| Library / Tipiṭaka / तिपिटक • Tipiṭaka / विमतिविनोदनी-टीका • Vimativinodanī-ṭīkā |
निमन्तनभत्तकथावण्णना
Nimantanabhattakathāvaṇṇanā
विच्छिन्दित्वाति ‘‘भत्तं गण्हथा’’ति पदं अवत्वा। तेनेवाह ‘‘भत्तन्ति अवदन्तेना’’ति।
Vicchinditvāti ‘‘bhattaṃ gaṇhathā’’ti padaṃ avatvā. Tenevāha ‘‘bhattanti avadantenā’’ti.
आलोपसङ्खेपेनाति एकेकपिण्डवसेन, एवञ्च भाजनं उद्देसभत्ते न वट्टति। तत्थ हि एकस्स पहोनकप्पमाणेनेव भाजेतब्बं।
Ālopasaṅkhepenāti ekekapiṇḍavasena, evañca bhājanaṃ uddesabhatte na vaṭṭati. Tattha hi ekassa pahonakappamāṇeneva bhājetabbaṃ.
आरुळ्हायेव मातिकं, सङ्घतो अट्ठ भिक्खूति एत्थ ये मातिकं आरुळ्हा, ते अट्ठ भिक्खूति योजेतब्बं। उद्देसभत्तनिमन्तनभत्तादिसङ्घिकभत्तमातिकासु निमन्तनभत्तमातिकाय ठितिवसेन आरुळ्हे भत्तुद्देसकेन वा सयं वा सङ्घतो उद्दिसापेत्वा गहेत्वा गन्तब्बं, न अत्तनो रुचिते गहेत्वाति अधिप्पायो। मातिकं आरोपेत्वाति ‘‘सङ्घतो गण्हामी’’तिआदिना वुत्तमातिकाभेदं दायकस्स विञ्ञापेत्वाति अत्थो।
Āruḷhāyeva mātikaṃ, saṅghato aṭṭha bhikkhūti ettha ye mātikaṃ āruḷhā, te aṭṭha bhikkhūti yojetabbaṃ. Uddesabhattanimantanabhattādisaṅghikabhattamātikāsu nimantanabhattamātikāya ṭhitivasena āruḷhe bhattuddesakena vā sayaṃ vā saṅghato uddisāpetvā gahetvā gantabbaṃ, na attano rucite gahetvāti adhippāyo. Mātikaṃ āropetvāti ‘‘saṅghato gaṇhāmī’’tiādinā vuttamātikābhedaṃ dāyakassa viññāpetvāti attho.
पटिबद्धकालतो पन पट्ठायाति तत्थेव वासस्स निबद्धकालतो पट्ठाय।
Paṭibaddhakālato pana paṭṭhāyāti tattheva vāsassa nibaddhakālato paṭṭhāya.
निमन्तनभत्तकथावण्णना निट्ठिता।
Nimantanabhattakathāvaṇṇanā niṭṭhitā.
