| Library / Tipiṭaka / ತಿಪಿಟಕ • Tipiṭaka / ಮಿಲಿನ್ದಪಞ್ಹಪಾಳಿ • Milindapañhapāḷi |
ನಿಗಮನಂ
Nigamanaṃ
ಇತಿ ಛಸು ಕಣ್ಡೇಸು ಬಾವೀಸತಿವಗ್ಗಪತಿಮಣ್ಡಿತೇಸು ದ್ವಾಸಟ್ಠಿಅಧಿಕಾ ದ್ವೇಸತಾ ಇಮಸ್ಮಿಂ ಪೋತ್ಥಕೇ ಆಗತಾ ಮಿಲಿನ್ದಪಞ್ಹಾ ಸಮತ್ತಾ, ಅನಾಗತಾ ಚ ಪನ ದ್ವಾಚತ್ತಾಲೀಸಾ ಹೋನ್ತಿ, ಆಗತಾ ಚ ಅನಾಗತಾ ಚ ಸಬ್ಬಾ ಸಮೋಧಾನೇತ್ವಾ ಚತೂಹಿ ಅಧಿಕಾ ತಿಸತಪಞ್ಹಾ ಹೋನ್ತಿ, ಸಬ್ಬಾವ ಮಿಲಿನ್ದಪಞ್ಹಾತಿ ಸಙ್ಖಂ ಗಚ್ಛನ್ತಿ।
Iti chasu kaṇḍesu bāvīsativaggapatimaṇḍitesu dvāsaṭṭhiadhikā dvesatā imasmiṃ potthake āgatā milindapañhā samattā, anāgatā ca pana dvācattālīsā honti, āgatā ca anāgatā ca sabbā samodhānetvā catūhi adhikā tisatapañhā honti, sabbāva milindapañhāti saṅkhaṃ gacchanti.
ರಞ್ಞೋ ಚ ಥೇರಸ್ಸ ಚ ಪುಚ್ಛಾವಿಸಜ್ಜನಾವಸಾನೇ ಚತುರಾಸೀತಿಸತಸಹಸ್ಸಯೋಜನಬಹಲಾ ಉದಕಪರಿಯನ್ತಂ ಕತ್ವಾ ಅಯಂ ಮಹಾಪಥವೀ ಛಧಾ ಕಮ್ಪಿತ್ಥ, ವಿಜ್ಜುಲ್ಲತಾ ನಿಚ್ಛರಿಂಸು, ದೇವತಾ ದಿಬ್ಬಪುಪ್ಫವಸ್ಸಂ ಪವಸ್ಸಿಂಸು, ಮಹಾಬ್ರಹ್ಮಾ ಸಾಧುಕಾರಮದಾಸಿ, ಮಹಾಸಮುದ್ದಕುಚ್ಛಿಯಂ ಮೇಘತ್ಥನಿತನಿಗ್ಘೋಸೋ ವಿಯ ಮಹಾಘೋಸೋ ಅಹೋಸಿ, ಇತಿ ಸೋ ಮಿಲಿನ್ದೋ ರಾಜಾ ಚ ಓರೋಧಗಣಾ ಚ ಸಿರಸಾ ಅಞ್ಜಲಿಂ ಪಣಾಮೇತ್ವಾ ವನ್ದಿಂಸು।
Rañño ca therassa ca pucchāvisajjanāvasāne caturāsītisatasahassayojanabahalā udakapariyantaṃ katvā ayaṃ mahāpathavī chadhā kampittha, vijjullatā nicchariṃsu, devatā dibbapupphavassaṃ pavassiṃsu, mahābrahmā sādhukāramadāsi, mahāsamuddakucchiyaṃ meghatthanitanigghoso viya mahāghoso ahosi, iti so milindo rājā ca orodhagaṇā ca sirasā añjaliṃ paṇāmetvā vandiṃsu.
ಮಿಲಿನ್ದೋ ರಾಜಾ ಅತಿವಿಯ ಪಮುದಿತಹದಯೋ ಸುಮಥಿತಮಾನಹದಯೋ ಬುದ್ಧಸಾಸನೇ ಸಾರಮತಿನೋ ರತನತ್ತಯೇ ಸುನಿಕ್ಕಙ್ಖೋ ನಿಗ್ಗುಮ್ಬೋ ನಿತ್ಥದ್ಧೋ ಹುತ್ವಾ ಥೇರಸ್ಸ ಗುಣೇಸು ಪಬ್ಬಜ್ಜಾಸು ಪಟಿಪದಾಇರಿಯಾಪಥೇಸು ಚ ಅತಿವಿಯ ಪಸನ್ನೋ ವಿಸ್ಸತ್ಥೋ ನಿರಾಲಯೋ ನಿಹತಮಾನತ್ಥಮ್ಭೋ ಉದ್ಧಟದಾಠೋ ವಿಯ ಭುಜಗಿನ್ದೋ ಏವಮಾಹ ‘‘ಸಾಧು, ಭನ್ತೇ ನಾಗಸೇನ, ಬುದ್ಧವಿಸಯೋ ಪಞ್ಹೋ ತಯಾ ವಿಸಜ್ಜಿತೋ, ಇಮಸ್ಮಿಂ ಬುದ್ಧಸಾಸನೇ ಠಪೇತ್ವಾ ಧಮ್ಮಸೇನಾಪತಿಂ ಸಾರಿಪುತ್ತತ್ಥೇರಂ ಅಞ್ಞೋ ತಯಾ ಸದಿಸೋ ಪಞ್ಹವಿಸಜ್ಜನೇ ನತ್ಥಿ, ಖಮಥ, ಭನ್ತೇ ನಾಗಸೇನ, ಮಮ ಅಚ್ಚಯಂ, ಉಪಾಸಕಂ ಮಂ, ಭನ್ತೇ ನಾಗಸೇನ, ಧಾರೇಥ ಅಜ್ಜತಗ್ಗೇ ಪಾಣುಪೇತಂ ಸರಣಂ ಗತ’’ನ್ತಿ।
Milindo rājā ativiya pamuditahadayo sumathitamānahadayo buddhasāsane sāramatino ratanattaye sunikkaṅkho niggumbo nitthaddho hutvā therassa guṇesu pabbajjāsu paṭipadāiriyāpathesu ca ativiya pasanno vissattho nirālayo nihatamānatthambho uddhaṭadāṭho viya bhujagindo evamāha ‘‘sādhu, bhante nāgasena, buddhavisayo pañho tayā visajjito, imasmiṃ buddhasāsane ṭhapetvā dhammasenāpatiṃ sāriputtattheraṃ añño tayā sadiso pañhavisajjane natthi, khamatha, bhante nāgasena, mama accayaṃ, upāsakaṃ maṃ, bhante nāgasena, dhāretha ajjatagge pāṇupetaṃ saraṇaṃ gata’’nti.
ತದಾ ರಾಜಾ ಸಹ ಬಲಕಾಯೇಹಿ ನಾಗಸೇನತ್ಥೇರಂ ಪಯಿರುಪಾಸಿತ್ವಾ ಮಿಲಿನ್ದಂ ನಾಮ ವಿಹಾರಂ ಕಾರೇತ್ವಾ ಥೇರಸ್ಸ ನಿಯ್ಯಾತೇತ್ವಾ ಚತೂಹಿ ಪಚ್ಚಯೇಹಿ ನಾಗಸೇನಂ ಕೋಟಿಸತೇಹಿ ಭಿಕ್ಖೂಹಿ ಸದ್ಧಿಂ ಪರಿಚರಿ, ಪುನಪಿ ಥೇರಸ್ಸ ಪಞ್ಞಾಯ ಪಸೀದಿತ್ವಾ ಪುತ್ತಸ್ಸ ರಜ್ಜಂ ನಿಯ್ಯಾತೇತ್ವಾ ಅಗಾರಸ್ಮಾ ಅನಗಾರಿಯಂ ಪಬ್ಬಜಿತ್ವಾ ವಿಪಸ್ಸನಂ ವಡ್ಢೇತ್ವಾ ಅರಹತ್ತಂ ಪಾಪುಣಿ, ತೇನ ವುತ್ತಂ –
Tadā rājā saha balakāyehi nāgasenattheraṃ payirupāsitvā milindaṃ nāma vihāraṃ kāretvā therassa niyyātetvā catūhi paccayehi nāgasenaṃ koṭisatehi bhikkhūhi saddhiṃ paricari, punapi therassa paññāya pasīditvā puttassa rajjaṃ niyyātetvā agārasmā anagāriyaṃ pabbajitvā vipassanaṃ vaḍḍhetvā arahattaṃ pāpuṇi, tena vuttaṃ –
‘‘ಪಞ್ಞಾ ಪಸತ್ಥಾ ಲೋಕಸ್ಮಿಂ, ಕತಾ ಸದ್ಧಮ್ಮಟ್ಠಿತಿಯಾ।
‘‘Paññā pasatthā lokasmiṃ, katā saddhammaṭṭhitiyā;
ಪಞ್ಞಾಯ ವಿಮತಿಂ ಹನ್ತ್ವಾ, ಸನ್ತಿಂ ಪಪ್ಪೋನ್ತಿ ಪಣ್ಡಿತಾ॥
Paññāya vimatiṃ hantvā, santiṃ papponti paṇḍitā.
ಯಸ್ಮಿಂ ಖನ್ಧೇ ಠಿತಾ ಪಞ್ಞಾ, ಸತಿ ತತ್ಥ ಅನೂನಕಾ।
Yasmiṃ khandhe ṭhitā paññā, sati tattha anūnakā;
ಲಙ್ಕಾಯಂ ದೋಣಿನಗರೇ, ವಸತಾ ದೋಣಿನಾಮಿನಾ।
Laṅkāyaṃ doṇinagare, vasatā doṇināminā;
ಮಹಾಥೇರೇನ ಲೇಖಿತ್ವಾ, ಸುಟ್ಠಪಿತಂ ಯಥಾಸುತಂ।
Mahātherena lekhitvā, suṭṭhapitaṃ yathāsutaṃ;
ಮಿಲಿನ್ದರಾಜಪಞ್ಹೋ ಚ, ನಾಗಸೇನವಿಸಜ್ಜನಂ।
Milindarājapañho ca, nāgasenavisajjanaṃ;
ಮಿಲಿನ್ದೋ ಹಿ ಮಹಾಪಞ್ಞೋ, ನಾಗಸೇನೋ ಸುಪಣ್ಡಿತೋ।
Milindo hi mahāpañño, nāgaseno supaṇḍito;
ಇಮಿನಾ ಪುಞ್ಞಕಮ್ಮೇನ, ಇತೋ ಗಚ್ಛಾಮಿ ತುಸ್ಸಿತಂ।
Iminā puññakammena, ito gacchāmi tussitaṃ;
ಮೇತ್ತೇಯ್ಯಂನಾಗತೇ ಪಸ್ಸೇ, ಸುಣೇಯ್ಯಂ ಧಮ್ಮಮುತ್ತಮನ್ತಿ॥
Metteyyaṃnāgate passe, suṇeyyaṃ dhammamuttamanti.
ಮಿಲಿನ್ದಪಞ್ಹೋ ನಿಟ್ಠಿತೋ।
Milindapañho niṭṭhito.
Footnotes:
