| Library / Tipiṭaka / តិបិដក • Tipiṭaka / មិលិន្ទបញ្ហបាឡិ • Milindapañhapāḷi |
និគមនំ
Nigamanaṃ
ឥតិ ឆសុ កណ្ឌេសុ ពាវីសតិវគ្គបតិមណ្ឌិតេសុ ទ្វាសដ្ឋិអធិកា ទ្វេសតា ឥមស្មិំ បោត្ថកេ អាគតា មិលិន្ទបញ្ហា សមត្តា, អនាគតា ច បន ទ្វាចត្តាលីសា ហោន្តិ, អាគតា ច អនាគតា ច សព្ពា សមោធានេត្វា ចតូហិ អធិកា តិសតបញ្ហា ហោន្តិ, សព្ពាវ មិលិន្ទបញ្ហាតិ សង្ខំ គច្ឆន្តិ។
Iti chasu kaṇḍesu bāvīsativaggapatimaṇḍitesu dvāsaṭṭhiadhikā dvesatā imasmiṃ potthake āgatā milindapañhā samattā, anāgatā ca pana dvācattālīsā honti, āgatā ca anāgatā ca sabbā samodhānetvā catūhi adhikā tisatapañhā honti, sabbāva milindapañhāti saṅkhaṃ gacchanti.
រញ្ញោ ច ថេរស្ស ច បុច្ឆាវិសជ្ជនាវសានេ ចតុរាសីតិសតសហស្សយោជនពហលា ឧទកបរិយន្តំ កត្វា អយំ មហាបថវី ឆធា កម្បិត្ថ, វិជ្ជុល្លតា និច្ឆរិំសុ, ទេវតា ទិព្ពបុប្ផវស្សំ បវស្សិំសុ, មហាព្រហ្មា សាធុការមទាសិ, មហាសមុទ្ទកុច្ឆិយំ មេឃត្ថនិតនិគ្ឃោសោ វិយ មហាឃោសោ អហោសិ, ឥតិ សោ មិលិន្ទោ រាជា ច ឱរោធគណា ច សិរសា អញ្ជលិំ បណាមេត្វា វន្ទិំសុ។
Rañño ca therassa ca pucchāvisajjanāvasāne caturāsītisatasahassayojanabahalā udakapariyantaṃ katvā ayaṃ mahāpathavī chadhā kampittha, vijjullatā nicchariṃsu, devatā dibbapupphavassaṃ pavassiṃsu, mahābrahmā sādhukāramadāsi, mahāsamuddakucchiyaṃ meghatthanitanigghoso viya mahāghoso ahosi, iti so milindo rājā ca orodhagaṇā ca sirasā añjaliṃ paṇāmetvā vandiṃsu.
មិលិន្ទោ រាជា អតិវិយ បមុទិតហទយោ សុមថិតមានហទយោ ពុទ្ធសាសនេ សារមតិនោ រតនត្តយេ សុនិក្កង្ខោ និគ្គុម្ពោ និត្ថទ្ធោ ហុត្វា ថេរស្ស គុណេសុ បព្ពជ្ជាសុ បដិបទាឥរិយាបថេសុ ច អតិវិយ បសន្នោ វិស្សត្ថោ និរាលយោ និហតមានត្ថម្ភោ ឧទ្ធដទាឋោ វិយ ភុជគិន្ទោ ឯវមាហ ‘‘សាធុ, ភន្តេ នាគសេន, ពុទ្ធវិសយោ បញ្ហោ តយា វិសជ្ជិតោ, ឥមស្មិំ ពុទ្ធសាសនេ ឋបេត្វា ធម្មសេនាបតិំ សារិបុត្តត្ថេរំ អញ្ញោ តយា សទិសោ បញ្ហវិសជ្ជនេ នត្ថិ, ខមថ, ភន្តេ នាគសេន, មម អច្ចយំ, ឧបាសកំ មំ, ភន្តេ នាគសេន, ធារេថ អជ្ជតគ្គេ បាណុបេតំ សរណំ គត’’ន្តិ។
Milindo rājā ativiya pamuditahadayo sumathitamānahadayo buddhasāsane sāramatino ratanattaye sunikkaṅkho niggumbo nitthaddho hutvā therassa guṇesu pabbajjāsu paṭipadāiriyāpathesu ca ativiya pasanno vissattho nirālayo nihatamānatthambho uddhaṭadāṭho viya bhujagindo evamāha ‘‘sādhu, bhante nāgasena, buddhavisayo pañho tayā visajjito, imasmiṃ buddhasāsane ṭhapetvā dhammasenāpatiṃ sāriputtattheraṃ añño tayā sadiso pañhavisajjane natthi, khamatha, bhante nāgasena, mama accayaṃ, upāsakaṃ maṃ, bhante nāgasena, dhāretha ajjatagge pāṇupetaṃ saraṇaṃ gata’’nti.
តទា រាជា សហ ពលកាយេហិ នាគសេនត្ថេរំ បយិរុបាសិត្វា មិលិន្ទំ នាម វិហារំ ការេត្វា ថេរស្ស និយ្យាតេត្វា ចតូហិ បច្ចយេហិ នាគសេនំ កោដិសតេហិ ភិក្ខូហិ សទ្ធិំ បរិចរិ, បុនបិ ថេរស្ស បញ្ញាយ បសីទិត្វា បុត្តស្ស រជ្ជំ និយ្យាតេត្វា អគារស្មា អនគារិយំ បព្ពជិត្វា វិបស្សនំ វឌ្ឍេត្វា អរហត្តំ បាបុណិ, តេន វុត្តំ –
Tadā rājā saha balakāyehi nāgasenattheraṃ payirupāsitvā milindaṃ nāma vihāraṃ kāretvā therassa niyyātetvā catūhi paccayehi nāgasenaṃ koṭisatehi bhikkhūhi saddhiṃ paricari, punapi therassa paññāya pasīditvā puttassa rajjaṃ niyyātetvā agārasmā anagāriyaṃ pabbajitvā vipassanaṃ vaḍḍhetvā arahattaṃ pāpuṇi, tena vuttaṃ –
‘‘បញ្ញា បសត្ថា លោកស្មិំ, កតា សទ្ធម្មដ្ឋិតិយា;
‘‘Paññā pasatthā lokasmiṃ, katā saddhammaṭṭhitiyā;
បញ្ញាយ វិមតិំ ហន្ត្វា, សន្តិំ បប្បោន្តិ បណ្ឌិតា។
Paññāya vimatiṃ hantvā, santiṃ papponti paṇḍitā.
យស្មិំ ខន្ធេ ឋិតា បញ្ញា, សតិ តត្ថ អនូនកា;
Yasmiṃ khandhe ṭhitā paññā, sati tattha anūnakā;
លង្កាយំ ទោណិនគរេ, វសតា ទោណិនាមិនា;
Laṅkāyaṃ doṇinagare, vasatā doṇināminā;
មហាថេរេន លេខិត្វា, សុដ្ឋបិតំ យថាសុតំ;
Mahātherena lekhitvā, suṭṭhapitaṃ yathāsutaṃ;
មិលិន្ទរាជបញ្ហោ ច, នាគសេនវិសជ្ជនំ;
Milindarājapañho ca, nāgasenavisajjanaṃ;
មិលិន្ទោ ហិ មហាបញ្ញោ, នាគសេនោ សុបណ្ឌិតោ;
Milindo hi mahāpañño, nāgaseno supaṇḍito;
ឥមិនា បុញ្ញកម្មេន, ឥតោ គច្ឆាមិ តុស្សិតំ;
Iminā puññakammena, ito gacchāmi tussitaṃ;
មេត្តេយ្យំនាគតេ បស្សេ, សុណេយ្យំ ធម្មមុត្តមន្តិ។
Metteyyaṃnāgate passe, suṇeyyaṃ dhammamuttamanti.
មិលិន្ទបញ្ហោ និដ្ឋិតោ។
Milindapañho niṭṭhito.
Footnotes:
