| Library / Tipiṭaka / ತಿಪಿಟಕ • Tipiṭaka / ವಿನಯಾಲಙ್ಕಾರ-ಟೀಕಾ • Vinayālaṅkāra-ṭīkā |
ನಿಗಮನಕಥಾ
Nigamanakathā
೧.
1.
ಜಮ್ಬುದೀಪತಲೇ ರಮ್ಮೇ, ಮರಮ್ಮವಿಸಯೇ ಸುತೇ।
Jambudīpatale ramme, marammavisaye sute;
ತಮ್ಬದೀಪರಟ್ಠೇ ಠಿತಂ, ಪುರಂ ರತನನಾಮಕಂ॥
Tambadīparaṭṭhe ṭhitaṃ, puraṃ ratananāmakaṃ.
೨.
2.
ಜಿನಸಾಸನಪಜ್ಜೋತಂ , ಅನೇಕರತನಾಕರಂ।
Jinasāsanapajjotaṃ , anekaratanākaraṃ;
ಸಾಧುಜ್ಜನಾನಮಾವಾಸಂ, ಸೋಣ್ಣಪಾಸಾದಲಙ್ಕತಂ॥
Sādhujjanānamāvāsaṃ, soṇṇapāsādalaṅkataṃ.
೩.
3.
ತಸ್ಮಿಂ ರತನಪುರಮ್ಹಿ, ರಾಜಾನೇಕರಟ್ಠಿಸ್ಸರೋ।
Tasmiṃ ratanapuramhi, rājānekaraṭṭhissaro;
ಸಿರೀಸುಧಮ್ಮರಾಜಾತಿ, ಮಹಾಅಧಿಪತೀತಿ ಚ॥
Sirīsudhammarājāti, mahāadhipatīti ca.
೪.
4.
ಏವಂನಾಮೋ ಮಹಾತೇಜೋ, ರಜ್ಜಂ ಕಾರೇಸಿ ಧಮ್ಮತೋ।
Evaṃnāmo mahātejo, rajjaṃ kāresi dhammato;
ಕಾರಾಪೇಸಿ ರಾಜಾ ಮಣಿ-ಚೂಳಂ ಮಹನ್ತಚೇತಿಯಂ॥
Kārāpesi rājā maṇi-cūḷaṃ mahantacetiyaṃ.
೫.
5.
ತಸ್ಸ ಕಾಲೇ ಬ್ರಹಾರಞ್ಞೇ, ತಿರಿಯೋ ನಾಮ ಪಬ್ಬತೋ।
Tassa kāle brahāraññe, tiriyo nāma pabbato;
ಪುಬ್ಬಕಾರಞ್ಞವಾಸೀನಂ, ನಿವಾಸೋ ಭಾವನಾರಹೋ॥
Pubbakāraññavāsīnaṃ, nivāso bhāvanāraho.
೬.
6.
ಅಟ್ಠಾರಸಹಿ ದೋಸೇಹಿ, ಮುತ್ತೋ ಪಞ್ಚಙ್ಗುಪಾಗತೋ।
Aṭṭhārasahi dosehi, mutto pañcaṅgupāgato;
ಅರಞ್ಞಲಕ್ಖಣಂ ಪತ್ತೋ, ಬದ್ಧಸೀಮಾಯಲಙ್ಕತೋ॥
Araññalakkhaṇaṃ patto, baddhasīmāyalaṅkato.
೭.
7.
ತಸ್ಮಿಂ ಪಬ್ಬತೇ ವಸನ್ತೋ, ಮಹಾಥೇರೋ ಸುಪಾಕಟೋ।
Tasmiṃ pabbate vasanto, mahāthero supākaṭo;
ತಿಪೇಟಕಾಲಙ್ಕಾರೋತಿ, ದ್ವಿಕ್ಖತ್ತುಂ ಲದ್ಧಲಞ್ಛನೋ॥
Tipeṭakālaṅkāroti, dvikkhattuṃ laddhalañchano.
೮.
8.
ತೇಭಾತುಕನರಿನ್ದಾನಂ, ಗರುಭೂತೋ ಸುಪೇಸಲೋ।
Tebhātukanarindānaṃ, garubhūto supesalo;
ಕುಸಲೋ ಪರಿಯತ್ತಿಮ್ಹಿ, ಪಟಿಪತ್ತಿಮ್ಹಿ ಕಾರಕೋ॥
Kusalo pariyattimhi, paṭipattimhi kārako.
೯.
9.
ಸೋಹಂ ಲಜ್ಜೀಪೇಸಲೇಹಿ, ಭಿಕ್ಖೂಹಿ ಅಭಿಯಾಚಿತೋ।
Sohaṃ lajjīpesalehi, bhikkhūhi abhiyācito;
ಸಾಸನಸ್ಸೋಪಕಾರಾಯ, ಅಕಾಸಿಂ ಸೀಲವಡ್ಢನಂ॥
Sāsanassopakārāya, akāsiṃ sīlavaḍḍhanaṃ.
೧೦.
10.
ವಿನಯಾಲಙ್ಕಾರಂ ನಾಮ, ಲಜ್ಜೀನಂ ಉಪಕಾರಕಂ।
Vinayālaṅkāraṃ nāma, lajjīnaṃ upakārakaṃ;
ಸುಟ್ಠು ವಿನಯಸಙ್ಗಹ-ವಣ್ಣನಂ ಸಾಧುಸೇವಿತಂ॥
Suṭṭhu vinayasaṅgaha-vaṇṇanaṃ sādhusevitaṃ.
೧೧.
11.
ರೂಪಛಿದ್ದನಾಸಕಣ್ಣೇ , ಸಮ್ಪತ್ತೇ ಜಿನಸಾಸನೇ।
Rūpachiddanāsakaṇṇe , sampatte jinasāsane;
ಛಿದ್ದಸುಞ್ಞಸುಞ್ಞರೂಪೇ, ಕಲಿಯುಗಮ್ಹಿ ಆಗತೇ॥
Chiddasuññasuññarūpe, kaliyugamhi āgate.
೧೨.
12.
ನಿಟ್ಠಾಪಿತಾ ಅಯಂ ಟೀಕಾ, ಮಯಾ ಸಾಸನಕಾರಣಾ।
Niṭṭhāpitā ayaṃ ṭīkā, mayā sāsanakāraṇā;
ದ್ವೀಸು ಸೋಣ್ಣವಿಹಾರೇಸು, ದ್ವಿಕ್ಖತ್ತುಂ ಲದ್ಧಕೇತುನಾ॥
Dvīsu soṇṇavihāresu, dvikkhattuṃ laddhaketunā.
೧೩.
13.
ಇಮಿನಾ ಪುಞ್ಞಕಮ್ಮೇನ, ಅಞ್ಞೇನ ಕುಸಲೇನ ಚ।
Iminā puññakammena, aññena kusalena ca;
ಇತೋ ಚುತಾಹಂ ದುತಿಯೇ, ಅತ್ತಭಾವಮ್ಹಿ ಆಗತೇ॥
Ito cutāhaṃ dutiye, attabhāvamhi āgate.
೧೪.
14.
ಹಿಮವನ್ತಪದೇಸಮ್ಹಿ, ಪಬ್ಬತೇ ಗನ್ಧಮಾದನೇ।
Himavantapadesamhi, pabbate gandhamādane;
ಆಸನ್ನೇ ಮಣಿಗುಹಾಯ, ಮಞ್ಜೂಸಕದುಮಸ್ಸ ಚ॥
Āsanne maṇiguhāya, mañjūsakadumassa ca.
೧೫.
15.
ತಸ್ಮಿಂ ಹೇಸ್ಸಂ ಭುಮ್ಮದೇವೋ, ಅತಿದೀಘಾಯುಕೋ ವರೋ।
Tasmiṃ hessaṃ bhummadevo, atidīghāyuko varo;
ಪಞ್ಞಾವೀರಿಯಸಮ್ಪನ್ನೋ, ಬುದ್ಧಸಾಸನಮಾಮಕೋ॥
Paññāvīriyasampanno, buddhasāsanamāmako.
೧೬.
16.
ಯಾವ ತಿಟ್ಠತಿ ಸಾಸನಂ, ತಾವ ಚೇತಿಯವನ್ದನಂ।
Yāva tiṭṭhati sāsanaṃ, tāva cetiyavandanaṃ;
ಬೋಧಿಪೂಜಂ ಸಙ್ಘಪೂಜಂ, ಕರೇಯ್ಯಂ ತುಟ್ಠಮಾನಸೋ॥
Bodhipūjaṃ saṅghapūjaṃ, kareyyaṃ tuṭṭhamānaso.
೧೭.
17.
ಭಿಕ್ಖೂನಂ ಪಟಿಪನ್ನಾನಂ, ವೇಯ್ಯಾವಚ್ಚಂ ಕರೇಯ್ಯಹಂ।
Bhikkhūnaṃ paṭipannānaṃ, veyyāvaccaṃ kareyyahaṃ;
ಪರಿಯತ್ತಾಭಿಯುತ್ತಾನಂ, ಕಙ್ಖಾವಿನೋದಯೇಯ್ಯಹಂ॥
Pariyattābhiyuttānaṃ, kaṅkhāvinodayeyyahaṃ.
೧೮.
18.
ಸಾಸನಂ ಪಗ್ಗಣ್ಹನ್ತಾನಂ, ರಾಜೂನಂ ಸಹಾಯೋ ಅಸ್ಸಂ।
Sāsanaṃ paggaṇhantānaṃ, rājūnaṃ sahāyo assaṃ;
ಸಾಸನಂ ನಿಗ್ಗಣ್ಹನ್ತಾನಂ, ವಾರೇತುಂ ಸಮತ್ಥೋ ಅಸ್ಸಂ॥
Sāsanaṃ niggaṇhantānaṃ, vāretuṃ samattho assaṃ.
೧೯.
19.
ಸಾಸನನ್ತರಧಾನೇ ತು, ಮಞ್ಜೂಸಂ ರುಕ್ಖಮುತ್ತಮಂ।
Sāsanantaradhāne tu, mañjūsaṃ rukkhamuttamaṃ;
ನನ್ದಮೂಲಞ್ಚ ಪಬ್ಭಾರಂ, ನಿಚ್ಚಂ ಪೂಜಂ ಕರೇಯ್ಯಹಂ॥
Nandamūlañca pabbhāraṃ, niccaṃ pūjaṃ kareyyahaṃ.
೨೦.
20.
ಯದಾ ತು ಪಚ್ಚೇಕಬುದ್ಧಾ, ಉಪ್ಪಜ್ಜನ್ತಿ ಮಹಾಯಸಾ।
Yadā tu paccekabuddhā, uppajjanti mahāyasā;
ತದಾ ತೇಸಂ ನಿಚ್ಚಕಪ್ಪಂ, ಉಪಟ್ಠಾನಂ ಕರೇಯ್ಯಹಂ॥
Tadā tesaṃ niccakappaṃ, upaṭṭhānaṃ kareyyahaṃ.
೨೧.
21.
ತೇನೇವ ಅತ್ತಭಾವೇನ, ಯಾವ ಬುದ್ಧುಪ್ಪಾದಾ ಅಹಂ।
Teneva attabhāvena, yāva buddhuppādā ahaṃ;
ತಿಟ್ಠನ್ತೋ ಬುದ್ಧುಪ್ಪಾದಮ್ಹಿ, ಮನುಸ್ಸೇಸು ಭವಾಮಹಂ॥
Tiṭṭhanto buddhuppādamhi, manussesu bhavāmahaṃ.
೨೨.
22.
ಮೇತ್ತೇಯ್ಯಸ್ಸ ಭಗವತೋ, ಪಬ್ಬಜಿತ್ವಾನ ಸಾಸನೇ।
Metteyyassa bhagavato, pabbajitvāna sāsane;
ತೋಸಯಿತ್ವಾನ ಜಿನಂ ತಂ, ಲಭೇ ಬ್ಯಾಕರಣುತ್ತಮಂ॥
Tosayitvāna jinaṃ taṃ, labhe byākaraṇuttamaṃ.
೨೩.
23.
ಬ್ಯಾಕರಣಂ ಲಭಿತ್ವಾನ, ಪೂರೇತ್ವಾ ಸಬ್ಬಪಾರಮೀ।
Byākaraṇaṃ labhitvāna, pūretvā sabbapāramī;
ಅನಾಗತಮ್ಹಿ ಅದ್ಧಾನೇ, ಬುದ್ಧೋ ಹೇಸ್ಸಂ ಸದೇವಕೇತಿ॥
Anāgatamhi addhāne, buddho hessaṃ sadevaketi.
ವಿನಯಾಲಙ್ಕಾರಟೀಕಾ ಸಮತ್ತಾ।
Vinayālaṅkāraṭīkā samattā.
