| Library / Tipiṭaka / తిపిటక • Tipiṭaka / సంయుత్తనికాయ • Saṃyuttanikāya |
౧౨. నిరోధధమ్మసుత్తం
12. Nirodhadhammasuttaṃ
౨౦౫. సావత్థినిదానం. ఏకమన్తం నిసిన్నం ఖో ఆయస్మన్తం రాధం భగవా ఏతదవోచ – ‘‘యో ఖో, రాధ, నిరోధధమ్మో; తత్ర తే ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో. కో చ, రాధ, నిరోధధమ్మో? రూపం ఖో, రాధ, నిరోధధమ్మో; తత్ర తే ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో. వేదనా…పే॰… సఞ్ఞా…పే॰… సఙ్ఖారా…పే॰… విఞ్ఞాణం నిరోధధమ్మో; తత్ర తే ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో. యో ఖో, రాధ, నిరోధధమ్మో; తత్ర తే ఛన్దో పహాతబ్బో, రాగో పహాతబ్బో, ఛన్దరాగో పహాతబ్బో’’తి.
205. Sāvatthinidānaṃ. Ekamantaṃ nisinnaṃ kho āyasmantaṃ rādhaṃ bhagavā etadavoca – ‘‘yo kho, rādha, nirodhadhammo; tatra te chando pahātabbo, rāgo pahātabbo, chandarāgo pahātabbo. Ko ca, rādha, nirodhadhammo? Rūpaṃ kho, rādha, nirodhadhammo; tatra te chando pahātabbo, rāgo pahātabbo, chandarāgo pahātabbo. Vedanā…pe… saññā…pe… saṅkhārā…pe… viññāṇaṃ nirodhadhammo; tatra te chando pahātabbo, rāgo pahātabbo, chandarāgo pahātabbo. Yo kho, rādha, nirodhadhammo; tatra te chando pahātabbo, rāgo pahātabbo, chandarāgo pahātabbo’’ti.
ఉపనిసిన్నవగ్గో చతుత్థో.
Upanisinnavaggo catuttho.
తస్సుద్దానం –
Tassuddānaṃ –
మారో చ మారధమ్మో చ, అనిచ్చేన అపరే దువే;
Māro ca māradhammo ca, aniccena apare duve;
దుక్ఖేన చ దువే వుత్తా, అనత్తేన తథేవ చ;
Dukkhena ca duve vuttā, anattena tatheva ca;
ఖయవయసముదయం, నిరోధధమ్మేన ద్వాదసాతి.
Khayavayasamudayaṃ, nirodhadhammena dvādasāti.
రాధసంయుత్తం సమత్తం.
Rādhasaṃyuttaṃ samattaṃ.
Related texts:
అట్ఠకథా • Aṭṭhakathā / సుత్తపిటక (అట్ఠకథా) • Suttapiṭaka (aṭṭhakathā) / సంయుత్తనికాయ (అట్ఠకథా) • Saṃyuttanikāya (aṭṭhakathā) / ౧-౧౧. మారాదిసుత్తఏకాదసకవణ్ణనా • 1-11. Mārādisuttaekādasakavaṇṇanā
టీకా • Tīkā / సుత్తపిటక (టీకా) • Suttapiṭaka (ṭīkā) / సంయుత్తనికాయ (టీకా) • Saṃyuttanikāya (ṭīkā) / ౧-౧౧. మారాదిసుత్తఏకాదసకవణ్ణనా • 1-11. Mārādisuttaekādasakavaṇṇanā
