| Library / Tipiṭaka / တိပိဋက • Tipiṭaka / ဝိမတိဝိနောဒနီ-ဋီကာ • Vimativinodanī-ṭīkā |
နိမန္တနဘတ္တကထာဝဏ္ဏနာ
Nimantanabhattakathāvaṇṇanā
ဝိစ္ဆိန္ဒိတ္ဝာတိ ‘‘ဘတ္တံ ဂဏ္ဟထာ’’တိ ပဒံ အဝတ္ဝာ။ တေနေဝာဟ ‘‘ဘတ္တန္တိ အဝဒန္တေနာ’’တိ။
Vicchinditvāti ‘‘bhattaṃ gaṇhathā’’ti padaṃ avatvā. Tenevāha ‘‘bhattanti avadantenā’’ti.
အာလောပသင္ခေပေနာတိ ဧကေကပိဏ္ဍဝသေန, ဧဝဉ္စ ဘာဇနံ ဥဒ္ဒေသဘတ္တေ န ဝဋ္ဋတိ။ တတ္ထ ဟိ ဧကသ္သ ပဟောနကပ္ပမာဏေနေဝ ဘာဇေတဗ္ဗံ။
Ālopasaṅkhepenāti ekekapiṇḍavasena, evañca bhājanaṃ uddesabhatte na vaṭṭati. Tattha hi ekassa pahonakappamāṇeneva bhājetabbaṃ.
အာရုဠ္ဟာယေဝ မာတိကံ, သင္ဃတော အဋ္ဌ ဘိက္ခူတိ ဧတ္ထ ယေ မာတိကံ အာရုဠ္ဟာ, တေ အဋ္ဌ ဘိက္ခူတိ ယောဇေတဗ္ဗံ။ ဥဒ္ဒေသဘတ္တနိမန္တနဘတ္တာဒိသင္ဃိကဘတ္တမာတိကာသု နိမန္တနဘတ္တမာတိကာယ ဌိတိဝသေန အာရုဠ္ဟေ ဘတ္တုဒ္ဒေသကေန ဝာ သယံ ဝာ သင္ဃတော ဥဒ္ဒိသာပေတ္ဝာ ဂဟေတ္ဝာ ဂန္တဗ္ဗံ, န အတ္တနော ရုစိတေ ဂဟေတ္ဝာတိ အဓိပ္ပာယော။ မာတိကံ အာရောပေတ္ဝာတိ ‘‘သင္ဃတော ဂဏ္ဟာမီ’’တိအာဒိနာ ဝုတ္တမာတိကာဘေဒံ ဒာယကသ္သ ဝိညာပေတ္ဝာတိ အတ္ထော။
Āruḷhāyeva mātikaṃ, saṅghato aṭṭha bhikkhūti ettha ye mātikaṃ āruḷhā, te aṭṭha bhikkhūti yojetabbaṃ. Uddesabhattanimantanabhattādisaṅghikabhattamātikāsu nimantanabhattamātikāya ṭhitivasena āruḷhe bhattuddesakena vā sayaṃ vā saṅghato uddisāpetvā gahetvā gantabbaṃ, na attano rucite gahetvāti adhippāyo. Mātikaṃ āropetvāti ‘‘saṅghato gaṇhāmī’’tiādinā vuttamātikābhedaṃ dāyakassa viññāpetvāti attho.
ပဋိဗဒ္ဓကာလတော ပန ပဋ္ဌာယာတိ တတ္ထေဝ ဝာသသ္သ နိဗဒ္ဓကာလတော ပဋ္ဌာယ။
Paṭibaddhakālato pana paṭṭhāyāti tattheva vāsassa nibaddhakālato paṭṭhāya.
နိမန္တနဘတ္တကထာဝဏ္ဏနာ နိဋ္ဌိတာ။
Nimantanabhattakathāvaṇṇanā niṭṭhitā.
