| Library / Tipiṭaka / ತಿಪಿಟಕ • Tipiṭaka / ಪಟಿಸಮ್ಭಿದಾಮಗ್ಗ-ಅಟ್ಠಕಥಾ • Paṭisambhidāmagga-aṭṭhakathā |
ನಿಗಮನಕಥಾ
Nigamanakathā
ಮಹಾವಗ್ಗೋ ಮಜ್ಝಿಮೋ ಚ, ಚೂಳವಗ್ಗೋ ಚ ನಾಮತೋ।
Mahāvaggo majjhimo ca, cūḷavaggo ca nāmato;
ತಯೋ ವಗ್ಗಾ ಇಧ ವುತ್ತಾ, ಪಮಾಣಪಟಿಪಾಟಿಯಾ॥
Tayo vaggā idha vuttā, pamāṇapaṭipāṭiyā.
ವಗ್ಗೇ ವಗ್ಗೇ ದಸ ದಸ, ಕಥಾ ಯಾ ತಾ ಉದೀರಿತಾ।
Vagge vagge dasa dasa, kathā yā tā udīritā;
ಉದ್ದಾನಗಾಥಾ ಸಬ್ಬಾಸಂ, ಇಮಾ ತಾಸಂ ಯಥಾಕ್ಕಮಂ॥
Uddānagāthā sabbāsaṃ, imā tāsaṃ yathākkamaṃ.
ಞಾಣಂ ದಿಟ್ಠಿ ಆನಾಪಾನಂ, ಇನ್ದ್ರಿಯಂ ವಿಮೋಕ್ಖಪಞ್ಚಮಂ।
Ñāṇaṃ diṭṭhi ānāpānaṃ, indriyaṃ vimokkhapañcamaṃ;
ಗತಿ ಕಮ್ಮಂ ವಿಪಲ್ಲಾಸೋ, ಮಗ್ಗೋ ಮಣ್ಡೋತಿ ತಾ ದಸ॥
Gati kammaṃ vipallāso, maggo maṇḍoti tā dasa.
ಯುಗನದ್ಧಸಚ್ಚಬೋಜ್ಝಙ್ಗಾ, ಮೇತ್ತಾ ವಿರಾಗಪಞ್ಚಮಾ।
Yuganaddhasaccabojjhaṅgā, mettā virāgapañcamā;
ಪಟಿಸಮ್ಭಿದಾ ಧಮ್ಮಚಕ್ಕಂ, ಲೋಕುತ್ತರಬಲಸುಞ್ಞತಾ॥
Paṭisambhidā dhammacakkaṃ, lokuttarabalasuññatā.
ಪಞ್ಞಾ ಇದ್ಧಿ ಅಭಿಸಮಯೋ, ವಿವೇಕೋ ಚರಿಯಪಞ್ಚಮೋ।
Paññā iddhi abhisamayo, viveko cariyapañcamo;
ಪಾಟಿಹೀರಂ ಸಮಸೀಸ-ಸತಿ ವಿಪಸ್ಸನಮಾತಿಕಾ॥
Pāṭihīraṃ samasīsa-sati vipassanamātikā.
ಯೋ ಸೋ ಸುಗತಸುತಾನಂ, ಅಧಿಪತಿಭೂತೇನ ಭೂತಹಿತರತಿನಾ।
Yo so sugatasutānaṃ, adhipatibhūtena bhūtahitaratinā;
ಥೇರೇನ ಥಿರಗುಣವತಾ, ವುತ್ತೋ ಪಟಿಸಮ್ಭಿದಾಮಗ್ಗೋ॥
Therena thiraguṇavatā, vutto paṭisambhidāmaggo.
ತಸ್ಸತ್ಥವಣ್ಣನಾ ಯಾ, ಪುಬ್ಬಟ್ಠಕಥಾನಯಂ ತಥಾ ಯುತ್ತಿಂ।
Tassatthavaṇṇanā yā, pubbaṭṭhakathānayaṃ tathā yuttiṃ;
ನಿಸ್ಸಾಯ ಮಯಾರದ್ಧಾ, ನಿಟ್ಠಾನಮುಪಾಗತಾ ಏಸಾ॥
Nissāya mayāraddhā, niṭṭhānamupāgatā esā.
ಯಂ ತಂ ಉತ್ತರಮನ್ತೀ, ಮನ್ತಿಗುಣಯುತೋ ಯುತೋ ಚ ಸದ್ಧಾಯ।
Yaṃ taṃ uttaramantī, mantiguṇayuto yuto ca saddhāya;
ಕಾರಯಿ ಮಹಾವಿಹಾರೇ, ಪರಿವೇಣಮನೇಕಸಾಧುಗುಣಂ॥
Kārayi mahāvihāre, pariveṇamanekasādhuguṇaṃ.
ಥೇರೇನೇತ್ಥ ನಿವಸತಾ, ಸಮಾಪಿತಾಯಂ ಮಹಾಭಿಧಾನೇನ।
Therenettha nivasatā, samāpitāyaṃ mahābhidhānena;
ತತಿಯೇ ವಸ್ಸೇ ಚುತಿತೋ, ಮೋಗ್ಗಲ್ಲಾನಸ್ಸ ಭೂಪತಿನೋ॥
Tatiye vasse cutito, moggallānassa bhūpatino.
ಸಮಯಂ ಅನುಲೋಮೇನ್ತೀ, ಥೇರಾನಂ ಥೇರವಾದದೀಪಾನಂ।
Samayaṃ anulomentī, therānaṃ theravādadīpānaṃ;
ನಿಟ್ಠಂ ಗತಾ ಯಥಾಯಂ, ಅಟ್ಠಕಥಾ ಲೋಕಹಿತಜನನೀ॥
Niṭṭhaṃ gatā yathāyaṃ, aṭṭhakathā lokahitajananī.
ಧಮ್ಮಂ ಅನುಲೋಮೇನ್ತಾ, ಅತ್ತಹಿತಂ ಪರಹಿತಞ್ಚ ಸಾಧೇನ್ತಾ।
Dhammaṃ anulomentā, attahitaṃ parahitañca sādhentā;
ನಿಟ್ಠಂ ಗಚ್ಛನ್ತು ತಥಾ, ಮನೋರಥಾ ಸಬ್ಬಸತ್ತಾನಂ॥
Niṭṭhaṃ gacchantu tathā, manorathā sabbasattānaṃ.
ಸದ್ಧಮ್ಮಪಕಾಸಿನಿಯಾ, ಅಟ್ಠಕಥಾಯೇತ್ಥ ಗಣಿತಕುಸಲೇಹಿ।
Saddhammapakāsiniyā, aṭṭhakathāyettha gaṇitakusalehi;
ಗಣಿತಾ ತು ಭಾಣವಾರಾ, ವಿಞ್ಞೇಯ್ಯಾ ಅಟ್ಠಪಞ್ಞಾಸ॥
Gaṇitā tu bhāṇavārā, viññeyyā aṭṭhapaññāsa.
ಆನುಟ್ಠುಭೇನ ಅಸ್ಸಾ, ಛನ್ದೋಬನ್ಧೇನ ಗಣಿಯಮಾನಾ ತು।
Ānuṭṭhubhena assā, chandobandhena gaṇiyamānā tu;
ಚುದ್ದಸಸಹಸ್ಸಸಙ್ಖಾ, ಗಾಥಾಯೋ ಪಞ್ಚ ಚ ಸತಾನಿ॥
Cuddasasahassasaṅkhā, gāthāyo pañca ca satāni.
ಸಾಸನಚಿರಟ್ಠಿತತ್ಥಂ, ಲೋಕಹಿತತ್ಥಞ್ಚ ಸಾದರೇನ ಮಯಾ।
Sāsanaciraṭṭhitatthaṃ, lokahitatthañca sādarena mayā;
ಪುಞ್ಞಂ ಇಮಂ ರಚಯತಾ, ಯಂ ಪತ್ತಮನಪ್ಪಕಂ ವಿಪುಲಂ॥
Puññaṃ imaṃ racayatā, yaṃ pattamanappakaṃ vipulaṃ.
ಪುಞ್ಞೇನ ತೇನ ಲೋಕೋ, ಸದ್ಧಮ್ಮರಸಾಯನಂ ದಸಬಲಸ್ಸ।
Puññena tena loko, saddhammarasāyanaṃ dasabalassa;
ಉಪಭುಞ್ಜಿತ್ವಾ ವಿಮಲಂ, ಪಪ್ಪೋತು ಸುಖಂ ಸುಖೇನೇವಾತಿ॥
Upabhuñjitvā vimalaṃ, pappotu sukhaṃ sukhenevāti.
ಸದ್ಧಮ್ಮಪ್ಪಕಾಸಿನೀ ನಾಮ
Saddhammappakāsinī nāma
ಪಟಿಸಮ್ಭಿದಾಮಗ್ಗಪ್ಪಕರಣಸ್ಸ ಅಟ್ಠಕಥಾ ನಿಟ್ಠಿತಾ।
Paṭisambhidāmaggappakaraṇassa aṭṭhakathā niṭṭhitā.
