| Library / Tipiṭaka / តិបិដក • Tipiṭaka / វិនយវិនិច្ឆយ-ដីកា • Vinayavinicchaya-ṭīkā |
និគមនកថាវណ្ណនា
Nigamanakathāvaṇṇanā
៩៦១-៣. មហេសិនោ តិវិធស្សាបិ សាសនស្ស សុចិរដ្ឋិតិកាមេន អតិចិរកាលប្បវត្តិំ ឥច្ឆន្តេន ធីមតា បសត្ថតរញាណេន សុទ្ធចិត្តេន លាភសក្ការនិរបេក្ខតាយ បរិសុទ្ធជ្ឈាសយេន ពុទ្ធទត្តេន ពុទ្ធទត្តាភិធានេន អាចរិយវរេន រចិតោ។
961-3. Mahesino tividhassāpi sāsanassa suciraṭṭhitikāmena aticirakālappavattiṃ icchantena dhīmatā pasatthatarañāṇena suddhacittena lābhasakkāranirapekkhatāya parisuddhajjhāsayena buddhadattena buddhadattābhidhānena ācariyavarena racito.
បជ្ជវសេន គន្ថតោ, អត្ថតោ ចេវ បរមុត្តរោ ឧត្តរោ វិនិច្ឆយោ អន្តរាយំ អន្តរេន អជ្ឈត្តិកំ, ពាហិរំ វា អន្តរាយំ វិនា យថា សិទ្ធិំ ឧបាគតោ បរិនិដ្ឋានំ បត្តោ, តថា សត្តានំ ធម្មសំយុតា កុសលូបសំហិតា សង្កប្បា មនោរថា សិជ្ឈន្តុ អន្តរាយំ វិនា និប្បជ្ជន្តុ, ឯតេន ឧត្តរវិនិច្ឆយរចនាមយេន មហតា បុញ្ញោទយេន ចតូហិ សង្គហវត្ថូហិ ជនំ រញ្ជេតីតិ ‘‘រាជា’’តិ សង្ខំ គតោ មហីបាលោ មហិំ បថវិសន្និស្សិតំ ជនកាយំ សម្មា ញាយេន ទស រាជធម្មេ អកោបេន្តោ បាលេតុ។ ទេវោ បជ្ជុន្នោ កាលេ ថាវរជង្គមានំ ឧបយោគារហកាលេ សម្មា បវស្សតុ អវុដ្ឋិអតិវុដ្ឋិកំ អកត្វា សម្មា បវច្ឆតុ។
Pajjavasena ganthato, atthato ceva paramuttaro uttaro vinicchayo antarāyaṃ antarena ajjhattikaṃ, bāhiraṃ vā antarāyaṃ vinā yathā siddhiṃ upāgato pariniṭṭhānaṃ patto, tathā sattānaṃ dhammasaṃyutā kusalūpasaṃhitā saṅkappā manorathā sijjhantu antarāyaṃ vinā nippajjantu, etena uttaravinicchayaracanāmayena mahatā puññodayena catūhi saṅgahavatthūhi janaṃ rañjetīti ‘‘rājā’’ti saṅkhaṃ gato mahīpālo mahiṃ pathavisannissitaṃ janakāyaṃ sammā ñāyena dasa rājadhamme akopento pāletu. Devo pajjunno kāle thāvarajaṅgamānaṃ upayogārahakāle sammā pavassatu avuṭṭhiativuṭṭhikaṃ akatvā sammā pavacchatu.
៩៦៤. សេលិន្ទោ សិនេរុបព្ពតរាជា យាវ តិដ្ឋតិ យាវ លោកេ បវត្តតិ, ចន្ទោ សកលជនបទនយនសាយនោ យាវ វិរោចតិ យាវ អត្តនោ សភាវំ ជោតេតិ, តាវ យសស្សិនោ គោតមស្ស អរហតោ សម្មាសម្ពុទ្ធស្ស សទ្ធម្មោ បរិយត្តិបដិបត្តិបដិវេធវសេន តិវិធោ សទ្ធម្មោ តិដ្ឋតុ បវត្តតុ។
964.Selindo sinerupabbatarājā yāva tiṭṭhati yāva loke pavattati, cando sakalajanapadanayanasāyano yāva virocati yāva attano sabhāvaṃ joteti, tāva yasassino gotamassa arahato sammāsambuddhassa saddhammo pariyattipaṭipattipaṭivedhavasena tividho saddhammo tiṭṭhatu pavattatu.
៩៦៥. សីហាទីនំ, ទាហាទីនញ្ច ពាហិរជ្ឈត្តិកានំ បរិស្សយានំ ខមនំ សហនំ អភិភវិត្វា បវត្តនំ ខន្តិ។ សោរច្ចន្តិ សោភនេ រតោតិ សុរតោ, សុរតស្ស ភាវោ សោរច្ចំ។ សុន្ទរំ អខណ្ឌតាទិគុណសមន្នាគតំ សីលំ អស្សាតិ សុសីលោ។ សុសីលស្ស ភាវោ។
965. Sīhādīnaṃ, dāhādīnañca bāhirajjhattikānaṃ parissayānaṃ khamanaṃ sahanaṃ abhibhavitvā pavattanaṃ khanti. Soraccanti sobhane ratoti surato, suratassa bhāvo soraccaṃ. Sundaraṃ akhaṇḍatādiguṇasamannāgataṃ sīlaṃ assāti susīlo. Susīlassa bhāvo.
និគមនកថាវណ្ណនា និដ្ឋិតា។
Nigamanakathāvaṇṇanā niṭṭhitā.
ឧត្តរវិនិច្ឆយដីកា និដ្ឋិតា។
Uttaravinicchayaṭīkā niṭṭhitā.
ឥតិ វិនយត្ថសារសន្ទីបនី នាម វិនយវិនិច្ឆយវណ្ណនា,
Iti vinayatthasārasandīpanī nāma vinayavinicchayavaṇṇanā,
លីនត្ថបកាសនី នាម ឧត្តរវិនិច្ឆយវណ្ណនា ច
Līnatthapakāsanī nāma uttaravinicchayavaṇṇanā ca
សមត្តា។
Samattā.
បច្ឆា ឋបិតគាថាយោ
Pacchā ṭhapitagāthāyo
ថេរេន ថិរចិត្តេន, សាសនុជ្ជោតនត្ថិនា;
Therena thiracittena, sāsanujjotanatthinā;
បុញ្ញវា ញាណវា សីលី, សុហជ្ជោ មុទុកោ តថា។
Puññavā ñāṇavā sīlī, suhajjo muduko tathā.
យោ សីហឡារិមទ្ទេសុ, ចន្ទិមា សូរិយោ វិយ;
Yo sīhaḷārimaddesu, candimā sūriyo viya;
បាកដោ សីវលិត្ថេរោ, មហាតេជោ មហាយសោ។
Pākaṭo sīvalitthero, mahātejo mahāyaso.
តេន នីតា សីហឡា យា, ឥធ បត្តា សុធីមតា;
Tena nītā sīhaḷā yā, idha pattā sudhīmatā;
ឯសា សំវណ្ណនា សីហ-ឡក្ខរេន សុលិក្ខិតា។
Esā saṃvaṇṇanā sīha-ḷakkharena sulikkhitā.
រេវតោ ឥតិ នាមេន, ថេរេន ថិរចេតសា;
Revato iti nāmena, therena thiracetasā;
អរិមទ្ទិកេ រក្ខន្តេន, បរិវត្តេត្វាន សាធុកំ។
Arimaddike rakkhantena, parivattetvāna sādhukaṃ.
លិខាបិតា ហិតត្ថាយ, ភិក្ខូនំ អរិមទ្ទិកេ;
Likhāpitā hitatthāya, bhikkhūnaṃ arimaddike;
ឯសា សំវណ្ណនា សុដ្ឋុ, សន្និដ្ឋានមុបាគតា;
Esā saṃvaṇṇanā suṭṭhu, sanniṭṭhānamupāgatā;
តថេវ សព្ពសត្តានំ, សព្ពត្ថោ ច សមិជ្ឈតូតិ។
Tatheva sabbasattānaṃ, sabbattho ca samijjhatūti.
