| Library / Tipiṭaka / ತಿಪಿಟಕ • Tipiṭaka / ಖುದ್ದಸಿಕ್ಖಾ-ಮೂಲಸಿಕ್ಖಾ • Khuddasikkhā-mūlasikkhā |
ನಿಗಮನಕಥಾ
Nigamanakathā
ಕಾರಾಪಿತೇತಿರುಚಿರೇ ಪವರೇ ವಿಹಾರೇ।
Kārāpitetirucire pavare vihāre;
ಮಾನಾಧಿಕಾರಿಪುರಿನಾ ಗರುನಾ ಗುಣೇನ।
Mānādhikāripurinā garunā guṇena;
ವಸ್ಸಂ ವಸಂ ದಮಿಳಸೋ ವಿಧಹಂ ಅಕಾಸಿಂ।
Vassaṃ vasaṃ damiḷaso vidhahaṃ akāsiṃ;
ಆಕಙ್ಖಟೀಕ ಜಿನಸಾಸನಸಮ್ಪವುದ್ಧಿಂ॥
Ākaṅkhaṭīka jinasāsanasampavuddhiṃ.
ಪುಞ್ಞೇನ ಸತ್ಥರಚನಾಜನಿತೇನ ತೇನ।
Puññena sattharacanājanitena tena;
ಸಮ್ಬುದ್ಧಸಾಸನವರೋದಯಕಾರಣೇನ।
Sambuddhasāsanavarodayakāraṇena;
ಲೋಕಾಮಿಸೇಸು ಪನ ಮೇ ಸಮಯಂ ಅಲಗ್ಗೋ।
Lokāmisesu pana me samayaṃ alaggo;
ಸಮ್ಬುದ್ಧಸಾಸನವರೋದಯಮಾಚರೇಯ್ಯಂ॥
Sambuddhasāsanavarodayamācareyyaṃ.
ಅತ್ಥೇಸು ಅಕ್ಖರಪದೇಸು ವಿನಿಚ್ಛಯೇಸು।
Atthesu akkharapadesu vinicchayesu;
ಪುಬ್ಬಾಪರೇಸು ಲಿಖಿತಂ ಖಲಿತಂ ಯದತ್ಥಿ।
Pubbāparesu likhitaṃ khalitaṃ yadatthi;
ಓಹಾಯ ಖನ್ತುಮರಹನ್ತಿ ವದನ್ತು ಸನ್ತಾ।
Ohāya khantumarahanti vadantu santā;
ದಿಟ್ಠಾಪರಾಧಮಥ ವಾ ಕಿಮುಲಾಲನೇನ॥
Diṭṭhāparādhamatha vā kimulālanena.
ಯೇನನ್ತತನ್ತರತನಾಕರಮನ್ಥನೇನ।
Yenantatantaratanākaramanthanena;
ಮನ್ಥಾಚಲೋಲ್ಲಸಿತಞಾಣವರೇನ ಲದ್ಧಾ।
Manthācalollasitañāṇavarena laddhā;
ಸಾರಾಮತಾತಿಸುಖಿತಾ ಸುಖಯನ್ತಿ ಚಞ್ಞೇ।
Sārāmatātisukhitā sukhayanti caññe;
ತೇ ಮೇ ಜಯನ್ತಿ ಗರವೋ ಗರವೋ ಗುಣೇಹಿ॥
Te me jayanti garavo garavo guṇehi.
ಪರತ್ಥಸಮ್ಪಾದನತೋ, ಪುಞ್ಞೇನಾಧಿಗತೇನಹಂ।
Paratthasampādanato, puññenādhigatenahaṃ;
ಪರತ್ಥಸಮ್ಪಾದನಕೋ, ಭವೇಯ್ಯಂ ಜಾತಿಜಾತಿಯಂ॥
Paratthasampādanako, bhaveyyaṃ jātijātiyaṃ.
ಸಿಸ್ಸೋ ಆಹ –
Sisso āha –
ಪರಮಪ್ಪಿಚ್ಛತಾನೇಕಸನ್ತೋಸೋಪಸಮೇಸಿನಂ।
Paramappicchatānekasantosopasamesinaṃ;
ಸುಚಿಸಲ್ಲೇಖವುತ್ತೀನಂ, ಸದಾರಞ್ಞನಿವಾಸಿನಂ॥
Sucisallekhavuttīnaṃ, sadāraññanivāsinaṃ.
ಸಾಸನುಜ್ಜೋತಕಾರೀನಂ, ಆಚೇರತ್ತಮುಪಾಗತಂ।
Sāsanujjotakārīnaṃ, ācerattamupāgataṃ;
ಉದುಮ್ಬರಗಿರಿಖ್ಯಾತಯತೀನಂ ಯತಿಪುಙ್ಗವಂ॥
Udumbaragirikhyātayatīnaṃ yatipuṅgavaṃ.
ಮೇಧಙ್ಕರ ಇತಿ ಖ್ಯಾತನಾಮಧೇಯ್ಯಂ ತಪೋಧನಂ।
Medhaṅkara iti khyātanāmadheyyaṃ tapodhanaṃ;
ಥೇರಂ ಥಿರದಯಾಮೇಧಾನಿಧಾನಂ ಸಾಧುಪೂಜಿತಂ॥
Theraṃ thiradayāmedhānidhānaṃ sādhupūjitaṃ.
ಸಿಸ್ಸಂ ಸಹಾಯಮಾಗಮ್ಮ, ಕಲ್ಯಾಣಮಿತ್ತಮತ್ತನೋ।
Sissaṃ sahāyamāgamma, kalyāṇamittamattano;
ಸೋಧೇತುಂ ಸಾಸನಂ ಸತ್ಥು, ಪರಕ್ಕಮಮಕಾಸಿ ಯೋ॥
Sodhetuṃ sāsanaṃ satthu, parakkamamakāsi yo.
ಸುಸದ್ದಸಿದ್ಧಿಂ ಯೋ ಯೋಗನಿಚ್ಛಯಂ ಸಬ್ಭಿ ವಣ್ಣಿತಂ।
Susaddasiddhiṃ yo yoganicchayaṃ sabbhi vaṇṇitaṃ;
ಅಕಾ ಸುಬೋಧಾಲಙ್ಕಾರಂ, ವುತ್ತೋದಯಮನಾಕುಲಂ॥
Akā subodhālaṅkāraṃ, vuttodayamanākulaṃ.
ಸಙ್ಘರಕ್ಖಿತನಾಮೇನ, ಮಹಾಥೇರೇನ ಧೀಮತಾ।
Saṅgharakkhitanāmena, mahātherena dhīmatā;
ನಿವಾಸಭೂತೇನಾನೇಕಗುಣಾನಪ್ಪಿಚ್ಛತಾದಿನಂ॥
Nivāsabhūtenānekaguṇānappicchatādinaṃ.
ತೇನೇವ ರಚಿತಾ ಸಾಧು, ಸಾಸನೋದಯಕಾರಿನಾ।
Teneva racitā sādhu, sāsanodayakārinā;
ಖುದ್ದಸಿಕ್ಖಾಯ ಟೀಕಾಪಿ, ಸುಮಙ್ಗಲಪ್ಪಸಾದನೀ॥
Khuddasikkhāya ṭīkāpi, sumaṅgalappasādanī.
ನಿಗಮನಕಥಾ ನಿಟ್ಠಿತಾ।
Nigamanakathā niṭṭhitā.
ಇತಿ ಸುಮಙ್ಗಲಪ್ಪಸಾದನೀ ನಾಮ
Iti sumaṅgalappasādanī nāma
ಖುದ್ದಸಿಕ್ಖಾ-ಅಭಿನವಟೀಕಾ ಸಮತ್ತಾ।
Khuddasikkhā-abhinavaṭīkā samattā.
