| Library / Tipiṭaka / ತಿಪಿಟಕ • Tipiṭaka / ಧಮ್ಮಸಙ್ಗಣಿ-ಅಟ್ಠಕಥಾ • Dhammasaṅgaṇi-aṭṭhakathā |
ನಿಗಮನಕಥಾ
Nigamanakathā
ಏತ್ತಾವತಾ ಚ –
Ettāvatā ca –
ಚಿತ್ತಂ ರೂಪಞ್ಚ ನಿಕ್ಖೇಪಂ, ಅತ್ಥುದ್ಧಾರಂ ಮನೋರಮಂ।
Cittaṃ rūpañca nikkhepaṃ, atthuddhāraṃ manoramaṃ;
ಯಂ ಲೋಕನಾಥೋ ಭಾಜೇನ್ತೋ, ದೇಸೇಸಿ ಧಮ್ಮಸಙ್ಗಣಿಂ॥
Yaṃ lokanātho bhājento, desesi dhammasaṅgaṇiṃ.
ಅಭಿಧಮ್ಮಸ್ಸ ಸಙ್ಗಯ್ಹ, ಧಮ್ಮೇ ಅನವಸೇಸತೋ।
Abhidhammassa saṅgayha, dhamme anavasesato;
ಠಿತಾಯ ತಸ್ಸಾ ಆರದ್ಧಾ, ಯಾ ಮಯಾ ಅತ್ಥವಣ್ಣನಾ॥
Ṭhitāya tassā āraddhā, yā mayā atthavaṇṇanā.
ಅನಾಕುಲಾನಮತ್ಥಾನಂ, ಸಮ್ಭವಾ ಅಟ್ಠಸಾಲಿನೀ।
Anākulānamatthānaṃ, sambhavā aṭṭhasālinī;
ಇತಿ ನಾಮೇನ ಸಾ ಏಸಾ, ಸನ್ನಿಟ್ಠಾನಮುಪಾಗತಾ॥
Iti nāmena sā esā, sanniṭṭhānamupāgatā.
ಏಕೂನಚತ್ತಾಲೀಸಾಯ, ಪಾಳಿಯಾ ಭಾಣವಾರತೋ।
Ekūnacattālīsāya, pāḷiyā bhāṇavārato;
ಚಿರಟ್ಠಿತತ್ಥಂ ಧಮ್ಮಸ್ಸ, ನಿಟ್ಠಾಪೇನ್ತೇನ ತಂ ಮಯಾ॥
Ciraṭṭhitatthaṃ dhammassa, niṭṭhāpentena taṃ mayā.
ಯಂ ಪತ್ತಂ ಕುಸಲಂ ತಸ್ಸ, ಆನುಭಾವೇನ ಪಾಣಿನೋ।
Yaṃ pattaṃ kusalaṃ tassa, ānubhāvena pāṇino;
ಸಬ್ಬೇ ಸದ್ಧಮ್ಮರಾಜಸ್ಸ, ಞತ್ವಾ ಧಮ್ಮಂ ಸುಖಾವಹಂ॥
Sabbe saddhammarājassa, ñatvā dhammaṃ sukhāvahaṃ.
ಪಾಪುಣನ್ತು ವಿಸುದ್ಧಾಯ, ಸುಖಾಯ ಪಟಿಪತ್ತಿಯಾ।
Pāpuṇantu visuddhāya, sukhāya paṭipattiyā;
ಅಸೋಕಮನುಪಾಯಾಸಂ, ನಿಬ್ಬಾನಸುಖಮುತ್ತಮಂ॥
Asokamanupāyāsaṃ, nibbānasukhamuttamaṃ.
ಚಿರಂ ತಿಟ್ಠತು ಸದ್ಧಮ್ಮೋ, ಧಮ್ಮೇ ಹೋನ್ತು ಸಗಾರವಾ।
Ciraṃ tiṭṭhatu saddhammo, dhamme hontu sagāravā;
ಸಬ್ಬೇಪಿ ಸತ್ತಾ ಕಾಲೇನ, ಸಮ್ಮಾ ದೇವೋ ಪವಸ್ಸತು॥
Sabbepi sattā kālena, sammā devo pavassatu.
ಯಥಾ ರಕ್ಖಿಂಸು ಪೋರಾಣಾ, ಸುರಾಜಾನೋ ತಥೇವಿಮಂ।
Yathā rakkhiṃsu porāṇā, surājāno tathevimaṃ;
ರಾಜಾ ರಕ್ಖತು ಧಮ್ಮೇನ, ಅತ್ತನೋವ ಪಜಂ ಪಜನ್ತಿ॥
Rājā rakkhatu dhammena, attanova pajaṃ pajanti.
ಪರಮವಿಸುದ್ಧಸದ್ಧಾಬುದ್ಧಿವೀರಿಯಪಟಿಮಣ್ಡಿತೇನ ಸೀಲಾಚಾರಜ್ಜವಮದ್ದವಾದಿಗುಣಸಮುದಯಸಮುದಿತೇನ ಸಕಸಮಯಸಮಯನ್ತರಗಹನಜ್ಝೋಗಾಹಣಸಮತ್ಥೇನ ಪಞ್ಞಾವೇಯ್ಯತ್ತಿಯಸಮನ್ನಾಗತೇನ ತಿಪಿಟಕಪರಿಯತ್ತಿಪ್ಪಭೇದೇ ಸಾಟ್ಠಕಥೇ ಸತ್ಥುಸಾಸನೇ ಅಪ್ಪಟಿಹತಞಾಣಪ್ಪಭಾವೇನ ಮಹಾವೇಯ್ಯಾಕರಣೇನ ಕರಣಸಮ್ಪತ್ತಿಜನಿತಸುಖವಿನಿಗ್ಗತಮಧುರೋದಾರವಚನಲಾವಣ್ಣಯುತ್ತೇನ ಯುತ್ತಮುತ್ತವಾದಿನಾ ವಾದೀವರೇನ ಮಹಾಕವಿನಾ ಪಭಿನ್ನಪಟಿಸಮ್ಭಿದಾಪರಿವಾರೇ ಛಳಭಿಞ್ಞಾದಿಪ್ಪಭೇದಗುಣಪಟಿಮಣ್ಡಿತೇ ಉತ್ತರಿಮನುಸ್ಸಧಮ್ಮೇ ಸುಪ್ಪತಿಟ್ಠಿತಬುದ್ಧೀನಂ ಥೇರವಂಸಪ್ಪದೀಪಾನಂ ಥೇರಾನಂ ಮಹಾವಿಹಾರವಾಸೀನಂ ವಂಸಾಲಙ್ಕಾರಭೂತೇನ ವಿಪುಲವಿಸುದ್ಧಬುದ್ಧಿನಾ ಬುದ್ಧಘೋಸೋತಿ ಗರೂಹಿ ಗಹಿತನಾಮಧೇಯ್ಯೇನ ಥೇರೇನ ಕತಾ ಅಯಂ ಅಟ್ಠಸಾಲಿನೀ ನಾಮ ಧಮ್ಮಸಙ್ಗಹಟ್ಠಕಥಾ।
Paramavisuddhasaddhābuddhivīriyapaṭimaṇḍitena sīlācārajjavamaddavādiguṇasamudayasamuditena sakasamayasamayantaragahanajjhogāhaṇasamatthena paññāveyyattiyasamannāgatena tipiṭakapariyattippabhede sāṭṭhakathe satthusāsane appaṭihatañāṇappabhāvena mahāveyyākaraṇena karaṇasampattijanitasukhaviniggatamadhurodāravacanalāvaṇṇayuttena yuttamuttavādinā vādīvarena mahākavinā pabhinnapaṭisambhidāparivāre chaḷabhiññādippabhedaguṇapaṭimaṇḍite uttarimanussadhamme suppatiṭṭhitabuddhīnaṃ theravaṃsappadīpānaṃ therānaṃ mahāvihāravāsīnaṃ vaṃsālaṅkārabhūtena vipulavisuddhabuddhinā buddhaghosoti garūhi gahitanāmadheyyena therena katā ayaṃ aṭṭhasālinī nāma dhammasaṅgahaṭṭhakathā.
ತಾವ ತಿಟ್ಠತು ಲೋಕಸ್ಮಿಂ, ಲೋಕನಿತ್ಥರಣೇಸಿನಂ।
Tāva tiṭṭhatu lokasmiṃ, lokanittharaṇesinaṃ;
ದಸ್ಸೇನ್ತೀ ಕುಲಪುತ್ತಾನಂ, ನಯಂ ಪಞ್ಞಾವಿಸುದ್ಧಿಯಾ॥
Dassentī kulaputtānaṃ, nayaṃ paññāvisuddhiyā.
ಯಾವ ‘ಬುದ್ಧೋ’ತಿ ನಾಮಮ್ಪಿ, ಸುದ್ಧಚಿತ್ತಸ್ಸ ತಾದಿನೋ।
Yāva ‘buddho’ti nāmampi, suddhacittassa tādino;
ಲೋಕಮ್ಹಿ ಲೋಕಜೇಟ್ಠಸ್ಸ, ಪವತ್ತತಿ ಮಹೇಸಿನೋತಿ॥
Lokamhi lokajeṭṭhassa, pavattati mahesinoti.
ಅಟ್ಠಸಾಲಿನೀ ನಾಮ
Aṭṭhasālinī nāma
ಧಮ್ಮಸಙ್ಗಹ-ಅಟ್ಠಕಥಾ ನಿಟ್ಠಿತಾ।
Dhammasaṅgaha-aṭṭhakathā niṭṭhitā.
