပုစ္ဆာ ပရဝာဒိသ္သ ။ တတ္ထ ဘဂ္ဂာနံ ပုန အဘဉ္ဇနတော အပ္ပဋိသင္ခာနိရုဒ္ဓာနံ ဝာ အရိယမဂ္ဂေ ဥပ္ပန္နေ တထာ နိရုဇ္ဈနတောဝ သကဝာဒီ အစ္စန္တဘဂ္ဂတံ ပဋိဇာနာတိ။ သေသမေတ္ထ ဥတ္တာနတ္ထမေဝာတိ။
Appaṭisaṅkhāniruddheti ye paṭisaṅkhāya lokuttarena ñāṇena aniruddhā suddhapakatikattā vā uddesaparipucchādīnaṃ vā vasena na samudācaraṇato niruddhāti vuccanti, te saṅkhāre. Paṭisaṅkhā nirodhentīti. Lokuttarañāṇena nirodhenti anuppattibhāvaṃ gamenti. Nanu appaṭisaṅkhāniruddhā saṅkhārāti pucchā paravādissa . Tattha bhaggānaṃ puna abhañjanato appaṭisaṅkhāniruddhānaṃ vā ariyamagge uppanne tathā nirujjhanatova sakavādī accantabhaggataṃ paṭijānāti. Sesamettha uttānatthamevāti.
နိရောဓကထာဝဏ္ဏနာ။
Nirodhakathāvaṇṇanā.
ဒုတိယော ဝဂ္ဂော။
Dutiyo vaggo.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၂၀) ၁၁. နိရောဓကထာ • (20) 11. Nirodhakathā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၁၁. နိရောဓကထာဝဏ္ဏနာ • 11. Nirodhakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၁၁. နိရောဓကထာဝဏ္ဏနာ • 11. Nirodhakathāvaṇṇanā
