| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
নিগমনং
Nigamanaṃ
ইতি ছসু কণ্ডেসু বাৰীসতিৰগ্গপতিমণ্ডিতেসু দ্ৰাসট্ঠিঅধিকা দ্ৰেসতা ইমস্মিং পোত্থকে আগতা মিলিন্দপঞ্হা সমত্তা, অনাগতা চ পন দ্ৰাচত্তালীসা হোন্তি, আগতা চ অনাগতা চ সব্বা সমোধানেত্ৰা চতূহি অধিকা তিসতপঞ্হা হোন্তি, সব্বাৰ মিলিন্দপঞ্হাতি সঙ্খং গচ্ছন্তি।
Iti chasu kaṇḍesu bāvīsativaggapatimaṇḍitesu dvāsaṭṭhiadhikā dvesatā imasmiṃ potthake āgatā milindapañhā samattā, anāgatā ca pana dvācattālīsā honti, āgatā ca anāgatā ca sabbā samodhānetvā catūhi adhikā tisatapañhā honti, sabbāva milindapañhāti saṅkhaṃ gacchanti.
রঞ্ঞো চ থেরস্স চ পুচ্ছাৰিসজ্জনাৰসানে চতুরাসীতিসতসহস্সযোজনবহলা উদকপরিযন্তং কত্ৰা অযং মহাপথৰী ছধা কম্পিত্থ, ৰিজ্জুল্লতা নিচ্ছরিংসু, দেৰতা দিব্বপুপ্ফৰস্সং পৰস্সিংসু, মহাব্রহ্মা সাধুকারমদাসি, মহাসমুদ্দকুচ্ছিযং মেঘত্থনিতনিগ্ঘোসো ৰিয মহাঘোসো অহোসি, ইতি সো মিলিন্দো রাজা চ ওরোধগণা চ সিরসা অঞ্জলিং পণামেত্ৰা ৰন্দিংসু।
Rañño ca therassa ca pucchāvisajjanāvasāne caturāsītisatasahassayojanabahalā udakapariyantaṃ katvā ayaṃ mahāpathavī chadhā kampittha, vijjullatā nicchariṃsu, devatā dibbapupphavassaṃ pavassiṃsu, mahābrahmā sādhukāramadāsi, mahāsamuddakucchiyaṃ meghatthanitanigghoso viya mahāghoso ahosi, iti so milindo rājā ca orodhagaṇā ca sirasā añjaliṃ paṇāmetvā vandiṃsu.
মিলিন্দো রাজা অতিৰিয পমুদিতহদযো সুমথিতমানহদযো বুদ্ধসাসনে সারমতিনো রতনত্তযে সুনিক্কঙ্খো নিগ্গুম্বো নিত্থদ্ধো হুত্ৰা থেরস্স গুণেসু পব্বজ্জাসু পটিপদাইরিযাপথেসু চ অতিৰিয পসন্নো ৰিস্সত্থো নিরালযো নিহতমানত্থম্ভো উদ্ধটদাঠো ৰিয ভুজগিন্দো এৰমাহ ‘‘সাধু, ভন্তে নাগসেন, বুদ্ধৰিসযো পঞ্হো তযা ৰিসজ্জিতো, ইমস্মিং বুদ্ধসাসনে ঠপেত্ৰা ধম্মসেনাপতিং সারিপুত্তত্থেরং অঞ্ঞো তযা সদিসো পঞ্হৰিসজ্জনে নত্থি, খমথ, ভন্তে নাগসেন, মম অচ্চযং, উপাসকং মং, ভন্তে নাগসেন, ধারেথ অজ্জতগ্গে পাণুপেতং সরণং গত’’ন্তি।
Milindo rājā ativiya pamuditahadayo sumathitamānahadayo buddhasāsane sāramatino ratanattaye sunikkaṅkho niggumbo nitthaddho hutvā therassa guṇesu pabbajjāsu paṭipadāiriyāpathesu ca ativiya pasanno vissattho nirālayo nihatamānatthambho uddhaṭadāṭho viya bhujagindo evamāha ‘‘sādhu, bhante nāgasena, buddhavisayo pañho tayā visajjito, imasmiṃ buddhasāsane ṭhapetvā dhammasenāpatiṃ sāriputtattheraṃ añño tayā sadiso pañhavisajjane natthi, khamatha, bhante nāgasena, mama accayaṃ, upāsakaṃ maṃ, bhante nāgasena, dhāretha ajjatagge pāṇupetaṃ saraṇaṃ gata’’nti.
তদা রাজা সহ বলকাযেহি নাগসেনত্থেরং পযিরুপাসিত্ৰা মিলিন্দং নাম ৰিহারং কারেত্ৰা থেরস্স নিয্যাতেত্ৰা চতূহি পচ্চযেহি নাগসেনং কোটিসতেহি ভিক্খূহি সদ্ধিং পরিচরি, পুনপি থেরস্স পঞ্ঞায পসীদিত্ৰা পুত্তস্স রজ্জং নিয্যাতেত্ৰা অগারস্মা অনগারিযং পব্বজিত্ৰা ৰিপস্সনং ৰড্ঢেত্ৰা অরহত্তং পাপুণি, তেন ৰুত্তং –
Tadā rājā saha balakāyehi nāgasenattheraṃ payirupāsitvā milindaṃ nāma vihāraṃ kāretvā therassa niyyātetvā catūhi paccayehi nāgasenaṃ koṭisatehi bhikkhūhi saddhiṃ paricari, punapi therassa paññāya pasīditvā puttassa rajjaṃ niyyātetvā agārasmā anagāriyaṃ pabbajitvā vipassanaṃ vaḍḍhetvā arahattaṃ pāpuṇi, tena vuttaṃ –
‘‘পঞ্ঞা পসত্থা লোকস্মিং, কতা সদ্ধম্মট্ঠিতিযা।
‘‘Paññā pasatthā lokasmiṃ, katā saddhammaṭṭhitiyā;
পঞ্ঞায ৰিমতিং হন্ত্ৰা, সন্তিং পপ্পোন্তি পণ্ডিতা॥
Paññāya vimatiṃ hantvā, santiṃ papponti paṇḍitā.
যস্মিং খন্ধে ঠিতা পঞ্ঞা, সতি তত্থ অনূনকা।
Yasmiṃ khandhe ṭhitā paññā, sati tattha anūnakā;
লঙ্কাযং দোণিনগরে, ৰসতা দোণিনামিনা।
Laṅkāyaṃ doṇinagare, vasatā doṇināminā;
মহাথেরেন লেখিত্ৰা, সুট্ঠপিতং যথাসুতং।
Mahātherena lekhitvā, suṭṭhapitaṃ yathāsutaṃ;
মিলিন্দরাজপঞ্হো চ, নাগসেনৰিসজ্জনং।
Milindarājapañho ca, nāgasenavisajjanaṃ;
মিলিন্দো হি মহাপঞ্ঞো, নাগসেনো সুপণ্ডিতো।
Milindo hi mahāpañño, nāgaseno supaṇḍito;
ইমিনা পুঞ্ঞকম্মেন, ইতো গচ্ছামি তুস্সিতং।
Iminā puññakammena, ito gacchāmi tussitaṃ;
মেত্তেয্যংনাগতে পস্সে, সুণেয্যং ধম্মমুত্তমন্তি॥
Metteyyaṃnāgate passe, suṇeyyaṃ dhammamuttamanti.
মিলিন্দপঞ্হো নিট্ঠিতো।
Milindapañho niṭṭhito.
Footnotes:
