| Library / Tipiṭaka / ติปิฎก • Tipiṭaka / สํยุตฺตนิกาย (ฎีกา) • Saṃyuttanikāya (ṭīkā) |
นิคมนกถาวณฺณนา
Nigamanakathāvaṇṇanā
สกลรูปารูปสมฺมสเน สณฺหสุขุมวิสยญาณตาย วิปสฺสนาจารนิปุณพุทฺธีนํ สุสํยตกายวจีสมาจารตาย สมถวิปสฺสนาสุ สมฺมเทว ยตนโต จ ยตีนํ ภิกฺขูนํ ขนฺธายตนธาตุสจฺจินฺทฺริยปฎิจฺจสมุปฺปาทเภเท ปรมตฺถธเมฺม นานานเยหิ ญาณวิภาคสฺส สนฺนิสฺสเยน พหุการสฺส สํยุตฺตาคมวรสฺส อตฺถสํวณฺณนํ กาตุํ สารตฺถปฺปกาสนโต เอว นิปุณา ยา มยา อฎฺฐกถา อารทฺธาติ สมฺพโนฺธฯ สวิเสสํ ปญฺญาวหคุณตฺตา เอว หิสฺส คนฺถารเมฺภ อาทิโตปิ ‘‘ปญฺญาปเภทชนนสฺสา’’ติ วุตฺตํฯ มหาอฎฺฐกถาย สารนฺติ สํยุตฺตมหาอฎฺฐกถาย สารํฯ เอกูนสฎฺฐิมโตฺตติ โถกํ อูนภาวโต มตฺต-สทฺทคฺคหณํฯ
Sakalarūpārūpasammasane saṇhasukhumavisayañāṇatāya vipassanācāranipuṇabuddhīnaṃ susaṃyatakāyavacīsamācāratāya samathavipassanāsu sammadeva yatanato ca yatīnaṃ bhikkhūnaṃ khandhāyatanadhātusaccindriyapaṭiccasamuppādabhede paramatthadhamme nānānayehi ñāṇavibhāgassa sannissayena bahukārassa saṃyuttāgamavarassa atthasaṃvaṇṇanaṃ kātuṃ sāratthappakāsanato eva nipuṇā yā mayā aṭṭhakathā āraddhāti sambandho. Savisesaṃ paññāvahaguṇattā eva hissa ganthārambhe āditopi ‘‘paññāpabhedajananassā’’ti vuttaṃ. Mahāaṭṭhakathāya sāranti saṃyuttamahāaṭṭhakathāya sāraṃ. Ekūnasaṭṭhimattoti thokaṃ ūnabhāvato matta-saddaggahaṇaṃ.
มูลฎฺฐกถาย สารนฺติ ปุเพฺพ วุตฺตสํยุตฺตมหาอฎฺฐกถาย สารเมว ปุน นิคมนวเสน วุตฺตนฺติฯ อถ วา มูลฎฺฐกถาย สารนฺติ โปราณฎฺฐกถาสุ อตฺถสารํฯ เตน เอตํ ทเสฺสติ ‘‘สํยุตฺตมหาอฎฺฐกถาย อตฺถสารํ อาทาย อิมํ สารตฺถปฺปกาสินิํ กโรเนฺตน เสสมหานิกายานมฺปิ มูลฎฺฐกถาสุ อิธ วิโยคกฺขมํ อตฺถสารํ อาทาย อกาสิ’’นฺติฯ ‘‘มหาวิหาราธิวาสีน’’นฺติ จ อิทํ ปุริมปจฺฉิมปเทหิ สทฺธิํ สมฺพนฺธิตพฺพํ ‘‘มหาวิหาราธิวาสีนํ สมยํ ปกาสยนฺติํ มหาวิหาราธิวาสีนํ มูลฎฺฐกถาย สารํ อาทายา’’ติ จฯ เตน ปุเญฺญนฯ โหตุ สโพฺพ สุขี โลโกติ กามาวจราทิวิภาโค สโพฺพ สตฺตโลโก ยถารหํ โพธิตฺตยาธิคมวเสน สมฺปยุเตฺตน นิพฺพานสุเขน สุขิโต โหตูติ สเทวกสฺส โลกสฺส อจฺจนฺตํ สุขาธิคมาย อตฺตโน ปุญฺญํ ปริณาเมติฯ
Mūlaṭṭhakathāya sāranti pubbe vuttasaṃyuttamahāaṭṭhakathāya sārameva puna nigamanavasena vuttanti. Atha vā mūlaṭṭhakathāya sāranti porāṇaṭṭhakathāsu atthasāraṃ. Tena etaṃ dasseti ‘‘saṃyuttamahāaṭṭhakathāya atthasāraṃ ādāya imaṃ sāratthappakāsiniṃ karontena sesamahānikāyānampi mūlaṭṭhakathāsu idha viyogakkhamaṃ atthasāraṃ ādāya akāsi’’nti. ‘‘Mahāvihārādhivāsīna’’nti ca idaṃ purimapacchimapadehi saddhiṃ sambandhitabbaṃ ‘‘mahāvihārādhivāsīnaṃ samayaṃ pakāsayantiṃ mahāvihārādhivāsīnaṃ mūlaṭṭhakathāya sāraṃ ādāyā’’ti ca. Tena puññena. Hotu sabbo sukhī lokoti kāmāvacarādivibhāgo sabbo sattaloko yathārahaṃ bodhittayādhigamavasena sampayuttena nibbānasukhena sukhito hotūti sadevakassa lokassa accantaṃ sukhādhigamāya attano puññaṃ pariṇāmeti.
เอตฺตาวตา สารตฺถปฺปกาสินิยา
Ettāvatā sāratthappakāsiniyā
สํยุตฺตนิกาย-อฎฺฐกถาย ลีนตฺถปฺปกาสนา นิฎฺฐิตาฯ
Saṃyuttanikāya-aṭṭhakathāya līnatthappakāsanā niṭṭhitā.
สํยุตฺตฎีกา สมตฺตาฯ
Saṃyuttaṭīkā samattā.
