| Library / Tipiṭaka / တိပိဋက • Tipiṭaka / ဝိမတိဝိနောဒနီ-ဋီကာ • Vimativinodanī-ṭīkā |
နိဂမနကထာဝဏ္ဏနာ
Nigamanakathāvaṇṇanā
အဝသာနဂာထာသု ဥဘတောဝိဘင္ဂ-ခန္ဓက-ပရိဝာရေဟိ ဝိဘတ္တတ္တာ ဝိဘာဂပဋိဒေသနာ ယသ္မိံ ဝိနယပိဋကေ။ သော ဥဘတောဝိဘင္ဂ-ခန္ဓက-ပရိဝာရဝိဘတ္တဒေသနော အာဟာတိ ယောဇနာ။ တသ္သာတိ ဝိနယပိဋကသ္သ။
Avasānagāthāsu ubhatovibhaṅga-khandhaka-parivārehi vibhattattā vibhāgapaṭidesanā yasmiṃ vinayapiṭake. So ubhatovibhaṅga-khandhaka-parivāravibhattadesano āhāti yojanā. Tassāti vinayapiṭakassa.
သတ္ထု မဟာဗောဓီတိ ဒက္ခိဏသာခံ သန္ဓာယ ဝဒတိ။ ယံ ပဓာနဃရံ နာမ ပရိဝေဏံ, တတ္ထ စာရုပာကာရေန သဉ္စိတံ ပရိက္ခိတ္တံ ယံ ပာသာဒံ ကာရယိ, တတ္ရ တသ္မိံ မဟာနိဂမသာမိနော ပာသာဒေ ဝသတာတိ ယောဇေတဗ္ဗာ။
Satthu mahābodhīti dakkhiṇasākhaṃ sandhāya vadati. Yaṃ padhānagharaṃ nāma pariveṇaṃ, tattha cārupākārena sañcitaṃ parikkhittaṃ yaṃ pāsādaṃ kārayi, tatra tasmiṃ mahānigamasāmino pāsāde vasatāti yojetabbā.
ဗုဒ္ဓသိရိံ ဥဒ္ဒိသိတ္ဝာ နိသ္သာယ, တသ္သ ဝာ အဇ္ဈေသနမ္ပိ ပဋိစ္စ ယာ ဣဒ္ဓာ ပရိပုဏ္ဏဝိနိစ္ဆယတာယ သမိဒ္ဓာ ဝိနယသံဝဏ္ဏနာ အာရဒ္ဓာတိ ယောဇနာ။
Buddhasiriṃ uddisitvā nissāya, tassa vā ajjhesanampi paṭicca yā iddhā paripuṇṇavinicchayatāya samiddhā vinayasaṃvaṇṇanā āraddhāti yojanā.
သိရိနိဝာသသ္သာတိ သိရိယာ နိဝာသနဋ္ဌာနဘူတသ္သ သိရိပာလနာမကသ္သ ရညော။ ဇယသံဝစ္ဆရေတိ ဝိဇယယုတ္တေ သံဝစ္ဆရေ။ အာရဒ္ဓကာလဒသ္သနတ္ထံ ပုန ‘‘ဇယသံဝစ္ဆရေ အယံ အာရဒ္ဓာ’’တိ ဝုတ္တံ။
Sirinivāsassāti siriyā nivāsanaṭṭhānabhūtassa siripālanāmakassa rañño. Jayasaṃvacchareti vijayayutte saṃvacchare. Āraddhakāladassanatthaṃ puna ‘‘jayasaṃvacchare ayaṃ āraddhā’’ti vuttaṃ.
ကာလေ ဝသ္သန္တိ ယုတ္တကာလေ ဝသ္သနသီလော။ ဒေဝောတိ မေဃော။
Kālevassanti yuttakāle vassanasīlo. Devoti megho.
နိဂမနကထာဝဏ္ဏနာ နိဋ္ဌိတာ။
Nigamanakathāvaṇṇanā niṭṭhitā.
