| Library / Tipiṭaka / តិបិដក • Tipiṭaka / សារត្ថទីបនី-ដីកា • Sāratthadīpanī-ṭīkā |
និគមនកថា
Nigamanakathā
ឯត្តាវតា ច –
Ettāvatā ca –
វិនយេ បាដវត្ថាយ, សាសនស្ស ច វុឌ្ឍិយា;
Vinaye pāṭavatthāya, sāsanassa ca vuḍḍhiyā;
វណ្ណនា យា សមារទ្ធា, វិនយដ្ឋកថាយ សា។
Vaṇṇanā yā samāraddhā, vinayaṭṭhakathāya sā.
សារត្ថទីបនី នាម, សព្ពសោ បរិនិដ្ឋិតា;
Sāratthadīpanī nāma, sabbaso pariniṭṭhitā;
តិំសសហស្សមត្តេហិ, គន្ថេហិ បរិមាណតោ។
Tiṃsasahassamattehi, ganthehi parimāṇato.
អជ្ឈេសិតោ នរិន្ទេន, សោហំ បរក្កមពាហុនា;
Ajjhesito narindena, sohaṃ parakkamabāhunā;
សទ្ធម្មដ្ឋិតិកាមេន, សាសនុជ្ជោតការិនា។
Saddhammaṭṭhitikāmena, sāsanujjotakārinā.
តេនេវ ការិតេ រម្មេ, បាសាទសតមណ្ឌិតេ;
Teneva kārite ramme, pāsādasatamaṇḍite;
នានាទុមគណាកិណ្ណេ, ភាវនាភិរតាលយេ។
Nānādumagaṇākiṇṇe, bhāvanābhiratālaye.
សីតលូទកសម្បន្នេ, វសំ ជេតវនេ ឥមំ;
Sītalūdakasampanne, vasaṃ jetavane imaṃ;
អត្ថព្យញ្ជនសម្បន្នំ, អកាសិំ សុវិនិច្ឆយំ។
Atthabyañjanasampannaṃ, akāsiṃ suvinicchayaṃ.
យំ សិទ្ធំ ឥមិនា បុញ្ញំ, យំ ចញ្ញំ បសុតំ មយា;
Yaṃ siddhaṃ iminā puññaṃ, yaṃ caññaṃ pasutaṃ mayā;
ឯតេន បុញ្ញកម្មេន, ទុតិយេ អត្តសម្ភវេ។
Etena puññakammena, dutiye attasambhave.
តាវតិំសេ បមោទេន្តោ, សីលាចារគុណេ រតោ;
Tāvatiṃse pamodento, sīlācāraguṇe rato;
អលគ្គោ បញ្ចកាមេសុ, បត្វាន បឋមំ ផលំ។
Alaggo pañcakāmesu, patvāna paṭhamaṃ phalaṃ.
អន្តិមេ អត្តភាវម្ហិ, មេត្តេយ្យំ មុនិបុង្គវំ;
Antime attabhāvamhi, metteyyaṃ munipuṅgavaṃ;
លោកគ្គបុគ្គលំ នាថំ, សព្ពសត្តហិតេ រតំ។
Lokaggapuggalaṃ nāthaṃ, sabbasattahite rataṃ.
ទិស្វាន តស្ស ធីរស្ស, សុត្វា សទ្ធម្មទេសនំ;
Disvāna tassa dhīrassa, sutvā saddhammadesanaṃ;
អធិគន្ត្វា ផលំ អគ្គំ, សោភេយ្យំ ជិនសាសនំ។
Adhigantvā phalaṃ aggaṃ, sobheyyaṃ jinasāsanaṃ.
សទា រក្ខន្តុ រាជានោ, ធម្មេនេវ ឥមំ បជំ;
Sadā rakkhantu rājāno, dhammeneva imaṃ pajaṃ;
និរតា បុញ្ញកម្មេសុ, ជោតេន្តុ ជិនសាសនំ។
Niratā puññakammesu, jotentu jinasāsanaṃ.
ឥមេ ច បាណិនោ សព្ពេ, សព្ពទា និរុបទ្ទវា;
Ime ca pāṇino sabbe, sabbadā nirupaddavā;
និច្ចំ កល្យាណសង្កប្បា, បប្បោន្តុ អមតំ បទន្តិ។
Niccaṃ kalyāṇasaṅkappā, pappontu amataṃ padanti.
សារត្ថទីបនី នាម វិនយដីកា និដ្ឋិតា។
Sāratthadīpanī nāma vinayaṭīkā niṭṭhitā.
