| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
নিমন্তনভত্তকথাৰণ্ণনা
Nimantanabhattakathāvaṇṇanā
ৰিচ্ছিন্দিত্ৰাতি ‘‘ভত্তং গণ্হথা’’তি পদং অৰত্ৰা। তেনেৰাহ ‘‘ভত্তন্তি অৰদন্তেনা’’তি।
Vicchinditvāti ‘‘bhattaṃ gaṇhathā’’ti padaṃ avatvā. Tenevāha ‘‘bhattanti avadantenā’’ti.
আলোপসঙ্খেপেনাতি একেকপিণ্ডৰসেন, এৰঞ্চ ভাজনং উদ্দেসভত্তে ন ৰট্টতি। তত্থ হি একস্স পহোনকপ্পমাণেনেৰ ভাজেতব্বং।
Ālopasaṅkhepenāti ekekapiṇḍavasena, evañca bhājanaṃ uddesabhatte na vaṭṭati. Tattha hi ekassa pahonakappamāṇeneva bhājetabbaṃ.
আরুল়্হাযেৰ মাতিকং, সঙ্ঘতো অট্ঠ ভিক্খূতি এত্থ যে মাতিকং আরুল়্হা, তে অট্ঠ ভিক্খূতি যোজেতব্বং। উদ্দেসভত্তনিমন্তনভত্তাদিসঙ্ঘিকভত্তমাতিকাসু নিমন্তনভত্তমাতিকায ঠিতিৰসেন আরুল়্হে ভত্তুদ্দেসকেন ৰা সযং ৰা সঙ্ঘতো উদ্দিসাপেত্ৰা গহেত্ৰা গন্তব্বং, ন অত্তনো রুচিতে গহেত্ৰাতি অধিপ্পাযো। মাতিকং আরোপেত্ৰাতি ‘‘সঙ্ঘতো গণ্হামী’’তিআদিনা ৰুত্তমাতিকাভেদং দাযকস্স ৰিঞ্ঞাপেত্ৰাতি অত্থো।
Āruḷhāyeva mātikaṃ, saṅghato aṭṭha bhikkhūti ettha ye mātikaṃ āruḷhā, te aṭṭha bhikkhūti yojetabbaṃ. Uddesabhattanimantanabhattādisaṅghikabhattamātikāsu nimantanabhattamātikāya ṭhitivasena āruḷhe bhattuddesakena vā sayaṃ vā saṅghato uddisāpetvā gahetvā gantabbaṃ, na attano rucite gahetvāti adhippāyo. Mātikaṃ āropetvāti ‘‘saṅghato gaṇhāmī’’tiādinā vuttamātikābhedaṃ dāyakassa viññāpetvāti attho.
পটিবদ্ধকালতো পন পট্ঠাযাতি তত্থেৰ ৰাসস্স নিবদ্ধকালতো পট্ঠায।
Paṭibaddhakālato pana paṭṭhāyāti tattheva vāsassa nibaddhakālato paṭṭhāya.
নিমন্তনভত্তকথাৰণ্ণনা নিট্ঠিতা।
Nimantanabhattakathāvaṇṇanā niṭṭhitā.
