| Library / Tipiṭaka / តិបិដក • Tipiṭaka / វិនយាលង្ការ-ដីកា • Vinayālaṅkāra-ṭīkā |
និគមនកថា
Nigamanakathā
១.
1.
ជម្ពុទីបតលេ រម្មេ, មរម្មវិសយេ សុតេ;
Jambudīpatale ramme, marammavisaye sute;
តម្ពទីបរដ្ឋេ ឋិតំ, បុរំ រតននាមកំ។
Tambadīparaṭṭhe ṭhitaṃ, puraṃ ratananāmakaṃ.
២.
2.
ជិនសាសនបជ្ជោតំ , អនេករតនាករំ;
Jinasāsanapajjotaṃ , anekaratanākaraṃ;
សាធុជ្ជនានមាវាសំ, សោណ្ណបាសាទលង្កតំ។
Sādhujjanānamāvāsaṃ, soṇṇapāsādalaṅkataṃ.
៣.
3.
តស្មិំ រតនបុរម្ហិ, រាជានេករដ្ឋិស្សរោ;
Tasmiṃ ratanapuramhi, rājānekaraṭṭhissaro;
សិរីសុធម្មរាជាតិ, មហាអធិបតីតិ ច។
Sirīsudhammarājāti, mahāadhipatīti ca.
៤.
4.
ឯវំនាមោ មហាតេជោ, រជ្ជំ ការេសិ ធម្មតោ;
Evaṃnāmo mahātejo, rajjaṃ kāresi dhammato;
ការាបេសិ រាជា មណិ-ចូឡំ មហន្តចេតិយំ។
Kārāpesi rājā maṇi-cūḷaṃ mahantacetiyaṃ.
៥.
5.
តស្ស កាលេ ព្រហារញ្ញេ, តិរិយោ នាម បព្ពតោ;
Tassa kāle brahāraññe, tiriyo nāma pabbato;
បុព្ពការញ្ញវាសីនំ, និវាសោ ភាវនារហោ។
Pubbakāraññavāsīnaṃ, nivāso bhāvanāraho.
៦.
6.
អដ្ឋារសហិ ទោសេហិ, មុត្តោ បញ្ចង្គុបាគតោ;
Aṭṭhārasahi dosehi, mutto pañcaṅgupāgato;
អរញ្ញលក្ខណំ បត្តោ, ពទ្ធសីមាយលង្កតោ។
Araññalakkhaṇaṃ patto, baddhasīmāyalaṅkato.
៧.
7.
តស្មិំ បព្ពតេ វសន្តោ, មហាថេរោ សុបាកដោ;
Tasmiṃ pabbate vasanto, mahāthero supākaṭo;
តិបេដកាលង្ការោតិ, ទ្វិក្ខត្តុំ លទ្ធលញ្ឆនោ។
Tipeṭakālaṅkāroti, dvikkhattuṃ laddhalañchano.
៨.
8.
តេភាតុកនរិន្ទានំ, គរុភូតោ សុបេសលោ;
Tebhātukanarindānaṃ, garubhūto supesalo;
កុសលោ បរិយត្តិម្ហិ, បដិបត្តិម្ហិ ការកោ។
Kusalo pariyattimhi, paṭipattimhi kārako.
៩.
9.
សោហំ លជ្ជីបេសលេហិ, ភិក្ខូហិ អភិយាចិតោ;
Sohaṃ lajjīpesalehi, bhikkhūhi abhiyācito;
សាសនស្សោបការាយ, អកាសិំ សីលវឌ្ឍនំ។
Sāsanassopakārāya, akāsiṃ sīlavaḍḍhanaṃ.
១០.
10.
វិនយាលង្ការំ នាម, លជ្ជីនំ ឧបការកំ;
Vinayālaṅkāraṃ nāma, lajjīnaṃ upakārakaṃ;
សុដ្ឋុ វិនយសង្គហ-វណ្ណនំ សាធុសេវិតំ។
Suṭṭhu vinayasaṅgaha-vaṇṇanaṃ sādhusevitaṃ.
១១.
11.
រូបឆិទ្ទនាសកណ្ណេ , សម្បត្តេ ជិនសាសនេ;
Rūpachiddanāsakaṇṇe , sampatte jinasāsane;
ឆិទ្ទសុញ្ញសុញ្ញរូបេ, កលិយុគម្ហិ អាគតេ។
Chiddasuññasuññarūpe, kaliyugamhi āgate.
១២.
12.
និដ្ឋាបិតា អយំ ដីកា, មយា សាសនការណា;
Niṭṭhāpitā ayaṃ ṭīkā, mayā sāsanakāraṇā;
ទ្វីសុ សោណ្ណវិហារេសុ, ទ្វិក្ខត្តុំ លទ្ធកេតុនា។
Dvīsu soṇṇavihāresu, dvikkhattuṃ laddhaketunā.
១៣.
13.
ឥមិនា បុញ្ញកម្មេន, អញ្ញេន កុសលេន ច;
Iminā puññakammena, aññena kusalena ca;
ឥតោ ចុតាហំ ទុតិយេ, អត្តភាវម្ហិ អាគតេ។
Ito cutāhaṃ dutiye, attabhāvamhi āgate.
១៤.
14.
ហិមវន្តបទេសម្ហិ, បព្ពតេ គន្ធមាទនេ;
Himavantapadesamhi, pabbate gandhamādane;
អាសន្នេ មណិគុហាយ, មញ្ជូសកទុមស្ស ច។
Āsanne maṇiguhāya, mañjūsakadumassa ca.
១៥.
15.
តស្មិំ ហេស្សំ ភុម្មទេវោ, អតិទីឃាយុកោ វរោ;
Tasmiṃ hessaṃ bhummadevo, atidīghāyuko varo;
បញ្ញាវីរិយសម្បន្នោ, ពុទ្ធសាសនមាមកោ។
Paññāvīriyasampanno, buddhasāsanamāmako.
១៦.
16.
យាវ តិដ្ឋតិ សាសនំ, តាវ ចេតិយវន្ទនំ;
Yāva tiṭṭhati sāsanaṃ, tāva cetiyavandanaṃ;
ពោធិបូជំ សង្ឃបូជំ, ករេយ្យំ តុដ្ឋមានសោ។
Bodhipūjaṃ saṅghapūjaṃ, kareyyaṃ tuṭṭhamānaso.
១៧.
17.
ភិក្ខូនំ បដិបន្នានំ, វេយ្យាវច្ចំ ករេយ្យហំ;
Bhikkhūnaṃ paṭipannānaṃ, veyyāvaccaṃ kareyyahaṃ;
បរិយត្តាភិយុត្តានំ, កង្ខាវិនោទយេយ្យហំ។
Pariyattābhiyuttānaṃ, kaṅkhāvinodayeyyahaṃ.
១៨.
18.
សាសនំ បគ្គណ្ហន្តានំ, រាជូនំ សហាយោ អស្សំ;
Sāsanaṃ paggaṇhantānaṃ, rājūnaṃ sahāyo assaṃ;
សាសនំ និគ្គណ្ហន្តានំ, វារេតុំ សមត្ថោ អស្សំ។
Sāsanaṃ niggaṇhantānaṃ, vāretuṃ samattho assaṃ.
១៩.
19.
សាសនន្តរធានេ តុ, មញ្ជូសំ រុក្ខមុត្តមំ;
Sāsanantaradhāne tu, mañjūsaṃ rukkhamuttamaṃ;
នន្ទមូលញ្ច បព្ភារំ, និច្ចំ បូជំ ករេយ្យហំ។
Nandamūlañca pabbhāraṃ, niccaṃ pūjaṃ kareyyahaṃ.
២០.
20.
យទា តុ បច្ចេកពុទ្ធា, ឧប្បជ្ជន្តិ មហាយសា;
Yadā tu paccekabuddhā, uppajjanti mahāyasā;
តទា តេសំ និច្ចកប្បំ, ឧបដ្ឋានំ ករេយ្យហំ។
Tadā tesaṃ niccakappaṃ, upaṭṭhānaṃ kareyyahaṃ.
២១.
21.
តេនេវ អត្តភាវេន, យាវ ពុទ្ធុប្បាទា អហំ;
Teneva attabhāvena, yāva buddhuppādā ahaṃ;
តិដ្ឋន្តោ ពុទ្ធុប្បាទម្ហិ, មនុស្សេសុ ភវាមហំ។
Tiṭṭhanto buddhuppādamhi, manussesu bhavāmahaṃ.
២២.
22.
មេត្តេយ្យស្ស ភគវតោ, បព្ពជិត្វាន សាសនេ;
Metteyyassa bhagavato, pabbajitvāna sāsane;
តោសយិត្វាន ជិនំ តំ, លភេ ព្យាករណុត្តមំ។
Tosayitvāna jinaṃ taṃ, labhe byākaraṇuttamaṃ.
២៣.
23.
ព្យាករណំ លភិត្វាន, បូរេត្វា សព្ពបារមី;
Byākaraṇaṃ labhitvāna, pūretvā sabbapāramī;
អនាគតម្ហិ អទ្ធានេ, ពុទ្ធោ ហេស្សំ សទេវកេតិ។
Anāgatamhi addhāne, buddho hessaṃ sadevaketi.
វិនយាលង្ការដីកា សមត្តា។
Vinayālaṅkāraṭīkā samattā.
