| Library / Tipiṭaka / තිපිටක • Tipiṭaka / විනයාලඞ්කාර-ටීකා • Vinayālaṅkāra-ṭīkā |
නිගමනකථා
Nigamanakathā
1.
1.
ජම්බුදීපතලෙ රම්මෙ, මරම්මවිසයෙ සුතෙ;
Jambudīpatale ramme, marammavisaye sute;
තම්බදීපරට්ඨෙ ඨිතං, පුරං රතනනාමකං.
Tambadīparaṭṭhe ṭhitaṃ, puraṃ ratananāmakaṃ.
2.
2.
ජිනසාසනපජ්ජොතං , අනෙකරතනාකරං;
Jinasāsanapajjotaṃ , anekaratanākaraṃ;
සාධුජ්ජනානමාවාසං, සොණ්ණපාසාදලඞ්කතං.
Sādhujjanānamāvāsaṃ, soṇṇapāsādalaṅkataṃ.
3.
3.
තස්මිං රතනපුරම්හි, රාජානෙකරට්ඨිස්සරො;
Tasmiṃ ratanapuramhi, rājānekaraṭṭhissaro;
සිරීසුධම්මරාජාති, මහාඅධිපතීති ච.
Sirīsudhammarājāti, mahāadhipatīti ca.
4.
4.
එවංනාමො මහාතෙජො, රජ්ජං කාරෙසි ධම්මතො;
Evaṃnāmo mahātejo, rajjaṃ kāresi dhammato;
කාරාපෙසි රාජා මණි-චූළං මහන්තචෙතියං.
Kārāpesi rājā maṇi-cūḷaṃ mahantacetiyaṃ.
5.
5.
තස්ස කාලෙ බ්රහාරඤ්ඤෙ, තිරියො නාම පබ්බතො;
Tassa kāle brahāraññe, tiriyo nāma pabbato;
පුබ්බකාරඤ්ඤවාසීනං, නිවාසො භාවනාරහො.
Pubbakāraññavāsīnaṃ, nivāso bhāvanāraho.
6.
6.
අට්ඨාරසහි දොසෙහි, මුත්තො පඤ්චඞ්ගුපාගතො;
Aṭṭhārasahi dosehi, mutto pañcaṅgupāgato;
අරඤ්ඤලක්ඛණං පත්තො, බද්ධසීමායලඞ්කතො.
Araññalakkhaṇaṃ patto, baddhasīmāyalaṅkato.
7.
7.
තස්මිං පබ්බතෙ වසන්තො, මහාථෙරො සුපාකටො;
Tasmiṃ pabbate vasanto, mahāthero supākaṭo;
තිපෙටකාලඞ්කාරොති, ද්වික්ඛත්තුං ලද්ධලඤ්ඡනො.
Tipeṭakālaṅkāroti, dvikkhattuṃ laddhalañchano.
8.
8.
තෙභාතුකනරින්දානං, ගරුභූතො සුපෙසලො;
Tebhātukanarindānaṃ, garubhūto supesalo;
කුසලො පරියත්තිම්හි, පටිපත්තිම්හි කාරකො.
Kusalo pariyattimhi, paṭipattimhi kārako.
9.
9.
සොහං ලජ්ජීපෙසලෙහි, භික්ඛූහි අභියාචිතො;
Sohaṃ lajjīpesalehi, bhikkhūhi abhiyācito;
සාසනස්සොපකාරාය, අකාසිං සීලවඩ්ඪනං.
Sāsanassopakārāya, akāsiṃ sīlavaḍḍhanaṃ.
10.
10.
විනයාලඞ්කාරං නාම, ලජ්ජීනං උපකාරකං;
Vinayālaṅkāraṃ nāma, lajjīnaṃ upakārakaṃ;
සුට්ඨු විනයසඞ්ගහ-වණ්ණනං සාධුසෙවිතං.
Suṭṭhu vinayasaṅgaha-vaṇṇanaṃ sādhusevitaṃ.
11.
11.
රූපඡිද්දනාසකණ්ණෙ , සම්පත්තෙ ජිනසාසනෙ;
Rūpachiddanāsakaṇṇe , sampatte jinasāsane;
ඡිද්දසුඤ්ඤසුඤ්ඤරූපෙ, කලියුගම්හි ආගතෙ.
Chiddasuññasuññarūpe, kaliyugamhi āgate.
12.
12.
නිට්ඨාපිතා අයං ටීකා, මයා සාසනකාරණා;
Niṭṭhāpitā ayaṃ ṭīkā, mayā sāsanakāraṇā;
ද්වීසු සොණ්ණවිහාරෙසු, ද්වික්ඛත්තුං ලද්ධකෙතුනා.
Dvīsu soṇṇavihāresu, dvikkhattuṃ laddhaketunā.
13.
13.
ඉමිනා පුඤ්ඤකම්මෙන, අඤ්ඤෙන කුසලෙන ච;
Iminā puññakammena, aññena kusalena ca;
ඉතො චුතාහං දුතියෙ, අත්තභාවම්හි ආගතෙ.
Ito cutāhaṃ dutiye, attabhāvamhi āgate.
14.
14.
හිමවන්තපදෙසම්හි, පබ්බතෙ ගන්ධමාදනෙ;
Himavantapadesamhi, pabbate gandhamādane;
ආසන්නෙ මණිගුහාය, මඤ්ජූසකදුමස්ස ච.
Āsanne maṇiguhāya, mañjūsakadumassa ca.
15.
15.
තස්මිං හෙස්සං භුම්මදෙවො, අතිදීඝායුකො වරො;
Tasmiṃ hessaṃ bhummadevo, atidīghāyuko varo;
පඤ්ඤාවීරියසම්පන්නො, බුද්ධසාසනමාමකො.
Paññāvīriyasampanno, buddhasāsanamāmako.
16.
16.
යාව තිට්ඨති සාසනං, තාව චෙතියවන්දනං;
Yāva tiṭṭhati sāsanaṃ, tāva cetiyavandanaṃ;
බොධිපූජං සඞ්ඝපූජං, කරෙය්යං තුට්ඨමානසො.
Bodhipūjaṃ saṅghapūjaṃ, kareyyaṃ tuṭṭhamānaso.
17.
17.
භික්ඛූනං පටිපන්නානං, වෙය්යාවච්චං කරෙය්යහං;
Bhikkhūnaṃ paṭipannānaṃ, veyyāvaccaṃ kareyyahaṃ;
පරියත්තාභියුත්තානං, කඞ්ඛාවිනොදයෙය්යහං.
Pariyattābhiyuttānaṃ, kaṅkhāvinodayeyyahaṃ.
18.
18.
සාසනං පග්ගණ්හන්තානං, රාජූනං සහායො අස්සං;
Sāsanaṃ paggaṇhantānaṃ, rājūnaṃ sahāyo assaṃ;
සාසනං නිග්ගණ්හන්තානං, වාරෙතුං සමත්ථො අස්සං.
Sāsanaṃ niggaṇhantānaṃ, vāretuṃ samattho assaṃ.
19.
19.
සාසනන්තරධානෙ තු, මඤ්ජූසං රුක්ඛමුත්තමං;
Sāsanantaradhāne tu, mañjūsaṃ rukkhamuttamaṃ;
නන්දමූලඤ්ච පබ්භාරං, නිච්චං පූජං කරෙය්යහං.
Nandamūlañca pabbhāraṃ, niccaṃ pūjaṃ kareyyahaṃ.
20.
20.
යදා තු පච්චෙකබුද්ධා, උප්පජ්ජන්ති මහායසා;
Yadā tu paccekabuddhā, uppajjanti mahāyasā;
තදා තෙසං නිච්චකප්පං, උපට්ඨානං කරෙය්යහං.
Tadā tesaṃ niccakappaṃ, upaṭṭhānaṃ kareyyahaṃ.
21.
21.
තෙනෙව අත්තභාවෙන, යාව බුද්ධුප්පාදා අහං;
Teneva attabhāvena, yāva buddhuppādā ahaṃ;
තිට්ඨන්තො බුද්ධුප්පාදම්හි, මනුස්සෙසු භවාමහං.
Tiṭṭhanto buddhuppādamhi, manussesu bhavāmahaṃ.
22.
22.
මෙත්තෙය්යස්ස භගවතො, පබ්බජිත්වාන සාසනෙ;
Metteyyassa bhagavato, pabbajitvāna sāsane;
තොසයිත්වාන ජිනං තං, ලභෙ බ්යාකරණුත්තමං.
Tosayitvāna jinaṃ taṃ, labhe byākaraṇuttamaṃ.
23.
23.
බ්යාකරණං ලභිත්වාන, පූරෙත්වා සබ්බපාරමී;
Byākaraṇaṃ labhitvāna, pūretvā sabbapāramī;
අනාගතම්හි අද්ධානෙ, බුද්ධො හෙස්සං සදෙවකෙති.
Anāgatamhi addhāne, buddho hessaṃ sadevaketi.
විනයාලඞ්කාරටීකා සමත්තා.
Vinayālaṅkāraṭīkā samattā.
