| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
நிக³மனங்
Nigamanaṃ
இதி ச²ஸு கண்டே³ஸு பா³வீஸதிவக்³க³பதிமண்டி³தேஸு த்³வாஸட்டி²அதி⁴கா த்³வேஸதா இமஸ்மிங் பொத்த²கே ஆக³தா மிலிந்த³பஞ்ஹா ஸமத்தா, அனாக³தா ச பன த்³வாசத்தாலீஸா ஹொந்தி, ஆக³தா ச அனாக³தா ச ஸப்³பா³ ஸமோதா⁴னெத்வா சதூஹி அதி⁴கா திஸதபஞ்ஹா ஹொந்தி, ஸப்³பா³வ மிலிந்த³பஞ்ஹாதி ஸங்க²ங் க³ச்ச²ந்தி.
Iti chasu kaṇḍesu bāvīsativaggapatimaṇḍitesu dvāsaṭṭhiadhikā dvesatā imasmiṃ potthake āgatā milindapañhā samattā, anāgatā ca pana dvācattālīsā honti, āgatā ca anāgatā ca sabbā samodhānetvā catūhi adhikā tisatapañhā honti, sabbāva milindapañhāti saṅkhaṃ gacchanti.
ரஞ்ஞோ ச தே²ரஸ்ஸ ச புச்சா²விஸஜ்ஜனாவஸானே சதுராஸீதிஸதஸஹஸ்ஸயோஜனப³ஹலா உத³கபரியந்தங் கத்வா அயங் மஹாபத²வீ ச²தா⁴ கம்பித்த², விஜ்ஜுல்லதா நிச்ச²ரிங்ஸு, தே³வதா தி³ப்³ப³புப்ப²வஸ்ஸங் பவஸ்ஸிங்ஸு, மஹாப்³ரஹ்மா ஸாது⁴காரமதா³ஸி, மஹாஸமுத்³த³குச்சி²யங் மேக⁴த்த²னிதனிக்³கோ⁴ஸோ விய மஹாகோ⁴ஸோ அஹோஸி, இதி ஸோ மிலிந்தோ³ ராஜா ச ஓரோத⁴க³ணா ச ஸிரஸா அஞ்ஜலிங் பணாமெத்வா வந்தி³ங்ஸு.
Rañño ca therassa ca pucchāvisajjanāvasāne caturāsītisatasahassayojanabahalā udakapariyantaṃ katvā ayaṃ mahāpathavī chadhā kampittha, vijjullatā nicchariṃsu, devatā dibbapupphavassaṃ pavassiṃsu, mahābrahmā sādhukāramadāsi, mahāsamuddakucchiyaṃ meghatthanitanigghoso viya mahāghoso ahosi, iti so milindo rājā ca orodhagaṇā ca sirasā añjaliṃ paṇāmetvā vandiṃsu.
மிலிந்தோ³ ராஜா அதிவிய பமுதி³தஹத³யோ ஸுமதி²தமானஹத³யோ பு³த்³த⁴ஸாஸனே ஸாரமதினோ ரதனத்தயே ஸுனிக்கங்கோ² நிக்³கு³ம்போ³ நித்த²த்³தோ⁴ ஹுத்வா தே²ரஸ்ஸ கு³ணேஸு பப்³ப³ஜ்ஜாஸு படிபதா³இரியாபதே²ஸு ச அதிவிய பஸன்னோ விஸ்ஸத்தோ² நிராலயோ நிஹதமானத்த²ம்போ⁴ உத்³த⁴டதா³டோ² விய பு⁴ஜகி³ந்தோ³ ஏவமாஹ ‘‘ஸாது⁴, ப⁴ந்தே நாக³ஸேன, பு³த்³த⁴விஸயோ பஞ்ஹோ தயா விஸஜ்ஜிதோ, இமஸ்மிங் பு³த்³த⁴ஸாஸனே ட²பெத்வா த⁴ம்மஸேனாபதிங் ஸாரிபுத்தத்தே²ரங் அஞ்ஞோ தயா ஸதி³ஸோ பஞ்ஹவிஸஜ்ஜனே நத்தி², க²மத², ப⁴ந்தே நாக³ஸேன, மம அச்சயங், உபாஸகங் மங், ப⁴ந்தே நாக³ஸேன, தா⁴ரேத² அஜ்ஜதக்³கே³ பாணுபேதங் ஸரணங் க³த’’ந்தி.
Milindo rājā ativiya pamuditahadayo sumathitamānahadayo buddhasāsane sāramatino ratanattaye sunikkaṅkho niggumbo nitthaddho hutvā therassa guṇesu pabbajjāsu paṭipadāiriyāpathesu ca ativiya pasanno vissattho nirālayo nihatamānatthambho uddhaṭadāṭho viya bhujagindo evamāha ‘‘sādhu, bhante nāgasena, buddhavisayo pañho tayā visajjito, imasmiṃ buddhasāsane ṭhapetvā dhammasenāpatiṃ sāriputtattheraṃ añño tayā sadiso pañhavisajjane natthi, khamatha, bhante nāgasena, mama accayaṃ, upāsakaṃ maṃ, bhante nāgasena, dhāretha ajjatagge pāṇupetaṃ saraṇaṃ gata’’nti.
ததா³ ராஜா ஸஹ ப³லகாயேஹி நாக³ஸேனத்தே²ரங் பயிருபாஸித்வா மிலிந்த³ங் நாம விஹாரங் காரெத்வா தே²ரஸ்ஸ நிய்யாதெத்வா சதூஹி பச்சயேஹி நாக³ஸேனங் கோடிஸதேஹி பி⁴க்கூ²ஹி ஸத்³தி⁴ங் பரிசரி, புனபி தே²ரஸ்ஸ பஞ்ஞாய பஸீதி³த்வா புத்தஸ்ஸ ரஜ்ஜங் நிய்யாதெத்வா அகா³ரஸ்மா அனகா³ரியங் பப்³ப³ஜித்வா விபஸ்ஸனங் வட்³டெ⁴த்வா அரஹத்தங் பாபுணி, தேன வுத்தங் –
Tadā rājā saha balakāyehi nāgasenattheraṃ payirupāsitvā milindaṃ nāma vihāraṃ kāretvā therassa niyyātetvā catūhi paccayehi nāgasenaṃ koṭisatehi bhikkhūhi saddhiṃ paricari, punapi therassa paññāya pasīditvā puttassa rajjaṃ niyyātetvā agārasmā anagāriyaṃ pabbajitvā vipassanaṃ vaḍḍhetvā arahattaṃ pāpuṇi, tena vuttaṃ –
‘‘பஞ்ஞா பஸத்தா² லோகஸ்மிங், கதா ஸத்³த⁴ம்மட்டி²தியா;
‘‘Paññā pasatthā lokasmiṃ, katā saddhammaṭṭhitiyā;
பஞ்ஞாய விமதிங் ஹந்த்வா, ஸந்திங் பப்பொந்தி பண்டி³தா.
Paññāya vimatiṃ hantvā, santiṃ papponti paṇḍitā.
யஸ்மிங் க²ந்தே⁴ டி²தா பஞ்ஞா, ஸதி தத்த² அனூனகா;
Yasmiṃ khandhe ṭhitā paññā, sati tattha anūnakā;
லங்காயங் தோ³ணினக³ரே, வஸதா தோ³ணினாமினா;
Laṅkāyaṃ doṇinagare, vasatā doṇināminā;
மஹாதே²ரேன லேகி²த்வா, ஸுட்ட²பிதங் யதா²ஸுதங்;
Mahātherena lekhitvā, suṭṭhapitaṃ yathāsutaṃ;
மிலிந்த³ராஜபஞ்ஹோ ச, நாக³ஸேனவிஸஜ்ஜனங்;
Milindarājapañho ca, nāgasenavisajjanaṃ;
மிலிந்தோ³ ஹி மஹாபஞ்ஞோ, நாக³ஸேனோ ஸுபண்டி³தோ;
Milindo hi mahāpañño, nāgaseno supaṇḍito;
இமினா புஞ்ஞகம்மேன, இதோ க³ச்சா²மி துஸ்ஸிதங்;
Iminā puññakammena, ito gacchāmi tussitaṃ;
மெத்தெய்யங்னாக³தே பஸ்ஸே, ஸுணெய்யங் த⁴ம்மமுத்தமந்தி.
Metteyyaṃnāgate passe, suṇeyyaṃ dhammamuttamanti.
மிலிந்த³பஞ்ஹோ நிட்டி²தோ.
Milindapañho niṭṭhito.
Footnotes:
